Drama: Si Kabayan Jadi Dukun (Bagean 2)

Si Kabayan Jadi Dukun

Drama Opat Bagian

Karangan: Moh. Ambri

Nu Ngalalakon

Saikem
Elu
Utun
Kabayan
Salhiam
Ki Silah
Ki Salih
Sudagar
Nyi Nonoh
Sujiah
Jang Agus

Bagean 2

Saikem keur ngored sisi kebon, deukeut pager. Keur kitu jol dua jelema, lalaki, Ki Silah jeung Ki Salih. Lalaki nu duaan tea, rarat-reret neangan tanyaeun. Barang nenjo Saikem keur ngored, terus ku nu saurang ditunjuk. Duanana arunggeuk.

Salih: "Sampurasun, Embok!"

Saikem: "Rampes, Nun. Saha tea baraya teh, asa-asa teu wawuh."

Salih: "Hih bet sarua. Ringkesna mah Embok, kuring duaan teh geus beng ka ditu beng ka dieu. Ka kaler enggeus diider, ka kidul enggeus disusud, ka kulon enggeus didongdon, ka wetan enggeus didipapay, kitu."

Saikem: "Kutan, ari ka luhur jeung ka handap geus diteangan deuih?"

Salih: "Behna mah, enggeus kabeh! Kieu Embok, kuring teh neangan dukun. Sugan di dieu aya, Embok?"

Saikem: "Aya kuring mah, ari ieu!"

Salih: "Hih, eta mah Embok, ieu mah sugan aya dukun nu deukeut-deukeut di dieu."

Saikem: "Dukun sunat, dukun paraji?"

Salih: "Hih, lieur ngomong teh, saha nu rek disunatan jeung euweuh nu rek ngajuru deuih."

Silah: "Geus...geus...! Kieu Embok, anak dunungan kuring ngadadak ngajubleg, pireu teu bisa ngomong. Jadi kuring ayeuna teh keur neangan dukun, susuganan bisaeun ngubaran. Kitu tah, Embok!"

Saikem: "Euh, neangan dukun, baraya teh? Aya...aya...! Malah dukun lepus ieu mah."

Salih: "Kumaha lepusna teh, Embok?"

Saikem: "Kieu...! Tilu minggu ka tukang aya budak ragrag tina tangkal nangka, luhur teh. Ari jret meneran ninggang batu, iyy da eta mah pasiksak awakna teh. Sirahna beulah, tulangna parotong. Ku dukun teh terus dituruban ku daun cau. Crot...crot...crot...diciduhan. Careuh...careuh cenah. Da aneh harita keneh budak teh deregdeg lumpat."

Silah: "Nyaan sakti dukun teh. Di mana imahna Embok dukun teh?"

Saikem: "Tara puguh imahna mah, ngan tadi katembong aya di leuweung keur ngala suluh. Leuweung itu tuh!"

Silah: "Leuweung nu itu?"

Saikem: "Enya, tuh geuning aya nu keur ngala suluh. Tah eta jelemana dukun teh. Tapi kade kudu lemes ngomongna. Mimitina kudu diadaban, tapi upama keuekeuh teui daekeun, tampiling bae dua kali, ulah asa-asa."

Salih: "Moal katulah Embok, nampiling Embah?"

Saikem: "Moal, da kitu kahayangna Embah mah, tandana urang nyaan hayang ditulunganana."

Silah: "Nuhun Embok, dibejaan. Ieu lumayan keur meuli tarasi."

(Silah ngasongkeun duit salawe, terus arindit. Geus rada jauh ngalieuk deui ka Saikem).

Silah: "Ka dieu jalanna, Embok?"

Saikem: "Enya, mengkol ka kenca, mengkol ka katuhu. Aya tanjakan, nanjak. Aya pudunan, mudun. Aya susukan, ajlengan. Tepi weh."

(Saenggeus duanana arindit, Saikem seuri nulak cangkeng bari ngacung-ngacung curuk).

Saikem: "Rasakeun pamales aing, Kabayan. Bongan nampiling sadua-dua. Kabales ayeuna mah!"

(Saikem ngelek bobokona terus indit). (*)

Sambungan ti Bagean 1

Nyambung ka Bagean 3

Moh. Ambri