Sasakala Gunung Tangkuban Parahu

Kacaturkeun di hiji leuweung aya bagong putih. Eta bagong teh gawena ngan tatapa bae, geus mangpuluh-puluh taun. Ari anu ditapaan ku manehna, hayang boga anak awewe sarta bangsa manusa.

Dina hiji waktu bagong putih ngarasa hanaang. Manehna indit ka hiji tegalan, deukeut walungan Citarum. Barang datang ka dinya, manggih batok balokan, hartina urut anu meulah duwegan. Loba pisan eta batok balokan teh, urut nu moro uncal ka dinya. Aya hiji batok balokan urut tuang Kangjeng Prabu. Eta batok teh aya caian, nyaeta cikahampangan Kangjeng Prabu. Barang geus marulang, kapanggih ku bagong putih. Lantaran hanaang, leguk bae cai nu ngemplang dina batok teh diinum. Ari geus nginum kawas aya nu nyaliara kana awak bagong putih, kawas nu ngandeg reuneuh bae.

Lila-lila bagong putih teh reuneuhna beuki gede. Ari gubrag orokna jelema sarta awewe geulis. Pohara bae bagong putih teh atoheunana. Anakna diciuman, digalentor bari disusuan. Eta orok teh tuluy dingaranan Dayang Sumbi.

Nalika geus gede, pok Dayang Sumbi teh nanyakeun bapa, "Ibu, ari bapa kuring teh saha? Naha jelema kawas kuring atawa bagong saperti Ibu?"

"Euh, Nyai anu geulis anak Ibu! Nyai mah henteu boga bapa. Mun enya mah boga bapa, meureun aya di dieu," tembal bagong putih.

"Euh, piraku Ibu, sakabeh mahluk ge kapan pada boga bapa, boh manusa boh sato hewan. Ngan bangsa kakaian anu henteu boga bapa mah."

Lantaran anakna pok deui pok deui nanyakeun saban waktu, ahirna bagong putih teh balaka. "Bapa hidep mah Kangjeng Prabu, di ditu ayana di karaton," cek bagong putih. Ngadenge kitu Dayang Sumbi pohara reuwaseunana, jeung ujug-ujug panasaran, hayang nepungan bapana.

"Lamun kitu mah ayeuna keneh ku kuring rek ditepungan," cek Dayang Sumbi.

Dayang Sumbi kebat bae indit, ngajugjug ka karajaan. Ku Kangjeng Prabu tuluy diaku anak, diperenahkeun di hiji tempat sarta dititah diajar ninun ka tukang ninun. Teu lila oge Dayang Sumbi geus maher ninun kaen. Ku Kangjeng Prabu tuluy dipangnyieunkeun saung ranggon anu luhur di tengah leuweung. Ari baturna ngan ukur anjing hideung nu ngaran Si Tumang.

Dina hiji waktu nalika Dayang Sumbi keur ninun, taropongna murag ka kolong saung. Lantaran seunggah kudu turun, pok bae manehna ngomong sorangan.

"Leuh, mun aya nu daek mangnyokotkeun eta taropong, tangtu bakal diaku salaki ku kuring."

Kabeneran pisan di kolong saung teh aya Si Tumang, anu ngadengekeun omongan Dayang Sumbi. Eta taropong teh dicokot ku Si Tumang sarta tuluy dibikeun ka Dayang Sumbi. Karuhan bae Dayang Sumbi pohara reuwaseunana, teu nyangka yen anu mangnyokotkeun taropong teh anjing, lain manusa. Mangkaning manehna geus kedal ucap, rek ngaku salaki.

Dayang Sumbi rumasa geus kapalang kedal ucap. Kawas geus kitu katangtuan ti Dewata, manehna tuluy hirup paduduaan jeung Si Tumang. Tepi ka hiji waktu kakandungan. Brol ngajuru, anakna lalaki, dingaranan Sangkuriang.

Sangkuriang sok resep ulin lulumpatan kadua Si Tumang. Sakapeung bari mamawa tumbak. Belewer dilempagkeun, cleb nanceb kana tangkal kai. Sangkuriang surak sorangan, bungah lantaran tumbakna meneran. Si Tumang dihucuhkeun. Sebrut lumpat, ngudag kana tangkal kai, bangun keur ngudag sato boroan.

Sangkuriang beuki maher bae ngalempagkeun tumbakna. Tuluyna mah lain saukur ulin lulumpatan, tapi mimiti diajar ngasruk ka leuweung, neangan sato boroeun. Moro sato naon bae, careuh, peucang, atawa mencek.

"Jung geura moro ka leuweung, Ibu mah hayang dahar jeung ati mencek," cek Dayang Sumbi hiji waktu.

Sangkuriang tuluy indit ka leuweung, dibarengan ku Si Tumang.

Aneh pisan poe eta mah sasatoan teh henteu aya nu katenjo ngaringkang hiji-hiji acan. Padahal ilaharna mah sok katenjo uncal atawa mencek keur rendang nyaratuan di tegalan. Poe harita mah kawas ngaleungit ka mana boa. Sangkuriang geus asruk-asrukan ka saban tempat, ka lamping ka tegalan. Lapur sasatoan teh teu kasampak tapak-tapakna acan. Ari Si Tumang bet ngadakngadak kebluk deuih, henteu daek lulumpatan neangan sato boroeun.

Awahing ku jengkel teu beubeunangan, ngan lekek bae Si Tumang teh dipeuncit ku Sangkuriang. Atina dibawa balik sarta dipasrahkeun ka indungna. Dayang Sumbi puguh bae kacida atohna, dagdag-degdeg ngasakan eta ati. Ngan barang Sangkuriang balaka yen eta ati teh ati Si Tumang lain ati mencek, Dayang Sumbi pohara ambekna. Sangkuriang ditoktrok sirahna ku sinduk tepi ka ngucur getihan.

Sangkuriang tuluy pundung, indit ti imahna ngajugjug ka tebeh wetan. Mangtaun-taun leuleuweungan tepi ka ahirna bras anjog ka nagara siluman. Di dinya Sangkuriang guguru elmu kasakten ka siluman nu wujudna oray naga. Sangkuriang ngulik elmu Tumbul Muda. Jalma anu miboga eta elmu bakal bisa meruhkeun sakumna jin jeung siluman. Sanggeus elmuna kataekan, Sangkuriang dijurungan sina indit deui ngalalana.

Dina hiji waktu manehna anjog deui ka nagara siluman. Lantaran geus boga elmu kasakten, Sangkuriang bisa ngelehkeun jin jeung siluman nu aya di eta nagara. Eta mahluk bangsa lelembut teh tuluy tunduk ka Sangkuriang.

Demi Dayang Sumbi, sanggeus ditinggalkeun ku anakna, manehna ngarasa kaduhung kabina-bina. Hirupna estu nunggelis. Manehna tuluy indit ka tebeh kulon, rek neangan Sangkuriang. Ngaprak ngalalana tepi ka anjog ka Gunung Halimun. Di dinya Dayang Sumbi patepung jeung raja jin anu keur tatapa.Dayang Sumbi tuluy diajar rupa-rupa elmu kasakten. Sanggeus tamat guguruna, manehna dijurungan sina indit deui ka tebeh wetan. Di hiji tempat nu katelah Gunung Bohong manehna nganjrek bumetah.

Kocapkeun Sangkuriang terus bae ngalalana. Mileuweungan migunungan tepi ka puluh-puluh taun, tepi ka ahirna anjog ka hiji gunung. Manehna patepung jeung awewe anu kacida geulisna. Sangkuriang bogoh sarta ngajak kawin ka eta awewe, anu saenyana eta awewe teh Dayang Sumbi, indungna sorangan. Dayang Sumbi nya kitu deui, bubuhan geus papisah mangpuluh-puluh taun, manehna kalinglap. Meh bae daek diajak kawin. Ngan basa Sangkuriang keur disiaran rek diala kutu, dina sirahna katenjo bet aya ceda. Dayang Sumbi ngagebeg, reuwas lain dikieuna. Manehna kakara inget, moal salah ieu lalaki teh anak aing gerentesna, Sangkuriang anu baheula kungsi ditoktrok sirahna ku sinduk.

Sanajan geus ditetelakeun yen manehna teh anak pituin, Sangkuriang teu percaya sarta keukeuh bae ngajak kawin. Mireungeuh anakna kitu, geuwat bae Dayang Sumbi nyiar akal.

"Heug kami daek dikawin, asal dipangnyieunkeun talaga jeung parahuna keur lalayaran urang papanganten. Eta talaga jeung parahu teh kudu anggeus dijieun sapeuting," ceuk Dayang Sumbi. Ku Sangkuriang disanggupan eta pamenta anu kacida banggana teh.

Harita keneh Sangkuriang tuluy ngabendung walungan Citarum. Digawe teu eureun-eureun sapeupeuting, dibantuan ku bangsa jin jeung siluman. Nincak janari, talaga teh geus ngemplang. Kari nyieun parahuna. Kabeneran aya tangkal kai gede, gedok dituar. Kai teh tuluy ditilasan regangna sarta dipapas dijieun parahu.

Dayang Sumbi yakin yen pamentana moal katedunan. Pimanaeun teuing nyieun talaga jeung parahu bisa anggeus sapeuting, cek pikirna. Tapi basa katenjo talaga geus ngemplang jeung parahuna geus ngabagug rek anggeus, manehna kacida reuwasna. Dayang Sumbi bingung liwat saking. Kudu kumaha carana, sangkan aing teu tulus kawin, cek pikirna. Ras manehna inget kana boeh rarang. Geuwat bae eta boeh teh dicokot tuluy dibawa ka mumunggang. Ku manehna dikebut-kebutkeun, tepi ka bijil cahaya bodas kawas balebat di beulah wetan. Dadak sakala sasatoan leuweung disarada. Manuk recet. Hayam raong kongkorongok, da disangkana geus beurang.

Sangkuriang ngagebeg barang nenjo di wetan geus bijil balebat. Manehna nu keur ngageduk nganggeuskeun parahu tuluy ngahuleng awahing ku reuwas. Bijil balebat tandana geus beurang. Mangka parahuna can anggeus, hartina manehna moal tulus papanganten jeung Dayang Sumbi.

Bakating ku handeueul kabina-bina, ngan jedak bae parahuna ditajong satakerna. Bubuhan jalma sakti, parahu teh mangpeng jauh pisan. Gubrag di hiji tempat, parahu teh nangkub. Jleg salin rupa jadi gunung. Eta gunung teh kiwari katelah Gunung Tangkuban parahu. Ari talaga nu ngemplang ku Sangkuriang didupak tepi ka caina saat ngoletrak. Eta urut talaga teh kiwari jadi padataran Bandung anu ngampar lega pisan. Tunggul kai urut nuar Sangkuriang tuluy ngajanggelek jadi Gunung Bukit Tunggul, wetaneun Gunung Tangkuban Parahu. Ari regang kai anu ngahunyud sarta geus rangrang teu daunan, tuluy ngajanggelek jadi Gunung Burangrang di beh kulon. (*)