Kecap Panyeluk

Kecap panyeluk (interjeksi) nyaeta kecap anteuran anu eusina ngebrehkeun rasa (emosi) panyaturna, upamana wae rasa gumbira, nalangsa, kaget, geuleuh, bingung, atoh, jeung sajabana. Dina nuliskeunana sok ditungtungan ku tanda panyeluk (!).

Dina wangun kalimah, kecap panyeluk biasana ditulis di hareup jeung biasana dipisahkeun make tanda koma (,).

Nilik kana adegan jerona (internal), kecap panyeluk aya tilu rupa:

1. Kalimah salam, nyaeta kalimah anu wangunanana matok. Biasana dipake waktu tepung jeung jalma lian, boh ngamimitian atawa mungkaskeun omongan.
   Conto: Wilujeng sumping! (Nunjukkeun pangbagea ka semah atawa tamu nu anyar datang).
2. Kalimah panggentra (vokatif), nyaeta kalimah panyeluk nu diwangun ku nyebut ngaran, gelar, sesebutan, atawa pangkat.
   Conto: Bu Guru! (Ngagentraan make sesebutan).
3. Kalimah anteuran, nyaeta kalimah panyeluk anu ngebrehkeun rasa panyatur. Biasana tumali jeung rasa kanyeri, kareueus, kakeuheul, jeung sajabana.
   Conto: Wah! (Ngebrehkeun rasa kahemeng atawa kareueus)

Conto kecap panyeluk nu diwangun dina kalimah bisa dititenan di handap ieu:

• Cing kadieukeun tali rapia teh, urang talian popoean teh ngarah pageuh.
• Sukur, Si Ujang ayeuna mah geus bisa ngaji sorangan.
• Euleuh, geningan cai susukan teh mudal ka kebon.
• Lakadalah, naha ngan aya saratus piring teh, kurang atuh da tamuna oge aya saratus lima puluh.
• Ambuing, teu nyana geuningan Si Aki geus teu aya dikieuna.
• Alahieung, ieu kebon meni rusak kabeh ditarajang ku caah.
• Mangga linggih heula atuh kadieu, urang ngaleueut heula.
• Hayu atuh urang ngopi di warung Bi Siti ngarah caang.
• Ey, naha kitu kalakuan jelema teh, teu boga kaera pisan.
• Hatur nuhun kana sagala rupi kasaeanana, mugia dipaparin ganjaran nu ageung ku Gusti anu kagungan.

Harti kecap-kecap di luhur nyaeta:

• Cing: kecap anteuran keur pamenta.
• Sukur: kecap keur nganuhunkeun.
• Euleuh: nuduhkeun rasa kaget.
• Lakadalah: kecap keur nuduhkeun rasa kaget.
• Ambuing: kecap keur nuduhkeun rasa kaget.
• Alahieung: kecap keur nuduhkeun kanyeri.
• Mangga: kecap pikeun ngajak atawa ngajurung.
• Hayu atuh: kecap pikeun ngajak.
• Ey: kecap pikeun rasa teu resep atawa ijid.
• Hatur nuhun: kecap pikeun nandakeun atoh atawa tumarima. (*)