Babasan jeung Paribasa

Babasan jeung paribasa nyaeta salah sahiji wanda pakeman basa anu mangrupa ungkara winangun kalimah anu geus puguh entep seureuhna, teu bisa dirobah - boh unina boh tempatna - atawa dilemeskeun anu ngandung harti babandingan atawa silokaning hirup manusa. Babasan jeung paribasa ampir sarua hartina, ngan ari paribasa mah lain mangrupa kalimah tapi mangrupa kecap kantetan tur ngandung harti injeuman.

Di handap ieu conto-conto babasan jeung paribasa nu loba dipake dina kahirupan sapopoe.

Babasan jeung Paribasa (A)

Adab lanyap » Jiga nu handap asor, daek ngahormat ka batur, tapi boga hate luhur.
Adam lali tapel » Poho ka baraya jeung poho ka lemah cai.
Adat kakurung ku iga » Adat nu hese digantina.
Adean ku kuda beureum » Beunghar ku barang titipan atawa ginding ku pakean batur.
Adigung adiguna » Gede hulu, boga rasa leuwih ti batur.
Agul ku payung butut » Ngagulkeun luluhur sorangan.
Akal koja » Pinter dina kagorengan atawa kajahatan.
Aki-aki tujuh mulud » Lalaki nu geus kolot pisan.
Aku-aku angga » Ngaku barang batur kalawan ngandung maksud hayang mibanda.
Aku panggung » Darehdeh ngan hanjakal boga rasa asa aing nu pangpunjulna.
Alak-alak cumampaka » Resep jeung hayang dipuji batur, boga rasa pangpunjulna.
Anu handap hayang nyaruaan nu luhur » Nu hina hayang nyaruaan nu mulya.
Alak paul » Tempat anu lain dikieuna, ngeunaan jauhna jeung pisusaheunana.
Alus panggung » Alus laur hade ome, tegep dedeg pangadegna.
Ambek nyedek tanaga midek » Ari napsu pohara gedena, ngan masih bisa meper diri.
Ambekna sakulit bawang » Gampang pisan ambek, jeung mun geus ambek teu reureuh sakeudeung.
Anak puputon » Anak nu kacida didama-damana, nu pohara dipikanyaah.
Anjing ngagogogan kalong » Mikahayang nu lain lain, nu pamohalan kasorang.
Ari diarah supana, kudu dipiara catangna » Naon bae nu mere hasil ka urang kudu diurus bener-bener.
Ari umur tunggang gunung, angen-angen pecat sawed » Umur geus kolot tapi ngongoraeun keneh.
Asa dijual payu ngungun » Dumeh nyorangan di panyabaan, jauh ti indung bapa.
Asa ditonjok congcot » Meunang kabungah nu gede, anu saenyana teu diarep-arep.
Asa ditumbu umur » Boga rasa kahutangan budi anu pohara gedena.
Asa nanggeuy endog beubeureumna » Kacida nyaahna.
Asa potong leungeun katuhu » Leungiteun jalma nu pohara hade gawena.
Ati mungkir beungeut nyinghareup » Palsu, siga sono, tapi henteu. Siga suka, tapi henteu.
Aub payung, sabet panon » Saba-soba wewengkon, ngeunaan tanah.
Aya astana sajeungkal » Anu mustahil oge oge bisa kajadian.
Aya bagja teu daulat » Arek meunang bagja atawa kauntungan tapi teu tulus.
Aya disihung maung » Kulantaran loba kawawuh, dina aya karerepet gampang meunang pitulungna.
Aya hate kadua leutik » Naksir.
Aya jalan komo meuntas » Nu diarep-arep titadina nepi ka maksud gancang kalaksanakeun.
Aya jalan komo meuntas » Aya pilantaraneun pikeun ngalaksanakeun atawa ngabulkeun kahayang.
Aya jalan komo meuntas » Eukeur mah aya maksud, turug-turug aya pilantaraneun.
Aya peurah aya komara » Aya harega, aya pangaji.
Ayakan tara meunang kancra » Nu bodo jeung nu pinter moal sarua darajatna jeung panghasilanana.

Babasan jeung Paribasa (B)

Baleg tampele » Ari rasa tresna ka lalaki geus aya, ngan lamun panggih gede keneh kaera.
Bali geusan ngajadi » Tempat dilahirkeun.
Balung kulit kotok meuting » Teu eureun-eureun nyeri hate ti baheula nepi ka kiwari.
Balungbang timur, caang bulan opat belas, jalan gede sasapuan » Beak karep ku rido jeung beresih hate.
Banda tatalang raga » Lamun panggih jeung karerepet, euweuh halangan ngajual barang nu aya.
Belang bayah gindi pikir » Boga pikiran goreng ka papada kawula.
Bengkung ngariung bongkok ngaronyok » Babarengan sok sanajan dina hina, rugi, atawa cilaka.
Beurat birit » Hese jeung sungkan dititah.
Beurat nyuhun beurat nanggung, beurat narimakeunana » Pohara narimakeun kana pitulung, ngan teu kawasa ngedalkeun.
Beureum paneureuy » Seuseut batan neureuy keueus hese pisan, seuseut seuat ngahasilkeun maksud.
Beuteung anjingeun » Ngeunaan ka jelema nu beuteungna cara/siga beuteung anjing.
Bilih aya turus bengkung » Bisi salah pokpokanana.
Biwir nyiru rombengeun » Resep mukakeun rasiah sorangan atawa rasiah batur.
Biwir nyiru rombengeun » Resep ngucah ngaceh rasiah atawa kaaeban boh nu sorangan boh nu batur.
Biwir sambung lemek, suku sambung lengkah » Teu milu-milu tanggung-jawab, ngan saukur mangnepikeun amanat tinu lian.
Bluk nyuuh blak nangkarak » Kabina bina rajina dina enggoning nyiar kipayah.
Bobo sapanon carang sapakan » Aya kuciwana, lantaran aya kakuranganana atawa karuksakanana.
Bobor karahayuan » Henteu rahayu, henteu salamet, meunang kacilakaan atawa tiwas.
Bonteng ngalawan kadu » Nu leutik ngalawan nu gede.
Buburuh nyatu diupah beas » Nyiar pangarti tur diburuhan atawa digajih.
Budi santri, legeg lebe, ari lampah euwah-euwah » Ari laku lampah mah kawas santri tapi sok ceceremed.
Buluan belut, jangjangan oray » Pamohalan kajadian.
Bungbulang tunda/tunda talatah » Lamun dititah tara sok pek ku maneh, tapi sok nitah deui ka batur.
Buntut kasiran » Koret, medit, ngeupeul, tara pisan daek barang bere.
Bur beureum bur hideung, hurung nagtung siang leumpang » Ginding, loba pakean anu aralus dipake.
Buruk-buruk papan jati » Ka sobat atawa ka baraya mah sok hayang ngahampura bae lamun aya kasalahan teh.

Babasan jeung Paribasa (C)

Caang bulan dadamaran » Migawe nu kurang mangpaat.
Cacag nangkaeun » Henteu beres, henteu rata, henteu sampurna.
Cangkir emas eusi delan » Omonganana mah alus nepi ka urang jadi percaya jeung kataji, tapi hatena jahat jeung matak bahaya ka urang.
Cara bueuk meunang mabuk » Ngeluk bae, teu lemek teu nyarek, euweuh hojah, euweuh karep, euweuh kahayang sabab era tawa sieun.
Cara gaang katincak » Anu tadina rame kacida, ayeuna jadi jempling pisan.
Cara jogjog mondok » Carekcok bae, matak gandeng ka nu sejen.
Cara simeut hiris, tai kana beuheung-beuheung » Pohara bodona; beunang dibobodo atawa ditipu ku batur.
Cecendet mande kiara » Nu leutik hayang nyaruaan anu gede, nu miskin hayang nyaruaan nu beunghar.
Ceuli lentaheun » Sok gancang nyaritakeun ka batur naon bae anu kadenge sanajan tacan karuhan eta beja teh bener henteuna.
Cicing dina sihung maung » Nganjrek di jelema anu nyusahkeun atawa bakal nyilakakeun ka diri urang.
Cikaracak ninggang batu laun-laun jadi legok » Ku dileukeunan mah sakumaha hesena ge lila-lila jadi bisa; najan bodo asal leukeun diajarna lila-lila tangtu bisa.
Cileuncang mande sagara, cecendet mande kiara, hunyur nandean gunung » Nyaruaan ka jelema anu saluhureun harkatna, darajatna atawa pangabogana.
Ciri sabumi cara sadesa beda » Unggal tempat pasti beda adat jeung kabiasaanana.
Clik putih clak herang » Kaluar tian hate anu beresih, rido pisan, teu aya geuneuk-maleukmeuk.
Congo-congo ku amis, mun rek mais oge puhuna » Kumaha arek bageurna nu jadi anak lamun bapana henteu bageur.

Babasan jeung Paribasa (D)

Daek macok embung dipacok » Daek ngarah kana rejeki atawa pakaya batur, tapi diarah rejekina atawa pakayana ku batur mah embung.
Dagang oncom rancatan emas » Ari modalna kacida tapi batina kacida leutikna.
Dah bawang dah kapas » Tah barangna tah duitna.
Daluang katinggang mangsi » Susuganan katuliskeun aya jodo (waris).
Deugdeug tanjeuran » Pada ngadeugdeug; pada nongton; jadi tongtonan kulantaran pinter dina kasenian.
Deukeut-deukeut anak taleus » Ari imah padeukeut, ngan teu nyaho yen eta teh baraya.
Dihin pinasti, anyar pinanggih » Baheula ditangtukeunana ngan kakara ayeuna kalakonan atawa kapanggihna.
Dikungkung teu diawur, dicangcang teu diparaban » Ari dipegat mah teu acan, ngan geus teu dipeutingan jeung teu dibalanjaan.
Dipiamis buah gintung » Disangka hade jeung bageur tapi buktina goreng jeung jahat.
Disakompet daunkeun, dihurun suluh » Dihijikeun bae, disaruakeun bae, teu dibeda beda.
Ditangtang-ditengteng dijieun bonteng sapasi » Dialak-ilik lantaran dianggap aneh.
Ditilik ti gigir lenggik, disawang ti tukang lenjang, diteuteup ti hareup sieup » Lenjang jeung geulis pisan, pantes kewes.
Dogdog pangrewong » Bantuan anu euweuh hartina, dina euweuhna oge teu naon-naon.
Dogong-dogong tulak cau, geus gede dituar batur » Ngantian jeung mahugi parawan ti keur leutik keneh, sugan diparengkeun jadi pipamajikaneun, ari geus gede dikawin batur.
Dosa salaput hulu » Kacida loba dosana.
Dulang tinande » Awewe mah nurutkeun bae, kumaha diaturna jeung diparentahna ku nu jadi salaki.
Duum tinggi » Ngabagikeun naon-naon kalawan henteu adil, aya nu loba, aya nu saeutik.

Babasan jeung Paribasa (E)

Elmu ajug » Pinter mapatahan ka batur, tapi prak ku sorangan henteu.
Elmu sapi » Samiuk (ngahiji) kana kagorengan.
Elmu tumbila » Nu boga imah ngarugikeun ka tatamu.
Elok bangkong » Nuju sakarat, ngan kari tunggu dawuh bae.
Endog sapatarangan, peupeus hiji peupeus kabeh » Kasusah atawa karerepet anu tumiba ka dulur, baraya atawa sobat, balukarna ngabingungkeun atawa nyusahkeun ka sarerea.
Endog tara megar kabeh » Najan saindung sabapa henteu sarua milikna, rejekina, atawa darajatna.

Babasan jeung Paribasa (G)

Galehgeh gado » Darehdeh tapi henteu terus kana hate.
Gancang pincang » Kulantaran digawe buru-buru jeung kurang ati-ati hasilna teu nyugemakeun.
Gantung denge » Henteu terus bisa ngadengekeun hiji perkara jeung pohara hayangna neruskeun ngadengekeun.
Gantung teureuyeun » Henteu terus dahar sabab dahareun geus beak atawa daharna kapaksa kudu eureun heula lantaran aya dahareun nu didagoan.
Gede-gede kayu randu, dipake pamikul bengkung, dipake lincar sok anggang, dipake pancir ngajedig » Ngeunaan ka jelema nu jangkung harelung tur dedeg ngan hanjakal gawena jeung karajinanana goreng.
Gede gunung pananggeuhan » Adigung kulantaran boga kolot atawa baraya baleunghar atawa jareneng.
Gede gunung pananggeuhan » Boga ahli atawa kawawuhan anu beunghar atawa jadi gegeden, dina urang aya karerepet atawa butuh ku pitulung, eta jalma bisa nulungan ka urang ku kabeungharan atawa kakawasaanana.
Getas harupateun, pingges harepan » Gampang pisan nyalahkeun atawa ngahukum ka batur.
Geulis sisi, laur gunung, sonagar huma » Ari rupa mah tegep ngan dangong dusun meledug.
Gindi pikir belang bayah » Goreng hate, dolim, julig , dengki.
Ginding kakampis » Ari pake mah ginding ngan duit teu boga.
Giri lungsi tanpa hina » Nu luhur jeung nu handap sarua bae ulah dihina.
Goong saba karia » Datang sorangan ka nu keur kariaan sanajan henteu di ondang, maksudna hayang dititah gawe sangkan seubeuh baranghakan.
Gunung tanpa tutugan, sagara tanpa tepi » Euweuh anggeusna, euweuh beakna.
Gurat batu » Pageuh kana jangji.
Gusti Alloh tara nanggeuy dibongkokna » Gusti Alloh tara nangtayungan ka mahlukna anu salah atawa boga dosa ka papada kawula.

Babasan jeung Paribasa (H)

Hade gogog hade tagog » Hade basa jeung hade tingkah lakuna.
Hade ku omong goreng ku omong » Omongan nu hade, balukarna hade jeung omongan nu goreng, balukarna oge goreng.
Halodo sataun lantis ku hujan sapoe » Kahadean anu sakitu gede tur lila leungit ku kagorengan atawa kasalahan saeutik.
Hambur bacot murah congcot » Goreng sungutna jeung sok mindeng nyarekan tapi berehan jeung daek barangbere.
Hampang birit » Gampang jeung daekan dititah.
Henteu gedag bulu salambar » Henteu sieun atawa gimir saeutik-eutik acan.
Hapa-hapa ge ranggeuyan » Sangsara oge da boga salaki nu ngurus jeung nangtayungan.
Harewos bojong » Omongan nu nepi kadenge ku jelema nu deukeut kalawan jentre.
Haripeut ku teuteureuyeun » Gancang atoh dina meunangna rejeki, boh dahareun boh duit kalawan teu ngingetkeun balukarna ieu teh rejeki halal atawa haram.
Harus omong batan goong » Beja teh sasarina sok gampang jeung gancang nerekab, kulantaran umumna sok pabeja-beja.
Hayang untung jadi buntung » Teu panggih ari jeung kauntungan mah, panggih soteh jeung karugian anu sama sakali henteu diarep-arep.
Hejo tihang » Resep jeung remen gunta-ganti imah atawa pagawean.
Herang caina beunang laukna » Maksud bisa kahontal kalawan beres teu aya pihak anu dirugikeun atawa dinyenyeri.
Herang-herang kari mata, teuas-teuas kari bincurang » Bareto mah beunghar ayeuna kari sangsara.
Heueuh-heueuh bueuk » Nyatujuan ari diluar mah, ngan bae henteu terus jeung hatena.
Heurin ku letah » Hayang jeung perlu ngabejakeun hiji perkara, ngan sieun pok kulantaran loba karisi jeung karempan.
Hirup ku panyukup gede ku pamere » Hirup samahi-mahi ku pamere batur sabab teu purun hojah sorangan dina enggoning nyiar kipayah.
Hirup nuhun, paeh dirampes » Rido pisan, pasrah pisan, teu boga kahayang naon-naon.
Hirup ulah manggih tungtung, paeh ulah manggih beja » Kudu bageur, kudu hade laku lampah supaya alus kacaritakeunana.
Hulu dugul dihihidan » Nu keur senang tambang senang, nu keur untung tambah untung.
Hunyur nandean gunung » Nyaruaan ka jelema saluhureun harkatna atawa pangabogana.
Hurung nangtung siang leumpang » Ginding lantaran make papakean atawa perhiasan anu aralus.

Babasan jeung Paribasa (I)

Ieu aing uyah kidul » Boga rasa pangleuwihna ti pada batur, boh ngeunaan rupa, pangarti, pangaboga, pangkat atawa kakawasaan.
Ilang-along margahina, katinggang pangpung dilebok maung, rambutna salambar, getihna satetes, ambekanana sadami, agamana darigamana, kaula nyerenkeun » Masrahkeun sagala-galana, hadena gorengna, bagja cilakana (biasana sok dipake dina seserahan).
Indung lembu bapa banteng » Ti indung jeung bapa turunan menak jeung beunghar.
Inggis batan maut hinis » Pohara risina, pohara paurna.
Inggis batan maut hinis, rempan batan mesat gobang » Inggis jeung paur kabina bina.
Ipis kulit beungeut » Gede kaera.
Iwak nangtang sujen » Wani nyorang picilakaeun, pibalayeun atawa pibahayaeun.

Babasan jeung Paribasa (J)

Jabung tumalapung sabda tumapalang » Milu nyaritakeun hiji perkara, sakapeung nempasan omongan batur, siga nu nyaho padahal teu nyaho nanaon.
Jadi maung malang » Jadi panghalang, ngeunaan ka lalaki nu ngahalangan pijodoeun hiji awewe.
Jadi sabiwir hiji » Jadi carita jalma loba.
Jadi senen kalemekan » Mindeng dicaritakeun batur.
Jaman cacing dua saduit » Jaman baheula pisan.
Jati kasilih ku junti » Pribumi kaelehkeun ku urang asing.
Jauh-jauh panjang gagang » Hanas jauh-jauh dijugjug, ngan euweuh hasilna.
Jauh ka bedug anggang ka dayeuh » Dusun pisan, teu nyaho di tata-titi, tindak-tanduk, suba-sita, duduga, jeung peryoga.
Jauh ka bedug » Dusun, bodo, euweuh kanyaho.
Jawadah tutung biritna, sacarana-sacarana » Unggal bangsa beda adat jeung kabiasaanana.
Jegjeg ceker » Cape kulantaran leumpang kaditu kadieu.
Jejer pasar » Lumrah bae; mun ka lalaki, kasep henteu goreng henteu.
Jeung leweh mah mending waleh » Leuwih hade wakca balaka ngedalkeun kahayang tibatan ngandung kabingung teu wani pok nyarita.
Jogjog neureuy buah loa » Miharep ka anu lain babad; milampah anu moal pihasileun.

Babasan jeung Paribasa (K)

Ka luhur teu sirungan kahandap teu akaran » Jelema nu jahat, julig jeung dengki mah moal jamuga, moal aya kamajuan boh ngeunaan pangkat atawa rejeki.
Kaceluk ka awun-awun kawentar ka janapria, kakoncara ka mancanagara » Kawentar pisan, kawentar kamana-mana.
Kaciwit kulit kabawa daging » Kababawa; katarik kana hiji perkara, keukeuh milu susah, sanajan teu boga salah jeung henteu milu ilubiung kana perkarana.
Kahieuman bangkong » Ku ayana barang titipan di urang, urang teh nepi ka jiga beunghar katenjona ku batur mah padahal miskin teu boga nanaon.
Kai teu kalis ku angin » Unggal jelema awal ahir tangtu bakal pinanggih jeung kasusahan.
Kajeun pait tungtung amis manan amis tungtung pait » Tibatan ahirna matak susah, leuwih hade dicaritakeun tiheula naon anu matak pikasusaheunana.
Kajeun panas tonggong asal tiis beuteung » Kajeun teuing cape gawe asal bisa dahar kalawan cukup.
Kalapa bijil ti cungap » Ngucah-ngaceh rusiah sorangan anu matak cilaka.
Kandel kulit beungeut » Euweuh kaera.
Katempuhan buntut maung » Batur anu salahna atawa anu boga dosana, tapi urang nu kudu nyanghareupan balukarna.
Katumbukan catur kadatangan carita » Loba anu embung sabab ngagedekeun jeung ngalulugukeun panyerewedan.
Kawas anjing kadempet lincar » Mere parentah ka batur kalawan teu sabar, malah bari ambek-ambekan sagala.
Kawas budak rodek hulu » Teu ngupama, teu ngajenan, teu ngahargaan pisan.
Kawas cucurut kaibunan » Ngeunaan ka jelema anu matak sareukseuk panon.
Kawas hayam keur endogan » Cilingcingcat bae, teu bisa cicing.
Kawas hayam panyambungan » Tacan nyaho di kaler-kidul, kawantu anyar keneh aya di eta tempat.
Kawas kacang ninggang kajang » Ngomongna tarik tur gancang, biasana ngeunaan ka awewe nu keur ngambek bari nyarekan.
Kawas kuda leupas ti gedogan » Ngarasa bebas, terus sakama-kama nganteur kahayang, ngalajur napsu, kulantaran euweuh anu ngageuing atawa euweuh nu nyengker.
Kawas lauk asup kana bubu » Gampang asupna kana pagawean tapi pohara hesena hayang kaluar ninggalkeun eta pagawean.
Kawas nu mulangkeun panyiraman » Sok nu lain-lain jeung hese ngayakeunana nu dipikahayang ku jelema nu tereh ajal, kahayangna sabisa-bisa kudu dicumponan bae, sanajan matak ngarepotkeun ka ahlina/kulawargana.
Kawas siraru jadi » Pabaliut ku tina lobana, ngeunaan ka jelema.
Kawas wayang pangsisina » Ngeunaan jelema nu goreng rupana.
Kejo asak angeun datang » Sapagodos jeung maksud urang, atuh teu talangke deui harita keneh dilaksanakeun.
Keur meujeuhna bilatung dulang » Laleutik keneh pisan, keur meujeuhna bareuki dahar.
Keur meujeuhna hejo lembok, rambay carita » Keur meujeuhna loba pakaya jeung loba rejeki.
Keur nuju bentang surem » Keur sue atawa tiis badan. Lamun keur tani keuna ku hama, lamun dagang terus-terusan rugi bae.
Kiceupna sabedug sakali » Pohara lungguhna.
Kiruh ti girang kiruh ka hilir » Lamun anu di luhurna teu balageur jeung teu balener, tangtu nu dihandapna oge milu teu bener.
Kokoro manggih mulud, puasa manggih lebaran » Anu saumur-umur miskin tuluy dina hiji waktu pinanggih jeung kamulyaan atawa rejeki anu gede, sasarina sok kacemekanana nepi ka siga nu mangpang-meungpeung.
Kokoro nyoso, malarat rosa, lebaran teu meuncit hayam » Kacida malaratna.
Kotok bongkok kumorolong, kacingcalang kumarantang » Pipilueun kana hiji kalakuan kulantaran kabawakeun ku batur, lain kahayang sorangan, nepi ka goreng katenjona (sarua jeung Lauk buruk milu mijah; Piritan milu endogan )
Kudu bisa ngeureut neundeun » Kudu bisa nyukupkeun rejeki atawa pangala anu saeutik.
Kudu boga pikir kadua leutik » Ulah sabongbrong teuing, kudu aya pikir rangkepan, kudu aya rasa curiga.
Kujang dua pangadekna » Hiji pagawean anu ngandung dua rupa maksud.
Kulak canggeum bagja awak » Milik hade atawa goreng anu geus ditangtukeun ti ajalina keneh ku Gusti Nu Maha Suci.
Kumaha bule hideungna bae » Kumaha engke bae buktina, kumaha behna.
Kumaha kejebur caina geletuk batuna » Kumaha jadina bae, henteu jadi pikiran.
Kunang-kunang nerus bumi » Ramana geus teu jeneng deui, putrana diawal-ahir aya nu jeneng jiga ramana.
Kuru cileuh kentel peujit » Daek tirakat, ngadoakeun budak sangkan junun.
Kurung batok » Teu resep nyanyabaan, genah cicing di imah bae.

Babasan jeung Paribasa (L)

Lain ku tulang munding kabeureuyan mah tapi ku cucuk peda » Arek cilaka mah ku kasalahan anu leutik oge bisa, teu kudu ku kasalahan anu gede bae.
Lain lantung tambuh laku, lain lentang tanpa beja, lain leumpang maladra » Indit ti imah kalawan ngandung maksud anu tangtu, lain lampah sakaparan-paran henteu puguh anu dijugjug.
Landung kandungan laer aisan » Gede timbanganana, gede pangampurana.
Langsung saur bahe carek » Sok gampang ngagelendeng atawa nyarekan.
Lauk buruk milu mijah » Pipilueun kana hiji kalakuan kulantaran kabawakeun ku batur, henteu kalawan kahayang sorangan, nepi ka goreng katenjona (sarua jeung Piritan milu endogan).
Legok tapak genteng kadek » Loba pangalamanan jeung kanyahona.
Leubeut buah hejo daun » Keur meujeuhna loba rejeki, loba pakaya.
Leuleus jeujeur liat tali » Pohara adilna. Dina mutus hiji perkara tara beurat sabeulah, jeung loba pertimbanganana.
Leunggeuh cau beuleum » Teu lutreuk dina ngajalankeun hiji pagawean.
Leutik burih » Euweuh kawani.
Leutik cahak, gede cohok » Ari panghasilan saeutik tapi pangaluaran mah gede.
Leutik-leutik ngagalatik » Sanajan leutik awakna, tapi leber ku wawanen.
Leutik ringkang gede bugang » Jelema mah teu beunang disapirakeun sabab sanajan leutik warugana, dina aya papaitna atawa bobor karahayuan mah bisa jadi kasusah sarerea.
Leuwi jero beunang diteuleuman, hate jelema najan deet teu kakobet » Hade gorengna pikiran jelema hese dikira-kirana.
Lieuk euweuh ragap taya » Malarat psan nepi ka teu boga naon-naon.
Loba teuing jaksa » Loba teuing nu pinter, nu ngatur jeung mapatahan, balukarna matak bingung kanu dipapatahan.
Lodong kosong ngelentrung » Loba omong tapi ari pangartina mah euweuh.
Luhur kuta gede dunya » Gagah tur beunghar taya kakurang.
Luncat mulang » Teu beunang dicekelan omonganana, ayeuna kieu engke kitu.
Lungguh tutut » Katenjona siga nu lungguh tapi saenyana mah henteu.

Babasan jeung Paribasa (M)

Malengpeng pakel ku munding, ngajul bulan ku asiwung » Ngajalankeun (mikarep) hiji perkara anu taya pihasileunana.
Maliding sanak » Henteu adil, pilih kasih.
Mangpengkeun kuya ka leuwi » Nitah mulang ka lemburna, atawa nitah pindah ka tempat bali geusan ngajadi.
Mapay ka puhu leungeun » Mamawa ka kolot atawa ka guru, kalayan kolot atawa guru mah teu nyaho naon-naon jeung euweuh patalina saeutik-eutik acan.
Marebutkeun paisan kosong » Marebutkeun hiji perkara anu teu aya hasilna atawa mangpaatna.
Maut nyere ka congona » Keur ngora senang, tapi ari ka kolotnakeun susah.
Melengkung bekas inhalan » Ari keur ngora keneh bageur tapi kakolotnakeun jadi teu bageur.
Mere langgir kalieun » Mere naon-naon anu bisa jadi aya pisusaheunana atawa pibahayaaeunana.
Meuli teri meunang japuh » Kalawan teu disangka-sangka meunang milik, darajat, atawa kauntungan anu leuwih gede (sarua jeung Nyair hurang meunang kancra).
Meungpeun carang ku ayakan » Nyaho yen batur teh salah atawa migawe anu dilarang ku nagara, tapi teu kitu-kieu, kalahka api-api teu nyaho.
Meungpeung teugeu harianeun » Embung pisan tutulung ka batur nu keur susah atawa loba kabutuh.
Miceun batok meunang coet » Miceun nu goreng kulantaran hayang meunang anu alus, tapi tungtungna meunang nu goreng deui bae.
Mindingan beungeut ku saweuy » Ari hate goreng ngan budi parangi marahmay, perluna pikeun mindingan hate nu goreng tea supaya ulah kaciri.
Mipit teu amit ngala teu menta » Maling boga batur.
Miyuni hayam kabiri » Leutik burih, babari sumerah eleh atawa lalaki nu babari sumerah ka awewe.
Moal ceurik menta eusi » Keun bae mawa wadah anu gede oge da lain hayang loba diberena.
Moal neangan jurig teu kadeuleu » Rek nyekel jelema nu aya bae, moal neangan jelema nu euweuh.
Mobok manggih gorowong » Aya lantaran pikeun ngalaksanakeun kahayang anu henteu gampang pihasileun.
Monyet kapalingan jagong » Tukang maling kapalingan, tukang tipu katipu.
Mopo memeh nanggung » Hoream, teu sanggup samemeh prak.
Mun teu ngakal moal ngakeul » Mun teu usaha moal pinanggih jeung rejeki pibekeleun hirup.
Mun teu ngoprek, moal nyapek. Mun teu ngakal moal ngakeul. Mun teu ngarah moal ngarih » Lamun teu digawe nyiar kipayah tangtu pisusaheun pikeun hirup.
Muncang labuh ka puhu, kebo mulih pakandangan » Mulang ka lemburna sabada mangtaun-taun aya di pangumbaraan atawa panyabaan.
Mupugkeun tai kanjut » Ngetrukeun pangaboga dina waktu nyunatan atawa ngawinkeun anak anu kacida dipikameumeutna.

Babasan jeung Paribasa (N)

Ngajul bulan ku asiwung, mesek kalapa ku jara » Usaha anu mubadir, moal ngadatangkeun hasil (asiwung: kapas nu geus diberesihan sikina, biasana dipake keur mayit pikeun nutupan liang-liangan).
Ngadu angklung di pasar » Papaduan nguruskeun nu euweuh mangpaatna di hareupeun jalma loba.
Ngadu-ngadu rajawisuna » Mawakeun omongan si A ka si B anu lain sabenerna, antukna si A jeung si B pasea, parea-rea omong.
Naheun bubu pahareup-hareup » Dina urusan pangabutuh silih injeuman duit.
Nangkeup mawa eunyeuh » Mawa cilaka ka jelema anu dipentaan tulung jeung geus nulungan ka urang.
Nangtung kariung ngadeg karageman » Ngariung rarageman ngabadamikeun hiji perkara.
Nepak cai malar ceret » Ngomongkeun jeung ngagogoreng batur supaya batur teh ragrag ngaranna jeung kawentar kagorenganana.
Nepakeun jurig pateuh » Puguh urang nu goreng tapi kagorengan urang teh ditamplokeun ka batur sangkan urang sorangan salamet.
Nete porot ngeumbing lesot » Cukup ari ihtiar mah kalawan mangrupa-rupa akal tarekah tapi teu hasil bae.
Nete semplek nincak semplak » Kieu salah kitu salah.
Nete semplek nincak semplak » Ninggang dina salah jeung rugi bae, turug-turug kasusah nambahan deuih.
Nete taraje, nincak hambalan » Kudu merenah, lamun aya uruskeuneun teh urang kudu datang ka nu handap heula, kakara terus kaluhur.
Neukteuk curuk dina pingping » Ngadakwakeun nu lian, tapi nu ngadakwakeunana milu susah, sabab milu katarik kana hiji perkara.
Neukteuk mani anggeus, rokrok pondokeun peunggas harupateun » Heuras hatena, teu sabar dina nyanghareupan rupa-rupa kasusahan jeung babari luluasan.
Neundeun piheuleut nunda picela » Neangan pilantaraneun supaya jadi goreng supaya temahna papisahan teu ngahiji deui.
Ngabudi ucing » Teu wani nembongkeun atawa ngedalkeun kahayang atawa kadeudeuh.
Ngadagoan kuah beukah » Ngadagoan pasesaan kadaharan (hal ieu lumaku ka tukang babantu di imah batur tapi saenyana mah ayana tukang babantu teh teu perlu).
Ngadagoan uncal mabal » Ngadagoan jeung mikahayang kana rejeki tapi sungkan ihtiar pikeun ngadatangkeun eta rejeki.
Ngadaweung ngabangbang areuy » Pohara nineungna kana jaman nu geus kasorang nepi ka matak waas pacampur jeung sedih.
Ngadek sacekna, nilas saplasna » Ngomong/nyarita anu teu dileuwihan atawa dikurangan.
Ngadeupaan lincar » Ngadeukeutan anu keur sidekah atawa kariaan supaya katenjo ku nu boga imah jeung diajak dahar.
Ngagandong kejo susah nyatu » Loba titaheun tapi euweuh nu daek dititah.
Ngagedag bari mulungan » Nanyakeun hiji perkara ka batur anu urang tacan nyaho tapi embung kanyahoan yen urang tacan nyaho, kulantaran kitu api-api geus nyaho bae.
Ngaliarkeun taleus ateul » Ngabeja-bejakeun kagorengan atawa kajahatan batur.
Ngarep-ngarep bentang ragrag » Ngarep-ngarep nu pamohalan bakal kasorang atawa kajadian.
Ngarep ngarep kalangkang heulang » Ngarep ngarep hiji perkara anu kacida banggana jeung sudah pihasileunana.
Ngawur kasintu, nyieuhkeun hayam » Ngaraeh jeung darehdeh ka deungeun sabab hayang kapuji, tapi teu nolih jeung nyapirakeun ka dulur atawa ka baraya sorangan.
Ngeplek jawer, ngandar jangjang, miyuni hayam kabiri » Leutik burih, borangan, sieunan, kecing.
Ngeupeul ngahuapan maneh » Lungas-lengis mikawelas mikaasih ka diri sorangan supaya batur welaseun jeung nulungan ka urang.
Nginjing sila, bengkok sembah » Goreng hate, teu satia ka nu jadi pamingpin atawa dunungan.
Ngodok liang buntu hese cape taya gawe, susah payah taya guna » Sanajan tihothat oge henteu beubeunangan.
Ngodok liang jero » Teu hasil enggoning nyiar rejeki, kaditu-kadieu luput bae.
Ngukur ka kujur nimbang ka awak » Ngaluarkeun duit pikeun kaperluan hirup, pakan, pake, jeung sajabana kalayan disaluyukeun jeung pangala.
Ngukut kuda kuru ari geus gede sok nyepak » Ngukut bujang anu tadina pohara balangsakna, susak dahar susah make, tapi ari geus mulya awak lintuh jeung pake hade, ngalawan ka nu jadi dunungan.
Ngusap birit » Bari indit kulantaran ambek nyedek atawa era parada, leos bae indit, teu amit heula ka nu araya didinya.
Nimu luang tinu burang » Nambahan luang atawa pangarti waktu keur pinanggih jeung kacilakaan atawa hukuman.
Nincak parahu dua » Ngadunungan ka duaan atawa boga dua pausahaan.
Ninggang kana kekecrekna » Keur mah goreng rupana, goreng laku lampahna deuih.
Nini nini dikeningan, awewe randa dihiasan » Ngamahalkeun barang naon bae anu geus ruksak.
Noong ka kolong » Leutik hate, leutik pangharepan.
Nu asih dipulang sengit, nu haat dipulang moha » Nu hade jeung loba jasana ka diri urang sasat dinyenyeri ku urang ku omongan atawa ku kalakuan anu goreng.
Nu borok dirorojok, nu titeuleum disimbeuhan » Nu keur susah ditambah deui kasusahna.
Nu burung diangklungan, nu edan dikendangan » Ngahaminan omongan atawa carita batur, sanajan ceuk hate sorangan eta omongan atawa carita teh salah.
Nu tani kari daki, nu dagang kari hutang » Nu tani jeung nu dagang sarua ripuhna, euweuh nu bagja.
Nuju hirup ninggang wirahma » Ngeunaan ka jelema anu keur alus milik.
Nulungan anjing kadempet » Nulungan jelema nu teu boga pisan rasa tumarima.
Nya di hurang nya dikeuyeup » Di unggal jelema oge taya bedana, sarua bae, mungguhing wiwirang atawa katugenah hate mah boh di menak boh di somah sarua bae.
Nya ngagogog nya mantog » Ongkoh nitah ka batur tapi digawean ku sorangan.
Nya picung nya hulu maung » Nu nanya jeung nu ngajawab teu sapagodos, pananya jeung jawaban pasalia, henteu nyambung.
Nyaeuran gunung ku taneuh, sagara ku uyah » Nambahan kauntungan atawa kakayaan ka nu geus beunghar.
Nyair hurang meunang kancra» Sugan teh rek meunang kauntungan, kamuliaan atawa bagja anu leutik manahoreng meunang kauntungan atawa bagja anu gede.
Nyaliksik ka buuk leutik» Nyusahkeun, peperedih atawa pepentaan ka jelema anu sahandapeun darajatna jeung pangabogana.
Nyalindung ka gelung» Milu hirup ka pamajikan anu loba pakayana.
Nyanggakeun suku genteng belokeun, beuheung teukteukeun, disiksik dikunyit-kunyit, dicacag diwalang-walang » Sumerah, masrahkeun diri rek dibeureum rek dihideung kari kumaha didinya bae, dina rumasa geus salah atawa rumasa boga dosa.
Nyanghulu ka jarian» Ngawula ka jelema anu sahandapeun harkatna atawa pangartina.
Nyeri beuheung sosonggeteun» Pohara ngarep ngarepna, tapi anu diarep arep teu jol bae datang.
Nyeungeut damar di suhunan » Mintonkeun kakayaan atawa barangbere supaya dipuji.
Nyeungseurikeun upih ragrag » Akey-akeyan nyeungseurikeun batur dumeh buuk geus bodas, huntu geus ompong, tonggong geus bengkung padahal kaayaan kitu ku urang sarerea bakal kasorang.
Nyiar batuk piaraheun » Nyiar pigujrudeun, pipaseaeun.
Nyicikeun cai, murulukeun lebu » Turun cadu (cacaduan), pantang ngalampahkeun hiji perkara anu dilarang ku luluhur.
Nyieun catur taya dapur » Nganggit hiji dongeng nu teu aya galurna.
Nyieun heuleur jeroeun huma » Henteu raket jeung dulur pahare-hare bae.
Nyieun pucuk ti girang » Pangheulana neangan piaseaeun.
Nyiruan mah teu resepeun nyeuseup nu pait » Lumrahna manusa teu resep reureujeungan jeung nu teu boga.
Nyiuk cai ku ayakan » Pagawean nu mubadir, moal ngahasilkeun naon-naon.
Nyium bari ngegel » Omongannana hade ngan hate jeung maksudna goreng. Salakina dipisobat ari pamjikanana dibogohan atawa sabalikna.
Nyokot lesot ngeumbing porot » Teu aya usaha anu ngahasilkeun.
Nyolok mata buncelik » Nganyenyeri, ngahina atawa ngawiwirang di hareupeunana.
Nyuhun nanggung ngelek ngegel » Rebo pisan, babawaanana loba naker.
Nyuhunkeun bobot pangayon timbang taraju » Menta pangampura jeung menta timbangan da geus puguh rumasa salah jeung dosa mah.
Nyukcruk walungan mapay-mapay wahangan » Kalawan taliti pisan nalungtik luluhur, imeut pisan panca kakina.

Babasan jeung Paribasa (O)

Omong harus batan goong » Beja teh gancang naker nerekabna, malah sasarina mah beja anu nerekab teh leuwih hebat batan aslina.
Owah gingsir » Henteu tetep, henteu ajeg, gunta-ganti pamadegan.

Babasan jeung Paribasa (P)

Paanteur-anteur julang » Silih anteur nepi ka aya dua tilu kalina.
Pacikrak ngalawan merak » Tangtu elehna sabab nu leutik ngalawan anu gede.
Pada rubak sisi samping » Sarua bae pada loba luangna, pada loba pangalamanana.
Pagirang girang tampian » Paunggul-unggul dina neangan pangupa jiwa, teu daek silih seblokan.
Paheuyeuk-heuyeuk leungeun » Silih bantuan, silih belaan, silih tulungan.
Pait daging pahang tulang » Arang gering, cageur teu keuna ku panyakit naon bae.
Pakotrek iteuk » Laki-rabi ti ngongora napi kakolot pisan, pada-pada geus jadi aki-aki jeung nini-nini.
Paluhur luhur diuk » Pagede-gede kauntungan dina nyiar kipayah.
Panday tara bogaeun bedog » Sasarina ari tukang mah sok tara bogaeun.
Papadon los ka kolong » Cidra jangji, teu nedunan jangjina.
Peureum kadeuleu beunta karasa » Inget bae, teu bisa poho. Biasana mah lain kana barang tapi ka jelema anu dipikancinta.
Piit ngeundeuk-ngeundeuk pasir » Mikarep ka nu lain babadna, tangtu moal kasorang.
Pindah cai pindah tampian » Robahna tempat matuh robah adat jeung kabiasaan.
Pinter aling laing bodo » Pinter tapi embung kanyahoan ku batur kusabab eta nyeta-nyeta anu bodo.
Pipilih meunang nu leuwih koceplak meunang nu pecak » Milih kalawan ati-ati pisan kulantaran hayang meunang nu leuwih hade, ngan ahirna meunang nu leuwih goreng.
Piruruhan katengah imahkeun » Nu dusun didikan dibawa kana pasamoan.
Pupulur memeh mantun » Menta ganjaran memeh aya jasa atawa menta buruhan memeh prak digawe.
Pur kuntul kari tunggul, lar gagak kari tunggak, tunggak kacuwatan daging » Dina cidrana anu diborehan, boreh anu katempuhan, kudu mayaran hutang anu dipangnanggungkeun.
Puraga tamba kadengda » Migawe hiji pagawean henteu jeung enya-enya. Henteu ngandung maksud supaya hade hasilna, ieu mah pada ulah dipaido bae.

Babasan jeung Paribasa (R)

Raweuy beuweungeun rambay alaeun » Loba dahareun da loba pepelakan.
Rumbak caringin di buruan » Dina hiji kasusah atawa karerepet, geus teu boga kolot anu mepelingan ka urang.
Rumbak kuntieun » Henteu lengkep, aya bae anu kurang nu matak cua kana hate.
Rup ku padung rap ku lemah, katuruban ku taneuh beureum » Maot. Sasarina ngeunaan kanyeri anu satungtung hirup moal poho sanajan nepi ka maot.
Rusuh luput gancang pincang » Migawe naon bae anu rurusuhan, temahna matak kaduhung sabab hasilna teu matak nyugemakeun.

Babasan jeung Paribasa (S)

Sabobot sapihanean » Sauyunan, sapapait-samamanis, sabagja-sacilaka.
Sabuni-buni anu ngising » Sanajan dibunian atawa disumputkeun oge ari laku lampah anu goreng mah awal akhir sok kudu kanyahoan bae.
Sagalak galakna macan tara nyatu anakna » Sanajan pohara bengisna nu jadi indung-bapa, umumna tara tega ka nu jadi anak.
Sagolek pangkek sacangreud pageuh » Hanteu cidra kana jangji.
Saherang-herangna cai beas » Galibna hate teh hese pisan beresihna ka jelema anu geus bukti tas nganyernyeri ka urang.
Saherang herangna cibeas, moal herang cara cisumur » Sasarina lamun geus aya pacengkadan sok tara hade deui cara bareto samemeh aya pacengkadan.
Sakecap kadua gobang » Gampang ngambek jeung gampang ngadek deuih.
Sakiriciking duit sakocopoking bogo » Naon bae anu matak narik kana hate urang.
Saluhur-luhur punduk tara ngaliwatan hulu » Sapinter pinterna murid, pangartina moal ngaluhuran nu jadi guru.
Sangsara di geusan betah » Teuing ku miskin, teu boga naon-naon pisan kulantaran geus embung digawe nyiar kipayah, tapi ari hirup mah hayang keneh.
Sapu nyere pegat simpay » Paturay, papisahan.
Sareundeuk saigel sabobot sapihanean sabata sarimbangan » Sauyunan, layeut, tara aya pacengkadan.
Satengah buah leunca » Teu jejeg ingetan, langlang-lingling, kurang saeundan.
Saumur nyunyuhun hulu » Saumur hirup rumingkang di bumi alam.
Saungkab peundeuy » Omongan anu pondok tur kurang manis.
Sengserang padung » Ngeunaan awewe atawa lalaki anu boga keneh napsuna cara baheula keur ngora keneh, sasarina aya di jelema nu geus kolot, nu tereh paeh.
Sentak badakeun » Teu ceehan dina gawe, mimiti pohara getolna, tapi beuki lila beuki ngedul nu tungtungna teh diantep teu dipigawe pisan.
Sereg di panto logor di liang jarum » Nyingkahan hirup kumbuh jelema loba, sabab loba dosa, loba kasieun jeung kaera, betahna di nu suni nu teu aya jelema.
Sereg dibuana logor diliang jarum » Kulantaran loba kasalahan atawa dosa, embung cicing di nu rame, sabab sieun, karesepna the di nu suni, nu euweuh jelema.
Seukeut ambeu seukeut deuleu » Loba mata-matana jeung pinter nyusud perkara (keur pagawean pulisi).
Seukeut tambang manan gobang » Sakumaha gagahna, wanina, jeung ngalawanna oge, jalma jahat mah awal ahir tangtu katangkep pulisi.
Seuneu hurung cai caah » Keur ambek, keur amarah, keur napsu.
Seuneu hurung dipancaran » Nu keur napsu, heug ditambahan pisan pikakeuheuleun, tangtu bae ngambekna jadi tambah.
Seuseut batan neureuy keueus » Hese pisan.
Sibanyo laleur » Ledis pisan, teu nyesa saeutik-eutik acan.
Sirung ngaliwatan tunggul » Darajat atawa milik anak ngaliwatan bapa.
Sosoroh ngadon kojor » Kikiriman ku lantaran aya pangarahan tapi boro-boro meunang kauntungan, kalah ka meunang wiwirang jeung karugian.

Babasan jeung Paribasa (T)

Tamiang meulit ka bitis » Malindes ka diri sorangan.
Tamplok batokeun » Berehan teuing nepi ka urang mah susah.
Taya halodo panyadapan » Taya eureunna digelendeng atawa dicarekan.
Teng anak teng, anak merak kukuncungan » Sipat-sipat nu aya di anak, babakuna nu hadena, sasarina loba anu diturunkeun ku kolotna.
Teu aya sarebuk samerang nyamu » Teu aya saeutik-eutik acan.
Teu beunang dikoet kunu keked » Teuing ku koret, tara pisan tutulung ka nu butuh tatalang ka nu susah.
Teu boga pikir rangkepan » Teu boga curiga saeutik-eutik acan.
Teu uusik bulu salambar » Teu regrog-regrog, malah unggul dina juritna.
Teu cari ka Batawi tapi ka salaki » Hakan pake hayang ti salaki.
Teu diambeuan » Teu dipikarisi, teu dipikagimir, teu dihargaan, teu diajenan.
Teu didingding kelir » Teu dibuni-buni, ditembrakeun bae, teu dirusiahkeun.
Teu dipiceun sasieur » Sarua pisan, teu aya bedana saeutik-eutik acan.
Teu ditari teu ditakon » Teu dipalire, diantep bae, teu ditanya-tanya acan.
Teu gugur teu angin » Samemeh kajadian naon-naon teu aya pisan beja atawa ciciren.
Teu jauh ti tihang juru teu anggang ti tihang tengah » Nya goreng rupana nya goreng kalakuanana sok daek pulang-paling.
Teu mais teu meuleum » Teu aya patalina pisan, teu pipilueun.
Teu ngalarung nu burung, teu nyesakeun nu edan » Ngalajur napsu ka awewe, ka nu halal jeung nu haram oge disaruakeun bae.
Teu nginjeum ceuli teu nginjeum mata » Ngadenge jeung nenjo sorangan lain cenah jeung baruk.
Teu nyaho di alip bingkeng » Bodo teu bisa maca-maca acan da teu sakola.
Teu puguh alang ujurna » Teu puguh entep seureuhna, teu beres, lain kitu kuduna.
Teu wawuh wuwuh pajauh, teu loma tambah paanggang » Sing wawuh tur sing loma sabab balukarna alus pisan.
Teu hir teu walahir, teu kakak teu caladi, teu aro-aro acan » Teu baraya, teu kaka teu adi, teu alo alo acan. Deungeun deungeun tulen.
Ti luhur sausap rambut ti handap sahibas dampal » Menta dihampura tina rumasa geus salah atawa boga dosa.
Ti peuting kapalingan ti beurang kasayaban » Sababaraha kali karurugian atawa karoroncodan.
Tiis ceuli herang mata » Ngeunah hate kulantaran ngeunah deudeuleuan jeung dedengean.
Tikoro andon peso » Ngadeukeutan jelema nu bakal ngahukum atawa nganyenyeri ka diri urang.
Tinggar kalongeun » Teu sieun atawa teu nurut kulantaran remen teuing digelendeng atawa dicarekan.
Tipu keling ragaji Inggris » Pinter dina kajahatan, pinter dina ngabobodo atawa nipu.
Titip diri sangsang badan » Mihapekeun maneh.
Titirah ngadon kanceuh » Sejana nyiar kasenangan, tapi jadina pinanggih jeung kasusah nu leuwih gede.
Totopong heureut dibeber-beber, tangtu soeh » Nyukupan ku pangala nu saeutik tangtu matak jadi susah lantaran keperluan jeung pangaluaran anu sakitu lobana.
Tugur tundang cuntang gantang » Ngajalankeun pagawean pikeun nagara, babakti ka nagara.
Tunggul dirarud catang dirumpak » Euweuh anu dipikaserab, terus bae ngalajur napsu.
Tunggul sirungan, catang supaan » Aya kajadian anu goreng atawa matak teu genah ahirna.
Tungkul ka jukut tanggah ka sadapan » Junun nyanghareupan pagawean anu dipilampah, teu kaganggu ku naon-naon.

Babasan jeung Paribasa (U)

Ulah beunghar memeh boga » Ulah adigung nyeta-nyeta anu beunghar padahal henteu atawa tacan boga pakaya.
Ulah cara ka kembang malati, kudu cara ka picung » Ulah sok bosenan ari ka pamajikan teh, hadena mah ti keur ngora keneh nepi ka geus kolot kudu beuki welas asih.
Ulah cara ka malati kudu cara ka picung » Ulah ngurangan kanyaah, kudu beuki lila beuki nyaah.
Ulah kabawa ku sakaba-kaba » Ulah kabawa ku nu teu puguh, maksudna kabawa jurig, dedemit.
Ulah muragkeun duwegan ti luhur » Masing nyaah kana rejeki meunang hese cape ladang kesang, ulah dimonyah monyah.
Ulah pangkat memeh jeneng » Ulah adigung adiguna hayang nyaruaan ka nu geus jeneng.
Ulah tiis-tiis jahe » Kudu iatna, kudu cingceung.
Ulah unggut kalinduan ulah gedag kaanginan » Ulah kagoda, ulah kaganggu atawa kabengbat ku rupa-rupa lamun urang keur nyanghareupan hiji maksud anu hade.
Uncal tara ridu ku tanduk » Duduluran karumpul kabeh.
Uyah tara tees kaluhur » Galibna sipat indung bapa anu harade atawa anu goreng sok diturunkeun ka anak incuna.