Ngaran Rupa-rupa Kasakit

• Ambeyen; wasir; bawasir » Kasakit dina bool; nongtot bool.
• Ampeg; asma; mengi » Kasakit hese ambekan pangpangna upama katiisan, bisa nepa lamu pacorok wadah kadaharan.
• Babareuhan » Kasakit busung lapar, barareuh meh saluar awak; kasakit bareuh di hiji tempat dina awak (semu mucunghul kawas bisul tapi taya mataan).
• Balas bogo » Kasakit kulit sabangsa hapur, warnana bodas, semu karadak.
• Batuk bangkong » Batuk kosong.
• Batuk gangsa » Batuk lantaran aya gangguan dina bayah.
• Bisul » Kasakit handapeun kulit, bareuh nu ngandung nanah sarta mataan.
• Bisul beunyeur » Bisul leutik, matana siga beunyeur.
• Borok » Raheut anu tuluy nanahan lantaran infeksi atawa radang nu pohara.
• Botoleun » Kasakit dina dampal suku; liangan.
• Budug » Kasakit kulit, barudus atawa carenang, biasana ateul lantaran kuman.
• Bungkul » Bisul teuas dina pengpelangan (bagian pingping belah jero); kasakit kotor.
• Cacar; kuris » Kasakit kulit nu babari tepa sarta gede bahayana. Mun teu maot sok jadi bowek.
• Cacingeun » Kasakit dina beuteung lantaran cacing.
• Cenang » Bisul leutik; bentol digaro jadi cenang lantaran infeksi.
• Conge » Kasakit di jero ceuli, kaluar nanah.
• Daging jadi » Daging anu jadi teu samistina tur ngalantarankeun kasakit. Biasana dina tikoro atawa dinu sejenna.
• Eksim » Ngaran kasakit kulit nu hese cageurna, aya nu jiih, aya nu tuhur, rasana ateul.
• Ewateun; jarawat; kuhkul » Kasakit kulit dina beungeut, biasana nu keur birahi atawa baleg tampele.
• Gelo » Burung; teu waras ingetan.
• Geregeseun » Kasakit lantaran aya sarupa batu di jero kabubuahan atawa giginjel, karasana nyeri cangkeng sarta hese kiih.
• Gondok » Kasakit dina beuheung lantaran kurang yodieum, siga bareuh ngagandoy, tumerapna sok nahun.
• Gondongeun » Kasakit bareuh dina beuheung bagian luhur, tumerapna henteu lila, biasa disebut panyakit anjing, sok diubaran ku bulao.
• Hapur » Kasakit kulit, totol-totol barodas, karasana ateul mun kesangan, babari tepa.
• Hapur beusi » Hapur nu leuwih kandel, hese leungitna.
• Hapur kembang » Hapur nu bodas katempona, bisa diubaran ku daun laja jeung sajabana. Leuwih ipis tibatan hapur beusi.
• Hileudeun » Kasakit lantaran infeksi dina ramo jeroeun kuku, ngandung nanah tur nyanyautan karasana.
• Jangar; rieut » Nyeri sirah jejeletetan.
• Jengkoleun » Kasakit nyeri kiih nu dilantarankeun ku racun nu aya dina buah jengkol, biasana tumerap lamun ngadahar jengkol rorosaan.
• Jeungjeuriheun » Kasakit nyeri kiih, cenah lantaran nginum cai nu can asak pisan.
• Kabebeng; mejen » Hese ngising.
• Kalikiben » Rasa nyeri dina jero beuteung anu sok timbul upama tas dahar atawa nginum terus kagujrug-gujrug alatan lulumpatan.
• Keremieun » Kasakit ateul bujur lantaran cacing keremi.
• Kesrek » Kasakit kulit saperti eksim garing.
• Kokoloteun » Kasakit kulit dina beungeut (semu harideung) lantaran mindeng kapanasan atawa ku sabab sok make wedak murah, biasana tumerap ka awewe.
• Kolera » Kasakit nyeri beuteung nu babari nular, bisa mateni. Cirina utah-utahan jeung ngayer terus.
• Kotokeun » Kasakit panon, kurang awas nenjo, siga hayam teu awas upama geus peuting.
• Kutil » Kasakit sabangsa ewateun ngan leuwih gede tur leuwih teuas, mun diantep sok ngalobaan saperti nu anakan.
• Leuncangeun » Kasakit dina sela-sela ramo suku, marentis atawa bareulah, dilantarankeun ku kuman cai, karasana ateul.
• Lilinieun » Leungeun atawa sirah ngadegdeg dilantarankeun ku kakolotan.
• Lumpuh » Awak leuleus teu bisa leumpang (hojah) atawa paeh sabeulah lantaran gangguan urat sarap.
• Mata iwakeun » Sarupa kutil, biasanan dina ramo leungeun atawa ramo suku, tumerapna tara lila tur tara ngalobaan kawas kutil.
• Menter; tipes » Kasakit di jero beuteung nu gede bahayana sarta babari tepa, lantaran cai atawa kadaharan.
• Mimiseun » Kaluar getih tina irung lantaran sariawan.
• Muriang » Awak paranas tiris lantaran katerap panyakit malaria, influensa, jeung sajabana.
• Nyeri huntu » Huntu karasa nyeri lantaran koropok, jeung sajabana.
• Nyeri panon » Panon karasa nyeri jeung peureus semu ateul.
• Peluh » Kasakit lalaki, nyaeta upama laranganana teu daek heuras.
• Peujit koreseun » kasakit nyelengit beuteung lantaran telat barangdahar.
• Peuteuyeun » Kasakit nyeri kiih nu dilantarankeun ku racun nu aya dina buah peuteuy, leuwih parna tibatan jengkoleun. Biasana tumerap lamun ngadahar peuteuy rorosaan.
• Reunghaseun » Kasakit kulit, kulit semu tarutung tur semu bareulah (kawas tangkal reunghas), sok tumerap lamun kulit kakeunaan ku geutah reunghas.
• Rorombeheun » Kasakit dina dampal suku, pangpangna dina keuneung, kulitna bareulah.
• Sakalor » Kasakit sarap. Mun keur kanceuh, teu karana puguh sababna sok ngadadak teu eling, tuluy ngagolepak kapaehan, sungutna ngabudah.
• Salatri » Kasakit anu timbul lantaran kosong beuteung. Karasana lieur, sebel, tur kaluar kesang tiis.
• Salesma » Kasakit di jero irung lantaran katiisan, mindeng beresin sarta lehoan.
• Sampar » Kasakit kulit nu babari tepa.
• Sarab » Kasakit kulit nu tumerapna ka barudak.
• Sariawan » Kasakit nu ngalantarankeun barusuh atawa kaluar getih tina irung atawa gugusi.
• Seueul » Kasakit dina jero beuteung anu karasana pupurilitan
• Sisidueun » Gangguan di jero dada lantaran katiisan nu nimbulkeun ceklak-cekleuk.
• Sumbilangeun » Kasakit awewe, nyeri pianakan waktu keur kotoran. Nyerina meh sarua jeung dipatil sumbilang (lauk laut).
• Tajam » Meh sarua jeung disentri, kasakit beuteung nu dilantarankeun ku baksil-baksil, sok ngayer (murus) sarta kokotorna sok pacampur jeung getih atawa bubudur.
• Tampek » Kasakit kulit, ateul semu panas, tumerapna biasana ka budak.
• Tibar » Kasakit sarupa bisul matana tujuh.
• Tuju » Kasakit nyeri tuur atawa cangkeng, tumerapna ka jalma nu geus kolot.
• Tujukuriling » Kasakit lanjung (lieur anu pohara).
• Tujulajer » Kasakit nu sok tumerap ka awewe lantaran kaganggu sarapna, sok jengker.
• Turuwisen » Kasakit sarupa cenang dina biwir panon.
• Uuseupeun » Kasakit dina tikoro, karasana nyeri neureuy asa aya useupan. (*)