Ngawayang Teu Direbaban (Bagian 8)

Ngobrol nepi ka tabuh tilu. Teu loba nu bisa dikoreh ngeunaan sabab-musabab uwa ka luar ti pagawean. Najan Yuda nyoba-nyoba malikeun deui ingetan uwana ka mangsa ka tukang.

"Tah harita mah, kajadian nu poe ieu, can tangtu aya berita poe isuk," ceuk uwa.

Malum, keur mah pakakas komunikasi ge can kawas ayeuna, jajauheun kana aya HP, telepon imah ge jarang keneh. Uwa ge ngalaman susahna nepungan sumber berita mangsa harita. Kungsi cenah, nepungan nara sumber nu dumuk di wewengkon perkebunan Sukabumi. Ari dijugjug, nu rek disabaan teh geus pindah ka Cirebon. Disusul ka Cirebon, cenah geus pindah deui ka Garut. "Panggihna mah di Garut," ceuk uwa.

"Waktos dalang Adang maot kacilakaan ge teu langsung diwartakeun enjingna panginten," ceuk Yuda.

"Teuing eta mah. Poho deui."

"Naha uwa teu ngawartakeun kitu?"

"Nyeta poho deui. Ih, geuning geus tabuh dua. Uwa rek ngalenyap heula. Kade ulah sare, bisi uwa gugah," pokna. Wa Sukma ngagoloyoh kana korsi panjang. Yuda mah cungelik. Ngan, manehna ge reup weh peureum. Hudang soteh digeuingkeun ku Wa Sukma.

"Geura solat Subuh!"

"Tos adan, Wa?"

"Geus ti tatadi. Tuh geus satengah genep."

Tabuh tujuh Yuda ka luar ti rumah sakit. Uwana mah nungguan keneh. Yuda mah ti heula, bubuhan rek ka kantor.

Basa nyalse, Yuda ngahaja ngadatangan Pa Yana. Rek ngadongengkeun papanggihanana waktu ngahaja nyungsi Pasir Caringin. Sakalian rek nembongkeun potokopi berita ngeunaan rombongan dalang Adang Sutarya nu kacilakaan.

"Panasaran kumaha?" ceuk Pa Yana.

"Muhun abdi tos ngaosan kliping seratan uwa, tapi teu aya nu tiasa dikait-kaitkeun sareng kaluarna uwa ti padamelanana."

Pa Yana teu nyarita. Manehna mukaan potokopi kliping. Ukur dibaca judul jeung lead-na wungkul. Waktu Pa Yana maca judul Rombongan Dalang Tigebrus ka Jungkrang, manehna ngerutkeun halisna.

"Janten, uwa lepat ngawartakeun?"

"Bisa jadi kitu. Nu disebut ku uwa hidep dalang Adang teh sabenerna mah dalang sejen," ceuk Pa Karim.

"Upami kitu mah, uwa gagabah. Teu taliti."

"Nilik ka dinya mah bakal loba nu nyangka kitu. Tapi, asa piraku, da uwa di dinya jeung dalang Adang teh lain sakatiga. Lain sakali dua kali ngabandungan manggungna ge. Hartina, piraku kasamaran."

Nu hajat nanggap dalang Adang harita, urang lembur peuntaseun Pasir Caringin. Naha harita aya nu hajat sejenna, nu nanggap wayang? Hanjakal, waktu ka Pa Juhdi teu nanyakeun sual eta.

Yuda beuki panasaran. Sanggeus ti kantorna nitipkeun naskahna dina flashdisk muateun, Yuda ngabelenyeng deui ka Galih. Ti dinya langsung muru lembur Mang Juhdi. Kabeneran nu disabaan keur rineh, kakara pisan tas maraban domba. Teu nyebutkeun ngahaja datang ka dinya, bebejana mah ukur nyimpang we.

Keur ngobrolkeun sual wayang mah teu hese. Sangkan teu nerag, mimiti nyaritakeun sual wawacan. geus kitu mah, obrolan teh naratay kana kabiasaan tatanggapan di lembur.

"Sering keneh panginten nu nanggap wayang di dieu mah?"

"Kasebat sering mah henteu. Malah, kawilang langka. Ayeuna mah seueur nu nanggap elektun we. Ngirit panginten, teu sapertos nanggap wayang. Tapi, ketang saurang-urangeun mah aya keneh. Benten sareng kapengker."

"Dupi dalang nu sohor ka dieu saha wae?

"Nu ayeuna mah aya sababaraha urang. Aya Awan Jatnika, Didi Kosasih, Asep Munandar, sareng Dudung Sutarya."

"Upami kapungkur?"

"Tos harilap deui. Mung nu pangnyongcolangna mah Adang Sutarya."

"Euh kitu."

"Saurna kantos diadukeun ka pulisi sagala?"

"Leres, da marukan nu gaduh hajat mah jalir jangji. Padahal, buktosna mah teu sumping soteh lantaran kacilakaan."

"Ke Mang, emut keneh panginten, ari nu hajat waktos harita, nu mareng sareng di Pa Romli aya deui?"

"Ah, teu aya, Den. Waktos harita mah mung di Pa Romli we."

"Dupi di lembur sanes?"

"Duka nya, mung saemut emang mah teu aya nu mareng nanggap wayang." Ras Yuda Kana pangalamanana waktu diajakan ku uwana tea. Sidik manehna ge lalajo wayang teu jauh ti jalan cagak.

"Tapi waktos harita teh abdi ge nongton wayang, Pa."

"Di mana?"

"Muhun teu tebih ti jalan cagak nu ka katuhu tea."

"Ke jalan cagak mana?"

"Muhun nu saatosna jambatan tea. Kinten-kinten dua kilo atanapi tilu kilo ti dieu mah."

Pa Juhdi nyerengeh. Keur Yuda mah asa diseungseurikeun.

"Leres Pa, abdi kantos nonton wayang harita teh?"

"Ah, da teu aya lembur di dinya mah."

"Nu leres Pa?"

"Kapungkur memang aya. Sapertos nu didongengkeun ti payun tea. Tapi, saatosna dijorag gorombolan mah, pangeusi lembur teh ngaralih ka tempat sanes," pokna.

Nu lalajo teh noyek. Loba saksi. Sajajalan ge nu rek lalajo teh nga-bring sabubuhan- sabubuhan. Inget keneh, Yuda ge meuli bandrek ti Mang Ahya.

"Leres Mang. Malah abdi sareng pun uwa ge kantos meser bandrek ti Mang Ahya."

Mang Juhdi ngahuleng. Manehna ge kungsi ngadenge beja, Mang Ahya nu biasa nagog di pertelon sisi lembur boga dongeng aheng, kungsi meunang duit jadi dangdaunan.

Si tukang bajigur teu apaleun peresis lembur nu nanggap wayang teh. Malum, manehna mah lain urang dinya pituin. Pindah ka dinya teh pedah meunangkeun Ceu Awis, randa popotongan mandor enteh.

Waktu datang ka tempat hiburan, nu lalajo corengcang keneh. Beuki peuting nu lalajo beuki merul. Manehna ngahaja dagang teh sisi jalan jauh ka panggung. Dagangna ledis. Mang Ahya gura-giru balik. Waktu ngitung duit tina laci daganganana, manehna ngajenghok, duit ladang dagangan teh euweuh. Ukur aya duit lima ratus perak, ladang bajigur jeung bandrek ditambah kulub suuk jeung seupan cau.

"Ukur lima ratus rupia, Mang?"

"Leres."

Yuda ingeteun keneh, beak jajan duaan teh ukur lima ratus perakeun. Kuduna mah dipulangan sapuluh perak, tapi ceuk Uwa Sukma teh, tos we tong dipulangan.

"Sering Cep nu ngadongeng kawas kitu mah. Mung, da sesah dibuktoskeunana. Ku Emang mah dianggap bungbu catur nu ngarahul, ngarah rame," ceuk Mang Juhdi.

"Dupi Mang Ahya biasa keneh dagang di pertelon?" Yuda api-api teu apal.

"Tara ayeuna mah. Tos teu dagang deui. Diteruskeun ku Jang Unab."

"Euh eta."

"Terang kitu Aden?"

"Terang da kantos sindang ka dinya mah."

Meakeun panasaran, Yuda jeung Galih rek nepungan Mang Ahya. Keur piobroleun mah teu hese, lantaran kungsi tepung dina wayang tea. Bubuhan ripuh ku gawe, Mang Ahya teh geus reyod naker. Leumpangna dibantuan iteuk. Geus kurang denge deuih.

"Emut keneh ka abdi, Mang?"

"Saha ieu teh?"

"Abdi langganan Emang," ceuk Yuda ngaheureuyan.

Mang Ahya seuri. Tembong semu bungah. Ieu tukang bajigur teh resepeun naker upama diajak ngobrolkeun pangalamanana nu tumali jeung dagang bajigur.

"Ngawitan deudeuieun ku bajigur Emang teh saatosna jajan dina wayang tea?"

"Wayang di mana, Den?"

"Kapungkur di lembur nu teu tebih ti Pasir Caringin tea."

"Ah, sok ngaheureuyan ka kolot teh," ceuk Mang Ahya.

Marukan manehna mah Yuda teh ukur ngageuhgeuykeun manehna. Kitu apan, kalolobaanana nu ngadenge caritaan Mang Ahya dagang di eta lembur teh. Loba nu nyebutkeun bohong atawa jijieunan.

"Leres, Mang."

Taksiran, Mang Ahya teh ingeteun deui ka nu lalajo kana motor. Ngan motor-motorna nu harita aya di panglalajoan teh. Taya sapedah-sapedah acan. Sakur nu datang ka dinya kabeh laleumpang.

"Encep teh nu kana motor beureum tea?"

"Leres."

"Enyaan, Den?" Mang Ahya sakapeung nyebut encep sakapeung aden. Kaciri, kaget jeung semu bungah.

"Ukur Embina nu percayaeun teh. Nu sanes mah nganggapna teh wadul," ceuk Mang Ahya.

Isukna, Mang Ahya indit deui ka eta tempat. Ngahaja harita teh mawa babaturanana, Kang Sobar. Urut tangungan bajigur kaciri keneh, lebah dinya mayak cangkang suuk.

Mang Ahya luak-lieuk ka sakuriling eta tempat. Tetela, taya lembur. Ukur tegalan, bari sisi-sisina mah kebon enteh.

Ti harita, Mang Ahya teu dagang deui. Kadieunakeun, kabisana diturunkeun ka Mang Unab. Anakna mah leuwih sohor batan Mang Ahya, lantaran boga cabang di tempat sejen.

Yuda ingeteun deui ka Mang Salim, tukang rebab nu kungsi diwawancara sawatara taun ka tukang. Pangna apal ka Mang Salim, ti muridna Salim Muda, waktu manggung di pendopo kabupaten. Harita babaturanna nyaritakeun Salim Muda nu pangabisana bleg weh Mang Salim. Yuda mimitina mah teu kataji, da ditilik tina kamampuhna mah jajar pasar jeung tukang rebab sejenna. Ngan, waktu babaturanana tea nyaritakeun Mang Salim jadi teu bisa nyeniman lantaran kacilakan, manehna panasaran. Karunya, geus kitu mah taya nu mirosea.

Yuda nulis ngeunaan lalakon Mang Salim. Dimuat dina majalah mingguan. Ngan, harita mah teu dihubung-hubungkeun jeung wayang golek nu dilalajoan ku manehna.

Yuda beuki panasaran, naon hubunganana, wayang nu dilalajoan ku manehna jeung Mang Salim. Kulantaran panasaran, Yuda ngabiur ka lembur Mang Salim. Ieu tukang rebab teh apaleun keneh ka Yuda.

"Saatosna dimuat ku Aden, Pa Camat ge sumping ka rorompok, masihan artos sagala," ceuk Mang Salim.

"Nya nuhun we, Mang. Ngiring bingah," ceuk Yuda.

Najan geus lila teu nyeniman, jiwa senina mah kandel keneh. Geura we, basa ngobrolkeun sual wayang manehna sumanget naker. Manehna nyaritakeun mimilu ka dalang Adang teh ti ngongora, ti mimiti jadi catrik (purah nyanggap wayang nu dimaenkeun ku Anung Sutarya, guruna Adang Sutarya). Tadina mah, Mang Salim ge hayang jadi dalang. Ngan, lila-lila mah kataji ku rebab. Ahirna, diajar ngarebab. Sanggeus bisa terus milu ka Adang Sutarya. Harita mah, Adang ge ukur kakara jadi dalang beurangna. Beuki lila ki dalang beuki sohor, ahirna mah manggungna ge meh unggal peuting.

"Sakaterang Emang, naha sok aya nu ngawayang teu direbaban?"

"Ah, teu aya, Cep."

"Naon margina?"

"Atuda tukang rebab mah sanes wae purah nungtun haleuang dalang, tapi sinden deuih."

"Mung Abdi kantos lalajo wayang, tapi teu direbaban," ceuk Yuda.

"Tah, duka nya upami kitu mah. Da sakaterang Emang mah, sadaya nu ngawayang ge sok direbaban," ceuk Mang Salim.

"Dupi Emang emut keneh, waktos kacilakan teh bade manggung di mana?"

"Di Pasir Ibun. Kantos ameng ka Pasir Ibun?" Pa Salim nanya.

"Teu acan. Mung upami ka Pasir Caringin mah kantos."

"Tah ti dinya mah, kantun ka kidul, meuntas pasir. Kinten-kinten sakilo tina pudunan nu pangnetekna, aya lembur. Tah, di dinya pimanggungeun teh. Emang mah apal pisan ka eta lembur teh, da manggung di dinya teh tos ngatilukalian, sakali sareng Pa Anung Sutarya, dua kali sareng Adang Sutarya. Mung nu kaopat mah bolay, da kacilakaan tea," pokna nyoreang mangsa ka tukang.

"Dupi kacilakaanana palih mana?"

"Di lebah wewengkon Pasir Caringin, dina pudunan upama arah ti dieu mah."

Ingetan Mang Salim seger deui. Pangalaman nu kungsi sirna jul-jol narembongan deui. Pamungkas milu kana rombongan teh, harita basa rek manggung di Pa Romli, di Pasir Ibun.

Harita mah, jarang keneh kandaraan. Rombongan teh sok kana treuk. Indit bareng kaasup dalang. Mang Salim diukna di tukang, meped sisi. Ki Dalang mah di hareup, jeung supir kaopat sinden, duaan. Waktu mobil mudun, ban hareup nu kenca ngabeledag, bitu. Mangkaning keur mudun. Mobil ngagaleong ka kenca, brus ka jungkrang. Waktu mobil gugulutukan dina gawir jungkrang, Mang Salim kapangpengkeun ka gigir, ngagebut kana batu nyangigir. Siku kencana ancur. Rombongan nu salapan welas urang teh, nu salamet mah ngan saurang, Mang Salim, tukang rebab.

Sajeroning Yuda nyusud nu tumali jeung uwana, Yaomil Anwar, ge ngutak-ngatik data ti Yuda. Sakur nu dikirimkeun ku Yuda dititenan gemet naker. Tapi, Yaomil ge can bisa nyindekkeun kumaha jujutan nu sabenerna.

"Kumaha cekap datana, Kang?"

"Ah, sok we aya keneh mah."

"Kumaha kasimpulan Akang?"

"Nu mana tea?"

"Muhun perkawis uwa ka luar ti koran Surya Medal?"

"Kawasna mah tumali jeung tulisanana."

"Seratan nu mana?"

"Ngeunaan dalang Adang."

Ke asa teu kahartos, kumaha wincikanana. Yaomil ngahuleng. Jajangkungna mukaan catetan nu ditunda katuhueunana.

"Wa Sukma nulis ngeunaan pangbagea masarakat ka dalang sohor. Beritana ditulis tanggal 6 Agustus. Dina poe eta keneh, aya tulisan ngeunaan Dalang Adang didakwakeun ka pulisi lantaran ngawiwirang nu hajat. Ki dalang teu datang ka nu hajat. Tapi, wartawan tacan meunang jawaban ti Dalang Adang. Isukna, aya berita dalang Adang maot lantaran treukna terjun ka jungkrang jerona tina beungeut jalan teh dua ratus meter. Dasarna batu taringgul!"

"Jadi kasimpulanana?"

"Uwa nulis warta fiksi, lain sabenerna!"

"Ah, moal mungkin!" Yuda namalang.

"Ke heula apan can tamat nyaritana ge."

"Nulis fiksi, atawa salah nulis?"

"Maksudna?"

"Nu ditulis ku uwa, lain dalang Adang, tapi nu sejen."

"Eta ge teu mungkin," Yuda keukeuh teu mikeun upama uwana kitu peta.

"Atawa, uwa kasamaran tingal. Nu ditulis ukur titingalianana atawa dedengeanana," gerentesna.

Yuda ngahuleng. Gilig, rek nanyakeun langsung ka uwana. Sakali ieu, uwa kudu balaka. Ngan, mun teu betus, Yuda rek nembongkeun pakta-paktana. (*)

Sambungan ti Bagian 7

Ensa Wiarna