Si Kabayan Koret

Sanggeus Si Kabayan indit ka balong rek ngala lauk jang nyuguhan sobatna, Si Iteung nyampeurkeun ka sobatna Si Kabayan tea. Pok ngomong.

Si Iteung: "Ayi geus nyaho can kalakuanana Si Kabayan waktu ayeuna?"
Sobat: "Acan, na kumaha kitu?"
Si Iteung: "Bisi acan nyaho, ayeuna Si Kabayan jadi robah pangadatanana, ti saprak gering panas."
Sobat: "Kumaha pangadatanana teh?" bari semu reuwas.
Si iteung: "Teu kaop aya semah cicing lila di imah, sok neunggeulan ku halu, sanajan semah sobatna oge."
Sobat: "Baruk kitu adatna teh?"

Teu lila sobatna terus pamitan rek balik da sieuneun ku Si Kabayan.

Si Iteung : "Alus atuh, ulah eureun-eureun leumpangna bisi Si Kabayan ngudag."

Sanggeus Si Iteung beberes, torojol Si Kabayan datang mawa lauk sagede bitis maksudna jang nyuguhan sobatna dahar.

Si Kabayan: "Iteung kamana ari sobat kami?"
Si Iteung: "Euh, tadi oge balik teu beunang dicarek ku kami teh, pundung meureun, dumeh aya pamenta."
Si Kabayan: "Pamenta naon ?"
Si Iteung: "Menta halu, ku kuring teu dibikeun, da puguh halu ngan hiji-hijina."
Si Kabayan: "Naha atuh halu-halu bae meni teu mikeun, kadieu haluna ku kami rek di susulkeun!"

Deregdeg Si Kabayan lumpat bari ngacungkeun halu, supaya katempoeun ku sobatna bari gogorowokan. "Ki sobat, Ki Sobat ieu halu teh, kop bae mere jang kenang-kenangan...!"

Sobatna barang nenjo Si Kabayan ngudag bari ngacung-ngacung halu, ngan berengbeng bae lumpat satarikna, disangkana rek diteunggeulan ku Si Kabayan. (*)