Malati Beureum (Bagian 2)
"Kang Dipa...!!!" Ratimaya ngoceak, kabawa ngajengkang.
"Teu kapok-kapok, hah!"
Gebeg! Di antara nu opat urang, ngabedega aki-aki jangkung gede, Bah Jatma salaki Ratimaya.
"Nangtung!" Bah Jatma mureleng ka Ratimaya.
Maksakeun rek nangtung.
"Pipilueun, modar siah!" Nu saurang nyentak. Ngamang-ngamang bedog.
Teu bisa kukumaha. Tungtungna ngayekyek bari leungeun nyampa tarang anu karasa peurih.
"Nangtung siah...!!!" Jekuk, angen Ratimaya ditajong satarikna.
"Ampuunn...!" Nu keur emok ngajengkang deui.
Hudang rurusuhan, gabrug kana suku bah Jatma. "Hapunten abdi, Kang!"
"Tangkurak siah!!!"
"Ampuuunnn...!" Ratimaya koceak-dengek. Buukna dijenggut, laju digusur dibawa ka sisi talaga. "Kang Dipaaa...!!! Tulungan abdi, Kaaang...!!!"
"Sok!" Deui-deui manehna ngancam basa ningali kuring rek cengkat.
Ambek nyedek tanaga midek. Ningali bebene dikitu-kitu, hate leutik teu mikeun. Sarebu kali sieun, keukeuh teu mikeun. Teu suka, sok sanajan awak teu walakaya. Napsu jujul ngalaputan hulu.
Bah Jatma salakina anu sah, tapi katresna kuring jeung Ratimaya geus saati, teu bisa dipukahkeun kitu bae. Kari-kari kudu ditunggel ku cara nu teu adil. Alatan serab ku harta jeung disingsieunan ku pangancam, kolotna maksa Ratimaya sangkan daek dikawin ku Bah Jatma. Teu rido!
Kapalang carambang! Leungeun ngaragap cangkeng. Reugreug. Nyampeurkeun ka palebah nu keur ngamang-ngamang bedog.
Nu disampeurkeun rancingeus masang kuda-kuda. Bedog dipalangkeun lebah dada.
Heeaaattt...!!! Satengah nubruk peureup ti pepereket narajang dada kenca. Tarik bangbaraan.
Enteng pisan, panarajang ditahan ukur ku sabetan bedogna.
Ngarasa tipuan keuna, buru-buru leungeun katuhu ditarik, bedog nyamos ngakan angin. Sakilat suku kenca nyuruwuk ngala pingping kenca. Nu diserang katingali reuwas, teu nyangka lamun teunggeulan nu tadi ukur tipuan. Buru-buru mulangkeun sabetan bedogna ka belah katuhu nadah suku sataker-kebek. Katingali lebah puhu leungeun katuhu aya lolongkrang, sakilat nurunkeun suku, peureup nu tadi ukur nipu, diteunggeulkeun deui sakebekna. Hasilna, musuh ngajorowok, leungeunna ngerepeng, bedog leupas tina leungeunna.
Kasempetan kitu teu diantep, suku katuhu ngabelesat deui ngala beuteung. Plak! Ditahan ku leungeun anu masih keneh komper. Hiuk, peureup nyuruwuk nyusul tepus. Jedak! Nenggel pisan kana dada.
"Tobaaattt...!!!" Awakna ngadayagdag, muringis nahan kanyeri.
"Deuleu cokor siah!!!" Ngahaja ngareureuwas.
Manehna rikat melong kana suku. Padahal, sakilat leungeun asup kana jero baju. Bedog leutik nyuruwuk kana lebah beuheung. Plek! Kulahek, berebey getih seger maseuhan beuheungna. Gubrag! Kerejet! Kerejet! Teu empes-empes deui.
Nu duaan deui mata simeuteun. Teu nyangka lamun babaturanana bakal ngalaman kajadian kawas kitu. Kajadian anu kacida cepetna.
Ngarasa gede hate, buru-buru muru ka nu duaan.
Silih reret. Nu saurang unggeuk maling reret ka baturna. Bari undur-unduran basa ditarajang teh. Saterusna lumpat muru ka lebah Bah Jatma. Nu saurang deui ngagajleng ngajauhan.
"Ampuunn...!!!" Ratimaya renghap-ranjug, langlayeuseun. Disela-sela biwirna aya getih ngalembereh. Bajuna jibreg. Ngarumpuyuk teu walakaya balas disiksa jeung dilelepkeun kana jero talaga ku Bah Jatma.
"Tobat, Nyaiiii!!!" Teu wasa ningalina.
Leungeun ngadegdeg, bedog anu masih keneh aya getihan malik ngarah ka Bah Jatma.
Dua jeungkal deui congo bedog nepi kana dadana, deui-deui aya nu ngabongohan, nenggel pisan kana puhu ceuli. Jedak! Bru, katurelengan. Bedog leupas tina leungeun.
Aya nu ngagakgak bari kukubuk.
"Modaaarrr siah!!!" Antara sadar teu sadar, Bah Jatma ngaheumbatkeun bedog. Lenyap...kabur sakabeh pangacian.
"Tahan!"
Memeh keuna, sajorelat aya anu datang bari ngetig pigeulang Bah Jatma.
Bah Jatma muringis nahan kanyeri.
"Eling, eum!" Nu anyar datang ngagebeg-gebeg awak bari babacaan.
"Wa!" Ukur sakitu.
Les! Teu inget di bumi alam.
-=oOo=-
Bau malati saeutik-saeutik ngurangan. Sirah teu balideg teuing. Alam dunya eureun muterna. Nu sesa kari awak anu rarincug jeung seah angin dibarung ku hujan ngaririncik.
Lalaunan beunta.
Ret.
"Wa!"
Nu ditanya ukur imut. Teu kawas tadi sore. Ayeuna mah darehdeh deui cara sasari.
"Aya naon ieu, Wa? Ku naon abdi?"
"Inum heula!" Si Uwa ngasongkeun gelas.
Regot, sababaraha kali. "Ning seueur jalmi?" Nguniang.
"Lain aya naon-aya naon, calutak sia mah!" Mang Warman jol awong-awongan bari ngaheumbat rek nampiling.
Sakilat Si Uwa nepak. Terus mureleng. "Ieu kabeh gara-gara sia, Warman!"
"Entos atuh Kang! Entos isin. Hapunten abdi, teu aya niat sakedik ge bade kikituan!" Sora Teh Eva haroshos, hing we ceurik bangun kanyenyerian.
Ngalieuk ka tukang. Geuning?
Beh juru Teh Eva tungkul bari carinakdak, diuk dina korsi panjang. Gigireunana, Mang Warman ngagigidir beungeutna atah-beuleum.
Di tukangeun korsi panjang, babaturan keur ngajoprak dina kasur jiga baloboran getih. Keur digugulung ku babaturan nu sejen, katingali beungeutna sarepa.
Beuki teu ngarti.
"Wa...?!"
"Antosan sakedap! Tah ning!"
Gebeg! Dunungan kuring urang Taiwan asup ka rohangan rurusuhan, dituturkeun ku Bu Sarah, pamajikanana.
Babaturan ngadeukeutan dunungan. Ngaharewos bari mencrong ka kuring. Duh, jadi teu genah rarasaan.
Sanggeus ting kuciwes, gek hareupeun Si Uwa.
"Sebenarnya apa yang terjadi?" Dunungan muka obrolan.
"Euuu..." Si Uwa bangun seunggah. Ret ka Mang Warman, ret ka pamajikanana.
"Bicaralah!"
"Mangga!"
Sarerea nahan napas, mencrong Si Uwa.
"Ieu kajadian mimitina tina kasalahan Jang Warman..."
Sarere ngareret ka Mang Warman.
"Tentu Bapa masih ingat setahun yang lalu, ketika membuat pondasi dan meratakan tanah ini dari yang asalnya lembah-lembah dan jurang menjadi dataran."
"Ya!"
"Di ieu tempat aya tilu lokasi kuburan anu gede."
Unggeuk.
"Bapa nyuruh saya untuk memindahkan isi kuburan dengan cara Islam ke tempat yang telah Bapa siapkan, dengan upah per kuburan 500 rebu."
"Terus?"
"Keur ngejar target, disamping menyuruh saya, Bapa oge miwarang Mang Warman, nya?" Ngareret ka Mang Warman.
Nu direret beuki tungkul. "Sumuhun, rumaos."
"Naon maksadna Akang nyarios rumaos?" Teh Eva ngareret.
"Rumasa, hayang untung tina enteng."
"Maksadna?" Panasaran.
"Akang teu mindahkeun eusina, tapi ukur nyabut tetenggerna hungkul. Terus nyieun kuburan bobodoan, luhurna dipasang tetengger nu nang nyabut tea. Bebeja mah geus beres we."
"Jadi?!" Dunungan molohok, teu percaya.
"Hartina, aya puluhan bahkan ratusan kuburan di bawah pabrik ini."
"Gustiiii...! Ari Akang nanaonan atuh?!" Teh Eva ngajerit.
Sarerea colohok. Paingan atuh mindeng pisan aya anu kasurupanana.
"Ke! Ari hubunganana sareng kajadian ieu, kumaha?" Motong obrolan.
Samemeh ngajawab, Si Uwa ngarenghap jero naker.
"Sabenerna mah teu kahaja." Ngusap beungeutna. "Gustiii, aya-aya wae atuh!"
Sarerea nahan napas.
"Ku Uwa ge teu ka jamanan kumaha kajadianana mah. Apal soteh dongeng ti kolot. Harita jaman gorombolan aya kajadian anu biasa-biasa sabenerna mah. Dua urang rumaja nu keur bobogohan, dipegat asih ku kolotna lantaran dipaksa kudu kawin ka aki-aki beunghar."
"Najan geus lain-lainna deui, tapi teu mugagkeun kana kacinta duaan. Kalah beuki sono beuki pogot." Kuring motong.
Sarerea mencrong.
"Mun salakina keur euweuh, duanana susulumputan, jangjian terus papanggih."
Si Uwa kerung. "Naha apal?"
"Sabuni-bunina nu modol, ahirna katohyan. Duanana ngemasi pati. Nu saurang dialungkeun ka jurang, nu saurang deui mah layonna ditinggalkeun di sisi talaga, nya ku masarakat dikuburkeun di ieu tempat."
"Kok kamu tahu sih, Ndri?" Bu Sarah nyelengkeung.
"Sabab eta kabeh kaalaman dina ngimpi, Wa."
Si Uwa gogodeg.
Sakabeh padungdengan, jeung masalah direngsekeun peuting eta keneh. Kabehanana silih hampura. Kuring sanduk-sanduk ka Mang Warman jeung ka Teh Eva. Babaturan nu kacilakaan langsung dibawa ka rumah sakit.
"Okeh! Saya serahkan masalah pergaiban ini sama Si Uwa!" Jung nangtung, muru ka luar.
"Kitu tah nu boga duit mah, ngagampangkeun!" Si Uwa ngagebes.
Dunungan nyerengeh.
Sanggeus nyetater mobil, dunungan ngagupayan pamajikanana. "Yu, Mam!"
"Ya udah Ndri, Ibu pulang dulu yah. Hati-hati. Kalo ada apa-apa, BBM-an aja sama Ibu. Ok!"
Unggeuk.
Selengseng, dina awakna kaambeu seungit malati.
Bu Sarah ngadilak.
Gebeg! (*)
| Sambungan ti Bagian 1 |
Cucu Rahmat
T A M A T
Reviewed by Rupa Sundapura
on
10.30
Rating:
