Sasakala Lauk jeung Sero
Numutkeun hiji katerangan mah jaman baheulana sasatoan teh kabeh bisa nyarita saperti jelema, katurug-turug boga karajaan sorangan nyaeta gabungan tina sagala sasatoan. Ari anu jadi rajana nyaeta sakadang maung, raja leuweung nu pohara pikagilaeunana tapi bijaksana.
Dina hiji poe, di eta nagara sasatoan teh aya anak sero keur anteng ulin. Keur kitu, torojol aya kuda nu kaparengan liwat ka eta tempat. Kalawan teu dihaja, eta anak sero teh katincak ku kuda. Nu jadi sabab, lantaran beungeut kuda kaeurad ku ramat lancah nu aya hareupeunana. Bari teuing ti mana bejana, eta kajadian teh ear saharita yen anak sero katincak kuda nepi ka hanteuna. Teu lila indung sero laporan ka raja.
Teu lila, raja mariksa kuda kalawan sora wibawaan.
"Hey kuda, bener anjeun geus boga dosa nincak anak sero?" tanya raja.
"Dawuh Gusti, abdi teu rumasa lepat. Pangna abdi nincak anak sero teh, abdi nuju leumpang, panon abdi tikudawet ramat lancah nu ngahaja dipasang di jajalaneun. Tuh nu lepat mah lancah, juragan."
"Bener sero, nu salah mah lain kuda tapi lancah. Lancah, naha bener maneh masang ramat di jalan?" raja nanya ka lancah.
"Leres ari masang ramat tea mah. Ngan sanes bade ngajaring kuda, tapi keuheul ku papatong bongan gawena ngan ngengklak bae ngigel. Maksad teh ku abdi bade dijaring. Janten nu lepat mah papatong," ceuk lancah.
"Bener maneh papatong gawe ngan ngengklak bae? Ngigelan saon?"
"Nun Gusti, abdi teu lepat da abdi mah ngigelan bangkong soteh bongan sakadang bangkong teu eureun ngendang bae, nya ku abdi diigelan. Jadi tuh nu lepat mah bangkong," tembal papatong.
"Bangkong, naha maneh make ngendang bae?" raja nanya ka bangkong.
"Gusti abdi teu lepat da abdi mah sanes ngendag tapi seuri, nyeungseurikeun tutut da mani agul boda imah ngan dibabawa bae ka mamana."
"Tutut, bener maneh ngan mamawa bae imah, naon sababna?"
"Abdi mamawa bae imah teh sabab abdi sieun ku cicika, sieun diduruk da mamawa bae seuneu."
"Hey cicika, naha maneh mamawa bae seuneu? Enya rek ngaduruk imah tutut?" raja nanya ka cicika semu ambek.
"Gusti, pangna abdi mamawa seuneu teh abdi mah neangan keuyeup bongan sok ngorowotan bae tambakan balong, upami ku abdi dicaangan mah liren ngorowotan tambakanana teh," tembal cicika bari lumengis.
"Keuyeup naha maneh sok ngorowotan tambakan balong?"
"Nun Gusti, abdi teu lepat da abdi mah ngorowotan tambakan balong soteh lantaran keuheul ku lauk anu asa kapuji sing jalepret teu kaop aya cai, matak ku abdi disaatan caina ngarah teu asa kapuji teuing."
"Lauk, naha maneh make sing jalepret bae teu kaop aya cai? Sok jawab naon sababna?" raja nanya ka lauk. Beungeutna semu beureum nahan ambekan.
Lauk ukur ngabigeu, manehna kalah ngahuleung. Atuh puguh bae raja beuki ambek. Tungtungna lauk teh diprekprek ku raja.
"Tuh sero, pek hakanan lauk ku maneh, itung-itung ngagantian anak maneh nu katincak ku kuda," ceuk raja sanggeus ambekna leler.
Nya ceuk ujaring dongeng, ti harita sero teh sok ngahakanan lauk di balong. (*)
Dicaritakeun deui ku Dika (Galura)
Reviewed by Rupa Sundapura
on
13.45
Rating:
