Irtasan Meunang Kuntul

Sanajan rada deglo (bloon), Irtasan teu burung bisa hirup rumah tangga. Layeut runtut raut jeung pamajikanana. Ngaran Nyi Ikok. Pakasaban matuh Irtasan nyeta kuli ari. Buburuh macul di sawah atawa di kebon. Nyi Ikok oge tara cicingeun. Getol mantuan salaki nyiar kipayah, saperti derep, buburuh tandur, atawa buburuh ngarambet.

Selang-selang tina gawe, biasana pasosore, Irtasan sok rajeun nguseupan kuntul. Carana teu beda ti nguseup lauk bae. Make jeujeur, kenur jeung useup. Ngan jeujeurna pondok. Dicecebkeun pageh dina galengan. Dieupanan anak lauk. Cul bae ditinggalkeun. Tara didekul ditungguan, cukup diawaskeun bae ti kaanggangan.

Dina hiji poe, useup Irtasan disanggut kuntul. Teu kira-kira Irtasan bungaheunana. Saumur dumelah pasang useup, karek ayeuna kabiruyungan hasil.

Gancang diboro. Suku kuntul diparekos. Useupna ditalian. Barang useup lesok, kuntul disana. "Kok...!!!

Irtasan ngarenjag. Kuntul diperong sajongjonan.

"Geuning maneh nyaho ka pamajikan kami?" omongna semu heran.

Kuntul disada deui, "Kok...!"

"Kabeneran!" Irtasan ngarenghap panjang. "Kami ayeuna masih keneh boga kaperluan. Naheunkeun posong di lebak. Pasti nepi ka burit. Lamun maneh dibabawa tangtu matak ridu. Tah, lantaran maneh geus apal ka pamajikan kami, wayahna balik sorangan ka ditu, nya! Itu tuh, imah kami teh, beulah kidul, deukeut randu kurung. Ieu peso sakalian bawa, pakeeun pamajikan kami meuncit maneh. Ambeh engke kami datang, geus nyampak semur daging kuntul."

Sanggeus digantelan peso tikel, geleber kuntul dihiberkeun.

"Kade tong sumpang-simpang heula ka mamana...!" Irtasan ngagorowok ka kuntul nu geus kikiplik, mumbul ka luhur. Mimiti mah enya, katembong kuntul hiberna maju ka kidul. Tapi teu lila ngoreleng ka beulah wetan. Leok ka kaler. Saterusna kebat ka kulon.

Gero-gero Irtasan ti handap, "Di beulah kidul imah kami mah, kuntul!" Di beulah kidul...!"

Kuntul teu nolih. Laju ngawang-ngawang. Nepi ka lesna teu katembong.

"Emh, lebar ku peso tikel bae. Hanas dibahankeun. Sugan teh enya apal ka imah kami. Ari tadi nanahoanan atuh, make nyambat-nyambat ngaran Si Ikok sagala rupa?" Irtasan kukulutus bari teu eureun-eureun gegetret. Manehna keukeuh teu ngartieun, naon sababna kuntul nyahoeun ngaran Nyi Ikok. Cag. (*)

---

Usep Romli HM (Dicutat tina Oray Bedul Macok Mang Konod)