Nu Mulang Wanci Sareupna
Lengkahna rumanggieung, lungse jeung cape museur dina dampal sukuna, lengkahna angger mapay-mapay tarahalna jalan nu keur disorang. Leungeun kencana ngajingjing karung bagor, teuing naon eusina, naha rongsokan meunang mulungan atawa doa-doa nu teu weleh ngagalindeng dina hatena, teuing jampe nu ngaharewos kana dadana, teuing haleuang dina serat kanayagan nu ditungtungan ku notasi sumbang.
Teuing geus sabara jauh sapasang sukuna mapay-mapay tarahalna jalan, boa geus teu kaukur. Nu puguh sapanjang nyorang lalakon, dina kongkolak panonna teu weleh ngalangkang imah basajan, imah nu dipikasono ku anak incuna, tapi teuing dimana ayana.
Dirina asa nyorang sagara keusik nu kapentrang matapoe, dampal sukuna asa nereptep panas. Unggal ngalengkah asa nincak karikil-karikil warisan mangsa ngorana.
Lebah tutugan pasir bulistir, panonna neuteup pasir-pasir nu taringgul ku batu. Leng ngahuleng. Renghapna karasa asa eungap nempo layung-layung mangsa sareupna. Aya genclang herang nu ngalembereh tina kongkolak panonna.
"Ujang, Nyai, Aki mulang...," gerendengna bari nyusut cipanonna. (*)
Jejen Jaelani War
Reviewed by Rupa Sundapura
on
14.49
Rating:
