Embe Banggala

Mang Enoh boga embe banggala, teuing ku bau, da tara aya nu wani ngadeukeutan. Dini hiji poe, jorojoy aya kahayang, pangangguran rek ngayakeun saembara, saha nu kuat 10 menit dikerem dina kandang embe.

Bewarana ditulis dina papan, disebutkeun yen saha-saha nu kuat 10 menit di jero kandang embe, bakal dibere duit Rp.500.000.

Kusabab loba nu panasaran, teu kungsi lila di hareupeun kandang embe teh mani ngaliud jelema nu lalajo. Sawareh rek milu saembara. Ari kandang tea ku Mang Enoh teh ditutup ku papan mani rekep pisan. Sanggeus rengse, diwawarkeun ku nu boga embe, kumaha prakprakanana eta saembara, tuluy nu rek nyobaan teh dititah ngantay ngarah beres. Ti dinya saurang-saurang asup kana kandang nu dieusi embe tea.

Lapur ngan karuateun 2 menit, paling lila 3 menit. Unggal nu ka luar tina kandang kudu we orolo utah. Bororaah bisa ditanya ku nu lian, da kabeh kawas nu mabok. Tungtungna jelema budal, sieun, nenjo "kasaktianana" eta embe banggala.

Barang geus paburencay, pok Mang Enoh ngomong, "Saha nu bade nyobi deui...? Teu aya...?"

"Cik emang ngajaran, panasaran," ceuk saurang. Duka urang mana, da teu aya nu wawuheun ka manehanana teh.

"Mangga...!" jawab nu boga embe.

Kacida we karegeteunana, barang geus 8 menit di jero kandang, jempling keneh. Kitu deui nu boga alpukah geus lieuk deui, lieuk deui kana erloji.

Barang geus 9 menit, kadenge dor-dar dina kandang, atuh pantona tuluy dibuka. Na ana gajleng teh ayeuna mah embena nu ka luar, tuluy utah-utahan. Sihoreng embe nu eleh. Ceuk beja, eta jelema teh ngarana Jang Adun, jalma cadu mandi. (*)