Ngawayang Teu Direbaban (Bagian 4)
Mimitina Yuda teu pati kataji ku tulisan kitu mah. Ukur warta nu nyaritakeun dalang Adang (alm) beuki hade. Tapi, sabada muka lambaran sejen, nu ngarempet jeung eta tulisan, Yuda ngajenghok. "Dalang Adang dilaporkeun ka pulisi." Eta tulisan, sapoe reujeung jeung tulisan Uwa. Nu ngalaporkeunana, Pa Romli, urang Pasir Ibun.
Pa Romli ngarasa diwiwirang. Panggung geus sayagi. Nu lalajo geus noyek, tapi rombongan ki dalang teu datang. Rek ditanyakeun, da tacan aya telepon di eta lembur mah. Ketang, tong boro telepon, listrik ge can aya harita mah. Tulisan dua warta teh beda. Koranna beda, eusina patukang-tonggong. Dina Surya Medal nu ditulis ku Uwana, kacaturkeun ki dalang meunang pangbagea ti nu lalajo. Tapi, dina berita sejen, Pa Romli ngalaporkeun dalang Adang ka pulisi. Naha bet patukang tonggong kitu? Yuda ngahuleng.
Yuda terus maca nepi ka tamat. Intina nu hajat ngarasa ditipu ku dalang Adang. Jangji rek datang malah geus dipanjer, tapi teu datang. Ngan, di dinya ge disebutkeun can meunang katerangan ti dalang Adang. Salambar deui, aya keneh berita sual dalang Adang. Tapi eta mah can waka dibaca ku Yuda teh. Yuda ngilikan tanggalna. Warta nu ditulis ku Uwana tetela satanggal jeung warta pangaduan Pa Romli di koran sejen, sarua tanggal 6 Agustus.
Yuda mikir, naha Adang teh narima panyeureuhan ti duaan kitu? Saha nu salah? Naha dalang Adang nu kaliru, atawa Pa Romli nu hajat tea nu kaliru nyeureuhan ka ki dalang. Da geuning Adang dina poe eta mah ngadalang di nu sejen.
Saterusna, Yuda ngilikan deui lambaran sejenna, nu can kabaca tea. Di dinya kabaca, rombongan dalang Adang Asup ka jungkrang. Eta warta teh, heuleut sapoe tina warta nu ditulis ku Uwa. Di dinya dituliskeun, cenah, Dalang Adang maot di tempat kacilakaan.
Yuda bingung. Naon hubunganana tulisan Uwa jeung dua warta nu ditulis dina koran sejenna? Yuda weleh teu ngarti. Kapanasaran Yuda ka Uwana beuki nambahan. Tapi, da harita mah teu bisa langsung nanyakeun ka Uwana.
Yuda heran, warta-warta nu dikliping ku Uwa teh taya hartina, ceuk Yuda mah. Ukur warta nu geus heubeul nu taya pangaruhna keur dangka lila. Berita dalang sohor, dalang nu diadukeun ka pulisi, jeung kacilakaan mah ilahar. Tapi naha Uwa siga nu nganggap penting kana eta berita teh?
Yuda jangji, naon wae tulisan ngeunaan Uwa, rek dibejakeun ka Yaomil. Kulantaran kitu, ti tempat motokopi teh langsung ka imah Yaomil. Tulisan ngeunaan nu tumali jeung dalang Adang dibikeun ka Emangna.
Yuda neangan deui tulisan sejenna, pangpangna nu sakira-kirana tumali jeung dipecatna Uwa ti koran tea. Nu ceuk taksiranana, sual tender jalan layang jeung sual pabrik Liem Huang, nu cenah teu jadi kasabet walungan, taya beritana di Uwa mah. Padahal, ceuk beja sejen, tina kasus eta di antarana nu ngalantarankeun Uwa dipecat. Uwa ngawartakeun rarancang walungan nu mun dilempengkeun bakal ngadobrak pabrik. Cenah, Uwa ge kabagean jatah, sabab milu nguruskeun eta pabrik sangkan teu keuna ku proyek. Naha enya kitu Uwa ge kabaud kana skandal pabrik Liem? Yuda tacan meunang katerangan.
Waktu balik lalajo wayang, isuk-isuk, Uwa nyimpang heula ka hiji imah tungtung lembur nu geus deukeut ka kota. Teu lila, da Pa Lurah, pribumi tea, teu kasampak. Saur bojona, ti kamari keneh ka kota rapat di kabupaten.
"Saurna mah rapat perkawis lomba desa," saur Bu Nisa, bojona Pa Lurah. Desa Sampalan kaasup salah sahiji desa nu diilukeun kana lomba desa tingkat propinsi.
Uwa rek nulis ngeunaan eta desa. Lain rek nulis sual lomba desana, tapi rek nulis sual kalaparan Kalapa Dua, nu kabawah ku eta desa. Kari konfirmasi Pa Lurah, da bahan ti lapangan mah geus cukup.
Sanggeus, maren pancen, Pa Lurah pindah ti Kadu Kolot, ka wewengkon rada kota. Ngan nya kitu, sual umur mah teu bisa dibade. Kakara lima taun nyicingan eta imah, Pa Lurah maot. Saterusna, imahna dibeuli ku Uwa, da bojo Pa Lurah mah mulang ka lemburna di lebakeun Pasir Masigit.
Uwa boga sawah tilu kotak di sisi lembur Mang Kana. Ieu panyawah teh, mindeng mondok di Uwa, sakalian mangmeresankeun buruan imah. Peutingna Uwa sok dipijet ku Mang Kana, da sohor di lemburna mah, manehna teh tukang urut.
Sajeroning mukaan kliping koran, Yuda inget ka Mang Kana. Ceuk pikirna, Mang Kana apaleun kana lalakon hirup Uwa, copelna leuwih loba kanyaho batan manehna. Sahenteuna, mindeng sagulung-sagalang, mindeng ngawangkong.
Yuda tara wani cakot-cokot upama teu diidinan ku Uwana. Tapi harita mah kabiasaanana kitu teh dilanggar lantaran panasaran. Kliping nu tumali jeung warta dalang tea, dipotokopi, dipasrahkeun ka Yaomil.
Aya kana sawelas kalina Yuda jeung Galih ka lembur Atim. Bahan-bahan nu tumali jeung skripsina dianggap cukup. Loba dongeng nu kacatet, di antarana urang Sampalan cadu ngalalakonkeun Karna Tandingan, lalakon sempalan Mahabarata nu nyaritakeun perang tanding Arjuna jeung Dipati Karna.
"Duka margina mah, mung nu tetela, saban nanggap eta lalakon sok aya kajantenan riributan, pangpangna mah nu garelut," ceuk Pa Hadori.
Sakurang-kurangna, dua minggu sakali Mang Kana datang ka Uwa. Tapi harita mah geus meh sabulan, teu datang-datang. Kapaksa Yuda ngahaja datang ka imah Mang Kana, dibarengan ku sobatna, Galih.
Ngahaja inditna teh pasosore, rek moro mondok. Make motor Galih, Honda Tiger, da nu Yuda mah Vespa, matak barabe dipake nyorang jalan taringgul mah. Nepina ka panyabaan bada Isa. Memeh ka imah pribumi, nyimpang heula ka tajug. Ti dinya mah ukur kahalangan ku kebon ka imah Mang Kana mah.
"Punten!"
"Saha?"
"Abdi, Mang."
"Cep Yuda?" Mang Kana apaleun kana sora Yuda.
"Muhun!"
Kolotrak panto muka. Lol Mang Kana ngelol, masih keneh dikopeah jeung disarung. Taksiran, kakara tas solat Isa.
"Pa Sukma damang?" Mang Kana nanyakeun Uwa. Kitu sesebutan Mang Kana ka Pa Teja Sukma teh.
"Pangesto. Sawalerna, Emang sareng Bibi?"
"Alhamdulillah!"
"Aya naon atuh mani rareuwas?"
"Ah, teu aya nanaon, Mang. Sono we tos lami teu tepang."
"Puguh enya. Emang teh tacan kaburu ka ditu, lantaran rariweuh, kapaksa kudu menerkeun cai unggal peuting, da mun teu kitu mah lapur, moal kabagean. Cai susukan moal nepi ka sawah garapan Emang mun teu dikocorkeun ti tonggoh mah."
"Saban usum halodo kituna teh, panginten?"
"Ah, kaayeunakeun we, Cep. Kapungkur mah, najan halodo ngampleng ge cai mah mayeng. Ngocor!"
"Teu acan taruang, panginten nya Cep?" Bi Onah, bojo Mang Kana nyelengkeung.
"Atos di jalan."
"Muhun, nembe di warung pengkolan ka dieu."
"Nyangu we atuh!" Mang Kana nitah bojona.
"Entong, Bi. Leres wareg keneh!"
"Opieun we atuh!" ceuk pribumi ka bojona.
Bi Onah ngojengkang ka dapur. Teu kungsi lila kadenge ngajirijis, kaambeu goreng ranginang.
Sanggeus ngasongkeun susuguh, ranginang jeung cai enteh, Bi Onah mah ngoloyong ka pangkengna. Teu milu ngobrol. Tunduh, cenah.
Obrolan Yuda teu tongmol nyaritakeun Uwana. Mimitina mah kitu we, sual tatanen jeung kaayaan di lembur masing-masing. Ngan lila-lila mah teu burung nyambung jeung nu dimaksud.
Teu kudu dipancing. Ahirna mah obrolan teh murudul jeung museur kana pangalaman Mang Kana salila ngadunungan ka Uwa.
"Cing naon pangalaman Emang nu teu weleh emut wae, salami Emang wanoh ka Uwa?"
"Naon nya? Seueur atuh!"
"Di antawisna, Mang?"
"Naon nya?" Mang Kana malik nanya.
"Ieu deuih, Mang. Kantos teu Uwa sasauran pangna ka luar ti Surya Medal?"
"Tah, eta mah, leres-leres Emang teu terang. Seueur nu diobrolkeun ka Emang teh, tapi perkawis nu tumali sareng anjeunna ka luar ti padamelan mah henteu. Seseringna mah nyarioskeun lalakon wayang."
Uwa kacida resepeunana kana wayang. Pajarkeun teh loba luang jeung pangalaman. Ngan, Uwa mah teu resep ka kabeh dalang, da nu pangdipikaresepna mah nu ngadalang gugon kana pakem. Resep ngabandungan lalakonna.
"Sakapeung cariosan Pa Sukma mah teu pikahartoseun," ceuk Mang Kana.
"Cariosan sual naon, Mang?" Galih semu panasaran.
"Muhun perkawis rupi-rupi kajantenan nu ditumalikeun sareng lalakon wayang."
"Euh kitu, Mang?"
"Muhun!"
Galih semu heran. Ari Yuda mah teu ngarasa aneh teu sing, da tiheula ge Mang Kana kungsi nyarita kitu. Ngan, pohoeun deui meureun. Saterusna Mang Kana cacarita. Hiji waktu, basa manehna mondok di Uwa, kadenge sora dalang tina radio. Lalakonna, nyaritakeun Dwarwati Dileled Ombak. "Malih, eta carios teh dugi ka noron tilu kali," ceuk Mang Kana.
"Teu aya deui lalakon sanes panginten, Mang?" ceuk Galih mairan.
"Bisa jadi kitu. Tapi, ketang da biasana ge ganti-ganti lalakonna teh."
"Mung waktos emang milarian kaset eta lalakon di saban toko, teu mendakan," ceuk Mang Kana.
Perkara radio, memang boga carita mandiri. Pa Lurah ge narima eta radio ti Mang Juhdi, urang lembur nu perenahna deukeut Pasir Caringin. Manehna katitipan ku nu ngakukeun sobat Pa Lurah. Kitu ceuk Mang Juhdi.
"Kitu Mang? Abdi mah nembe nguping ayeuna!"
"Perkawis eta mah, tiasa disusud ka Bu Lurah, Bu Nisa, sareng ka Aseng," ceuk Mang Kana.
Tina nyaritakeun wayang dina radio, obrolan teh bras we ka para dalang. Mang Kana mah apaleun pisan ka dalang-dalang sohor teh. Di antara dalang kameumeutna teh, Adang Sutarya nu tilar dunya lantaran kacilakaan. Ki Dalang dirojong ku nayaga nu geus maroyan. Malah, sinden (Isah Karyati), alok (Saman Wijaya), jeung tukang kendang (Ajum Jumena nu oge katelah Si Brangbrang), kaasup rengrengan seniman nu sohor ka jauhna.
"Geunjleung waktos kajantenan kacilakaan harita mah," ceuk Mang Kana.
"Emang ngaraos leungiteun atuh?"
"Kantenan. Malah, ku resep-resepna ka Adang Sutarya, dalang sanes ge sok kakuping teh asa ngadangu dalang Adang we," ceuk Mang Kana mesem.
"Kitu nya Mang?"
"Muhun. Ketang da seueur dalang nu niron-niron Adang Sutarya."
"Kutan!"
"Leres. Cobi we bandungan. Nu disiarkeun di RRI, sapertos nu sering kabandungan ku Emang waktos mondok di bumi Pa Sukma, apan soanten dalang teh mirip Pa Adang. Ngan hanjakal ka dieu mah teu katangkep. Saban Malem Salasa jeung Juma'ah, sok ngahaja muter-muter radio hayang ngabandungan carita wayang saperti nu sok kadenge dina radio Uwa hidep. Ngan, lapur, teu katangkep di lembur Emang mah," Mang Kana semu handeueul.
Yuda apaleun, siaran wayang teh lain ti RRI, tapi ti studio sejen. Kanyahona kitu, teu dibejer-beaskeun ka Mang Kana, bisi kapapanjangan. Yuda jeung Galih mah percaya teu percaya, sabab teu kungsi apal bener-bener Kana sora dalang Adang teh. Ketang, da maranehna mah arang ngabandungan carita wayang.
Nu salamet tina kacilakaan teh tukang rebab (Mang Salim). Disebut salamet teh, pedah teu nepi ka misan, da cilaka mah angger. Malah leungeun kencana nepi kana siku diamputasi. "Tah, Mang Salim mah gaduh murid, nu katelah Salim Muda nu namina aslina mah Samsu. Pedah dina ngarebab boh kesetna boh gayana, bleg we Mang Salim waktu masih keneh bisa manggung," ceuk Mang Kana.
Sajeroning ngobrol, Yuda mah teu weleh kutrat-kotret nyieun catetan. Pangpangna nyatetkeun ngaran-ngaran nu ditataan ku Mang Kana nu perelu ditepungan. Sakurang-kurangna, kudu nepungan Bu Nisa (bu lurah), Mang Salim, Mang Aseng, jeung Mang Ahya tukang bajigur nu tepung dina wayang sawatara taun ka tukang.
Samemehna, Yuda nyatet ngaran Mang Ahya, nu ceuk pikirna pantes ditepungan, sabab kabeneran dagang dina wayang nu dalangna Adang Sutarya. Ras kana dongeng Mang Unab, nu nyebutkeun bapana kungsi manggih pangalaman aneh dina wayang. Ngan, dongeng Mang Unab teh ngagantung, kaburu aya nu sejen nu menta diladangan bajigur.
"Naha enya bapa Mang Unab teh Mang Ahya nu kungsi tepung welasan taun ka tukang waktu lalajo wayang di tatangga lembur Atim?" Yuda ngagerentes. (*)
| Sambungan ti Bagian 3 | Nyambung ka Bagian 5 |
Ensa Wiarna
Reviewed by Rupa Sundapura
on
20.16
Rating:
