Ngawayang Teu Direbaban (Bagian 5)

Isukna, Yuda jeung Galih balik ti lembur Mang Kana. Di warung sisi jalan, reureuh heula. Yuda ngajak sobatna nepungan Mang Ahya.

"Mun aya waktu, urang ulin ka Mang Ahya."

"Iraha?"

"Mun bisa mah Saptu ayeuna."

"Naha apal kitu alamatna?"

"Nya urang nanyakeun we ka Mang Unab"

"Har naha apaleun kitu?"

"Puguh we, da bapana."

"Kutan?"

"Enya. Geus dipuguhkeun ka Atim."

Sajongjongan Galih ngahuleng. Nginget-nginget bisi aya pagawean sejen. Teu kungsi lila nyarita. Cindekna mah nyanggupan.

"Insya Allah da moal ka mana-mana."

"Urang isuk-isuk we nya."

"Nya teu nanaon. Kuma nu ngajak we."

Isukna, Yuda ngahaja datang ka imah uwana. Galih ge ngahaja datang ka dinya. Maksudna mah hayang ngadengekeun pamanggih uwa ngeunaan lalakon Karna Tandingan.

Maksud Yuda jeung Galih tangtu beda. Nu saurang mah keur bahan skripsi, nu saurang deui mah lantaran kajurung ku kapanasaranana. Yuda kungsi ngadengekeun carita Karna Tandingan tina radio uwana. Ngan teu tamat da harita teh kaburu tunduh.

Basa Galih nepikeun maksudna rek nyieun skripsi nu jejerna sual pantrangan-pantrangan di lembur-lembur sabudeureun Pasir Ibun, babaturanana mah loba nu ngageuhgeuykeun.

"Ah, ente mah kawas lain mahasiswa wae kalah percaya ka nu kararitu," ceuk Dayat, babaturan ulinna.

"Ih, lain sual percaya teu percaya. Uing mah nulis nu kitu soteh dumeh we kabandungan keneh aya nu teu wani ngarempak kana eta pantrangan. Ari keur sorangan mah teu rek kapangaruhan ku pamanggih masarakat. Nu jelas mah, kanyataan kitu aya di masarakat. Kadar eta, aya nu percaya aya nu henteu, kumaha karep," pokna.

Ngobrol jeung uwa, harita mah museur kana sual carita wayang. Uwana resepeun pisan dibawa ngobrol sual wayang teh.

"Hayang apal mah baca we atuh bukuna."

"Uwa kagungan kitu?" ceuk Galih. Nyebutna ge sarua 'uwa' nurutan sobatna.

"Aya. Tuh we teangan dina rak nu dijuru!"

Rak buku teh dua. Hiji di tengah imah, hiji deui di kamar tukang. Teu loba nu dina rak kamar tukang mah. Eusina ge husus buku-buku karandel. Di dinya aya buku-buku tarjamahan tina buku deungeun saperti Monte Cristo karya Alexander Dumas, Kejahatan dan Hukuman karya Fyodor Dostoyevsky, Insomnia karangan Stephen King. Lian ti eta aya dua buku babon carita wayang. Ieu tarjamahan tina buku Mahabarata karangan Viyasa jeung Ramayana karya Walmiki. Keur Galih mah penting lantaran tumali jeung skripsina, copelna keur bahan babandingan antara carita nu dipintonkeun ku Ki Dalang jeung carita dina buku asalna.

Ngobrol teh nepi ka satengah dua welas peuting. Uwana ngagoloyoh ka kamarna. Yuda jeung Galih morongkol di tengah imah. Yuda mah di handap ukur disamakan, ari Galih mah dina korsi panjang.

Di uwana taya TV. Minangka hiburan teh ukur nyetel radio. Mimindengna mah nyetel berita luar negeri, saperti VOA, BBC, jeung ABC. Tangtu deuih, uwa saban peuting muter-muter gelombang radio, neangan wayang.

Angkanan mah, memeh sare teh rek kalaluar heula. Rek meuli sangu goreng di parapatan jalan. Bukana sapeupeuting, nepi ka subuh.

Sajungjungeun, sanggeus ngarawel jeket, Galih jeung Yuda teu tulus ka luar. Harita teh, kadenge hujan miripis. Hujan nu dianti-anti patani, lantaran geus aya kana dua bulanna halodo. Mangka pare mah rambeteun. Lapur, bakal kagaringan upama teu aya hujan sabulan deui mah. Yuda jeung Galih tinggoledag deui dina pangsarean masing-masing.

Kakara ge rek ngalenyap, kadenge sora gamelan. Saperti biasa, carita wayang tina gelombang eta mah taya panganteurna. Ujug-ujug der weh, sakapeung nu kadenge mimiti teh sora sinden, nu ngahaleuangkeun lagu Kembang Gadung. Taksiran, sora radio teh kadengeeun ku uwa oge. Da ujug korejat weh. Cinekul, terus ka luar ti pangkeng, ngajingjing radio diteundeun dina meja hareupeunana.

Ningali uwana ngorejat deui, Yuda jeung Galih ge hudang. Pitunduheun nu geus ngagayot dina kongkolak panonna ilang sapada harita.

Koloyong Yuda ka dapur. Ninyuh cikopi tiluaneun.

"Mending ge urang ngadengekeun wayang," ceuk Uwa bari nyetrekeun lampu kamarna sina poek. Nu hurung mah ukur tengah imah jeung lampu dina lalangit teras hareup.

Sanggeus lagu Kembang Gadung, Ki Dalang muka carita, ngagambarkeun pihak Astina nu keur tatan-tatan ngayonan balad Pandawa di Tegal Kurusetra. Perang antara Kurawa jeung Pandawa asup kana babak Bisma kagiliran jadi panglima perang.

"Geus dua kali lalakon Bisma Gugur. Peuting ieu nu katilukalina," ceuk Uwa ngagerentes.

"Teu gaduheun rekaman sanes panginten, Wa," ceuk Galih.

"Bisa jadi. Tapi..." Uwa teu kebat nyaritana.

"Tapi naon, Wa?" Yuda panasaran.

"Bisa jadi ngahaja."

Sakapeung, Mang Uleh ge tatangga uwa ngadengeeun wayang tina radio teh, da puguh imahna aya tukangeun imah uwa. Kungsi nanyakeun gelombangna, da hayang nyetel wayang saperti nu kadenge ti imah uwa. Tapi, lapur, najan digalar-gilir, gelombangna nu nyiarkeun radio teu katangkep.

Tina sababaraha kali ngabandungan siaran wayang dina eta radio, bisa dicindekkeun, kaset nu diputer teh eta keneh eta keneh, lalakon Yudistira Turun Tahta, Arimbi Ngadeg Raja, Duwarwati Dileled Ombak, Karna Tandingan, jeung Bisma Gugur. Uwa rajin nyatetkeun lalakon tina eta radio. Cenah, lalakon Destarata Turun Tahta kungsi noron disiarkeun tilu kali unggal peuting, disusul ku lalakon Arimbi Ngadeg Raja, nu disiarkeun tilu kali. Dwarwati Dileled Ombak noron tilu-tilu kali. Nu kawilang jarang, teh Karna Tandingan. Ari Bisma Gugur, geus dua kali noron, katilu kali dina peuting eta.

Hiji waktu, Yuda mah ngahaja neangan kaset carita wayang nu disiarkeun dina radio tea. Ngubek ka meh saban toko kaset. Ukur manggih dua lalakon, Bisma Gugur jeung Karna Tandingan. Waktu disetel, tetela beda jeung nu kungsi disiarkeun dina radio tea. Nu dina kaset mah nayagana ge kumplit, aya tukang rebab, aya alokna deuih.

"Kawas-kawas rek aya inohong nu maot," uwa ngagerendeng. Nyaritana alon pisan. Nepi ka Yuda mah teu tenget kana omongan uwana kitu teh. Ngan, taksiran Galih mah ngadengekeun, da puguh diukna leuwih deukeut ka uwa.

Lalakon teu kungsi tamat. Kakara ge nepi ka Bisma kapentang panah Srikandi, les weh teu kadenge. Uwa haben ngagilir-gilir gelombang radio. Lapur teu kapanggih.

Isuk-isuk sanggeus ka carai, Galih jeung Yuda ka warung. Ngadon sarapan sangu koneng di Bi Uneh. Bari nyaneut, ngabandungan warta berita tina TV. Galih ngajenghok, ceuk berita, H. Ali Sadikin, nu katelah Bang Ali, gupernur DKI manten tilar dunya.

"Innalillahi waina ilaihi raajiuun," Galih jeung Yuda ngagerentes.

Ras Galih kana caritaan uwana tadi peuting, nu nyebutkeun kawas-kawas bakal aya inohong nu mulang ka kalanggengan.

"Yuda ngadenge caritaan uwa tadi peuting?"

"Perkara naon tea?"

"Saur uwa, kawas-kawas bakal aya inohong nu tilar dunya."

"Ah, naha enya, uwa nyarita kitu?"

"Enya kadenge pisan ku sorangan."

"Geuning di dieu mah teu ngadenge."

"Da lalaunan nyariosna ge."

Ti warung, Galih jeung Yuda langsung nepungan uwa. Ngabejakeun berita tina radio.

"Wa, Bang Ali pupus."

"Enya, uwa ge ngadenge ti RRI."

Yuda ngahuleng. Mikiran kekecapan uwana. Ras kana omongan Mang Kana nu nyebutkeun uwana kawas nu nyaho ka nu bakal kajadian. Naha enya uwa nyaho ka nu bakal kajadian? Atawa ukur kabeneran. Yuda teu bisa nyindekkeun.

Yuda jadi panasaran kana radio uwa. Matak, ceuk pikirna, nu kudu ditepungan mah, pangpangna Bu Lurah heula. Lian ti puguh dumukna, oge geus arang indit-inditan jauh. Minangka kagiatan maneuhna teh ka pangajian, saban Rebo jeung Saptu bada Lohor. Lian ti dinya mah sok aya wae di imah.

Waktu disabaan ka bumina, Bu Lurah kasampak. Pribumi harita galehgeh naker ngabageakeun nu datang teh. Apaleun Yuda teh suan Pa Sukma nu meuli imahna tea.

"Kumaha damang, Kasep?"

"Alhamdulillah, Bu."

"Kumaha Pa Sukma sehat?"

"Alhamdulillah sehat. Sawalerna Ibu, damang?"

"Cageur. Yap atuh ka lebet!"

"Nuhun."

"Tos ti marana atanapi bade angkat ka mana?"

"Biasa we udar-ider milarian bahan serateun, Bu."

"Euh enya, nya da tukang ngider hidep mah."

"Sok atuh reureuh heula!"

Sanggeus ngobrol ngaler-ngidul, Yuda kakara neangan jalan, hayang meunang dongeng ngeunaan radio. Ceuk pikir Yuda, radio teh, lain radio samanea. Buktina, loba kaahenganana. Saperti siaran wayang dina eta radio nu maneuh disiarkeun malem Salasa jeung Saptu tengah peuting, tetela dina radio batur mah tara katangkep. Ari disebutkeun eta radio leuwih hade batan nu sejen, asa pamohalan. Nilik kana wangun jeung modelna, kaasup model heubeul. Sacara tehnis, radio ka dieunakeun leuwih hade.

Memeh ngadongengkeun radio, Bu Lurah nyaritakeun heula Pa Lurah saminggu samemeh nemahan pati.

"Meh unggal enjing pun lanceuk nyarioskeun radio disada teu pupuguh," ceuk Bu Nisa nyoreang mangsa ka tukang.

"Naon saurna nu kakuping ku Pa Lurah teh?"

"Saurna mah sok kakuping siaran wayang."

"Lalakonna naon wae?"

"Duka perkawis eta mah, teu kantos ditaroskeun. Anjeunna oge teu nerangkeun lalakon sareng dalangna. Ukur kitu we nyarioskeun radio disada teu pupuguh, sareng siaran wayang golek," Bu Lurah nandeskeun.

"Memang leres disada teu pupuguh atanapi hilap teu dipareuman?"

"Tah, duka perkawis eta ge. Ibu mah teu kantos tetelepek."

"Dupi radiona aya keneh?" Yuda api-api teu nyaho.

"Teu aya, da kapungkur teh sakantenan we dipasihkeun ka Pa Sukma," pokna.

Radio leutik pasagi saperti kotak, kandelna dua senti, rubakna ukur dalapan senti, panjangna dua welas senti. Radio antik nu teu sagawayah dipiboga jaman harita mah. Yuda ge kungsi ningali radio kawas kitu teh ti Kang Saad nu kungsi jadi reporter RRI saangkatan jeung Pa Udin.

Radio eta teh, radio ka dua bogana Pa Lurah. Nu mimiti mah, radio rada gede ti dinya. Ngan, aya nu maok. Pa Lurah teu bisa waka meuli deui radio, da keur ukuran harita mah kaasup mahal. Hayang radio teh kudu ngajual beas sakintal. Basa kukumpul rek meuli deui radio, teu laksana. Lain euweuh duit tapi, harita teh aya rombongan wartawan ti Bandung rek ka Pameungpeuk. Kang Udin, reporter nyimpang ka Pa Lurah, maksudna rek nginjeum duit lantaran dompetna tinggaleun. Bubuhan geus wawuh pisan, Pa Lurah mere nginjeum duit ka Mang Udin.

Bu Nisa ge teu apaleun persis asal-usul radio teh. Nu tetela, kira-kira haneut moyan aya nu datang. Nanyakeun bumi Pa Lurah. Maksudna, ukur nyebutkeun katitipan radio ti urang kota keur Pa Lurah. (*)

Sambungan ti Bagian 4

Nyambung ti Bagian 6

---

Ensa Wiarna