Ngawayang Teu Direbaban (Bagian 6)
Bu Nisa ge teu apaleun persis asal-usul radio teh. Nu tetela, kira-kira haneut moyan aya nu datang. Nanyakeun bumi Pa Lurah. Maksudna, ukur nyebutkeun katitipan radio ti urang kota keur Pa Lurah.
"Saha nu ka dieuna?"
"Juhdi, namina teh."
"Urang mana?"
"Ti lembur caket Pasir Caringin."
"Alamatna angger keneh kitu ayeuna."
"Kantenan we, tetep di dinya. Da, kaleresan minggu kamari ibu kantos ka lembur Juhdi, ka wargi ibu. Saurna, Juhdi masih keneh aya di eta lembur. Kanggo patokan mah, saatosna jambatan, aya Tanjakan Ogin. Tah, ti dinya mah kantun mengkol ka kenca."
Yuda nyatetkeun alamatna. Maksudna meakeun panasaran, hayang nyaho asal-usul eta radio.
"Tanjakan Ogin?"
"Muhun."
"Sapertos tokoh carita dina wawacan."
"Muhun."
"Naon margina disebat kitu?" Galih panasaran.
"Duka atuh, Cep."
Ti Bu Nisa, Yuda jeung Galih ka Pasir Caringin. Alamat nu dimaksud teu hese. Najan lain inohong masarakat, di kampung mah tong boro jeung nu salembur, dalah ka urang kampung sejen ge loba nu apaleun.
"Komo deui ka Mang Juhdi, da sohor purah beluk, purah nembangkeun wawacan. Bumina caket tangkal kalapa ngarendeng dua. Tah, palih kenca bumina teh," ceuk nu ditanya.
"Tebih keneh ti dieu?"
"Caket, kinten-kinten dua kilo."
"Mung enggal-enggal we meungpeung teu acan wengi teuing."
"Naha Mang?"
"Ah, henteu," pokna bangun aya nu disamunikeun.
"Aya keneh nu biasa ngabeluk nya?"
"Sanes biasa, panginten, tiasa. Da, tos teu araya ahli-ahlina mah. Mang Juhdi ge pedah we turunan ti ramana."
Kira-kira sakilo ti tempat nanyakeun, jalan teh cagak. Nu ka katuhu jeung ka kenca. Nu ka katuhu mah, asa-asa apal Yuda teh, ngan teuing iraha kungsi ngaliwat ka lebah dinya. Nu ka kenca mah lapur, teu apal pisan, da memang kakara ngaliwat ka lebah dinya.
Keur leutik, Juhdi sok mimilu ka bapana nembangkeun wawacan. Matak, teu aneh teu sing upama Juhdi apal kana rupa-rupa lalakon wawacan, saperti Amar Sakti, Umarmaya, Amir Hamzah, Walangsungsang, Ogin, jeung sajabana.
"Kaleresan atuh, sakantenan we bade wawancara perkawis wawacan," ceuk Yuda.
"Muhun, sae. Da, ayeuna mah tos jarang pisan nu terangeun kana lalakon wawacan teh," ceuk Bu Lurah nyumangetan.
Disusud ka tempatna, teu hese. Gok weh panggih. Kabeneran nu dimaksud kasampak, tas ti masigit, solat Isa.
"Punten we ngaganggu ka Emang."
"Ih, teu nanaon. Yu atuh ka bale."
"Yuda jeng Galih hanjat kana golodog. Gek di tepas, teu ka imah, da hareudang cenah.
Yuda langsung nyaritakeun maksudna, hayang apal sual wawacan. Mang Juhdi giak naker diajak ngobrol sual wawacan teh. Manehna ngojengkang ka kamar, mawa sababaraha naskah wawacan nu biasa diilo ditembangkeun ku Ki Usin, rama Mang Juhdi.
"Tuh naskahna oge tos rareksak," pokna.
Mang Juhdi mukaan buku gede nu tulisanana hurup Arab, tapi basana, basa Sunda.
"Hurup Arab geuning," ceuk Yuda.
"Enya disebutna teh hurup pegon," ceuk Galih.
Galih mah kungsi diajar ngeunaan naskah di kampusna. Apaleun, naskah Sunda teh ditulis dina sababaraha hurup aya hurup laten, hurup Jawa, jeung pegon.
"Tah ieu karesep emang mah, wawacan Ogin," pokna nyerengeh.
Tina ngobrolkeun wawacan, wangkongan ngalegot kana sual radio. Mang Juhdi ngerutkeun halis, bangun heran.
"Ke radio nu mana nya?"
"Nu disanggakeun ka Pa Lurah?"
"Euh! Dupi perkawis radio, aya naon kitu?"
"Muhun hoyong terang asal-usulna we," ceuk Yuda.
"Ih, sok nyosok jero!" Ceuk Mang Juhdi.
"Wios atuh Mang, panasaran we abdi mah."
"Kieu kawitna mah," ceuk Juhdi.
Najan geus welasan taun, eta pangalaman teh teu weleh natrat dina ingetanana. Kira-kira bada Asar, embena satilu-tilu can balik. Biasana mah hideng sorangan ngampih ka kandangna. Tapi, harita waktu rek diparaban teu kasampak. Juhdi ngeleyeng ka sabudeureun eta kandang. Beuki lila, neanganana beuki jauh. Panonpoe geus nyalingker ka tukangeun gunung. Atuh di eta tempat mah geus reup-reupan.
Waktu ngajanteng di pengkolan deukeut tangkal kiara, kadenge sora embe ngaberele. Dilieuk aya jelema nungtun embe. Sidik embe anuna. Indungna ditungtun, nu dua deui anakna ngiclik.
"Ieu teh embe kagungan?"
"Muhun."
"Mangga atuh."
"Mung punten ieu pangnyanggakeun ka Pa Lurah," ceuk nu nungtun embe teh.
Aneh, cenah, Juhdi teu bisa nyarita nanaon. Sagala rupa caritaan jalma pinanggih lir komando komandan ka prajurit.
Juhdi ukur unggeuk-unggeukan, bari nyebutkeun mangga. Leos nu masrahkeun radio indit ti dinya. Waktu Juhdi ngalieuk, si jelema teh teu katembong. Teuing ka mana leosna.
"Saha anjeunna teh, Mang?"
Keur ngobrol kitu, torojol Bi Irah, bojo Mang Juhdi nyampeurkeun bari mawa cai enteh dua gelas, da Mang Juhdi mah geus disadiakeun kana emuk.
"Malih waktos harita teh, emangna mah teras pada ngagugulung da kasurupan," ceuk Bi Irah. Taksiran, obrolan nu ditepas teh kadengeeun ku Bi Irah nu keur sasadiaan nyadiakeun susuguh.
"Kutan emang dugi ka kasurupan?" Yuda semu teu percaya.
"Saurna. Da emang mah teu emut. Waktos sadar teh tos seueur tatangga ngariung emang," pokna nyerengeh.
"Emang teu kantos naroskeun jenengan anjeunna?"
Leng Mang Juhdi ngahuleng. Nginget-nginget kajadian nu geus welasan taun ka tukang. Ras deui kana omongan nu nitipkeun radio tea.
"Mu...muhun ieu teh ti sa...saha?" Mang Juhdi urupap eureupeup.
"Ti Ogin." Kitu nu kadenge ku Juhdi mah. Manehna ge kurang tetela, teuing nyebutkeun ti Ugin, Agin, Ogin, da cenah, teu pati jentre. Beja kitu nyebar ka masarakat.
Nepi ka kiwari, eta tanjakan teh katelah Tanjakan Ogin. Pedah, Mang Juhdi nu nyebutkeun papanggih jeung nu nungtun embe teh di dinya, na tanjakan panungtung rek mengkol ka Pasir Caringin.
Tanjakan Ogin, memang netek. Mangka kenca-katuhuna jungkrang lungkawing. Loba nu cilaka di lebah dinya teh. Ngan, nu pangparnana, rombongan dalang nu tigebrus tea. Harita mah, tacan sohor kasebut Tanjakan Ogin da kasebutna ge tanjakan Pasir Angin we.
"Leres nu nitipkeun radio teh Ogin nu dilalakonkeun dina wawacan tea?" Ceuk Yuda.
"Ah, sanes atuh Cep. Da, Ogin nu dicarioskeun dina wawacan mah satria, kasep. Ari nu nitip radio mah jalma biasa we, sapertos urang. Mung ketang teu pati sidik, da tos harieum beungeut," ceuk Mang Juhdi bari ngaheheh.
"Teras kieu, tadi teh memeh jalan cagak abdi naroskeun bumi emang, nu ditaroskeun teh bangun ngawawadian sangkan abdi enggal-enggal neraskeun lalampahan. Naha memang seueur kajahatan kitu di dinya teh?"
"Ah, kalebet aman. Malah, aman pisan. Arang deuih nu wantun ngalangkung ka dinya wengi-wengi ari ukur saurang dua urang mah," ceuk Mang Juhdi.
"Naha, Mang?"
"Kanggo urang dieu sareng sabudeureunana mah sohor eta tempat teh sanget keneh. Saurna, enya ieu mah saur nu sanes, sakapeung sok aya nu ceurik ngabangingik lebah dinya teh. Sakapeung, komo nu jalan ka katuhu, kira-kira tujuh ratus meter ti jalan cagak, sok aya nu kawenehan manggihan lembur. Malah, cenah, aya nu kungsi mondok sagala."
"Naha teu aya lembur kitu di dinya teh Mang?"
"Teu aya, aya oge peuntaseun pasir."
"Euh, kitu."
"Tapi, da eta mah mung ukur bungbu catur urang lembur we. Emang sorangan, can kungsi kawenehan manggihan nu aneh-aneh," pokna mesem.
Sisi jalan ka katuhu, aya tempat nu katelah Babakan Pasir Caringin. Ngan, kiwari mah kari urutna. Memang, cenah, kungsi aya lembur di dinya teh, pangeusina moal kurang ti tilu puluh umpi. Ngariung di lebah lengkob. Ayana lembur ti jaman Walanda keneh. Beuki lila lembur beuki ngagedean, pangeusina beuki loba.
"Mung saatosna kajantenan lembur diranjah gorombolan, urang Babakan Pasir Caringin nu salamet, parindah ti eta tempat. Tah, eta mah tragedi ageung dina jaman gorombolan DI/TII. Nu maotna oge aya kana opat puluh urangna," ceuk Mang Juhdi.
Sanggeus kajadian kitu, pangeusina parindah ka tempat sejen. Imahna dirakrak. Sakur nu kapuluk dibawaan pindah ka tempat anyar. Nu nyesa teh ukur tatapakan tina batu we, da kai jeung kentengna mah diarakutan ku nu bogana.
Ngadenge dongeng gorombolan, Yuda mah inget ka Haji Toharuddin (alm). Pa Haji nu kungsi jadi tentara dina jaman awal-awal kamerdekaan Indonesia, kungsi ngobrol jeung Yuda basa muateun dina poean 17 Agustus. Harita, ieu pangsiunan veteran teh nyaritakeun oge sual gorombolan. Memang akur jeung nu dicaritakeun ku Mang Juhdi, kungsi aya lembur nu dijorag gorombolan nepi ka pangeusina carem ditandasa gorombolan.
"Malih kantos di hiji lembur mah dugi ka aya nu maot sawengi eta 43 urang," ceuk Pa Haji Taoharudin waktu harita.
Balik ti Mang Juhdi, isuk-isuk. Ti dinya mah ider-ideran, ulin heula kalayan teu boga tujuan anu jinek. Teu poho, ieu dua sobat teh ngahaja nyorang jalan nu ti jalan cagak mah jalan ka katuhu tea. Enya, taya lembur ukur aya tegalan nu meh satengah kurilingna tapel wates jeung kebon enteh.
Yuda asa-asa kungsi ka dinya, tapi iraha. Weleh, teu inget anu pasti. Lolongkrang waktu nu welasan taun, mupus sabagian ingetanana. Galih ge mondok di imah uwa. Harita mah, Uwa Sukma keur aya, da teu ka mamana. Ngan, peuting mah Yuda ge teu ngobrol husu jeung uwana. Yuda badami, isukna rek ka Jalan Mawar, nepungan istri Mang Udin (alm). Hayang nyaho dongengna perkara Mang Udin. Akon-akonna mah, rek nanyakeun babaturan Mang Udin, Mang Saad tea. Najan, apal pindah ka luar kota, susuganan bojona Mang Udin apaleun, sabab kungsi sapagawean jeung salakina.
Yuda ge moal togmol ngawangkong sual Mang Udin, bisi nyuat-nyuat hate Ceu Rukmi, bojo Mang Udin, nu can boga salaki deui. Cenah, lantaran teu bisa mupus pangalaman endah salila rumah tangga jeung Mang Udin.
"Janten Ceuceu ge teu terang ka mana ngalihna Mang Saad teh?"
"Muhun, teu terang alamat peresisna. Nu terang teh, ngalih ka Ciamis we," pokna.
"Euh, wios atuh."
Jep jarempe. Yuda ngenyot ududna. Ari galih mah nyuruput cikopi haneut susuguh Ceu Rukmi.
"Dugi ka ayeuna euceu mah asa diheulang," pokna. (*)
| Sambungan ti Bagian 5 | Nyambung ka Bagian 7 |
Ensa Wiarna
Reviewed by Rupa Sundapura
on
20.50
Rating:
