Ngawayang Teu Direbaban (Bagian 3)

Yuda ngarasa era saban dipentaan nalangan kaset wayang teh. Diitung-itung, tilu kali Mang Kana menta dipangmeulikeun kaset wayang. Nu pamungkas mah hayang Lalakon Dwarwati Dileled Ombak. Alesanana, sarua cara ti heula-heula, pedah kungsi ngabandungan eta lalakon, nitir tilu kali tina radio Uwa.

"Terang abdi ge ari lalakon Dwarwati Dileled Ombak mah," ceuk Yuda.

"Kumaha runtuyan caritana, Den?"

Yuda apaleun. Satutas Perang Baratayuda, Kresna tatapa dina guha. Eta tempat, jadi cukang lantaran palastrana Raja Dwarwati. Lantaranana, suku Kresna kapanah ku paninggaran nu keur moro mencek.

"Tah saatosna Kresna palastra, Dwarwati carem dileled ombak." Kitu ceuk Yuda nyutat tina buku Mahabarata karangan Viyasa.

"Tapi, Emang mah hoyong kasetna," ceuk Mang Kana.

"Mangga upami aya mah," ceuk Yuda.

Ngan, nya kitu, najan ngaprak ka saban toko kaset, teu manggihan. Lalakon wayang golek nu kabandungan tina radio Uwa, kawas nu teu dijual keur umum.

Satutas teu jadi wartawan, Uwana bangun robah paripolah. Nu asalna, arang cacarita, kadieunakeun mah, sabalikna, resep ngawangkong. Naha kitu teh, ku lantaran loba luang, atawa teu boga kagiatan maneuh?

Yuda kungsi ngarasa hariwang ku Uwana teh. Paripolah jeung omonganana bangun nu teu jeung ijiran. Malah, sakapeung mah sok wanian teuing, pangpangna nu tumali jeung nu bakal karandapan. Paripolah kitu, memang kadieunakeun. Geura we, basa Pa Harto geus deukeut kana mungkas kakawasaanana, togmol nyebutkeun presiden bakal ngecagkeun jabatan di tengah jalan. Ceuk Uwa, dina mungkas jadi presiden, Pa Harto moal nepi ka tamat lima taun. Tetela bener!

Saterusna, Uwa ge kawas nu geus apal, upama awal-ahir, Megawati bakal jadi Presiden. Ramalan Uwa sejenna, basa Aceh dileled ombak. Uwa nyarita bakal aya caah badag nu tacan aya tandingna. Tapi deui-deui pangaweruh Uwana kitu, keur Yuda mah tetep teu bisa mupus cedana. Kunaon Uwa bet dikaluarkeun ti pagaweanana? Upama Yuda ngarasa tugenah ku kasalahan Uwa, lain pedah taya hampura, ngan kusabab geus katalanjuran percaya ka Uwana. Ceuk pikir Yuda, Uwana teu merenah boga ceda nu matak ngarugikeun dirina. Tapi, kabuktian, Uwa teh jelema nu bisa salah. Pamanggih Uwa, kadang-kadang loba nu beda jeung pamanggih batur. Ceuk ramalan urang wetan, nagri urang teh bakal 'nararatay' dipingpin ku nu ngaran Notonongoro. Cenah, 'no' teh Sukarno, 'to' teh Suharto. Nu saterusna, bakal dipingpin deui ku nu ngaranna 'no' deui. Tapi, harita Uwa boga pamadegan sejen. Ramalan kitu teh, moal payu keur Nusantara. Upama payu ge keur Jawa. Cenah, ramalan kapamingpinan keur karajaan nagara di Jawa. "Upama keur gupernur Jawa Tengah, Jawa Timur, atawa Yogyakarta mah bisa jadi," pokna bari ngahahah.

Sual Uwa Sukma bisa ngaramal, diuar-uar ku Mang Kana, panyawah nu sakalian sok babantu di Uwa.

"Nya leres, Den," ceuk Mang Kana ka Yuda.

"Naon tea Mang?"

"Perkawis Pa Harto moal dugi ka tutas mancen tugas tea."

"Har, naha kumaha, Mang?"

"Saur Uwa, Pa Harto bakal geura-geura ngecagkeun kalungguhanana."

"Iraha sasauranana?"

"Kinten-kinten dua atanapi tilu sasih deui ka Pa Harto mundur."

"Duka ah," ceuk Yuda.

Upama Uwa loba kanyaho memang sadirieun Yuda mah teu aneh teu sing. Uwa teh wartawan, mindeng nulis rupa-rupa topik. Liputanana oge lain wungkul nasional, tapi deuih internasional. Matak teu aneh upama karir Uwa di eta surat kabar ge terus nerekel. Tina koordinator reporter, bakal jadi wakil pimpinan redaksi. Tapi lalakon Uwa jadi kuli tinta di eta surat kabar henteu nepi ka jucungna. Yuda nyaho lalakon Uwana ti Pa Yana, nu saentragan asup ka eta surat kabar.

Mimitina tina miluan kursus jurnalistik basa eta koran muka kursus. Uwa tanjrih nepi ka ahirna boga kasempetan magang. Ti dinya, ditawaran kontrak, Uwa daek. Ngan, giliran rek diangkat, Uwa teu lungsur-langsar. Uwa kaelehkeun ku wartawan anyar, awewe nu kabeneran saalmamater jeung wakil pingpinan redaksi di eta koran. Basa Yuda papanggih jeung Pa Rustam, babaturan Uwana keneh, kapanasaranana nambahan. "Uwa hidep mah jujur, tong boro barang penta ka nara sumber, dibere duit ku sumber berita ge tara daek," pokna. Tapi, ari ceuk beja sejen, Uwa kungsi narima panyogok waktu ribut soal tender jalan layang. Cenah, geus jadi rusiah umum, lelang tender teh ukur kedok, da nu pimeunangeun mah geus jinek. Kana beja kitu, Yuda teu wanieun nanyakeun langsung ka Uwana. Manehna ukur nyidem catetan hideung Uwana dina tungtung hatena.

Keur Mang Kana, Uwa Sukma angger dianggap jalma nu lain samanea tea. Sanggeus meneran neguh nu bakal jadi presiden teh awewe, Uwa ge heuleut sawatara waktu ti harita nyaritakeun bakal aya caah rongkah. Telela, kajadian tsunami di Aceh. Kadieunakeun Mang Kana nyebutkeun kanyaho Uwa teh tina carita wayang. Lain ukur teteguhan, da ceuk Uwana cenah,nNgan, Yuda mah teu percaya. Komo deui Uwana mah jalma nu rasional. Ketang, kitu soteh baheula.

Nu leuwih matak panasaran, ku dikaluarkeunana Uwa ti Surya Medal, Uwa jadi teu puguh cabak. Dua taun ngaligeuh teu daek baranggawe. Balukarna Uwa istri ge menta dipulangkeun ka sepuhna. Cindekna, Uwa teh pipisahan. Uwa teu boga budak, teu ngalantarankeun aya korban sejen balukar rumah tangga bubar. Uwa hirup nyorangan. Pakasabanana teu tangtu, teu boga pacabakan maneuh. Keur kahirupan sapopoe, ngandelkeun kontrakan. Basa Uwa meunang warisan ti aki, Uwa nyieun kontrakan tilu rohang. Nya tina eta ge ari keur kahirupan sapopoe mah teu susah. Lian ti eta, Uwa ge kadieunakeun kalan-kalan nulis feature, carpon, cerpen, jeung sajabana. Malah, sakapeung sok jadi nara sumber dina ceramah nu tumali jeung jurnalistik.

Imah nu ditempatan ku Uwa teh leutik, ukur ukuran 5 X 6,5 meter. Ukur aya dapur jeung kamar mandi. Di imah taya paparabotan, euweuh TV. Kadieunakeun mah aya leptop model heubeul pamere ti kawawuhanana, minangka buruhan nyieun biografi. Keur hiburan, aya radio. Tah eta teh radio heubeul, jieunan taun 1970-an, ngan alus keneh. Lain radio meunang meuli, tapi radio pamere ti nu ngajual imah ka Uwa. Imah Uwa teh urut bumi Pa Lurah nu maot. Aya nu nembak di kamarna. Cenah mah ku garong basa saminggu samemeh narima duit ladang lahan nu kasabet ku proyek walungan. Eta radio teh pamere ti urang lembur Pasir Caringin.

"Mun teu jeung batur, Yuda milu," ceuk Uwa harita.

Nu rek nepungan dalang di panggung teh lain Uwa wungkul, tapi oge Pa Udin, reporter RRI nu ngahaja rek ngarekam eta pintonan. Ngan piisukaneun ka indit, reporter RRI tea bebeja moal bareng jeung Uwa. Manehna mah rek megat panayagan di jalan, da kabeneran imahna deukeut ka jalan nu bakal kaliliwatan ku rombongan nayaga. Ari Uwa Sukma, memang teu boga niat wawancara peuting eta mimitina mah, da puguh geus jangji samemehna ge. Rek wawancara husus nu butuh waktu sakurang-kurangna sajam. Ngan Ki Dalang menta wawancara sakalian di nu hajat.

Sawatara waktu ka tukang, Pa Yana ge ngobrolkeun Uwa basa rek ngaliput dalang Adang Sutarya. Uwa nelepon ti wartel. Malah cenah, Pa Yana ge ngadengekeun pisan obrolan Uwa jeung Ki Dalang teh.

"Halo!"

"Saha?"

Uwa nyebutken ngaran jeung pacabakan. Taksiran Ki Dalang teh pohoeun kana jangjina rek diwawancara ku Uwa.

"Aduh, hapunten nya, hilap. Kumaha atuh upami engke wengi we di Pa Romli, di Kampung Pasir Ibun, lebakkeun Pasir Angin? Sakantenan sareng reporter nu ti RRI," ceuk Ki Dalang.

"Saha nya?"

"Pa Udin."

"Mangga. Insya Allah."

"Bade sareng?"

"Nyusul we, bade kana motor."

"Muhun! Mangga diantos!"

Uwa ge apaleun kana jadwal manggung dalang Adang Sutarya teh sa kungsi ka bumi Ki Dalang, ngan pribumi teu kasampak, ukur aya bojona, Ceu Utari. Dina kalender tanggal-tanggal pimanggungeun dicirian ku spidol beureum. Di dinya ge kanyahoan, Malem Saptu 4 Agustus teh manggung di Pa Romli, urang Pasir Ibun.

"Sabenerna, upama teu kaluar, nu bakal jadi pingpinan surat kabar teh Uwa hidep," ceuk Pa Rustam, babaturan keneh Wa Sukma.

Ayeuna, eta koran dicekel ku Pa Haji Mukti, minangka pingpinan umumna. Eta teh anak Pa Subarja, babaturan Uwa. Pa Mukti asalna wartawan, saterusna dipercaya jadi pamingpin pausahaan. Di antara pamingpin surat kabar nu kungsi mingpin Surya Medal, nya anjeunna nu pangbeungharna. Lian ti boga hotel teh, deuih bogaeun beus antarkota aya kana limana.

"Uwa di dinya mah idealis," ceuk Pa Rustam deui. Sakapeung nyebut ngaran, sakapeung nyebut 'di dinya'. Umur Pa Rustam sahandapeun Uwa genep taun. Tapi, cenah, da Uwa mah ka sahandapeun ge ngaharegaan.

"Naha atuh Uwa dikaluarkeun ti eta koran?"

"Lain dikaluarkeun tapi ngundurkeun diri," ceuk Pa Rustam.

"Naon margina?"

"Tah, lebah dinya mah teu apal."

Uwa teu kungsi betus alesan eureunna ti eta koran. Tong boro ka batur, wa istri oge, bojona teu apaleun. Kawasna Uwa mah hayang neukteuk bari anggeus, embung ngaliarkeun taleus ateul.

"Omat deuih kudu manggihan katerangan, kumaha situasi di pagawean Uwa harita," ceuk Yaomil.

"Maksad Akang?"

"Bisa jadi aya persaingan nu teu sehat, pan bisa silih kusrukkeun jeung babaturan," pokna.

Di antara Subarja, Sapta, Dahlan, nya Uwa, ceuk Pa Yana jeung Pa Rustam, nu pangpayusna jadi pamingpin ngaganti Pa Surya. Tapi ahirna Uwa disingkirkeun. Kitu ceuk Pa Rustam.

Obrolan Pa Rustam kitu, keur Yuda mah mingkin panasaran. Tapi, rek togmol nanyakeun teu werat. Kungsi nanyakeun alesanana kaluar ti eta koran. Tapi, jawaban Uwa mah pondok. "Bosen we," pokna. Bosen? Naha enya Uwa bosen? Yuda curiga. Jawaban Uwana kitu siga ngahaja ngarah ngabuntut bangkong.

Yuda mindeng mondok di Uwana. Malah, sakapeung mah idek-liher di dinya. Upama kaparengan Uwana keur euweuh, Yuda wani kurah-koreh kana laci meja tempat Uwana ngetik.

Sakur nu kadenge ku Yuda dicaritakeun ka Yaomil. Pa Dosen, leukeun nyatet-nyatetkeun katerangan ti Yuda. Najan katembongna nyalse, Yaomil daria ngalaksanakeun pancenna.

Uwa mah rajin. Meh sagala tulisanna, iwal ti berita, boga arsipna. Yuda ge apal Uwana teh neundeun arsip tulisan dina file hideung, nu asup ratusan lambar. Tulisan feature jeung fiksi mah kabeh ge aya.

Sanggeus Yuda ngadenge omongan Pa Rustam, kapanasaran ka Uwana beuki nambahan. Saterusna hayang nyaho duduk perkara nu sabenerna. Ngan ka saha nanyakeunna. Ras Yuda inget kana tulisan-tulisan Uwana, sugan aya pituduh ngeunaan kasus nu ngalantarankeun Uwana ka luar ti Surya Medal.

Basa Uwana nyaba ka luar kota aya kana tilu poena, Yuda kakaratak kana rak buku. Langsung kana file. Hiji-hiji dibukaan. Tapi, sama sakali taya berita Uwa nu tumali jeung kajadian nu pantes jadi mamala keur Uwana. Yuda neangan berita sual jalan layang, tapi tetela euweuh. Padahal, eta berita teh penting upama ditumalikeun jeung beja ti babaturan Uwa. Tapi, keur Uwa mah bangun nu teu penting.

Tulisan-tulisan Uwa feature tina Surya Medal, geus meh kailikan kabeh. Dina lambaran panungtung, breh berita pondok. Dua kolom, panjangna ukur sawelas senti. "Sering nongton, raraosan ka dieunakeun asa mingkin sae," ceuk Pa Ahya tukang bajigur. Pamanggih tukang bajigur kitu teh, dicutat ku Uwa.Yuda teu sirikna molotkeun panonna. Ras inget kana pangalaman lalajo wayang jeung Uwana welasan taun ka tukang. (*)

Sambungan ti Bagian 2

Nyambung ka Bagian 4

---

Ensa Wiarna