Ngawayang Teu Direbaban (Bagian 2)
Yuda hayang nyusud cukang lantaran Uwana dikaluarkeun. Ngan, asa teu kaotakan ku sorangan mah. Ku kituna, kahayangna kitu teh, dibejakeun ka Emangna ti indung, Yaomil Anwar, dosen ngora nu ngajarkeun kriminologi.
"Ceuk emutan, Uwa Sukma teh kantos milampah kalepatan ageung ka koranna," ceuk Yuda ka Yaomil.
"Nya tanyakeun we atuh langsung ka Uwa!"
"Teu wantun. Bilih nyigeung manahna."
"Naha atuh make jeung rek ngutak-ngatik kasalahanana nu geus lawas?"
"Panasaran we, Kang. Sareng, asa teu percanten upami Uwa milampah kasalahan ageung dina profesina."
"Har, naha kumaha kitu?"
"Upami ngabandungan papatahna, Uwa teh idealis, sareng kacida ngajagana kana kahormatan profesi," pokna.
Nu salilana jadi catetan Yuda dina ngalaksanakeun pancenna, Wa Sukma kungsi nyarita. "Mun rek jadi wartawan, Yuda teu meunang narima 'amplop' ti sumber berita," pokna tandes.
Uwa percaya, pers teh The Forth Estate, atawa lembaga ka opat. Mun dina kanagaraan aya legislatif, eksekutif, jeung yudikatif, pers mah nempatan lembaga kaopat. "Kalungguhanana penting, teu leuwih handap ajenna batan lembaga-lembaga nu tilu tadi. Ngan, tangtu we, hayang jadi insan pers nu kawas kitu mah kudu nyumponan sarat," pokna.
Saterusna, Uwa cacarita. Mun Alva Edison nyarita, tulisanana bisa nyaangan peuting nu poek mongkleng, tangtu lain hartina tina tulisan kaluar cahaya. Bisa soteh nyaangan, upama elmu Alva Edison dina sual listrik, dirojong ku pakakas nu cukup kalayaan dijieun ku ahlina. "Sual The Forth Estate ge kitu," pokna.
"Ari ayeuna rek kumaha?" ceuk Yaomil.
"Muhun bantosan mangmikirankeun. Ngaanalisa, lah!"
"Ah, teu bisa atuh ari ukur dikira-kira mah."
"Muhun abdi bade ngempelkeun informasina. Saterasna dikaakangkeun."
"Nya teu nanaon ari ukur kitu mah."
Yuda ngahuleng. Ras inget basa rek lalajo wayang jeung Uwana tea. Indit ti imah teh tas solat Magrib. Motor Honda bebek beureum nyemprung ka pagunungan. Ti lembur Atim teh terus ka kidul, mengkol ka kulon, terus ka kidul deui. Uwana teh ngahaja ngajakan Yuda, batur ngomong, cenah. Ari Yuda diajak kitu teh atoh we nu aya, da kabeneran isukna poe pere, najan lain Minggu, tapi Saptu.
Yuda nangkel dina tonggong Uwana. Hawa tiis nyocoan kulitna, najan make jeket. Sajajalan tiisieun, ukur aya hiji dua kandaraan nu papaliwat. Ngan, sanggeus mengkol ka kenca, ka jalan leutik mah, teu papanggih jeung kandaraan sejen. Jalan eta mah lain jalan raya, ukur jalan nu biasa dililiwatan ku kandaraan nu rek ka perkebunan enteh. Sapaparat jalan poek, kenca katuhueunana rajeg tatangkalan. Motor ge teu bisa gancang, paur ngagaleong ka jungkrang. Mun ti beurang, lewang naker, lantaran di sawatara tempat lungkawing naker. Aya jungkrang nu jerona leuwih ti limaratus meter tina beungeut jalan. Mangka dasarna mah walungan nu mun keur saat batuna tarengtong.
Sanggeus ngaleok ka katuhu ti jalan gede, kira-kira sapuluh menit, mimiti manggihan urang lembur nu leumpang sabubuhan-sabubuhan. Ngan anehna, ka manehna teh bangun hare-hare. Najan pasarandog, saurang ge taya nu nanya. Kitu teh, beda jeung kabiasaan urang lembur, nu umumna galehgeh, najan ka nu anyar pinangih.
Teu kungsi lila, anjog ka tungtung lembur. Tembong imah-imah parentul di lebak. Breh weh aya palataran nu ngebrak. Patromak ngempray, nyaangan panggung. Hawar-hawar sora sinden ngahaleuangkeun lagu Kembang Gadung.
"Saha dalangna, Kang?" Uwa nanyakeun. Lain teu apal, tapi ukur hayang ngayakinkeun, da tong boro Uwa, Yuda ge apal kana sora dalang mah, moal salah deui Adang Sutarya.
Nu ditanya teu nembalan. Malah, teu ngareret-reret acan. Motor disarandekeun deukeut tukang bajigur. Dikonci stang. Yuda jeung Uwana turun sababara meter ka lebak ngadeukeutan panggung. Tapi, teu bisa deukeut pisan. Lian ti hariwang ku motor, oge hese jalanna rek ka panggung mah. "Bismillah ngawitan manggung..." lagu Kembang Gadung dihaleuangkeun ku juru sinden.
Yuda biasa lalajo wayang. Mun di nu deukeut mah sok nepi ka isuk-isuk. Ku kolotna ge sok dilandi si gungclo, da lalajona teh sok ti samemeh der.
"Ih, naha teu kadenge rebabna," ceuk Uwa. Enya, najan sinden beken, ari teu direbaban mah angger we rada ngagaleong, teu pati pas, lantaran taya nu nuyun.
Uwa muka notes, kutrat-kotret. Ukur sababara kalimah, sup weh notes teh diasupkeun kana saku jeketna.
Uwa teu tulus wawancara jeung dalang. Hese ka panggung atuda. Kira-kira tabuh dua Uwa ngajak balik. Najan resep keneh Yuda kapaksa nuturkeun. Tukang bajigur, deukeut panundaan motor geus teu ngaladangan, geus beak, laris.
"Manawi Emang mah tebih, matak seunggah ngawitanana mah. Ari pek teh, teu tebih teuing," ceuk Mang Ahya, tukang bajigur nu biasa mangkal di pengkolan di parapatan jalan.
Nyahona rek aya wayang geus heubeul naker, aya kana sabulanna. Malum dalang sohor nyeureuhanana ge teu bisa didadak. Mang Ahya mah biasa, di mana wae dalang Adang Sutarya manggung, ngadon dagang, ari bisa keneh disorang ku leumpang mah.
Balik teu kana jalan urut. Malibir ka jalan sejen gigireun pasir. Sajajalan tiiseun naker. Sanggeus ka jalan gede, oge teu kungsi manggih atawa papaliwat jeung kandaran sejen. Dur Subuh geus nepi ka lembur sisi kota, di dinya reureuh heula, solat Subuh. Geus kitu mah neruskeun deui lalampahan.
Bari nundutan, Yuda mah ngagaranyem ngadaharan suuk nu dibeuli ti Mang Ahya. Duaan teh ukur jajan opat ratus salapan puluh perakeun, bajigur jeung bandrek dua gelas, suuk sabungkus, jeung ciu dua siki. Duit lima ratus teh teu dipulangan, da pamulanganana teu ditarima ku Uwa.
"Wios lah, angsulanana mah kanggo Emang."
"Nuhun atuh, Pa," ceuk Mang Ahya ka Uwa.
Saminggu ti harita, Uwa ka luar digawena. Ukur kitu kanyaho Yuda harita mah. Keur leutik, Yuda hayang cara Uwana, hayang jadi wartawan. Kabeneran, waktu ngalamar ka majalah mingguan dua taun ka tukang katarima. Mimitina mah magang heula, saterusna dipercaya purah ngider ka daerah-daerah ka luar kota.
Sanggeus aya kana lima welas taunna ti saprak Uwana dikaluarkeun ti koranna, Yuda manggih beja nu matak ngajenghok. Yuda beuki panasaran. Naha Uwa nepi ka dikaluarkeun ti kantorna? Naon kasalahanna? Beuki dieu beuki panasaran. Yuda ngarasa kuciwa, upama Uwana nyata-nyata saperti nu ditudingkeun ku pihak sejen. Najan kajadianana geus welasan taun, tetep keur Yuda mah ceda nu moal gampang dipupusna.
Dina pandangan Yuda, Uwana teh payus jadi conto. Ku batur salemburna ge teu weleh pada ngaharegaan. Uwa pada mikolot, malah geus tilu kali ganti kapangurusan RW, Uwa kapeto jadi panasehat.
Uwa, ceuk Yuda, landung kandungan laer aisan. Remen jadi panengah nu pacengkadan. Malah, sakali mangsa mah, uwa kapapancenan ngakurkeun dua kelompok masarakat nu parasea gara-gara tina maenbal. Masarakat lembur Babakan Hilir jeung Babakan Girang, nu ukur kahalangan ku walungan, silih serang. Isukna Uwa ngadatangan tokoh-tokoh masarakat eta lembur. Saterusna gempungan. Uwa nyaritakeun pentingna silaturahmi jeung ngajaga duduluran. Di antarana, Uwa ge nyaritakeun kaancuran teh bisa datang ku lantaran pacengkadan. Saterusna, Uwa nyontokeun baheula, umat Islam dina jaman Rosullulloh sareng jaman khalifah kacida kuatna. Tapi, saterusna mah hengker, nepi ka waktu dijorag musuh dina munggaran Perang Salib nu mimiti lumangsung ahir abad kasawelas, umat Islam kungsi kadeseh. Yuda ge apal, caritaan uwana teh, nyutat tina buku nu judulna Perang Salib, karya Carle Hillenbrand, Guru Besar Studi Islam jeung Basa Arab di University of Edinburgh.Pa Yana mindeng muji Uwa lantaran kawani jeung kajujuranana. Tapi, pangajen Yuda ka Uwana luntur lantaran ceda dina mungkas lalakon jadi wartawan di Surya Medal.
Ka tukang-tukang, Yuda kacida reueusna ku Uwana teh. Ceuk dirina mah kolot nu patut jadi conto. Uwa loba kanyahona, boh dina sual budaya, pulitik, ekonomi, jeung atikan. Ngobrolkeun naon wae nyambung. Malah, Yuda ngarasa meunang luang ti Uwana, pangpangna dina elmu jurnalistik.
Uwa memang kaseundeuhan. Galih ge mahasiswa Antropologi, resepeun ka Uwa mah, lantaran cenah, loba kanyahona. Galih jeung Yuda teh sa-SMA. Ngan, sangggeus ka luar sakola nyorang jalan atikan nu beda. Yuda milih kuliah di Fakultas Pendidikan, nyokot program Diploma Dua (D-2), najan ahirna mah jadi wartawan. Yuda, semester salapan, kuduna mah geus beres, tapi masih keneh mandeg dina skripsi, sababaraha kali ganti judul. Nu pangahirna, panalungtikan ngeunaan mitos lembur ditumalikeun jeung kabiasaan urang lembur miara lingkungan, kaasup miara leuweung. Di antara nara sumberna Haji Hudori.
Pangna, panalungtikanana di Kawung Nunggal, Kalapa Dua, jeung Pasir Ibun, lian ti loba dongeng aheng, oge aya kawawuhanana, Atim nu kungsi babarengan masantren kilat di Ajengan Ahmad tea. Bareto, basa pere sakola SMA, Galih jeung Yuda ngahaja liburan di lembur Atim, urang Kalapa Dua. Atim masantren di ajengan Ahmad, nyantri kalong, teu matuh di kobong. Loba piliheun keur objek skripsi teh, tapi ahirna Galih milih sababaraha lembur sabudeureun lembur Atim. Copelna, upama kapaksa kudu mondok ge moal susah, moal kudu ucul duit.
Dina nyusud lalakon Uwana, Yuda satekah polah ngumpulkeun rupa-rupa katerangan ti nu sejen, kaasup ngumpulkeun tulisan Uwa nu ditulis dina Surya Medal. Tetela, teu gampang neangan tulisan Uwa nu geus sakitu lilana mah, sabab, najan di dokumentasi redaksi eta koran ge teu kumplit. Kadieunakeun Uwa teh pada nganggap boga kamampuh husus. Kawas nu nyaho ka nu memeh kajadian. Kitu teh, pedah sababaraha kali ramalanana meneran. Ketang, boa ukur digegedekeun ku nu sejen, da ka Yuda mah tara nyaritakeun nu aneh-aneh. Yuda mah apaleun, Uwana kacida muhitna kana cara mikir rasional, bareto mah.
"Wa Sukma mah, memang sanes jalmi samanea," ceuk Mang Kana, panyawahna.
"Na kumaha kitu, Mang?"
"Kapungkur sababaraha sasih kapengker, Emang ngadangu Pa Sukma sasauran, Pa Harto moal tutas dugi ka tamat lima taun. Buktos pan."
"Ngahaja uwa sasauran kitu ka Emang?"
"Sanes ka Emang, tapi ka tamu, ka rerencanganana kapungkur, waktos Emang nyuguhkeun cai ka tamu."
"Sanes, kumaha kaset teh kenging?" Mang Kana nanyakeun kaset.
Mangkukna Yuda dipesenan neangan kaset lalakon Destarata Turun Tahta. Mang Kana kasengsrem ku eta lalakon, jeung panasaran deuih. Sawatara bulan ka tukang, kungsi ngabandungan eta lalakon tina radio uwa. Waktu mondok tilu peuting di imah uwa tea, Mang Kana unggal peuting ngabandungan eta lalakon. "Mung duka da teu kantos tamat."
Yuda memang kungsi nanyakeun ka toko kaset Purnama Record, nu ngahususkeun kana seni-seni Sunda. Tapi, lalakon kitu mah euweuh.
"Saatosna di bumi, meh saban wengi emang milarian siaran wayang, pangpangna mah nu nyaritakeun eta lalakon, tapi weleh teu aya. Panasaran, hoyong terang dugi ka tamatna," pokna.
Heuleut sawatara waktu, Mang Kana menta deui dipangnalangankeun kaset wayang. Lalakonna Arimbi Ngadeg Raja. Ditanya alesanana, deui-deui kawas jawaban ti heula. "Pedah we panasaran. Tilu kali ngadangukeun lalakon wayang Arimbi Ngadeg Ratu, tapi teu kantos tamat," pokna.
Yuda ngarasa era saban dipentaan nalangan kaset wayang teh. Diitung-itung, tilu kali Mang Kana menta dipangmeulikeun kaset wayang. Nu pamungkas mah hayang Lalakon Dwarwati Dileled Ombak. Alesanana, sarua cara ti heula-heula, pedah kungsi ngabandungan eta lalakon, nitir tilu kali tina radio uwa."
Terang abdi ge ari lalakon Dwarwati Dileled Ombak mah," ceuk Yuda.
"Kumaha runtuyan caritana, Den?" (*)
| Sambungan ti Bagian 1 | Nyambung ti Bagian 3 |
Ensa Wiarna
Reviewed by Rupa Sundapura
on
18.15
Rating:
