Biografi Bagawan Hadim (Bagean 3)

Langit beuki bengras bae. Aya hiji lembur nu bulanna midang bae, lembur Jang Hadim. Ngan nyaeta, Jang Hadim mah kalbuna teu weleh angkeub. Neng Yusi! Beurang peuting Neng Yusi nu kapicangcam! Saestuna, Jang Hadim teh ngalanglayung satengahing lembur nu saheng tur ngagulubur.

Ti poe ka poe, teu weleh ngabring jalma nu hayang narepungan Jang Hadim. Ti poe ka poe, sajak-sajak Jang Hadim teh beuki diisimkeun bae, diparusti-pusti, dijarieun jimat. Di mana-mana, batur jenuk sok aruplek mun ngaguar beja perkara Jang Hadim.

"Eta mah Jang Hadim, kamari teh sapopoe anjeunna aya di kobong! Na da Si Dartam mah tepung jeung Kang Hadim di Curug Tilu atuh! Si Kunang deuih susumpahan nenjo Kang Hadim di Batu Saheng!" Si Mamat keur ngabudah di hareupeun toko karangan "Kembang Kuring", ditanggap ku para tamu.

"Ari ngarangna masih keneh, Kang Mamat?" cek tatamu istri geulis.

"Kantenan we! Sakumaha sibukna ge anjeunna mah da tiasa aya di mana-mana tea! Carpon-carponna sarae pisan! Sajakna mah tos kantenan, mujarab! Saur kritikus Cecep Borges mah, taun ieu sajak sareng carpon Kang Hadim bakal ngaborong Hadiah Sastra!" Si Mamat ngagalantang da puguh geus mindeng nyarita kitu.

"Salam kitu ti abdi nya, Kang! Ti Melva kituh!" cek eta tatamu istri.

Melva katut rewuan mojang sejenna sakadar ambon sorangan da puguh Jang Hadimna mah keukeuh micangcam Neng Yusi nu cenah mah geus tunangan. Katembong bangun gumbira mun keur pareng ngariung jeung para cantrik. Tapi mun nyorangan deui, Jang Hadim teh teu weleh marudah bae.

Tah, kacaturkeun, rek cunduk kana waktuna, rek ninggang kana mangsana, mangsa masrahkeun Hadiah Sastra. Jang Hadim sapara cantrik nyewa mobil tilu elep. Subuh ngabiur ka kota. Padepokan ditungguan ku sawatara urang cantrik nu kawilang anyar keneh. Langit kota direumpeukan mega bodas. Jang Hadim sapara cantrik ngadon reureuh di alun-alun, ngadon marurak timbel nu keukeuh dibahankeun ku Olot Uhyi.

Iuh naker alun-alun teh. Jaba kembang keur meujeuhna mangkak deuih. Si Mamat nyetel tip, lagu dangdut. Sapopoe, Jang Hadim ngadon joged motah pisan.

Langit reueuk kasorenakeun. Der, peutingna acara dimimitian. Dihin pinasti, tos kersana Dewan Juri, carpon jeung sajak Jang Hadim ngadon tiwas di pakalangan. Kalah Si Mamat jeung Si Dartam nu mareunang Hadiah Sastra teh. Jang Hadim katembong imut basa Si Mamat jeung Si Dartam narima piagem tea.

"Teu kaci euy ah! Rek kumaha bener ngajen mun aya juri nu can kungsi meunang hadiah sastra! Aya juri nu teu kualipaid! Nya ngaco atuh!" cek kritikus Cecep Borges bari kekerot bangun nu hayang neunggeulan Dewan Juri, sabada rengse acara kituna teh.

Saterusna, pihujaneun geus meh bedah, guludug bebeledagan marengan. Jang Hadim mulang. Sajajalan, Si Mamat jeung Si Dartam katenjona rampang-reumpeung, teu puguh rarasaan. Ret deui, ret deui ka Jang Hadim nu angger teu riuk-riuk. Wanci subuh carunduk ka lemburna teh, dipapag angin ngadudud. Hujan teh tacan breg keneh, kalah tatit sambung-sinambung jeung guludug nu terus bebeledagan basa Jang Hadim sapara cantrik anjog ka buruan padepokan. Kasampak teh para cantrik nu talugur can sarare, keur ngariung lebah tangkal haur bodas.

"Kang, Kang Hadim! Haur bodas dituar ku Haji Abing! Kulahna ge disaeur deuih!" aya cantrik hariweusweus.

Aya gelap ngabeledag tarik naker. Breh Haur bodas nu panjangna geus aya kana tilu meterna kasampak geus ngagoler dina taneuh panyaeuran kulah tea. Jang Hadim nyiak sakedapan, tuluy katembong ngagidir. Jang Hadim maju lalaunan, tuluy deku nyanghareupan haur bodas. Para cantrik bruk-brek dareku. Meunang sawatara jongjongan mah Jang Hadim ngahuleng bari muncereng.

"Gobaaaaang!" Jang Hadim ngagorowok mapakan sora guludug.

Para cantrik lalumpat neangan gobang. Jul-jol deui sagobangna-sagobangna. Jang Hadim nampanan gobang ti Si Mamat, tuluy nilas haur bodas jadi tilu. Tungtung haur diseukeutan. Kituna teh bari terus humariring. Sorana jadi robah. Basana jadi aheng. Cek beja kadieunakeun, nya harita Jang Hadim teh ngabadagan, beuki lila beuki jangkung. Buukna, kumisna, janggotna beuki manjangan jeung jadi ngeplak bodas.

"Anteurkeun kana beuheung Haji Abing!" cek Jang Hadim nu sorana ngagoronggong, nu panonna ngempur hurung, sabot mikeun bambu runcing tina haur bodas tea ka Si Mamat jeung ka Si Dartam.

Angin beuki ngagelebug bae basa Si Mamat jeung Si Dartam ngagedig bari kekerot, muru imah Haji Abing. Dapuran haur munggah muntir bangun aya nu ngahaja rek ngarabut. Cigede kapireng seah ditarajang caah dengdeng. Jang Hadim ngajejega di buruan padepokan bari nyekel bambu runcing, dibaturan ku para cantrik nu samakta.

"Haji Abing tiwas, para cantrik! Haji Abing aya nu mateniii!" kitu cek bewara tina pengeras sora, tatalepa ti masjid ka masjid, bada rengse adan subuh.

Pa Kuwu tibuburanjat basa Kulisi laporan yen Haji Abing ditelasan ku Si Mamat jeung ku Si Dartam. Teu lila, aya Hansip nyebrut dina motor rek lapor ka kacamatan. Ari Pa Kuwu jeung Mang Kulisi katut Hansip saaleutan kebat nanjak muru ka padepokan.

"Teu bisa! Si Mamat jeung Si Dartam moal dibikeun ku Kula!" cek Jang Hadim, nu geus make jubah bodas, ka Pa Kuwu nu ngahaja mamandapan.

"Ih, ulah kitu, Jang! Ulah ngalanggar hukum!" saur Pa Kuwu bari ngareretan cantrik nu samagreng, nu marake pakean bodas, nu marake iket bodas.

"Moal! Moal dibikeun! Montong maksa, Kuwu!" Jang Hadim ngulangkeun bambu runcingna.

Pa Kuwu sabatur-batur kapaksa undur barang nenjo para cantrik ngalalugas pakarangna.

Isuk-isuk, hujan mimiti miripis basa Pa Kuwu angsrog deui ka buruan padepokan dibarengan ku para patugas kaamanan ti kacamatan. "Dibikeun sukur! Teu dibikeun maraneh bakal cilaka!" tungtungna patugas mungkas obrolan.

Jang Hadim ngagidir. Samemeh eta patugas nyabut pestolna, Si Dartam ngaheumbat manten. Gabres. Bambu runcing bodas teh ambles niir jajantung patugas. Ger geus kitu mah campuh. Girimis beuki kerep. Para cantrik rikat rek ngarebut bedil. Basa hujan geus ngagebret, nu galungan beuki ragot. Tungtungna, para patugas kadeseh. Bedil rea nu karebut. Para patugas katawuran, ninggalkeun baturna nu taratu jeung nu geus ngababatang.

Hujan ngagebret sapopoe. Caah Cigede leb-leban. Angin teu weleh gumuruh. Kakayon rea nu rungkad, ngahalangan treuk patugas kaamanan nu cunduk ti kabupaten. Lembur ditutup. Padepokan dikepung. Rahayat mungguh tagiwur. Salembur nalingkreb maneh bari keueung liwat-saking.

Maju ka sareureuh budak, ti lebah padepokan kapireng nu tingborobot, tingjalegur. Sora bedil awor jeung nu gogorowokan, jeung sora-sora nu jumerit bangun keur nahan kanyeri. Aya oge nu kalaluar ti imah, nyerangkeun seuneu nu ngabela-bela di padepokan. Tengah peuting jemplingna teh. Tapi hawar-hawar, kadenge keneh sora piriwit jeung sora nu paparentah.

Tah, ti harita, lembur teh jadi manjang ngalanglayung. Teu aya nu kungsi apal sabaraha urang jumlah nu tiwas peuting harita. Taya nu wani ngulampreng ka palebah padepokan nu kari ruruntuk tutung. Cek beja, lebah dinya rea pisan haur bodas nu jaradi tingkulisik. (*)

Sambungan ti Bagean 2

T A M A T

---

Godi Suwarna