Sasakala Gunung Tampomas

Kacaritakeun, Gunung Gede anu aya di Sumedang ngaluarkeun sora pohara pikakeueungeunana. Sorana ngaguruh. Tina puncakna kaluar haseup campur lebu anu hurung. Ieu gunung kawas-kawas arek bitu. Rahayat Kabupaten Sumedang harita, pohara rareuwaseunana. Kumaha balukarna lamun eta Gunung Gede bener-bener bitu?

Teu kacatur saha anu jeneng bupati harita. Ngan eta bupati teh pohara toweksana ka rahayat, wedi asih sarta bijaksana. Atuh sanajan can kalaporan ge anjeunna parantos uningaeun, kumaha tagiwurna rahayat. Anjeunna teras ngemutan sangkan bisa nyalametkeun rahayatna.

Ku pangjurung kanyaah ka rahayat tea, anjeunna teras nyepi di hiji kamar, seja mujasmedi neda pituduh ti para dewa. Susuganan ku jalan kitu, anjeunna tiasa mangadep ka Yang Tunggal, dipasihan pituduh pikeun nyalametkeun rahayatna.

Ku cengeng-cengengna nu mangadep, alhamdulillah, maksad Kangjeng Bupati tinekanan. Dina hiji wengi, Kangjeng Bupati ngimpen kasumpingan hiji aki-aki. Eta aki-aki anu nganggo anggoan sing sarwa bodas teh, pok sasauran anca pisan, "Putu Eyang anu kasep, Éyang geus terang kumaha kabingung hidep. Eyang hayang mantuan sangkan rahayat hidep bisa leupas tina kahariwangna. Eta gunung kudu ditumbal ku keris pusaka kagungan putra dalem anu dijieun tina emas. Poma hidep ulah deuk ngoretkeun. Tah, sakitu bae ti Eyang."

Sabada sasauran kitu, eta aki-aki teh les bae leungit tina impenan Kangjeng Bupati. Satampina eta ilapat, enggal bae Kangjeng Bupati kaluar ti kamar sarta teras nyandak keris pusaka.

Enggal anjeunna angkat ngajugjug ka puncak Gunung Gede. Rurusuhan da sieun bitu manten. Najan rahayat anu keur bingung, nyaksian Kangjeng Bupati angkat ka puncak gunung mah, teu tegaeun ngantep. Bring bae naluturkeun. Sadugina ka puncak Gunung Gede, Kangjeng Bupati teu talangke, ngan lung bae eta keris teh dialungkeun kana kawahna. Rahayat anu tadi naluturkeun teh ngan bati colohok, da eta keris teh estu kageugeut pisan Kangjeng Bupati.

Barang eta keris geus dikana kawahkeun, jep saharita sora anu ngaguruh pikakeueungeun teh jempe. Lini anu geus lila karasa, harita mah teu karasa naon-naon. Sabada leungit kagetna, timbul kabungah rahayat teh. Ger bae surak bakat ku atoh, sarta tuluy sumujud ka Kangjeng Bupati tanda nganuhunkeun.

Sakabeh rahayat ngaikrarkeun seja satia-satuhu ka anu ngaheuyeuk dayeuh. Eta maksud kasatiaan rahayat teh ku Kangjeng Bupati ditampi kalayan dareuda, bakat ku bingah. Bingah manahna lantaran bisa nyingkahkeun balai, bingah lantaran bisa nyalametkeun rahayatna.

Tah, nya ti harita pisan eta gunung katelah Gunung Tampa Emas, anu saterusna robah jadi Gunung Tampomas. Ayeuna mah teu pikasieuneun, malah mun pareng poe pere mah sok rajeun dijarugjugan nepi ka puncakna. (*)

---

Budi Rahayu Tamsyah