Lalakon Pilot

Saurang pilot tagiwur sabab kapal ngapungna leungit kasaimbangan. Keur ngurangan beban, si pilot miceun pestolna ka handap, tuluy miceun bedil panjangana, tapi angger karasa beurat keneh. Ahirna si pilot miceun bomna nepika eta kapal karasa enteng tur bisa ngadarat sakumaha ilaharna. Eta pilot salamet, tuluy manehna balik.

Di satengahing jalan, manehna nempo saurang budak keur ceurik bari ngagugulung bangke hayam.

"Kunaon ceurik, Jang?" ceuk si pilot nanya.
"Hayam abi paeh katinggang pestol ti luhur," cenah jawabna.

Si pilot menta hampura ka eta budak tuluy leumpang deui sanggeus mere duit sababaraha lambar. Teu kungsi lila, manehna nempo deui saurang budak keur ceurik bari ngagugulung embena nu keur sakarat.

"Aya naon, Jang?" tanyana deui panasaran.
"Ieu Pa, embe abi katinggang bedil panjang ti luhur," tembalna jiga nu sedih.

Si Pilot menta hampura, song mere duit sababaraha lambar tuluy manehna leumpang deui. Teu jauh tidinya, manehna nempo saurang budak nu keur seuri babarakatakan jiga nu meunang ka bungah.

"Jang, kunaon seuseurian?" tanya si pilot bangun nu heran.
"Ha...ha...ha..., uing mah jagoan, Mang. Tadi pas uing bersin, imah uing langsung ngabeledug," ceuk eta budak nu teu lian nyaeta si Ucil bari nunjuk imahna nu ancur paburantak.