Sasakala Kuda

Jaman baheula - beh ditueun baheula - waktu sasatoan barisa keneh ngomong cara jelema, di hiji leuweung aya sato gede. Eta sato ngadenge beja, yen di dunya aya manusa sarta pinter pisan akalna. Eta sato hayangeun nyaho kumaha rupana manusa teh, jeung hayang nyaho kapinteranana.

Tuluy eta sato gede teh kaluar ti leuweung, maksud rek neangan manusa tea. Di jalan papanggih jeung jalma tiluan. Eta sato teh nanya, "Rek ka mana maraneh araya di dieu?"

"Rek ngala suluh ka leuweung," tembal nu saurang. "Ari maneh rek ka mana?"

"Kieu, bejana di alam dunya teh aya anu disebut manusa, pinter jeung rea akalna. Kaula hayang nyaho rupana, jeung kaula hayang nyoba kapinteranana. Sugan andika nyaraho, di mana ayana eta manusa teh?"

"Puguh bae nyaho mah, ngan tempatna jauh. Tuh, di ditu!"

"Naha maraneh bisa nganteur kaula, sabab kaula hayang pisan panggih jeung nu disebut manusa teh."

"Bisa, ngan kaula teu kuat leumpangna, sabab kacida jauhna."

"Gampang, lamun maraneh teu kuat leumpang mah, tarumpak bae dina tonggong kaula. Gede tanaga kaula mah."

"Ah, embung, tumpak dina tonggong maneh tiluan mah, sieun aya nu ragrag engke mun maneh lumpat. Kieu bae ayeuna mah, ku lantaran geus burit, sanajan dianteur oge ku kaula tiluan, moal bisa nepi beurang keneh ka ditu, da kacida jauhna tea. Kumaha lamun isukan bae isuk-isuk, jeung kaula rek mikir-mikir heula, supaya bisa kabawa tiluanana."

"Heug!" ceuk eta sato teh.

Tuluy eta sato teh balik ka tempatna di leuweung. Nya kitu deui jalma nu tiluan tea baralik ka lemburna.

Sadatangna ka lembur, jalma anu tiluan teh badami, kumaha akalna sangkan bisa tumpak eta sato bareng tiluan.

Cek nu saurang, "Urang nyieun padati leutik bae, kai loba. Keun manehna sina narik, urang tiluan tarumpakna."

Tuluy eta jalma nu tiluan teh sapeupeuting nyieun padati leutik, kira asup tiluaneun.

Isukna isuk-isuk, sato gede teh geus papanggih deui jeung jalma anu tiluan.

Cek jalma nu saurang, "Tah, ieu padati tarik ku maneh, kaula tiluan nu tarumpakna!"

"Kumaha narikna, da kaula mah teu boga leungeun."

"Gampang, hulu (sungut) maneh bae ditalian (dikadalian), talina dicekel ku kaula, bisi maneh tarik teuing lumpat ku kaula bisa ditahan. Jeung dada maneh ditalian kana ieu padati (make lestreng), supaya ieu padati katarik," cek nu saurang teh.

"Ari eta naon?" ceuk eta sato bari nunjuk kana gadona.

"Ieu ngaranna pecut. Bisi maneh lumpatna kendor, ku ieu pecut bisa gancang deui."

Sanggeus sagalana beres, tuluy elesna dicekel ku nu saurang. Ceterr...eta sato dipecut, belenyeng lumpat tarik pisan. Barang geus rada jauh, sato teh eureun, nanyakeun, "Jauh keneh tempat manusa teh?"

Ditembal ku jalma nu saurang, "Geus deukeut. Tuh beh ditu!"

Belenyeng deui eta sato lumpat.

Barang geus kacida capeeunana, sato teh eureun deui, nanyakeun, "Di mana ayeuna manusa teh, kaula geus kacida capena?"

Jalma anu tiluan tarurun tina padati. Cek nu saurang, "Saenyana ieu kaula tiluanana nu disebut manusa teh. Ayeuna maneh rek kumaha? Rupana manusa ayeuna maneh geus nyaho, akal jeung kapinteranana geus bukti, nepi ka maneh geus bisa mawa kaula tiluan nu sakitu jauhna, ditarik ku maneh dina ieu padati meunang nyieun manusa."

Jawab eta sato, "Bener, manusa teh pinter, rea akalna. Ayeuna kaula taluk ka manusa. Jeung kaula rek menta ngaran ka andika, sabab kaula tacan boga ngaran."

Ceuk jalma nu pangpinterna, "Ayeuna maneh ku kaula dingaranan kuda, sabab waktu maneh rek lumpat narik padati tadi, ku kaula katenjo kuku suku maneh ngukud kana taneuh, jeung dada maneh narik kana ieu padati."

Nya nepi ka ayeuna, sato nu kitu pandena teh disebut kuda. (*)

---

Ki Umbara - Dongeng-Dongeng Sasakala (Geger Sunten)