Kakariaanan

Indoeng bapa Roesdi samemeh arindit ka pasar, ngomong ka anakna, "Baroedak, sia montong mariloe ka pasar, da Ĕma oge moal lila. Ĕngke ti pasar dikirim kahakanan djeung tjotjooan. Tjaritjing bae sia di dieu, toenggoean imah."

"Heug!" tembal baroedak teh.

Indoeng bapana djoeng arindit kapasar.

Roesdi djeung Misnĕm aroelin di tĕpas. Teu lila djol batoer oelinna, si Ramlan djeung si Iti.

"Keur naraon, euj?" tjeuk Iti.

"Keur oelin bae," tembal si Misnĕm.

"Nĕm! Oerang oelin hajoe, ka sawah," tjeuk Iti.

"Ah emboeng," tembal si Misnĕm. "Da aing mah dititah toenggoe imah koe ĕma."

"Na ka mana indoeng sia, Nĕm?"

"Keur ka pasar, Ti, malah djeung bapa ka pasarna. Di dieu bae atoeh oelinna Iti! Ĕngke ari koe Ĕma dikirim naon-naon ti pasar, sia dibere koe aing."

"Seug!" tembal si Iti.

"Oerang kakariaanan hajoe," tjeuk si Misnĕm.

"Pek, ke aing ngala daoen nangkana, keur sigĕr djeung beubeurna," omong Roesdi. "Si Ramlan sina njieun papadjanganana koe dangdaoenan."

Si Roesdi njieun sigĕr geus anggeus, make rarawis koe kĕkĕmbangan. "Tah deuleu, baroedak, geus anggeus sigĕr teh. Pek sia pangantenna, Misnĕm."

Si Misnĕm geus didangdanan, disigĕran daoen nangka, beubeurna daoen nangka, didjieun kawas panganten, ari kongkorongna kĕkĕmbangan.

Beunang ngadangdanan, toeloej broel diiring-iringkeun. Tatabeuhanana batok, kaleng, djeung awi ditakolan. Baroedak tatanggana daratang ngariloe oelin. Atoeh rame bae aroelinna saloesoerakan.

Sanggeus iring-iringan ngoerilingan imah, gek pangantenna didioekkeun dina papadjangan tea.

Keur rame-rame aroelin, djol indoeng bapa Roesdi daratang ti pasar.

"Tah geuning baroedak teh balageur," tjeuk indoeng Roesdi. "Top ieu kahakanan geura saridĕkah."

Baroedak ngarioeng, baranghakan. Sanggeus baranghakan, toeloej baralik ka saimah-imahna. (*)