Ngaran Bagian Awak Sasatoan

Dina basa Sunda loba istilah-istilah anu patali jeung sasatoan. Di handap ieu bisa ditengetan hiji-hijina.

1. Tanduk

• Dongkol » Tanduk anu ngulapes duanana, goreng katenjona.
• Leker » Bangun tanduk munding anu meh siga leukeur (meh mangrupa sirkel), tungtung jeung tungtung padeukeut.
• Ranggaek » Tanduk anu cagakan atawa nu nyengklik.
• Sanggadulang » Bangun tanduk munding anu melengkungna rubak ka gigir.

2. Hulu

• Balung » Jawer hayam nu ka luhur (bagian luhur).
• Bangus » Sungut sasatoan suku opat (anjing, babi, jeung sajabana).
• Cula » Sabangsa tanduk dina cukang irung badak.
• Cungur » Tungtung irung sasatoan sabangsa munding jeung sajabana.
• Gading » Sihung gajah atawa singa laut.
• Jawer » Gagaber handapeun careham (hayam, kalkun, jeung sajabana) .
• Loyop (koplok) » Ceuli sasatoan anu ngaplek.
• Pamatuk » Sungut sasatoan sabangsa manuk, hayam, jeung sajabana ti eta, paranti macok.
• Rancung » Ceuli sasatoan anu nangtung/jeceng.
• Sihung » Huntu sato galak, bangunna mencos antara huntu hareup jeung careham.
• Tulale » Irung gajah nu panjang sarta bisa dipake barang cokot saperti leungeun.

3. Awak

• Buntut » Bagian awak sato nu pangtukangna.
• Burih » Bagian eusi beuteung bangsa manuk tempat ngancurkeun (ngagiling) kahakananana.
• Cecepet » Anggahota badan lauk cai pikeun kasaimbangan awakna.
• Dada mento » Daging dada hayam jeung bangsa manuk lianna.
• Gagaber » Bagian kulit beuheung sapi India jeung sawatara sato sejen nu guwang-gawing.
• Jangjang » Anggahota badan bangsa manuk, insekta, jeung sajabana ti eta, nu biasana sok dipake hiber.
• Pamatil » Cucuk cecepet lauk tur sawareh ngandung peurah.
• Sisit » Bagian kulit sasatoan tina sabangsa tanduk nu nyusun.
• Telih » Sarupa kantong handapeun beuheung hayam jeung bangsa manuk lianna, tempat ngumpulkeun kahakanan.
• Tunggir » Bagian buntut hayam jeung bangsa manuk, ngandung gajih pikeun ngaleuciran buluna.

4. Suku

• Cakar » Tapak cokor.
• Ceker » Kuku sato opat nu beulah dua (embe, sapi, jeung sajabana ti eta).
• Cokor » Suku sasatoan.
• Siih » Senggeh suku hayam jago nu siga sihung paranti ngabintih.
• Talapok » Kuku kuda nu sok diterapan beusi ti handapna.

5. Bulu

• Borontok » Warna bulu hayam, hideung atawa beureum campur totol-totol bodas.
• Bulu kumuut » Bulu nu kakara jadi, lemes keneh.
• Bulu pangere » Bulu manuk nu kakara mekar congona.
• Jambul » Bulu-bulu istimewa dina hulu sawatara hayam, japati, jeung sajabana ti eta, nu rada nyungcung.
• Kondang » Warna bulu hayam semu koneng.
• Kukuncung » Bulu anu ngacung atawa ngacir dina huluna.
• Rengge » Warna bulu hayam nu meh siga cele leutik.
• Rintit » Bulu hayam nu carentik. (*)