Dongeng Paman

Roesdi, Misnĕm djeung pamanna, sanggeus daladaharan sore, gek darioek di tĕpas hareup.

"Koemaha dongeng boehaja teh, mang?" tjeuk Roesdi. "Tjing mangga geura tjarioskeun, koering hajang tĕrang!"

"Jeuh, kieu geura!" tjeuk pamanna, "Pek darengekeun!" Roesdi djeung Misnĕm beuki dareukeutan bae darioekna ka pamanna, malah Misnĕm mah nĕpi ka menta dilahoen.

"Taoen katoekang Emang njaba ka pakidoelan tanah Priangan, waktoe njiar barang dagangan. Dina hidji poe nĕpi ka sisi waloengan noe rea boehajana. Sawareh ngadarakom marojan dina keusik. Sawareh aja noe teuteuleuman, ngan katembong goebar-geborna bae. Harita Emang teu wani deukeut ka sisi tjai, da sieun koe sakadang-sakadang noe sakitoe gĕdena, nĕpi ka rek nintjak sasak oge teu wani, da sieun dioedag."

"Keur waktoe Emang leumpang, di beulah girang aja awewe ngelek boboko kasisi tjai. Koe Emang teu di geureuh-geureuh, da mana kitoe oge biasana, teu sieun koe boehaja. Eta awewe tea gog nagog dina batoe bari ngisikan. Sihoreng gigireun batoe aja boehaja gĕde pisan, keur galasar-goeloesoer mojan. Koe eta awewe tea roepa-roepana teu kanjahoan. Noe ngisikan tea ongkoh-ongkoh bae. Boehaja tea ti toekangeunana ngadodoho newak soekoena. Barang gĕp digegel, awewe teh gĕgĕroan menta toeloeng."

"Kabĕnĕran aja boedak noe njahoeun, toeloej manehna loempat bebedja ka kolot-kolot di lemboer eta. Djĕlĕma-jĕlĕma ti lemboer ngabroel sapakarangna, rek noeloengan eta awewe tea. Tapi daratangna ĕlat teuing, awewe teh geus teu aja, digusur boehaja ka djero leuwi, ngan kari beasna bae awoer-awoeran loehoereun batoe."

"Djĕlĕma noe rek naroeloengan, roepa-roepana geus teu sieun deui koe boehaja teh, broes bae taloetoeroeboen kana leuwi. Lĕp manehna nareangan awewe tea. Tapi weleh hĕnteu kapanggih, taksiran geus digoesoer ka leuwi sedjen. Boehaja noe aja dina eta leuwi kawasna ngan hidji-hidjina, da boektina teu tembong deui noe sedjen."

"Koemaha ari Emang miloe mantoean neangan?" tjeuk Roesdi.

"Atoeh poegoeh bae!" tembal pamanna. "Sieun oge ngawajahnakeun maneh bae, da kolot boedak oerang-oerang dinja geuning tjrab-tjroeb alantjroeb ka leuwi.

Djĕlĕma kabeh geus harandjat ti waloengan toeloej baralik, malah sawareh mah aja noe tjeurik aloek-aloekan, taksiran baraja-barajana djeung anak-anakna."

"Lah matak karoenja nja, Mang," tjeuk Misnĕm, bari baragadag birigidig ngomongna.

"Hadena bae di lemboer oerang mah euweuh sato kitoe, nja Mang!" omong Roesdi. "Meureun oeing moal wani oelin djaoeh, da sieun dihakan boehaja." (*)