Si Dudung Tukang Ngadu Hayam
Aya hiji budak lalaki ngarana Dudung. Si Dudung kacida baong jeung kacida ngedulna. Pagawean sapopoena nya eta ngadu hayam. Hayam aduanana kacida dipikameumeutna. Buluna salawasna herang, jeung siihna seukeut wae. Ku manehna dingaranan Si Jago.
Dina hiji poe manehna indit ka kampung sabrang rek ngadu, bari ngengelek hayam Si Jago. Sanggeus nepi ka nu dituju, der hayamna diadukeun jeung Si Jagur hayam Si Imot. Hayam si Dudung geus sadia narima serangan musuh, panonna neuteup seukeut ka Si Jagur.
Braakkk...! Si Jagur nyuruduk ka Si Jago. Atuh Si Jago ngajoprak. Si Jagur beuki galak, jeprot-jeprot ngabintihan. Si Jago teu walakaya. Tapi ku Si Dudung dipaksa nangtung, bari diguyur ku cai ambeh seger deui cenah. Tapi acan oge nangtung, Si Jagur geus nyuruduk deui. Atuh Si Jago beuki teu walakaya, nepi ka paehna.
Lantaran geus eleh, Si Dudung balik ka imahna. Di imahna geus nyampak budak lalaki pantaran manehna, anu dibaturan ku buta. Si Dudung diadukeun jeung budak lalaki tea ku si buta, bari dipapanas.
Ger bae Si Dudung gelut. Duanana geus pada-pada capeeun, jeung baloboran getih. Tapi ku si buta terus bae diadukeun teu meunang eureun.
Lantaran geus teu kuat nahan kanyeri, blug wae Si Dudung labuh, tuluy jejeritan bakat ku nyeri. Bray beunta, korejat hudang.
Ti harita manehna tobat. Ayeuna Si Dudung tara ngadu hayam deui. (*)
Nuryatiningsih Sudrajat - Mangle No. 907 (1983)
Reviewed by Rupa Sundapura
on
20.38
Rating:
