Istilah Babagian Imah

• Abig; ampig » Bilik juru tilu dina pongpok leuit atawa pongpok imah.
• Adeg-adeg » Pananggeuy nok dina suhunan.
• Amben » Tepas imah panggung nu lantena tina palupuh.
• Babancik » Golodog; papangge.
• Balandar » Sarupa balok nu wangunna pasagi opat dipasang di luhur kuda-kuda pikeun nahan usuk dina rangka hateup.
• Bangbarung » Kai atawa awi antara tihang panto di handap.
• Cemped » Lakop; papan heureut atawa awi sabebek anu dipake nutupan sarta mageuhan sisi-sisi atawa sambungan bilik.
• Dalurung; darurung » Awi guluntungan atawa kai antara pananggeuy jeung palupuh dina imah panggung.
• Damit » Iga-iga leuit; palang dada luareun bilik.
• Deudeul » Tihang pondok panahan dalurung (di kolong imah panggung).
• Erang-erang » Awi atawa kai nu aya di antara dua tihang panto atawa jandela belah luhur.
• Ereng » Awi bebekan atawa kai paranjang nu dipaku kana usuk pikeun ngaitkeun ceuli kenteng, numpangkeun seng, jeung sajabana nu dipake tutup suhunan (hateup).
• Gagalur » Kai atawa beusi panahan tataban.
• Galar » Palang dada; kai malang antara dua tihang wates sadada (harigu). Luhurna sok dipake barangteundeun.
• Golodog » Tangga paranti unggah-unggah di imah panggung.
• Hateup » Tutup diluhureun imah supaya iuh, ulah kapanasan, asup cihujan, jeung sajabana.
• Heuay badak » Liang haseup; bangunan pasagi dina suhunan dapur nu make hateup deui sina calangap.
• Iga-iga » Pamageuh bilik jeung bilik deui.
• Jandela » Lawang cahaya jeung hawa dina bilik atawa dingding tembok nu biasana bisa dibuka jeung ditutup cara panto. Aya oge nu make sarigsig.
• Jungjang » Kai atawa awi anu dipalingpangkeun antara dua tihang supaya ulah reyod; pamageuh saung atawa raraga imah nu rek di adegkeun.
• Jure » Kai suhunan antara pucukna jeung juru imah nu opat.
• Kolong » Rohangan di handapeun imah panggung.
• Kuda-kuda » Balok kai nu dipasang dengdek anu nyambungkeun tihang adeg jeung pamikul.
• Kusen » Kai rangkay panto atawa jandela.
• Lincar » Cemped (papan) rubak pikeun nutup bilik ti belah luar, lebah darurung, atawa pikeun nutup tungtung darurung nu di hareup (dina imah panggung).
• Mundu » Golodog panto.
• Palang dada » Galar.
• Palipid; palisir » Papan nu dipake nutup tungtung usuk supaya ulah katenjo rogokna.
• Palupuh » Lante imah panggung nu dicacag ka panjangna tuluy dibeberkeun sarta diamparkeun dina dalurung. Biasana dijieun tina awi.
• Pamikul » Panahan suhunan ka panjangna imah.
• Pangeret; pangheret » Pamikul rubakna atawa heureutna imah.
• Panto » Panutup lawang imah nu bisa dibuka jeung dipeundeutkeun (ditutup).
• Papangge » Golodog atawa babancik.
• Para » Bagian imah antara suhunan jeung lalangit.
• Pondasi » Dasar atawa tatapakan adegan tembok (gedong); pasangan batu jeung adukan dina rorakan anu jerona nepi kana lapisan taneuh nu teuas.
• Pongpok » Rohangan di sisi (handapeun suhunan) anu sok ditutup ku abig (ampig).
• Ranki » Sabagian tina suhunan imah baheula anu dijieun tina sasag paranti hateup balubur.
• Sarang » Awi beunang meulahan saperti ereng nu dipasang dina dalurung handapeun palupuh.
• Sarigsig; ruji » Sarupaning pager saperti dina jandela paragi liang hawa. Dijieun tina awi, kai, atawa beusi supaya ulah beunang diponcoran.
• Siku-siku; sisiku » Kai atawa awi sateukteuk pikeun ngawewegan raraga imah atawa wangunan sejenna.
• Sorondoy » Hateup panambah gigireun atawa tukangeun adegan nu geus aya.
• Sosompang » Wawangunan panambah mangrupa kamar. Biasana keur saheulaanan.
• Suhunan » Bagian imah nu pangluhurna, ngujur manjang nurutkeun wangun imah.
• Tataban » Papan kandel nu dipake lante imah panggung.
• Tatapakan » Batu atawa tembok tempat napakna tihang imah.
• Teer » Kai atawa awi guluntungan nu nyambungkeun antara dua tatapakan.
• Tihang » Kai atawa awi panjang nu ditangtungkeun pikeun nahan pamikul imah.
• Usuk » Kaso-kaso.
• Wuwung » Tutup hateup sapanjang sambungan suhunan, tempat patepungna dina puncak suhunan (tembok atawa seng). (*)