Ngaran-ngaran Wanci

Beungharna kecap jeung motekarna urang Sunda salasahijina bisa diilikan dina jam atawa ciri wanci. Ampir unggal jam dina wanci sapoe sapeuting aya istilah anu dipake pikeun ngaranan waktu. Dina basa sejen mah acan tangtu aya anu samodel kitu teh. Ngaran-ngaran eta biasana mah nyokot tina kabiasaan atawa kajadian anu aya dina kahirupan sapopoe, upamana bae saperti wanci pecat sawed anu nuduhkeun yen dina wanci eta teh sawed paranti nalian beuheung sapi atawa munding dileupaskeun atawa dilaan. Aya deui wanci sareureuh budak anu nuduhkeun dina waktu eta barudak mimiti sarare.

1. Wanci tumorek (jam 00.30)
2. Wanci janari sapi (jam 01.00)
3. Wanci janari leutik (jam 01.30)
4. Wanci janari gede (jam 02.00)
5. Wanci disada rorongkeng (jam 02.30)
6. Wanci haliwawar (jam 03.00-03.30)
7. Wanci janari (jam 04.00)
8. Wanci balebat 05.00)
9. Wanci carangcang tihang (jam 05.30)
10. Wanci murag ciibun/meletek sarangenge (jam 07.00)
11. Wanci haneut moyan/laer kanjut (jam 08.00)
12. Wanci rumangsang (jam 09.00)
13. Wanci pecat sawed (jam 10.00)
14. Wanci manceran/tengah poe (12.00)
15. Wanci lingsir ngulon (jam 14.00)
16. Wanci panonpoe satungtung (jam 15.00)
17. Wanci tunggang gunung (jam 16.00-17.00)
18. Wanci sariak layung (jam 17.00-18.00)
19. Wanci erang-erang (jam 17.30-18.00)
20. Wanci sareupna/harieum beungeut (jam 18.00-18.30)
21. Wanci sareureuh gaang (jam 19.00)
22. Wanci sareureuh budak (jam 21.00)
23. Wanci sareureuh kolot (jam 22.00)
24. Wanci tengah peuting (jam 24.00) (*)

-=oOo=-