Dongeng Harengheng (Sasakala Reungit)

Neng Wiwin oge sakedapan mah rada ngahuleng, basa nyaksian Si Buruy anu riringkid mawa bantal jeung simbut, bari ngagidig semu rurusuhan. Bubuhan Neng Wiwin mah jalma anyar, nya tangtu bae can pati apal kana kabiasaan barudak di Cigorowek.

Bisa jadi, panyangkana mah rek pundung deui, alatan dicarekan ku akina. Maklum da Si Buruy mah, ampir unggal bulan, pundungna teh. Lamun lain perkara embung dicukur, paling oge urusan jeung tatanggana, alatan nyumputkeun sendal. Matak urang Cigorowek mah da geus teu pati araneheun deui.

Tapi ari peuting eta mah, Si Buruy lain rek pundung cara sasarina. Sanajan akina ninitah oge, Si Buruyna tara daekeun. Pangpangna mah sieun henteu dipangmeulikeun pakean anyar. Unggal bulan puasa oge, memang Si Buruy mah sok pindah sare ka tajug. Malah lain Si Buruy bae. Kaasup batur ngabluna oge, da sarua tukang meuting di tajug.

Bras, Si Buruy ka hareupeun tajug. Di dinya geus ngadagoan barudak pantaranana aya kana sapuluh urang. Biasa bae, sabangsaning Si Atek, Si Ook, jeung sajabana. Teu pati beda jeung Si Buruy, maranehna oge geus tatahar bekel sare sapuratina.

"Jadi kumaha acara peuting ayeuna?" tanya Si Atek, bari menerkeun kopeahna anu rada dengdek.

"Bejana mah, di imah Mang Sarkowi aya dulurna ti kota," tembal Si Buruy.

"Urang mana?"

"Bejana mah ti Cianjur."

"Cianjurna di mana?"

"Ciranjang."

"Wawuh ka Neneng Rostika?"

"Nyao. Na jeung nanya ka uing atuh. Tanyakeun bae ka jinisna!"

"Aeh heueuh. Aya ku poho."

"Geulis, teu?"

"Dalapan koma tujuhpuluh tilu."

"Oh, saluhureun Neng Wida, sahandapeun Neng Lina," Si Ook mairan.

"Geus gandeng atuh! Kawas urusan matematika bae. Sok di beulah mana eta teh sarena?"

"Moal salah, pasti di kamar tengah. Da kamar tukang mah, apan sok dipake gudang pare."

Memang barudak teh keur meujeuhna badeur. Sakapeung mah sok matak ngajangarkeun kolot. Heureuyna oge sok kamalinaan. Eta bae, boga pangarasep kana noong oge, apan geus adat kakurung ku iga. Leuheung basa, lamun tara bari ngaruksak. Da ieu mah, apan bilik imah Aki Jamhuri oge, nepi ka barolong, balas ditarojosan ku paku. Kungsi eta oge Si Atek neunggar cadas. Basa hiji mangsa keur noong budakna Mang Suhadma. Teu kanyahoan mimitina, Mang Suhadma geus aya di tukangeunana, bari mawa haseupan. Teu antaparah deui, haseupan teh dirungkupkeun kana sirah Si Atek, nepi ka tosblong. Puguh bae Si Atek reuwas kabina-bina. Beretek lumpat tipararetot. Mangkaning haseupan teh, hese pisan diudarna.

Dina bulan Puasa taun ieu mah, acara Si Buruy anu kaitung ngetrend keneh teh, nyaeta abring-abringan dina wanci saur, bari nakolan sabangsaning kaleng butut. Malah sakali mangsa mah, nepi ka bedug masigit oge apan diparanggul. Leuheung basa lamun diteundeun deui kana urutna. Da ieu mah sangeunahna pisan atuh. Cle di mana karep. Puguh bae, basa Ustad Otong rek nakol bedug subuh, kacida medenghelna barang ningali bedug geus teu nyampak di tempatna. Mangkaning di Cigorowek mah apan can aya speker. Geus ilahar, wanci subuh teh tandana ku nakol bedug. Ustad Otong kutuk gendeng, bari kukurilingan neangan bedug. Kapanggih-panggih teh, ngajugrug di sisi balong anu Mang Lurah, pipireun pisan kamar Neng Lina.

Sapeuting harita mah, Si Buruy saparakanca, teu bisa raramean cara sasari. Sajabana ti kaayaan hujan, katambah geus disetrap, tur meunang peringatan ti Mang Lurah. Lamun sakali-kali deui nyieun masalah sarupa kitu, mangka moal dibere kolek cau, sesa konsumsi anu taraweh. Antukna ngan ukur ngawangkong, bari ngararasakeun panon anu geus hayang liliaran.

"Aya ku loba-loba teuing reungit, euy. Mani napuk kieu," ceuk Si Atek, bari gogolehean kana rekal. Kituna teh leungeunna mani pahibut, ngeprakan reungit.

"Etah, ulah dipaehan. Reungit teh leluhur urang keneh," ceuk Si Buruy.

"Na kabina-bina teuing, ari ngomong teh." Si Atek nyerengeh.

"Itu geura. Marukana ngawadul. Uing mah nyaan, ceuk Bah Anes. Sing wani kabentar gelap tah!"

"Kumaha sih caritana?"

"Kieu..." derekdek bae Si Buruy nyaritakeun dongeng perkara reungit, anu kungsi didongengkeun ku Bah Anes sawatara waktu kaliwat. Kieu cenah mah:

Jaman baheula teh, antara reungit jeung jalma, aya patula-patalina. Hanjakal pisan, kaayaan waruga anu kalintang bedana. Ari reungit mah awakna gede, tapi teu bogaeun jangjang. Ari jalma mah, awakna leutik (sagede reungit jaman ayeuna) tapi boga jangjang.

Dina hiji poe, basa jalma keur gegeleberan luhureun kulambu, reungit pangangguran ngajakan ngawangkong.

"Jal, sigana lamun uing bisa hiber, aya bahan rada ngeunaheun nya. Bisa nginjeum jangjang, teu?" ceuk reungit, bari cengkat. Kop kana sendal, tuluy leumpang, muru ka palebah jalma anu keur euntreup.

"Ah, embung. Ke uing moal bisa hiber atuh!" tembal jalma.

"Kajeun atuh, da moal lila ieuh!" reungit satengah maksa.

"Sok atuh, asal uing nginjeum awak silaing. Uing oge hayang ngasaan boga awak gede!" pokna. Meunang sakedapan mah, reungit ngahuleng. Tapi lila-lila mah unggut-nggutan bari nyeh bae seuri.

"Sok atuh, tapi omat, ulah kabur!"

"Rek kabur kumaha? Apan awak gede mah, babari neanganna oge. Mun soteh uing, tinggal hiber bae rek niat kabur mah."

"Aeh, enya nya." Reungit nyatujuan. Satuluyna mah, tukeuran weh. Awak reungit dibikeun ka jalma. Jangjang jalma dibikeu ka reungit.

Nya ti harita pisan, kaayaan waruga reungit jadi leutik teh. Tapi ku lantaran jalma ngarasa ngaunah mibanda awak badag. Antukna teu daekeun ditukeuran deui. Kungsi sakadang reungit nyusulan jalma ka Babakan Sophia. Tapi bejana mah, jalma teh kalah nyumput dina jero lomari. Malah nepi ka ayeuna, jalma kalah nyiar tarekah, sangkan henteu diontrog ku reungit. Pon kitu deui, nepi ka kiwari, reungit taya kabosen neangan jalma. Tapi jalma siga anu api-api torek. Najan reungit ngagorowok kana liang ceuli oge, angger bae teu didenge. Malah sok kalah dipaehan.

"Ke..., ke..., ke..., asa teu pati nyambung carita teh. Euweuh ti dituna, bangsa manusa kudu urusan jeung reungit mah..." Si Ook ngahuleng.

"Geus, teu kudu dipikiran. Pilakadar oge dongeng Bah Anes gedebul. Dipercaya teuing atuh!"

"Jadi, pangna reungit sok nyoco teh, sigana mah alatan awakna teu dibikeun deui, nya?"

"Enya bener. Tapi ari perkara reungit anu sok rajeun nyerot getih mah, aya alesan khusus atuh."

"Naon tah?"

"Apan aya keneh, sesa pasipatan jalma anu ngancik dina reungit."

"Na ari jalma, baheulana sok resep nyerot getih jalma kitu? Aeh, getih reungit?

"Bandungan bae jalma jaman ayeuna...!" kituna teh bari menerkeun bantalna. Ukur sakedet netra, geus kadenge sora kerekna.

Leng, Si Atek ngahuleng, bangun anu jangar naker tayohna teh. (*)

---

Dhipa Galuh Purba