Eupan Ngurek

Abong jelema, beda sirah beda karesep. Contona bae Kang Baun. Sanajan ayeuna geus jadi Manajer Bajigur Pertelon, karesepna kana ngurek mah teu beunang disisilihan. Lamun aya waktu senggang, geus pasti neangan sawah anu kakara ditanduran. Ka dituna mah ngurek bari teu petot-petot ngagejligan galengan neangan bancet keur eupanna. Sakaresep jeung Jang Didin. Ngan ari Jang Didin mah ngurekna matuh di sawah sabudeureun Situ Wanayasa. Majarkeun teh cenah, belutna pungkil jeung girinyih.

Hiji mangsa Kang Baun tepung jeung Jang Didin di Wanayasa. Euweuh deui anu dicaritakeun teh ngan perkara ngurek bae. Urusan nagara jeung urusan mengbal, eleh ku urusan ngurek mah. Ieu mah ngurek ti beurang nya. Da ari ngurek ti peuting mah beda atuh. Jeung sawahna oge, teu kudu ngadagoan ditanduran heula. Bisa langsung dirambet.

"Upama ngurek di Kiarapedes, sok ku naon bae eupanna?" Jang Didin nanya ka Kang Baun.

"Nya sarua we jeung di dieu, ku bancet di ditu oge," tembal Kang Baun.

"Beda atuh, di dieu mah ayeuna eupanna kudu ku sardencis bae."

"Ah, nu bener, Jang? Kumaha mimitina bisa kitu?"

"Mimitina mah uing. Hiji mangsa, salila saminggu uing ngurek teu meunang hiji-hiji acan. Teu meunang kuntit-kuntitna acan. Panasaran, tuluy we ku uing teh ditawasulan. Ari tengah peuting, antara sadar jeung henteu, kadenge aya sora. Pokna teh, 'Jurig, lamun silaing hayang meunang belut di dieu, ganti deuleu eupanna, ulah ku bancet bae bosen. Aing mah hayang sardencis'. Isukna dicobaan eupanna ku sardencis, enya bae euy, salila saminggu mah mucekil-mucekil bae beubeunangan teh."

"Bener eta teh?" ceuk Kang Baun bangun teu percaya.

"Ih, piraku uing bohong kakapeungan, Kang. Teu lila, hese deui bae. Saminggu tah teu beubeunangan deui. Ditawasulan deui. Tengah peuting, kadenge deui aya sora, cenah ge, 'Jurig, ganti atuh sardencisna ulah Botan bae. Da aing ge hayang ngasaan sardencis sejen anu aya iklanna dina TV'. Dicobaan ku sardencis merek sejen. Enya, bangenan deui bae. Anu matak, uing mah lamun ngurek teh, sok mawa sardencis sababaraha kaleng. Lamun teu beubeunangan bae, nya didahar we sardencisna. Eta untungna teh, da ari kudu ngadahar bancet mah, terus terang bae embung najan sakumaha dipaksana oge," ceuk Jang Didin.

Kang Baun ukur ngaheheh. Teuing ngandel teuing henteu kana caritaan Jang Didin teh. (*)