Lomba Desa (Bagian 2)

Kuring ngajak Pa Lurah jeung ibuna asup ka rohangan gawe. Sanajan bahan laporanana geus siap, tapi can mimiti ngalatih. Ngobrol heula bae, panjang lebar. Lolobana mah ngeunaan pangalaman Pa Lurah. Tarekahna nepi ka bisa sukses, bisa meunangkeun Lomba Desa tingkat Kawadanaan, sanajan bari jeung teu dibantuan ku bojona dina ngabina kagiatan ibu-ibu PKK.

Tapi barang diajak ngamimitian diajar pidato mah, Ibu Lurah teh merod.

"Kieu bae atuh Bu Lurah! Cobi diaos we ieu laporan teh, mung kawitan we heula ku bubuka, ngahaturkeun nuhun ka nu haladir," omong teh. Bu Lurah tetep teu daek. Ku kuring dipangnuliskeun, kecap-kecap keur bubukana, supaya dibaca bae eta oge. Bu Lurah gideug. Pa Lurah buru-buru nyarita, "Sawios ku abdi bae Pa Mantri! Urang tungtun heula, engke upami tos rada lancar, urang cobian dipayuneun Pa Mantri!"

"Tah muhun kitu bae atuh heula ayeuna mah, mangga sareng Pa Lurah heula wae di dieu. Abdi mah bade ngalereskeun heula nu sanes."

Kuring ka luar heula, memeres pagawean sejen. Geus kurang leuwih sajam, balik deui nepungan nu keur diajar pidato.

"Kumaha? Tos tiasa dicobian?" ceuk kuring bari ngagupayan Mang Kardi sangkan milu nyaksian Bu Lurah. "Yu, di dieu atuh di rohang rapat, ngarah sakalian nyobian nyariosna dina podium!" Sarerea pindah. Pagawe nu keur nyalse, disina milu, dipernahkeun saperti keur ngayakeun rapat. Pa Lurah ngagendeng Bu Lurah kana podium. Di podium, Bu Lurah muntang kana peupeuteuyan Pa Lurah. Kapaksa Pa Lurah maturan gigireunana.

Bu Lurah ngajeten salila-lila. Sarerea narungguan. Pa Lurah ngaharewos, sigana mah nitah buru-buru ngamimitian.

"Assalam...ehm...ehm... Assalamualaikum..., euh...warahmatullohi wa barokatuh!" cenah, dumaregdeg. "Bapak Bupati, Ibu Bupati, sareng... euh sareng...sa...sa...daya, nu sami...hadir. Langkung ti pa...langkung ti...payun, abdi...aeh, sim abdi..., aeh kuring..., euh pribados, ketang...eh laleur teh teu uyahan deuih!" Keur teu lancar teh, bari nepak laleur. Pakupis. Kuring nahan piseurieun, pagawe nu ngabarandungan mah ngabarakatak. Tapi ku kuring dicawad, bisi Bu Lurah nambahan geumpeur.

"Muhun atuh da Bapa, eta laleur teh meni ngaganggu pisan!" Palebah ngomong kitu mah, teu arapap-eureupeup.

"Wios laleur mah Bu Lurah! Sok teraskeun deui atuh! Geuning eta tiasa," omong teh bari ngareret ka Pa Lurah nu tetep ngajengjen gigireunana.

"Sok ti ngawitan deui! Bilih hilap deui mah aos bae atuh seratanana. Da biasa batur oge, seueur nu kitu, supados lancar!"

Bu Lurah ngamimitian deui, tapi tetep ditalar, teu make teks. "Bapa Bupati..., Ibu Bupati..., sareng para tamu anu sami-sami hadir, pribados, atas nami, euh...atas nami...Naon tea nya Bapa?" bari ngareret ka Pa Lu

rah.

"Ketua Tim Penggerak PKK Desa Jampangkulon, kituh!" ceuk Pa Lurah semu kesel.

"Aeh muhun eta, atas nami Desa...aeh Ketua...Desa...euh atas nami Ketua Desa...aeh Ketua PKK Desa Jampangkulon!"

"Make Penggerak Bu!" ceuk Pa Lurah, bari nyigeung bojona.

"Aeh muhun nganggo panggerak...! Pribados... Aeh, nganggo pribados deui henteu Bapa?" Bu Lurah ngareret deui ka Pa Lurah. Nanyakeun.

Pikaseurieun tapi oge pikawatireun. Sabab teu nyekel naon-naon, leungeunna ngopepang, muril-muril tungtung tiung. Sigana mah ti barang nangtung di podium, da geus nepi ka kusut jeung tiungna nyangeyeng, malah rada nyekek, da katarik-tarik ka handap. Harita mah can usum jilbab cara ayeuna, nutupan orat teh cukup ku tiung bae disampaykeun, dapon teu katempo buuk.

Sanajan mereketkeun maneh, kuring teu kuat hayang seuri, barakatak bae! Atuh komo pagawe nu sejen mah. Bu Lurah tungkul, beuki nyorodcod. Terus tanggah mencrong Pa Lurah, siga nu samar polah. Beuki pias. Pa Lurah bareureum siga nu kacida kawiwirangan. Tungtungna Bu Lurah mogok. Ngabuntut bangkong.

Kuring eleh deet. Boboleh, terus terang ka Pa Lurah. "Pa Lurah, saena mah atuh ku Pa Lurah bae ngalatihna di bumi, ngarah teu asa-asa. Piraku da Pa Lurah mah sakitu saena geuning ari pidato teh. Mung enjing, enjing-enjing keneh, tos kedah ngawartosan hasilna, urang sakalian teras lapor ka Pa Camat!"

Pa Lurah nyanggupan, terus pamit.

Isukna, didagoan ti jam tujuh isuk-isuk, nepi ka satengah salapan teh Pa Lurah can embol-embol. Kuring ngajurungan Mang Kardi, nyusulan. Jam sapuluh Pa Lurah kakara kurunyung, kitu oge sorangan, teu jeung Bu Lurah.

"Har, geuning teu sareng Ibuna? Tos langsung lancar panginten nya?" Nempo pasemon Pa Lurah nu karusut kitu mah, kuring cangcaya. Boa-boa teu hasil.

"Hapunten Pa Mantri, abdi teu tiasa maksa, diteren-teren oge pun bojo teh kalah ka ceurik. Teu sanggem cenah. Bilih ngisinkeun dina waktosna! Kitu sanggem pun bojo teh."

"Kumaha atuh?" ceuk kuring bari mencetan tarang, asa ngadak-ngadak lieur. "Tapi cobian deui diolo sakali deui, susuganan bae ari dileukeunan mah kersaeun! Cobi ku Ibu-ibu atuh, ku para Pangurus PKK, piraku teu aya nu tiasa. Malih upami peryogi mah urang nyuhunkeun bantosan Ibu Camat, da kapan saur Pa Camat oge kamari kitu. Atanapi cobi ku Bu Ulis geura! Pan sakitu dalitna geuning, sahenteuna ari ku sobat mah, moal matak geumpeur!"

Pa Lurah rada lila ngahuleng, kawas nu jarauh panineungan, tapi ahirna mah ngajawab. "Insya Alloh Pa Mantri, ku abdi bade dileukeunan deui. Sawios teu kedah ngarepotkeun ibu-ibu nu sanes!" Ngomongna kitu bari ngasongkeun leungeun sasalaman rek ka desa deui. Tapi, teu beunang disumputkeun, pasemonna kaciri semu nu nandangan bingung.

Isuk keneh pisan, kuring geus ka kantor. Dina meja aya surat, ditindihan asbak. Alamatna keur kuring. Nilik amplopna mah kawas surat pribadi, lain dina amplop dines. Singhoreng surat ti Pa Lurah Jampangkulon. Kuring kacida helokna. Aya naon make jeung nyuratan sagala, pan deukeut ti kantor Desa ka kantor Kacamatan teh, ku leumpang oge moal kungsi sapuluh menit. Atuh ti imah Pa Lurah ka panganjrekan sarua, moal kungsi saparapat jam.

Surat buru-buru dibuka. Dibaca. Asa kabentar gelap meureun, lamun enggeus mah. Kumaha teu rek kitu, sabab nu kaunggel dina surat teh kieu:

Kahatur
Pa Mantri Pulisi
linggih di Kantor.

Salam miwah hormat!
Serat dibujeng enggalna bae.
Hapunten abdi teu tiasa nepangan, margi tadi subuh nyusulan pun bojo. Kamari sonten keukeuh hoyong wangsul ka sepuhna. Sanggemna mah hoyong dianteurkeun wangsul, margi tos teu sanggem janten Ibu Lurah. Basana mah, cenah, ngaraos tos ngisinkeun, da inyana rumaos bodo, teu tiasa nulis jeung maca.

Sakali deui hapunten. Padamelan sadayana tos dipasrahkeun ka pun Jurutulis.

Wassalam.

Hurmatna;
Kepala Desa
Jampangkulon.

"Masya Alloh! Naha naon anu dicaritakeun ku Pa Lurah ka ibuna teh! Boa-boa dipaksa bari diesek-esekeun." Kitu na gerentes hate. Mun enya teh, tada teuing kuring dosana, urusan pidato Lomba Desa nepi ka kudu megatkeun duriat. Ngabarubahkeun kulawarga. Kapan tujuan PKK teh di antarana pikeun ngawujudkeun katengtreman rumah tangga. Ari ieu kalah sabalikna.

Kuring cengkat, surat buru-buru disakuan, rek lapor ka Pa Camat.

"Wilujeng enjing Pa!", kuring rengkuh. Ngahormat gaya ABRI, tapi punduk jeung tonggong teu weleh bongkok, kawas urang Jepang keur sikerey.

"Calik Ayi! Kumaha persiapan Lomba Desa teh? Kapan waktosna mung tilu dinten deui!"

"Nu mawi ieu bade laporan. Urusan administrasi sareng nu sanesna mah parantos beres. Malih umbul-umbul pangbagea ka tim oge tos siap. Dinten ieu bade diparasangkeun. Namung hapunten, aya perkawis nu sanes anu kirang sae! Da abdi ge reuwas barang terang aya kajantenan kieu teh!" ceuk kuring bari ngeserkeun korsi tamu.

Pa Camat kerung. "Perkawis naon tea?"

"Perkawis Laporan Ibu Ketua Penggerak PKK Desa tea, manawi! Kumargi abdi mah teu tiasa maksa Ibu Lurah latihan, nya diserenkeun ka Pa Lurah, supados latihan sareng Ibu-ibu pangurus PKK nu sanesna. Malih nu ngalatihna oge disarankeun Ibu Juruserat Desa, supados teu karaos serius sareng karagok, maksad mah! Namung tadi enjing-enjing abdi nampi serat ieu ti Pa Lurah." Ku kuring surat dipintonkeun ka Pa Camat. Ku anjeuna dicandak, teras diilo.

"Ya Alloh! Naha kumaha ari Pa Lurah ngalatihna? Dugi ka pundung kieu ieu Bu Lurah teh? Rupina mah heuras teuing panginten!" kitu saur Pa Camat, bari ngasongkeun deui surat ka kuring.

"Kumaha atuh Ayi? Mangkaning waktos parantos nyantek pisan!"

Kuring sarua bingungna, tapi ngawani-wani maneh usul. "Rupina, Panitia kedah dibagi dua! Nu hiji ngalereskeun persiapan dugi ka nampi tim ti Sukabumi. Pan sanggem Pa Lurah oge, sadaya padamelan tos dipasrahkeun ka Ulis. Perkawis laporan kagiatan PKK, sawios sapertos kamari bae, didugikeun ku Pangurus nu sanes. Alesanana oge nuju udur deui bae, sami sapertos lomba nu kamari. Nu hiji deui, etang-etang nebus kalepatan, kedah nyusulan Pa Lurah sareng Ibuna ka Surade, supados teu kateterasan."

Sanaos bari rada kerung keneh, tapi katingalna Pa Camat semu nu bingah, nyaluyuan. "Tah leres kitu atuh! Akang beberes di dieu. Ayeuna keneh, Ayi kedah nyusul Pa Lurah sareng Ibuna ka Surade. Sawios kituh soal laporan mah tong jadi emutan. Enggal we ka Jampangkulon deui. Moal enya aya satria ninggalkeun pangperangan. Diantos kituh, ceuk Akang!"

Kuring ngahuleng, moal enya kuring kudu memeres rumah tangga kolot. Pan kuring mah bujangan keneh, can ngarti kana urusan rumah tangga. Asa teu merenah, kudu memeres rumah tangga mah. Asa kokolot begog. Kuring teu ngajawab.

Rupina Pa Camat surti. "Euh...ngarah aya sepuhna mah, keun wae Euceuna atuh sina ka Surade. Ayi mah minangka nganteur ludeungna. Ajakan bae Bu Ulis Desa. Sugan ari ku pada Ibu-ibu mah, Ibu Lurah teh moal lepat ngartos. Ku Akang rek di omat-omatan, ulah ngutik-ngutik soal pidato deui!"

Kuring ngabring ka Surade. Pa Lurah kabawa. Tapi jeung Ibu Lurah mah panggih oge teu kungsi. Duka di mana nyumputna. Atawa, boa, duka disumputkeun ku kolotna.

Dina prakna penilaian, Pa Lurah tapis pisan ngajawab pananya-pananya tim, kitu deui para pamong desa jeung anggota LKMD, pada bisa mintonkeun jeung nerangkeun hasil-hasil pangwangunan desa nu kira-kira bakal naekeun peunteun dina lomba. Ngeunaan Ibu Lurah, saperti Lomba sa eks wilayah Kawadaan tea, diwakilan ku Ibu Mantri Guru. Alesanana sarua, Ibu Lurah nuju udur, titirah di Surade. Padahal, ayeuna mah jeung enyana, keur titirah niiskeun pikir, da cenah ceuk mertua Pa Lurah mah, masih keneh kanyenyerian ku Pa Lurah, pajarkeun Bu Lurah ngawiwirang salaki di pakalangan.

Nepi ka ayeuna, kuring teu nyaho naon sabenerna nu dicaritakeun ku Pa Lurah ka bojona, tepi ka pundungna kamalinaan. Mulan-malen, leuwih ti sabulan. Kitu oge rapihna deui jeung Pa Lurah teh, beunang nyombo sarerea. Malah Pa Camat mah ngahaja ngutus Pa Naib, mere tausiyah heula.

Nu puguh mah, Jampangkulon teu bisa jadi juara. Ngan cenah, elehna lain ku alatan Ibu Lurah diwakilan, tapi loba aspek-aspek sejen anu masih keneh kurang. Komo, kapan nu jadi juara Lomba Desa sa-Kabupaten harita teh desa Lembursitu, wewengkon Kacamatan Baros. Desa nu geus kawilang maju, sisi dayeuh, tapel wates jeung Kotamadya Sukabumi. Teu matak jadi panyirikan.

Tapi, sanajan harita Desa Jampangkulon teu bisa jadi juara, keur kuring mah Lomba Desa harita teh gede pisan hartina tur moal bisa dipopohokeun. Sabab, basa ngariung di bumi Pa Camat saminggu bada lomba, Bu Camat sasauran. "Tah keur barudak ngora mah kudu jadi pangalaman. Nunung, utamana mah. Kudu rapekan, sagala bisa. Kudu wanter! Lamun sakalieun aya kasempetan pidato atawa aya nu nitah mere sambutan dina ririungan, kudu sonagar. Diajar ti ayeuna, bisi katuliskeun malaikat, meunangkeun pamong praja. Ngarah teu ngawiwirang salaki!" Bu Camat ngarenghap heula. "Komo deui Den Mantri mah, tos kantenan priyai. Anom keneh tos janten Mantri Pulisi. Didu'akeun ku ibu sing tereh dibenum Camat. Milarian pigarwaeun teh kedah anu tos asak atikanana!"

Sanajan nyariosna ditujukeun ka kuring, tapi bari ngeletan putrana. Kuring ngareret ka Nunung. Singhoreng manehna oge keur nyerangkeun. Tepung reret. Kaciri seuri leutik, ukur renyu. Seblak bae, ngalenyap. Kawas enya ayeuna mah "batu teh turun". Manehna terus tungkul. Beungeut asa jadi euceuy, tapi hate mah bungangang. Asa direremokeun. Komo kapan bieu mah ngabasakeun anjeunna teh jadi "Ibu", lain "Euceu" cara sasari. Rarasaan teh meni geus enya diaku jadi...piminantueun. (*)

Sambungan ti Bagian 1

---

SundaMidang No. 92, Juni-Juli 2012

T A M A T