Lomba Desa (Bagian 1)

Dina mangsa Pamarentahan Orde Lama, di unggal desa aya hiji organisasi kamasarakatan anu ngaranna Lembaga Sosial Desa atawa LSD, anu dibina ku Departemen Sosial. Garapanana ngamumule masarakat desa, hususna nu aya patalina jeung hirup kumbuh sapopoe pangeusi desa, kayaning gotong royong, mantuan kulawarga nu katalangsara, ngurus lumbung desa, mantuan rahayat anu walurat utamana dina usum paceklik, mulasara jompo, jeung sajabana.

Ku Pamarentah Orde Baru, LSD dirautan tur disarungsum jadi organisasi anu leuwih jembar garapanana. Ngaranna diganti jadi Lembaga Ketahanan Masyarakat Desa, singgetanana LKMD. LKMD jadi organisasi mitra Pamarentah Desa anu mibanda kawajiban babarengan ngawangun karaharjaan masarakat. Ieu organisasi teh diatur jeung didadasaran ku mangpirang-pirang aturan jeung kaputusan pamarentah, ti mimiti Presiden, Mentri Dalam Negri, Direktorat Jendral Pembangunan Desa, nepi ka palaturan Gupernur jeung Bupati nu aya di daerah. Nurutkeun aturan eta, ketuana ditetepkeun Kapala Desa, ngarah aya kesatuan komando, bisi kajadian aya pabentar pamadegan dina ngajalankeun kawijaksanaan jeung Pamarentahan Desa. Di sagigireun eta, LKMD teh diwangun ku sababaraha seksi, salasahijina nya eta seksi PKK, atawa Pendidikan Kesejahteraan Keluarga, kadieunakeun kecap Pendidikan dina PKK, dirobah jadi Pembinaan. Seksi ieu oge, kudu dipupuhuan ku istri Kapala Desa atawa Ibu Lurah, minangka Ketua Tim Penggerak PKK Desa. Para anggota pangurusna, Ibu-ibu wungkul. Dina prak-prakanana, di sawatara wewengkon mah, Ibu-ibu pangurus PKK teh leuwih loba garapanana ti batan seksi-seksi nu dipingpin ku para bapa.

Pikeun ngaronjatkeun usaha pangwangunan masarakat desa, dina taun tujuh puluhan, Mentri Dalam Negeri marentahkeun sangkan di unggal Daerah diayakeun Lomba Desa. Anu kudu dipeunteunna, kamajuan pangwangunan desa nu geus bisa kahontal ku masarakat desana. Salasahijina, nyaeta icikibungna LKMD, kaasup PKK, dina ngawujudkeun karaharjaan kulawarga. Sakumna desa kudu jadi pamilon lomba nu diayakeun luyu jeung hambalan-hambalan Pamarentahan. Ti mimiti tingkat kacamatan, tingkat eks wilayah kawadanaan, tingkat kabupaten, tingkat eks wilayah karesidenan, nepi ka tingkat provinsi jeung nasional.

-=oOo=-

"Den Mantri! Dihaturanan Juragan, diantos ayeuna!" Bada apel, Mang Kardi, Pulisi Praja Kacamatan Jampangkulon, minangkana mah anak buah kuring, hariweusweus ngabejaan. Asa jaman baheula, puguh. Asa keur mangsa feodal. Kuring disebut "Den", jeung ka Pa Camat nyebutna masih keneh "Juragan". Abong agen pulisi sesa jaman Walanda. Padahal, merdeka teh nepi ka harita, geus meh tilupuluh taun.

Kuring gura-giru nepangan Pa Camat. Barang jol oge, bari gumujeng anjeuna sasauran, "Kieu Ayi! Numutkeun hasil rapat di kabupaten kamari, Lomba Desa tingkat wilayah eks kawadanaan teh, cios diayakeun sasih payun. Luyu sareng babadantenan urang kamari ieu, ti kacamatan urang mah nu bade diajengkeun teh desa Jampangkulon. Piraku sugan, bubuhan desa di ibukota kawadanaan, seueur inohong Jampang nu marantuan, moal ngisinkeun teuing panginten. Moal matak ngawirangkeun urang Jampang."

Bari pinuh ku kahariwang, kuring ngajawab, "Kukupingan teh sasih payun Pa?". Sanajan Pa Camat ka kuring nyebatna "ayi" oge, ka anjeunna kuring mah tara nyebut "Akang". Rarasaan mah asa merenah keneh nyebut "Bapa". Eta oge, ari nurutkeun undak usuk pangkat jeung kalungguhan mah, antara Camat jeung Mantri Pulisi teh ngan beda sasetrip. Kacida pisan nyurupna dina tata krama pamong praja mah, lamun Mantri Pulisi milanceuk ka Camat teh. Hanjakal, kuring mah teu wasa. Kahiji, ngarasa yen umur teh ganjor pisan, pantesna mah pernah bapa ka pa Camat teh, malah boa Ua nu leuwih pantes mah. Kapan yuswa anjeunna teh parantos lima puluh taun langkung. Ari kuring, duapuluh opat taun ge can jejeg. Kaduana, pedah eta, Pa Camat teh kagungan putra istri, Dang Nunung, nu nembe lulus ti SMEA Sukabumi. Sabab teu diteruskeun, atuh ayeuna teh idek liher di dinya, di bumi Pa Camat. Sok dihelaran, malah jadi panglamunan. Mun daekeun mah rek diajak hahadean. Kitu soteh, lamun! Lamun batuna turun, da ari keusikna mah geus puguh naek. Da kitu ceuk sisindiran oge geuning, kudu batu turun keusik naek, itu purun ieu daek. Pan kuring mah sanajan jadi Mantri Pulisi oge, lain asli teureuh menak, jeung estuning teu aya kaboga deuih. Sakola oge, nepi ka lulusna teh teu kungsi mayar, da ikatan dinas. Benten sareng putra Pa Camat. Puguh kokocoranana. Menak urang dinya pituin, nu sagala rupi nyampak. Estuning teu aya cawadeun. Tapi nya eta, sanajan kuring asa teu nalipak maneh oge, da ieu mah ngalamun. Lamun kabiruyungan. Kapan saur ajengan oge, jodo, pati, bagja, jeung cilaka mah, mung Gusti anu kagungan. Susuganan! Sakapeung mah, sok seuri koneng. Rumasa. Cau ambon dikorangan, kanyere ka pipir-pipir. Lalaki ambon sorangan, awewe teu mikir-mikir. Tapi, sanajan can karuhan bule hideungna oge, na lamunan teh, moal enya ka pimitohaeun make kudu nyebut "Akang".

"Muhun Ayi, sasih payun!" Kuring asa kagebah. "Eta oge, meh sadayana nu haladir dina rapat mah protes, da puguh santek teuing. Lomba desa tea, persiapanana oge sakitu tanggelna. Ti ngawitan ngeusian buku-buku administrasi, meresan wangunan-wangunan, ngapur, ngecet, beberesih di lingkungan lembur-lembur, ngomean jalan, dugi ka masalah pembinaan Ibu-ibu PKK, kapan sakitu seueurna. Tapi da saur Pa Bupati, eta teh tos jadwal nu diatur ti luhur, margi, lomba taun ieu kedah rengse dugi ka tingkat provinsi."

Sieun katohyan bari ngalamun, buru-buru kuring nyarita, "Atuh ti ngawitan ayeuna tos kedah beberes sareng sasayagian panginten! Manawi, naon anu kedah dipidamel ku abdi?"

"Tah nya eta Ayi, margina disaur oge. Urang badanten perkawis sasayagianana! Rupina mah kedah aya pananggel walerna. Nu kairong ku Akang teh mung Ayi. Disarengan ku urusan Pembangunan Masyarakat Desa, Pa Memet. Sagala rupi data nu diperyogikeun mah pan tos aya di dinya. Nu rada seueur garapeun teh PKK, ku margi Ibu-ibu mah seueur nu hareurin lengkah, cenah. Bantosan Ayi diperyogikeun pisan. Komo da cenah Ibu Lurahna nuju kirang sehat, teu tiasa ngiring aktip. Mung Alhamdulillah Ayi, saurna, Ibu Mantri Guru SD Jampangkulon, seueur pisan ngabantosna. Malihan urusan PKK sadidinten mah, tos dipercantenkeun ka anjeunna sareng Ibu Ulis Desa."

"Insya Alloh, enjing urang kawitan ku rapat nyusun Panitia Persiapan Lomba. Ayeuna keneh ku abdi sareng rerencangan bade dipidamel ulemanana." Kuring cengkat, terus pamit. Nepungan Pa Memet, nu nyekel urusan PMD tea, ngabadamikeun bahan keur rapat isukna, sakalian menta dipangnyieunkeun ondangan jeung nganteur-nganteurkeunana.

Waktu nu sabulan, karasa kacida nyerelekna. Panitia kacida dariana, sarerea pada meunang hancengan beberes sewang-sewangan. Sanajan kuring jadi pananggung jawab utama dina kapanitiaan, tapi garapan hususna mah mantuan Ibu-ibu PKK. Tapi da teu hese ieuh, ibu-ibu pangurus PKK saroson-soson pisan. Ku kitu tea mah pantes, da sieuneun kawiwirangan. Sieun eleh lomba, padahal di Kawadanaan Jampangkulon mah, kapan desa eta teh, minangka nu pangmajuna. Bubuhan desa nu aya di ibu kota kawadanaan. Desa nu aya di wewengkon pangkotana.

Nu teu kaharti teh Ibu Lurah. Ku naon teu embol-embol. Basa ngahaja ditanyakeun, cenah udurna kateterasan, nepi ka kudu titirah di Surade. Tapi ku sabab loba ibu-ibu pangurus PKK sejenna, garapan ibu-ibu henteu kateter. Sanajan aya oge nu rada hese teh. Eta, loba nu babari pundung. Ceuk babasan kolot mah, abong kena loba biwir, awewe mah teu kaopan, teu kaur salah nyarita. Mun geus kitu sok hul-hel. Hese kompakna. Aya-aya wae alesanana teh, budak gering tea, pun lanceuk teu acan dongkap, atawa aya tamu lereskeuneun. Tapi, bubuhan Pa Memet mah "sepuh", bisa pisan ngarapihkeunana deui teh. Teu matak jadi barebedan.

Alhamdulillah. Meunang tekal-tekil panitia teh, hasil. Desa Jampangkulon lulus jadi Juara Lomba Desa di tingkat eks wilayah kawadanaan. Desa ngayakeun syukuran, ngaos di Kaum, sakalian rajaban, ngondang ajengan Dadali.

Luyu jeung jadwal, sabulan deui Desa Jampangkulon kudu milu lomba tingkat kabupaten. Nu jadi Ketua Panitia Lomba, ningkat. Lain kuring deui, tapi Pa Camat, da ditunjuk ku Bapa Pembantu Bupati, Wadana tea baheula mah. Rengrengan panitiana oge ditambahan, dibantuan ku sababaraha urang pagawe kawadanaan. Tapi, sok sanajan kitu, di kantor kacamatan mah kuring teh kaasup nu pangriweuhna. Sabab tugas utamana mah angger, mantuan Ibu-ibu PKK. Kaasup kudu ngalatih Tim Paduan Suara Ibu-ibu, keur ngeusian acara dina waktuna. Ngan kabeneran loba ibu-ibu guru SD jeung SMP, nu mamaosna aralus, diakukeun bae Tim Paduan Suara PKK Desa Jampangkulon. Ari ku kitu tea mah da enya, sakolana ge bener aya di dinya.

Kira-kira pisaminggueun deui kana prungna penilaian, kuring disaur ku Pa Camat.

"Ayi, meni asa ku duduk-dadak kieu ieu teh! Bieu Akang nampi telepon ti Pa Kabag Pamarentahan Kabupaten, rehna anjeunna nampi serat ti PMD Jawa Barat, salasawios aspek nu kedah dipeunteun dina lomba teh nya eta Laporan Kagiatan PKK Desa. Saurna, ngadugikeun laporanana teu kenging diwakilkeun. Kedah ku ibu Lurah pribadi! Sabab nu dipeunteunna, sanes mung eusi laporanana wungkul, tapi kamampuh ibu Ketua PKK ngalaporkeunana. Meunteun kabisa ibu Lurah pidato panginten Ayi! Mangkaning akang mah can kantos nyaksian Bu Lurah Jampangkulon nyarios di payuneun umum. Komo kapan kamari mah nuju lomba tea, nuju titirah di sepuhna, di Surade. Teu ngiring hadir dina acara lomba."

Sajongjongan kuring ngahuleng. Da enya atuh Bu Lurah eta mah teu cara ibu Lurah Cikangkung, desa tatangga, mun pidato teh meni nerewelang. Leuwih harus batan Pa Lurahna. Atuh nu ngabarandungan teu weleh kalekeprok. Beda pisan jeung Bu Lurah ieu, sanajan loba pisan kasempetan keur diajar oge, tapi Ibu Lurah Jampangkulon mah siga nu teu aya karep. Teu hayang diajar. Kuring oge kungsi nyaksian, basa aya muludan ibu-ibu. Teu aya nu ngawakilan nyambut teh, Bu Lurah mah teu ieuh maksakeun, kalah ka permios, gura-giru ninggalkeun acara. Pajar teh, rek aya kaperluan sejen. Ku Pa Lurahna deuih, teu kungsi pisan dijurung. Cenah mah, teu dibantuan ku bojona oge, pagawean di desa mah teu naon-naon. Kapan urusan PKK mah loba keneh pangurus nu sejenna. Komo da nguruskeun PKK Desa Jampangkulon mah, ti kamarina oge geus dicepeng ku Ibu Mantri Guru SD Jampangkulon, anu sagala bisa, jeung sagala dicabak. Nu marantuanana ge moal kurang ti sapuluh urang, dikokolotan ku Bu Ulis Desa, minangka wakil resmi Ibu Lurah. Malah dina Lomba kamari oge PKK teh kaasup anu meunang pujian ti Tim Pangajen, cacakan ditinggalkeun "titirah" ku Ibu Lurahna mah.

Ningali kuring ngahuleng, Pa Camat neraskeun deui, "Bilih ngirangan poin, kumaha upami dicobian bae Bu Lurah teh urang latih. Piraku sugan, ari diajar heula mah teu tiasa majeng. Kapan sadidinten ge ari ngobrol mah biasa-biasa bae, sakitu lancarna. Tah eta bagean Ayi, panginten. Tiasa sareng Pa Doding, Mantri Panerangan atanapi Pa Damin, Penilik Pendidikan Masyarakat, ngalatihna mah. Engke praktekna, dibantuan ku Euceuna. Persiapan nu sanesna mah katawisna tos bareres, da mung kedah nambihan sakudak-sakedik kakirangan tilas penilaian lomba kamari."

Kuring nyanggupan. Tapi sajeroning kitu, hate mah cangcaya. Sabab, waktuna nyantek teuing, ngan ukur saminggu deui. Kuring lah-lahan, kumaha behna bae! Harita keneh nepungan Pa Doding jeung Pa Damin, ngajak badami kumaha carana ngalatih Ibu Lurah pidato. Kuring seuri sorangan, ngalatih pidato keur kajuaraan Lomba Desa sakabupaten, disasaruakeun jeung ngawuruk barudak nu rek lesengan khotam ngaji di diniyah pilemburan. Mangkaning waktuna samporet pisan. Saminggu teh kudu geus maher.

Mimiti, kuring nyiapkeun heula bahan-bahan nu kudu ditepikeun dina laporan. Teu hese, da aya urut lomba kamari. Kari ngaganti waktu jeung tingkat lombana wungkul. Eusina mah kitu-kitu keneh. Lolobana ngeunaan ketak Ibu-ibu PKK ngarojong usaha pamarentah dina ngawujudkeun karaharjaan kulawarga di desa. Dina lomba kamari mah, bubuhan diwakilan ku Ibu Kapala Sakola tea, boh eusina boh gaya ngalaporkeunana, kacida pisan alusna. Nambahan peunteun.

Isukna Pa Lurah diangkir ka kacamatan, sakalian bareng jeung ibuna. Nu nyarios Pa Camat, netelakeun aya parentah ti kabupaten ngeunaan laporan Ibu Lurah tea. Pa Lurah ngalieuk ka bojona. "Tah kitu geuning Bu! Engke teh ibu nu kudu laporan ka Tim Penilai Tingkat Kabupaten. Ka para menak laluhur wungkul, para gegeden ti Kabupaten. Kudu ku Bu Lurah sorangan, teu bisa diwakilan!" ceuk Pa Lurah, bari neuteup bojona, siga nu ngajugjugan naon kira-kira pijawabeunana. Ibu Lurah ngadadak pias, kawas teu aya getihan. Neureuy ciduh terus dedeheman, "Ehm..., ehm..., kumaha atuh nya Bapa, pan abdi mah teu tiasa," Bu Lurah siga nu maksakeun nyarita, sorana alon, pikawatireun.

Pa Camat enggal ngawaler, "Ah, teu tiasa soteh teu acan dicobi! Upami diajar heula mah tangtos Bu Lurah oge tiasa. Urang latihan heula bae atuh ayeuna mah. Pa Mantri Pulisi, Pa Doding, Pa Damin disarengan ku Ibu, tos siap ngalatihna mah. Sok Pa Lurah, kawitan ti ayeuna, tempatna mah di dieu oge teu naon-naon. Tuh di rohangan Pa Mantri, geura nyalse. Bapa mah rek nepangan Pa Wadana heula," saurna bari mungkur. (*)

Nyambung ka Bagian 2

---

SundaMidang No. 91, Mei-Juni 2012