Pengkolan Jalan Ka Simpang

Ieu-ieu layang, ieu kumalayang saha anu hayang tangtu kudu wani neang. Aya paribasa awewe mah dulang tinande, saha nu datang asal ngabogaan niat nu bener-bener rek rumah tangga tangtu moal ditolak. Kiwari awak kuring keur meumeujeuhna seksi ngareusi, majarkeun ceuk batur mah kuring teh keur meumeujeuhna ngembang buruan. Loba jajaka nu kabengbat, malah loba nu arulin sakadar hayang macangkrama. Aya oge nu nyuratan ngedalkeun eusi hatena ku ranggeuyan carita nu direka, sakapeung sok bingung ku piliheun.

Dasar ari jodo mah Alloh nu ngatur, teu aya hiji ge nu jadi pisalakieun, kalah trek teh rarabi ka Kang Haji Dulloh anu umurna duapuluh taun leuwih kolot ti kuring. Kuring kabengbat ku Haji Dulloh teh ku bageurna, jeung manehna nu wani nyanghareup rek bener-bener mikanyaah jeung mikadeudeuh ka kuring, kalawan bebereanana bro-broan wae, teu sirikna ka kuring teh meuli-meuli. Eta oge aya pirasat sangkaan mah, yen manehna teh boga pamajikan, tapi ah da kuring mah api lain we. Manehna nu bebeakan ngolo-ngolo nepi ka kuring daek dikawin.

Danget ieu mah rumah tangga kuring teh runtut-raut teu aya pacogregan. Malahan mah kuring disenangkeun pisan ku salaki teh. Imah diimahan, kendaraan dibere, motor ge sina milih sorangan ka dealer nu aya di Karawang. Atuh kuring ge geus boga turunan ti Kang Haji Dulloh teh hiji, budak awewe mani geulis, Neng Riska Purbasari ngaranna, karek sakola di TK, Taman Kanak-kanak Plamboyan nu aya di Purwakarta.

Malum ari rumah tangga keur reugreug pageuh mah sok loba gosip-gosip anu negatip, mani harengheng asa rawing daun ceuli, loba tatangga nu nyarita, manglebarkeun ka kuring, nyaah cenah ku pangawakanana anu sampulur jangkung jeung geulis tur ngora keneh deuih, mani kersa dipihukum ku Pa Haji Dulloh! Asa kirang serasi sapertos bapa ka anak, pokna teh. Eta kalimah teu ieuh dianggap nepi kana hate, bisi boga maksud rek ngaruntagkeun rumah tangga.

Sirik meureun pedah kuring manggih kasenangan. Sok inget kana titis tulis bagja diri, jodo pati, bagja lara, jeung cilaka mah anging Mantenna anu ngatur, urang mah mung sakadar boga kahayang. Lain teu hayang boga salaki ka nu kasep, beunghar, jeung ngora keneh, dalah kumaha kieu kuduna ari geus jodona mah, moal aya nu bisa misahkeunana.

Eta oge ari ngagugu napsu mah lain teu hayang menta diserahkeun ka salaki teh, tapi da keur naon atuh. Can tangtu lalaki kasep hatena bageur, sieun boga salaki ka nu kasep mangnyerikeun. Aya ku cunihin ari lalaki euweuh kaseubeuhan, ongkoh nyaho kuring teh boga salaki, tapi keukeuh ninitah sangkan kuring menta diserahkeun, cenah mah mun geus jadi randa rek dikawin ku manehna. Malah kungsi nga-SMS ngajak kuring ulin ka Ciater sakalian ka Bandung cenah.

Ey, ku bararaid mikir dua kali atuh, daek ngalayanan lalaki sejen mah kuring ge boga iman keneh, najan manehna teh urut kabogoh. Panasaran meureun tadina mah hayang kauntun tipung katambang beas laksana kapi duriat, hayang ngarendeng di bale nyungcung.

Ka luar ti SPG manehna mah teu eureun heula, tapi nuluykeun kuliah ka IKIP Bandung. Kiwari manehna geus ngajar di hiji SMA di Purwakarta. Mindeng eta ge tepung jeung kuring di pengkolan jalan ka simpang, sarua pada-pada rek miang ka sakola.

Hiji waktu tepung jeung manehna.

"Bade angkat ka sakola, Teh Endah?" Ceuk nu dina jero mobil, majuna rada lalaunan.

"Muhun, dupi salira?" ceuk kuring dina motor.

"Sami bade ngawulang," pokna, bari imut ngagelenyu.

"Nuhun pisan waleran SMS-na, punten kapayunan...!" Belesur mobil teh majuna rada tarik ninggalkeun kuring dina motor.

Pengkolan jalan ka simpang nu jadi hiji panineungan. Di dinya aya reret sajorelat, aya teuteup nu seukeut nembus jajantung, ngahudang rasa kasmaran.

Datang ka sakola, sok motor diteundeun ngajajar jeung motor batur. Cetrek dikonci bisi aya nu ngaganggu, sup ka kantor, nyiapkeun buku pelajaran. Gidig ka kelas, terus ngajar, nerangkeun pelajaran. Banding teuing ku jongjon ngajar di kelas, teu karasa waktu geus beurang, tanda bel istirahat disada. Barudak ka luar ti kelasna sewang-sewangan, kuring sup ka kantor, geus nyampak guru-guru keur ngarobrol. Katingal Bu Tuti mah keur nyetrak-nyetrek hape. Hape kuring nu aya di jero tas disada tandaning aya nu ngirim SMS. Barang dipencetan, aya pesan SMS ti nomer hape Kang Andhika,

"Panginten teh ros bodas teu acan aya nu metik, sawios tos aya nu gaduh sugan wae tiasa deui kapimilik." Kitu unina eta SMS Kang Andhika teh.

"Duh engkang naha atuh anjeun teh teu enggal sumping, padahal salira teh diantos pisan, lieuk deui-lieuk deui nyeri beuheung sosonggeteun ngantos anjeun. Tapi ayeuna mah kuring ge tos kakurung ku hukum," hate galecok.

Bisi anjeunna teu raos manah, ku kuring dibales SMS-na.

"Ku naon atuh engkang, bangbara teh make hiber jauh ka awang-awang, les-ngiles na mega malang, kiwari anjeun sumping hanjakal kapandeurian." Langsung dikirim kana nomer manehna.

Aya reret sajorelat ngabayang raray nu gandang. Pangawakan atletis pinuh romantis, gagah wanda jeung sembada. Manehna kedal ucap rek satia saati, sapapait samamanis, sabagja sacilaka, ngajak beber layar tarik jangkar lalayaran ngajugjug sagara kabagjaan. Duh panutan kuring lain teu deudeuh ka anjeun, dalah da kumaha atuh, urang ngan saukur bisa gugupay ti kajauhan, doa kuring nyarengan anjeun. Pamugi sing pinanggih jeung kabagjaan, hate galecok.

Boa teuing ieu teh gogoda rumah tangga, da bahtera rumah tangga teh saperti parahu keur lalayaran di tengah lautan, bakal datang lambak jeung ombak badag ngahalangan sangkan teu laju nepi ka pulo kabagjaan. Duh Kang Dhika, ulah ngaharepkeun kuring, rumah tangga kuring keur reugreug pageuh. Kanyaah Kang Dhika ka kuring rek ngabagjakeun pinuhun pisan. Eta meureun kuring pedah dicandung jadi nu ngora. Najan enya kuring dicandung, kelaanan ari kudu ngalayanan lalaki sejen mah, naon pingaraneunana.

Kuring teh guru, kedah ngajaga harga diri. Mun daek ngalayanan lalaki sejen meureun ceuk masarakat teh gampang ngadidik batur, didik heula diri sorangan. Era temen ku babaturan mun kuring migawe teu uni teh, di kamanakeun ajen diri. Ulah ieu mah salaki jongjon di nu kolot hayoh kuring jongjon ngundeur di buruan. Keheulaanan sina jararauh! Sok emut kana peupeujeuh kolot, kade nyai sing nyaah ka anak. Ulah rek mangnerekeun, karunya ka turunan. Rumah tangga teh sing kuat ku gogoda, genteng-genteng oge ulah potong.

Ieu ge nyerina mah nataku ku salaki teh sok asa disapirakeun. Asa dianggap lumayan ari salaki kilir ka nu kolot, hate teh mani ngentab panas. Najan kuring jadi nu ngora, ayeuna mah salaki teh hayang ku sorangan. Cenah kuring ngarebut salaki batur teu pisan-pisan. Harita teh Kang Hajina nu meuli-meuli ka kuring. Komo ceuk batur mah kudu mangpang-meungpeung jadi nu ngora, sina bisa ngeretna! Ah kuring mah teu hayang kikituan teh, karunya Si Ceuceu. Ngan saeutik kahayang teh kilirna tong ampleng-amplengan teuing di nu kolot. Beuki dieu teh asa beuki teu adil ngabagi waktuna Kang Haji teh.

Ceu Hati kalawan pok nyarita ka kuring geus teu dihiding deui duka sirik duka karunya ka kuring pokna teh, "Ulah bageur teuing ka salaki teh, sing bisa mangpang-meungpeung. Meungpeung jadi nu ngora keur gede kasono. Mun teu dicumponan kahayang urang, pek setik balik menta diserahkeun. Mun urang geus jadi randa mah rek kawin deui ge sabatae, moal aya nu nyaram atawa rek ulin abring-abringan jeung batur ge moal aya nu ngaharu-haru."

Mun dipikir dibulak-balik memang aya benerna omong batur teh, tapi mun dilenyepan nu asak kuring nyaah ka anak.

Anyar-anyar ieu Kang Haji Dulloh jarang kilir ka kuring, loba cicing di nu kolot. Kajadian jarang kilir ka kuring Kang Andhika teh nyahoeun, mani sok jongjon hayoh nga-SMS-an wae ka kuring. Pangpangna Kang Dhika teh ari nga-SMS-na sok peuting kira wanci tabuh sawelas. Peuting keur jempling heg kang haji teu mulang simpe teh sok kaubaran ku SMS-na Kang Dhika.

Si Eneng budak kuring geus tibra sare hareupeun TV. TV ngagembrung euweuh nu ngalalajoanan, cetrek ku kuring dipareuman. Sup ka kamar terus ngagubragkeun maneh kana kasur, rup disimbut. Karek ge gegelehean, aya SMS ti Kang Dhika. "Hapunten tos ngaganggu, ku sumpingna ieu SMS, aya geter-geter endah dina hate saksina bulan nu ngempray, sorot soca anjeun nu cureuleuk ngahudangkeun rasa geugeut. Duh panutan cangreud ranggeuy pameungkeut deudeuh rambat cinta nu baheula mugia pinanggih bagja. Malati ligarna ati campaka mangkak na dada, kieu nu kapentang asmara, duh Teh Endah asih teh rek dipatri ku jatukrami." Bray asa endah kalimah teh, keup ditangkeup eta hape teh disimpen na luhureun dada.

Mun dipikir siga nu enya maksud Kang Dhika teh, tapi loba tanda tanya, naha enya kitu Kang Dhika teh can boga papacangan, naha enya anjeunna teh bener-bener rek mikacinta?

Kuring ulah kagoda ku nikmat saeutik tapi sangsarana panjang. Ieu teh meureun gogoda rumah-tangga. Kiwari mah loba telepon atawa hape nu dipake salingkuh ti pamajikan, dihenteu-henteu ge geus bukti loba kabejakeun, malah loba nu geus runtag rumah tanggana, pedah eta meureun teu kanyahoan ieuh ku pamajikan, padahal rumah-tangga mah masalah hate. Lalaki nyeleweng sanajan sakumaha bunina tetep karasa geterna hate kana angen pamajikan.

Kuring ge sok ngarasa reuwas gegebegan, rumasa ari dosa mah moal bisa disumputkeun, sabuni-bunina ge nyumputkeun kadu pasti kaambeu bae. Eta oge mun aya SMS ti Kang Dhika teh sok buru-buru dipupus bisi kanyahoan ku Kang Haji Dulloh. Tapi ketang Kang Haji Dulloh mah tara pipilueun urusan awewe jeung tara timburuan deuih. Jongjon lamun tea mah rek ngalampahkeun teu uni ge. Ari Kang Andhika nga-SMS teh mani bebas mangpang-meungpeung, pedah salaki kuring teu aya di imah, sanajan SMS ti manehna tara dibalesan ge mani murudul. Jeung aya ku keukeuh ngedalkeun kahayangna, hayang ngawin kuring, karunya cenah, pedah kuring didua ku nu kolot cenah.

Basa rek indit ka sakola isuk-isuk tabuh tujuh di pengkolan jalan ka simpang, bet geus aya mobil manehna eureun kawas nu nungguan kuring, tapi jalmana teu aya. Panasaran direret ka jero mobil, meh paadu teuteup jeung manehna, geuning aya nuju nyetrak-nyetrek hape.

"Eh, geuning Bu Endah," ceuk manehna pura-pura kaget.

"Muhun, bade angkat ka sakola," ceuk kuring.

"Muhun. Abdi oge bade ka sakola," ceuk manehna. "Namung...," teu kebat nyaritana.

"Namung ku naon, Kang?" ceuk kuring, panasaran.

"Eta hoyong ngobrol di darat, asa teu puguh dina hape wae mah."

"Mangga atuh aya pikersaeun naon?"

"Kumaha maksad Engkang teh, ditampi?" tembalna, ngedalkeun cintana satarabasna.

"Pan Engkang ge uninga, abdi teh ayeuna mah tos gaduh caroge. Naha atuh Engkang harita make teu enggal-enggal sumping ka pun biang, da ku abdi ge kalintang diantos-antosna," ceuk kuring mangkarunyakeun.

"Hapunten dupi Pa Hajina nyondong di bumi?"

"Teu aya, Pa Haji mah nuju betah di nu sepuh."

"Kaleresan atuh."

"Kaleresan kumaha?"

"Kaleresan Engkang jongjon ngobrol jeung nu geulis."

"Teu kenging kitu dosa."

"Kumaha upami nganteur Engkang kersa henteu?" pokna, miharep.

"Ka mana, Kang?"

"Ka Ciater, sakedap we. Upami kersa, uih sakola diantos ku Akang di dieu, di pengkolan jalan ka simpang."

Kasempetan nyolowedor keur aya, ku naon atuh Kang Haji teh jarang mulih kawas nu mere kasempetan. Mimiti pikiran kuring jadi goncang, mun teu dilaksanakeun kahayang Kang Dhika sieun jadi masalah, mun ngalaksanakeun kahayang Kang Andhika tetep sieun jadi masalah. Kahariwang mah tetep aya, ngaranna ge anu milampah teu uni. Mun ditolak karunya ka Kang Dhika sieun raheut hatena. Ah, ras teh loba karunya ka manehna, rek daek we asal tong lila teuing bisi salaki datang.

"Mangga Kang Andhika asal ulah lami teuing," kuring mutuskeun daek.

Sabot ngobrol, duka teuing ti mana jolna saurang ibu guru nganggo anggoan jas abu-abu tur ngora keneh jeung geulis deuih, datang nyampeurkeun Kang Andhika bari pokna, "Tos tabuh sabaraha ayeuna Kang, saurna bade ka sakola geuning kalahkah rapat di dieu?" ceuk si ibu guru nu anom keneh.

Ngan katempo raray Kang Andhika mani beureum kawas beusi atah beuleum.

"Saha ieu teh, Kang?" ceuk si ibu deui bari ngadilak ka kuring.

"Eu, eta Mah, rerencangan sakola, saurna dinten Senen aya rapat di kabupaten," manehna ngabohong nyieun ekol.

Boa-boa ieu teh istrina Kang Andika, kuring panasaran, ditanya sakalian.

"Dupi lbu teh istri Pa Andhika?" ceuk kuring.

"Muhun, bade naon kitu," tembalna rada kuraweud baeud.

"Hayu Pah, geura angkat bisi kasiangan," ceuk istrina bari asup ka jero mobil diuk di hareup. Geuleuyeung mobil maju lalaunan, terus beuki tarik ninggalkeun kuring. Istrina Kang Andhika bangun ambek ka kuring.

Puas teuing Kang Andhika kanyahoan ku istrina moal henteu ayeuna keur dijembelan tah pingpingna, mana teuing bariruna. Ehm ari lalaki teu aya kaseubeuhan teu kaop ningal imbit nu demplon sok terus nyorodcod tuur.

Mun ngaliwat ka lebah dinya, pengkolan jalan ka simpang sok waas, di dieu aya catetan endah cinta anu teu laksana. Ya Alloh nuhun, kuring disalametkeun keneh. (*)

---

Ade Subadio