Sasakala Manuk Bueuk

Di hiji lembur aya dua jalma awewe lalaki nu karek ngawangun rumah tangga. Sapopoe, saminggu tug nepi ka sabulan mah, maranehna teh katempo kacida layeutna. Tapi lila ti lila jadi mindeng kadenge dog-dag pasea. Pangpangna salakina anu boga sifat goreng teh, barangasan! Salah saeutik ge pamajikanana teu weleh dihaok, malah mindeng dibarengan ku gaplokna. Mun geus kitu, rajol tatanggana pikeun misah.

Dina hiji poe, salakina indit ka kebon. Samemehna amanat heula ka pamajikanana, yen wanci pecat sawed menta dianteuran. Ninggang dina mangsana, lengo deui lengo deui salakina teh ka palebah lembur, susuganan katempo pamajikanana datang nganteuran. Nu nungguan geus geregeteun tapi ari nu di tungguanana teu hol bae. Puguh we salakina teh jadi mudigdig nafsu. Gidig balik muru imahna.

Kasampak pamajikanana teh keur ngagojod we di enggonna. Nenjo kitu, teu antaparah deui ngan heaaattt...jebet...jebet we! Pamajikanana digebugan.

"Di dago-dago nganteurkeun kalah molor sia teh!" pokna.

"Am...ampun, Kang...! A...abdi teh lalieur sareng sarebel...!" ceuk pamajikanana lumengis menta dipikarunya.

"Alesan wungkul sia mah. Pangedulan!" salakina anggur beuki tambah nyiksana.

Nandang panyiksa anu kacida, antukna pamajikanana maot sapada harita. Nenjo pamajikanana geus ngalonjor taya nyawaan, salakina jejeritan kaduhung. Ngadenge kitu tatanggana rabul daratang.

"Gusti...! Si Nyai teh keur nyiram, geuning...," ceuk saurang tatanggana anu biasa marajian. Nyarita kitu teh bari nyabakan beuteung nu maot. Ngadenge kitu kabehanana carolohok. Komo salakina mah nepi ka les kapaehan.

Tengah peuting, ti pajajaratan aya nu disada kueuk-kueukan. Gancang ku urang lembur diteang. Barang breh, sihoreng nu disada kueuk-kueukan teh sora hiji sato nu rupana pikasieuneun, anjeucleu dina tunggul kuburan awewe nu nyiram tea nu dikurebkeun tadi beurang.

Ku sabab si sato teh disadana kueuk-kueukan, nelah nepi ka kiwari dingaranan bueuk. Malah loba nu percaya, yen bueuk teh jajadian ti nu maot keur nyiram. Jeung deui mun di hiji lembur aya bueuk disada, hartina aya awewe nu keur nyiram. (*)

---

Teu kapaluruh saha nu nulis ieu dongeng