Si Kabayan Nguseup

Isuk-isuk Si Abah, mitoha Si Kabayan, geus gogorowokan nyalukan Si Kabayan anu masih keneh ngajoprak di tengah imah lantaran saban peuting lalajo wayang golek di tatangga sabeulah.

"Kabayan...! Kabayan...! Geura hudang maneh teh ngan molor wae! Aduh eta si borokokok teh sigana mabok golek tah peuting tadi."

Kusabab gandeng, antukna Si Kabayan hudang, tuluy nyamperkeun Si Abah bari gigisik.

"Aya naon Bah gogorowokan wae, masih tunduh keneh yeuh."

"Tuh Si Ambu hayang pais lauk cenah, matakan ngahudangkeun maneh oge. Urang ngala lauk ka wahangan, anteur Abah! Tuh sakalian bawa usep di pipir."

Si Abah ngaleos bari mawa useup tiheula muru ka wahangan.

Atuh kapaksa Si Kabayan nuturkeun Si Abah. Teu poho manehna nyokot useup di pipir bari mawa bekel. Kabeneran aya wajit 2 siki sesa peuting.

Datang ka wahangan katinggali Si Abah keur ngadeluk bari mencrong kana useup, tayohna bisi aya nu nyanggut teu ka angkat.

"Kumaha Bah, geus meunang lauk teh?"

"Acan Kabayan, titadi can aya nu nyanggut."

"Sigana tunduheun kene, Bah laukna isuk keneh kieu mah."

Teu kungsi lila, katingali Si Abah memedol useupna bari kilicid ka hilir kilicid ka girang.

"Kunaon Bah, ngan ejegeler wae?

"Jadol teh...! Sugan teh disanggut lauk padahal tikait. Cih Kabayan turunan ka ditu!"

"Ah sangeuk, Bah, tiris."

"Buru sia teh...!"

Si Abah nyurungkeun Si Kabayan. Atuh daek teu daek Si Kabayan ngagujubar kana wahangan. Lep teuleum bari rarampa ngomekeun useup Si Abah anu tikait. Teu kungsi lila Si Kabayan geus mucunghul bari guyam-gayem bari pok manehna ngomong, "Beres, Bah geus diomekeun."

"Alus, Kabayan! Eta kakarek minantu Abah anu bageur. Ari maneh ngadaang naon eta Kabayan?" Si Abah nanya semu nu heran.

"Yeeeeeh Si Abah teu nyahoeun. Tadi uing keur ngomekeun useup Abah, pan tadi teh teuleum. Tah di jero cai aya nu hajat, matakan uing ngadaang wajit."

"Bener eta teh, Kabayan?"

"Bener atuh bah. Tah buktina!" Si Kabayan ngodok pesak bari nembongkeun wajit anu tinggal hiji deui.

"Wah kudu diriksakeun atuh, sugan we kuehna aya keneh."

Si Abah luncat kana wahangan, lep teuleum. Teu kungsi lila Si Abah mucunghul deui, katingali tarangna ngajendol, biwirna jeding.

"Ari eta kunaon, Bah?"

"Puguh tadi di jero cai teh Abah di cegat begal nu antukna tarang abah ngajendol jeung biwir jebleh oge. Hayu ah Kabayan, urang balik!" Si Abah ngaleos balik, teu nungguan Si Kabayan ngajawab.

"Aeeh Si Abah, pan can meunang bah laukna oge."

Si Kabayan antukna nuturkeun Si Abah balik ka lembur, bari hatena seuri sorangan, ningali kalakuan Si abah. Pajar teh di jero cai dicegat begal, padahal mah Si Kabayan apal Si Abah pasti tidagor kana batu waktu tadi ngajebur teuleum. (*)