Tanteu Mey

Wawuh jeung Tanteu Mey teh diwawuhkeun ku Si Nana basa rek ngontrak kamar. Leuwih wanoh deui sanggeus sagulung-sagalang saimah. Tanteu Mey jigana mah kaasup kolem geulis keur ngorana mah. Ceuk Si Nana mah, Eva Arnaz taun dua rebu cenah. Randa, hartina kungsi boga salaki, teuing sabaraha kali da tara nyabit-nyabit sual jumlahna najan diselok oge.

"Pokona, Tanteu apal kana sipat-sipat pameget mah. Tah, tos aya dina dampal leungeun. Kakeupeul."

"Kumaha kitu, Tanteu?"

"Sami bae pameget mah, resep ngulinkeun istri."

Tangtu we para lalaki teh protes. Dilawanan ku awewe-awewe sejenna. Tapi ari parea-rea omong jeung awewe dina suasana kitu, lalaki mah sok hese meunangna. Teu cara mun keur paduduaan, paling-paling ngelehan, da aya pamrih kitu ge.

Supel Tanteu Mey teh. Katembongna mah bisa gaul jeung nu kumaha bae. Bisnis itu bisnis ieu, omongna mah. Milu kagiatan itu kagiatan ieu, caritana mah. Ipis biwir, luyu jeung wangun biwirna. Beuki seuri, malah sakapeung mah ku hal-hal anu ceuk kuring mah teu lucu teu sing. Najan kitu, teu ngurangan daya tarikna, komo keur nu anyaran tepung mah. Cara kuring ti heula we. Aya kesan hade tur ngartikeun.

"Di dieu mah Cep Dudi, bebas. Anggap di bumi nyalira we. Apal atuh Tanteu ge ka anak muda mah. Tanteu ge ngora heula atuh," pokna ge basa kuring mimiti jadi "kulawarga"-na. Puguh saenyana mah salahsa hiji sarat ngontrak teu tinulis teh nyaeta jaminan kabebasan.

Nu ngontrak di Tanteu Mey teh mahasiswa-mahasiswi. Mahasiswa opat, mahasiswi genep. Nyicingan kamar-kamar nu kawas kamp tahanan kenca-katuhueun imah puseur, imah Tanteu Mey. Aya tujuh kamar. Kuring, Si Nana, Teh Ais, jeung Heni sakamar ku sorangan. Sesana sakamar ku duaan. Ari peuting, pangpangna bari lalajo "Dunia dalam Berita" tipi, sok ngariung di patengahan imah puseur. Nu matak teu lila asa-asana ge jeung batur sa-kamp teh. Relatif singget.

Sapoe dua poe mah, betah we rarasaan teh. Memang sual fasilitas mah teu geseh jeung kontrakan sejen. Sual hargana ge prah we jeung batur. Ngan nya eta, kabebasan eta anu ngabedakeunana teh. Nu jadi helok mah, eta ku asa merhatikeun pisan Si Tanteu ka kuring teh.

"Biasa we anyaran mah," ceuk Si Wawan. Enya sugan. Tapi mudah-mudahan we kitu satutuluyna. Kuring teu nyaho kumaha mun geus lilana, da can ngalaman. Kana beja-beja ti nu geus lalila teh lain rek teu percaya, ngan sugan we ka kuring mah aya iwalna.

"Cep Dudi, ieu bilih palay ngaraosan pasakan Tanteu."

"Nuhun atuh Tanteu, make ngarerepot sagala," ceuk kuring bari nampanan rantang, sop jeung sanguna.

"Ah, henteu, ngarerepot naon? Ka Cep Dudi mah Tanteu teh sok ras we inget ka anak sorangan."

"Oh, di mana nya Tanteu?"

"Di Manado anak Tanteu mah, milu jeung akina di ditu."

"Istri pameget, Tanteu?"

"Awewe. Sakola kelas hiji ayeuna teh."

"SMP?"

"Ih, kelas hiji SMA marukan teh."

"Wah, atuh tiasa diantosan nya Tanteu?" ceuk kuring, ujug-ujug pok bae. Si Tanteu seuri.

"Ari kersa mah. Tanteu teh sok inget bae, saha nu terang keh anak Tanteu ge ngumbara jauh ti kolot. Piraku we ari Tanteu nyaah ka anak deungeun mah, ka anak Tanteu ge teu aya nu nyaaheun." Kuring ngahaminan.

Tanteu Mey, kitu nyarebutna saha bae oge, teu bireuk deui di ieu wewengkon mah. Ngaranna mah Meirina saperti anu ditulis dina rekening listrikna. Cenah bibit-buitna mah ti Manado. Lahir di Bandung, gede di Bandung, kawin di Bandung. Geus asa jadi urang Bandung we cenah.

Beuki lila, kuring beuki apal kana jero-jerona Si Tanteu teh. Ebreh dina kahirupan jeung sikep sapopoena.

"Eu...Cep Dudi, punten we nya pangwartoskeun ka Cep Nana, da ari Tanteu mah teu wantun," ceuk Tanteu Mey dina hiji poe.

"Naon Tanteu?"

"Eta, Tanteu teh bade mayar listrik sareng ledeng, tos kaping sapuluh ayeuna teh. Ari telat teuing bilih didengda. Nu sanes mah parantos malayar," omongna. Gebeg teh, kuring ge da acan mayar, sarebu perak keur listrik jeung keur ledeng sakumaha perjangjian.

"Mangga, Tanteu."

"Punten we nya, Cep."

"Abdi ge, teu acan."

"Ih, wios Cep Dudi mah. Tanteu ge terang, biasana ge apan Cep Dudi mah tara hararese ari tos aya mah."

"Muhun atuh Tanteu, engke we urang wartoskeun ka Nana."

Pinter malibirkeun caritana Si Tanteu teh. Urang Sunda ge ayeuna mah carang nu kitu teh.

"Iraha ngomongna, Dud?" ceuk Si Nana basa hal eta dibejakeun ka manehna.

"Tadi basa sayah balik kuliah."

Si Nana seuri.

"Saenyana mah, Dud, tadi isuk Si Tanteu nitah ka sayah mangnanyakeun duit listrik jeung ledeng ka ente. Ngan tadi teh entena sare keneh."

"Oh, kitu?"

Kuring duaan sareuri. Surti we. Buru-buru we dibayar, teu boga duit oge kapaksa nginjeum heula ka Si Rini. Dipasrahkeun bari sakalian lalajo iklan musik Artis Safari. Si Tanteu, eh biasa we nampanan duit teh. Teu jiga-jiga tas nyiasatan. Manuver yang berhasil, ceuk Si Nana mah.

Ti harita, asa mindeng Tanteu Mey teh ngadoni ka kuring.

"Padahal ceuk Tanteu mah nya Cep Dudi, ngariung mah ngariung we ulah bari jeung eak-eakan. Isin ku tatangga Tanteu teh. Aya naon cenah di Tanteu Mey meni rame kitu?" ceuk Tanteu Mey, pedah ka kamar Si Tina loba babaturanana, ngalobrol bari suka seuri. Padahal kuring ge milu nembrong, ngobrol suka seuri. Kuring mah surti we. Sacara teu langsung sangkan dibejakeun ka Si Tina. Horeng lain ka kuring bae ngomong kituna teh deuih.

Antukna, meh ka nu ngontrak Tanteu Mey teh mere komentar.

"Sanaos tos tunangan oge nya Cep Dudi, tapi ulah kitu-kitu teuing atuh. Ieu mah ari kencan teh sok teu terang di waktu," komentar Tanteu Mey ka Teh Ais. Pedah eta meureun Kang Denina ari apel teh sok nepi ka peuting-peuting bae. Teh Ais mah ukur seuri dibejaan kitu teh, abong nu cicing. Lungguh munding ceuk Si Wawan mah, kakara mijah lamun sawahna digarap.

"Tong diwartoskeun ka Kang Deni we nya, Dud!" ceuk Teh Ais.

"Tapi Teh, sakali-sakali mah kudu diwarah!" ceuk Si Heni. Ambek meureun, pedah kungsi dikomentaran teu bisa masak, neuteuli tayohna mah.

"Diwarah kumaha? Bet saruana atuh!"

"Neng Ais! Neng!" kadenge di luar Si Tanteu gegeroan.

"Tah, rek aya naon cenah Madame de Cegekan teh!" ceuk Si Heni. Abong budak sastra, pinter nyieun istilah. Kuring seuri.

"Husy, ulah kitu ka kolot teh!" Teh Ais ngagebes, tapi tetep tembong mesemna.

"Neng Ais!"

"Kaaah!"

"Ka dieu geura!"

Teh Ais kaluar.

"Bade aya naon, Tanteu?"

"Ieu bilih palay ngaraosan. Aya nu ngirim cau tadi teh, raos geura. Sok we candak!" ceuk Si Tanteu, atra kadenge sabab ngahaja ngadedengekeun. Teh Ais sababaraha kali nganuhunkeun.

Teu lila, sup Teh Ais bari nanggeuy goreng cau sapiring metung.

"Hen, hayang males ka Si Tanteu?" ceuk kuring.

Si Heni unggeuk.

"Pisangna tong didahar! Keun sina ngarasaeun kumaha rasana diacuhkeun!"

"Teu aya we, atuh raos di Akang teu raos di Ayi," ceuk Si Heni bari ngarongkong pisang. Dasar!

Tah, mun pareng lalakina karumpul tur salse, rengse lalajo tipi teh taya deui gawe, gapleh atawa ngobrol ngalor-ngidul. Ti mimiti sual sapopoe, di kampus, jeung sajabana. Bras we kana sual awewe. Tapi anu tetep seger mah angger sual Tanteu Mey.

"Ka sayah Dud, nyebut teu boga pikiran!"

"Wah, nu bener, Na?"

"Tah, tanyakeun ka Si Wawan!"

"Enya. Tadi teh nya urang rek mandi, ngadagoan Si Yanti. Si Eta tea ari mandi teh sawindu. Moyan we di dinya tah, handapeun jambu. Jol teh Si Tanteu. Cep Wawan teu acan kuliah? Teu acan, engke da siang. Oh, ari Cep Nana aya? Tos angkat, ceuk urang teh. Sanes nya Cep, ari wengi Cep Nana teh bobo di kamar Neng Tina? Duka atuh, ceuk urang teh, da abdi mah wengi teh wangsul jam sabelas, teras we ngaringkuk. Padahal urang ge nyaho maneh teh sare di Si Tina nya, Na?"

"Heueuh, sayah mah ngan maturan wungkul. Si Tina keueungeun sare sorangan, da Si Dedehna balik."

"Lain ge maturan wungkul ari nepi ka isuk mah," ceuk Si Wawan.

"Heueuh, sual sejenna mah merupakan kosekuensi logis we eta mah. Bener, Dud?" ceuk Si Nana ngabela diri bari aya sari-sari hayang kaalem.

"Kuma dinya we lah. Ngan ari ceuk sayah mah, kade euy bisi kalepasan. Boa enggeus ketang. Cilaka we. Ari perkara moral-moral kitu, da urang teh geus pada dewasa, geus boga pamilih sorangan, geus boga cecekelan sorangan."

"Alaaah, ari ente siah ti heula ngerem Si Dewi? Ngaku lah! Basa aya pagelaran seni, hayoh! Tong munapek Dud lah!" Si Nana malik nuduh kuring.

"Ukur ngampihan sayah mah. Manehna rek balik, geus peuting, euweuh mobil. Kapaksa we eta mah!"

"Rek kapaksa rek dipaksa, pokona mah maneh ngerem Si Dewi. Titik! Ari nu nempo mah Dud, teu nyaho alesan itu-ieuna. Alesan tea, selalu datang belakangan. Jeung deuih, da sayah ge boga itungan atuh, Dud!" ceuk Si Nana deui.

"Mun urang enya, euweuh kabejakeunana," ceuk Si Aang nu ti tadi ngan ukur milu seuri.

"Pantes we maneh man da kuuleun. Mahasiswa purba, bet jaman feodal ge geus euweuh nu siga maneh mah, Ang," ceuk Si Wawan. "Kaasup jenis langka maneh mah, geus kudu asup musieum!"

Sarerea sareuri. Si Aang ge milu seuri.

"Terus kumaha, Wan, Si Tanteu teh?"

"Ari ceuk Si Tanteu teh nya, sing gaduh pikiran we atuh, da di dunya teh sanes mung duaan bae. Enya ngomong kitu, sumpahna ge. Urang mah cicing we teu ngomong-ngomong. Nya ari keur Tanteu mah, cenah, teu nanaon. Tanteu ge ngora heula atuh, ngan Tanteu teh isin ku tatangga. Meureun ceuk batur teh, eta nu ngalontrak di Tanteu Mey meni barebas kitu. Sok komo upami aya kajadianana, aya kabejakeunana. Tanteu ge tangtos we kababawa wirang. Meureun ceuk batur teh, pantes we da Tanteu Mey mah antepan pisan. Sanes ku nanaon, cenah, Tanteu mah karunya we bisi kuliahna kagaranggu."

"Terus ngomong naon deui, Wan?" ceuk Si Nana.

"Nya terusna mah kabeh we kaparet. Maneh, Dud. Teh Ais, Si Heni. Ah, kabeh we dikomentaran. Ngan maneh Ang nu dipuji teh. Resep Tanteu mah ka Cep Aang teh, cenah. Bageur. Ngan urang we nu teu dikomentaran teh."

"Aing tea atuh!" ceuk Si Aang ngalegeg. Terus digaronjak.

"Ente mah teu dikomentaran soteh, pantes we keur aya di hareupeunana," ceuk Si Nana.

Da enya atuh, ku alus budi ari hareupeun mah. Moal aya nu nyangka alus adat atuh. Matak, ceuk beja mah, carang aya anu memperpanjang kontrakanana. Kitu we meureun.

"Ari urang kumaha cenah, Wan?"

"Ka maneh mah pedah carang sare di dieu wungkul."

"Lah, enggeus lah! Mending gapleh ayeuna mah!" ceuk Si Nana bari nyokot kartu gapleh, terus dikocok.

"Pasangan, ertean?" Si Aang nanya.

"Ertean," ceuk Si Nana. "Tante Mey Cup!"

Sarerea sareuri, terus nyokot kartu.

"Balak kosong!"

"Nya di nu hajat atuh!" ceuk Si Nana bari ngalungkeun balak kosong.

"Beda euy, kaciri hayang meunangkeun Tanteu Meyna teh," ceuk kuring.

"Mun rido mah Tanteu Meyna, moal rek nampik rejeki, nyaan," ceuk Si Nana kalem.

"Aya beja cenah Tanteu Mey teh baheulana mah ngabadung oge," ceuk Si Aang. "Ditilu-tilu, Dud? Euweuh euy, liwat!"

"Ceuk saha, Ang?" Si Nana nanya.

"Urang ge ceuk Si Eulis, tah anu ngontrak di Bu Pardi."

"Nu bangkok tea, Ang?" ceuk Si Wawan. "Heueuh, da sajurusan jeung maneh nya?"

"Enya ceuk Si Eta. Manehna ge cenah ceuk Bu Pardi. Malah tah imahna ge cenah dipangnyieunkeun ku Pa Imang, pejabat, teuing pejabat nanahaon, pokona mah pejabat we. Pa Imangna maot, ganti deui. Ditilu-tilu deui, Dud? Ah, aya sentimen pribadi Si Dudi mah ka aing teh. Liwat lah!"

Kuring sarerea sareuri, ngeunah, tapi Si Aang seuri maur.

"Lewat lagih, sudah ada kila-kilanyah ari pierteeun mah. Mangkaning erte mah kabagean nyusutan urutna, urut pejabat!" ceuk Si Wawan.

"Baheula mah cenah, turun mobil unggal mobil Si Tanteu teh."

"Kenek meureun nu kitu mah," ceuk kuring. "Liwat Na? Nya sayah atuh poldan." Lung tilu-genep, tilu tea atuh stok sorangan.

Si Aang kukulutus pedah balak genepna kabebeng, diseungseurikeun ku tiluan. Terus ngocok, terus ngabagi kartu.

"Heueuh, sigana mah Si Tanteu teh kesepian nya. Naek kana sungut. Bisa jadi eta teh! Apan ceuk Freud oge, tingkah manusia itu dipengaruhi oleh libido seksnya. Sabaraha tateh?"

"Kosong-dua!" Si Wawan nembal.

"Hayang nyaho we nya mun ku sayah dilalanyah," ceuk Si Nana deui bari ngalungkeun kartu dua-hiji.

"Daek kitu maneh?"

"Ceuk sayah ge Dud, sayah mah moal rek nampik rejeki. Kacipta we nya, euy, mun keur kieu teh torojol Tanteu Mey. Cep Nana, Cep Dudi, Cep Wawan upami teu aya damel mah sareng Tanteu we urang sparing. Keun we Cep Aang mah bagean beberesihna!"

Kuring sarerea sareuri, Si Aang nyereng. Memang dina riungan mah biasana sok aya anu jadi korban pikeun kasenangan nu sejen. Di dieu, biasana mah Si Aang. Mun awewena Si Heni. Teuing atuh, kitu ditakdirkeunana we meureun.

Nepi ka jam dua, gapleh bari eak-eakan. Moal henteu isuk bakal aya bejana.

-=oOo=-

Carita ngeunaan Tanteu Mey terus mekar, disusurup, dipapantes. Dihenteu-henteu oge memang pantes rek loba caritakeuneunana teh Tanteu Mey mah. Tina sareatna we, sanajan geus teu ngora deui masih keneh tembong geulisna, menorna. Komo keur ngorana meureun. Encan tina hal-hal sejenna, saperti ceuk beja jeung sajabana.

Hiji peuting, kuring ngajenghok oge nempo Tanteu Mey ngajanteng hareupeun kamar Si Nana. Keketrok, Si Nana mukakeun panto, sup Tanteu Mey asup. Gelo! Lain heureuy jigana Si Nana teh. Rek naon atuh Tanteu Mey peuting-peuting ka kamar Si Nana? Kuring inget kana omongan-omongan Si Nana. Sayah mah moal rek nampik rejeki, cenah.

Bener-bener edan Si Nana mah. Ah, Si Tanteuna we deuih teu boga pikiran. Bisa ka batur! Teu sieun kanyahoan kitu? Boa enya nu dicaritakeun ku Si Aang teh. Gelo, duanana ge geus garelo! Aredan!

Salila-lila kuring mikiran Tanteu Mey jeung Si Nana. Wah, kabutak-butak mikiran nu teu areling mah! Tapi kacipta we Si Tanteu, ibarat nu kahalodoan manggih hujan. Si Nana...! Gelo! Edan! Geus lah, mending liar, cicing di kamar ge kalah lieur teu puguh.

Ceg kana jeket, lalaunan kaluar ti kamar. Mending ngendong di Si Yayat lah, loba sarana pikeun ngabrangbrangkeun hate, rasa anu teuing kumaha mah. Keuheul aya, sebel aya, jeung sajabana. Pokona aya rasa tujuh rupa we, nu negatif wungkul.

Balik teh isuk-isuk, niat teh rek terus sare nebus urut bagadang peutingna. Karek ge rek ngedeng, panto kamar aya nu ngetrok. Saha deuih? Ngaganggu pisan! Bray panto dibuka. Gebeg. Tanteu Mey ngajanteng imut.

"Cep Dudi teu kuliah?"

"Teu Tanteu, da teu aya kuliah dinten ieu mah. Mangga ka lebet, Tanteu!" ceuk kuring.

"Punten we nya, ngaganggu," ceuk Si Tanteu bari asup. Gek diuk dina korsi. Jempe sajongjonan, teuing hate teh make ngageter sagala.

"Oho...oho...(Si Tanteu batuk), Tanteu teh bade aya kaperyogian ka Cep Dudi."

"Kaperyogian naon, Tanteu?" Hate teh geterna rada leler. Tapi ingetan ka Si Nana mah can leungit keneh.

"Isin-isin ge maksakeun Tanteu teh. Oho...oho...! Ka saha deui atuh, da mung ka Cep Dudi we wantun teh, tos teu asa-asa deui. Oho...oho...! (Tanteu nyekel dadana). Tanteu teh bade ka dokter, bronchitis saurna mah, kedah diparios deui. Ehem, tulungan we Tanteu teh, nambut artos upami aya mah. Oho..., sapuluh rebu we. Di Tanteu tos teu aya pisan, oho...oho...oho..., dianggo mayar listrik sareng ledeng kamari."

"Aduh, teu aya atuh Tanteu ari ageung-ageung kitu mah. Nya upami lima rebu mah aya we panginten." Hate geus biasa deui, sugan teh rek naon tuda.

"Sawios lima rebu ge, oho...oho..., ehem kirangna mah sugan kenging ti Bu Engkom, kagungan sambetan dua puluh rebu ka Tanteu teh. Oho...oho..., jangjina mah kamari. Ari kamari ditagih, cenah enjing we teu acan oho..., kenging. Tungtungna mah icuk cole-icuk cole we oho...oho...! Ehem!"

Golosor we lima rebu perak, karunya oge nempo kitu mah. Kabeneran we karak nampa wesel. Tapi ari hate mah aya ngutrukna oge. Na atuh lain ka Si Nana nginjeum duit teh? Duit ditampanan ku Si Tanteu, nganuhunkeunana oge duka sabaraha kali mah, teu diitung ieuh. Diselang ku oho-oho, batuk bronchitis cenah.

Teu ngeunah puguh ge. Ari ngeungeunahna keur Si Nana, kuring bagean riripuhna.

"Ngeunah naon?" ceuk Si Nana basa didakwa ku kuring. "Si Tanteu mah ka kamar sayah teh rek nginjeum deuit, cenah keur ka dokter, nyeri dada!"

"Dibere?"

"Dibere we da karunya, lima rebu perak, hayangna mah sapuluh rebu. Sayah ge ngan boga sapuluh rebu deui duit teh, saminggueun deui," ceuk Si Nana. "Mangka ayeuna teh karak tengah bulan."

"Ka urang ge nginjeum duit deuih. lima rebu sarua. Sarua deuih mentana mah sapuluh rebu. Sarua deuih keur ka dokter. Ngan panyakitna bronchitis ka urang mah," ceuk kuring bari seuri.

"Iraha?"

"Tadi isuk-isuk."

"Ari peuting ente ka mana, Dud?"

"Ngendong di Si Yayat," tembal kuring. Can dibejakeun sabab-musababna mah. Keun engke ge aya waktuna keur terus terang mah, mun aya deui Tanteu Mey Cup. (*)

---

Katumbiri Jilid 2, 1986