Dongeng Nini-nini

Jaman baheula aya nini-nini malarat teu kinten-kinten. Papakeanana geus butut sarta laip. Disampingna oge ngan ukur bisa nutupan orat. Kitu deui dahar leueutna salawasna ngan sapoe sakali bae, malah-malah sakapeung mah datang ka potpisan sapoe dua poe henteu manggih-manggih sangu, ngan ukur nginum cai wungkul. Ari buburuh dederep henteu kaduga jeung geus henteu laku, wantu-wantu enggeus kolot kurang tanagana. Jadi kahirupanana taya deui ngan tina ngarorotek bae dina tegal-tegal atawa kebon awi. Ari beubeunanganana dipake nukeuran beas atawa cangkaruk ka tatanggana.

Pandening imahna ngan sempil bae, ditangkodkeun kana pongpok imah baturna, kitu oge hateupna bilikna geus balocor. Wantu-wantu henteu aya pisan anu daek nulung mangomeankeun, ku tina henteu boga sanak baraya, sumawona anak incu, estuning nunggul pinang.

Ari eta nini-nini teh sakitu nya kokolotanana henteu pisan nyaho ka Gusti Alah, ulahbon ngalampahkeun tea kana parentahna, jenenganana oge henteu apal. Pangrasana ieu bumi jeung langit teh jadi sorangan bae, euweuh anu midamel.

Dina hiji mangsa eta nini-nini geus dua poe henteu manggih-manggih dadaharan, sosoroh nukeuran sangu ka tatanggana taya nu mere. Ti dinya manehna tuluy ngajentul di imahna bari humandeuar pokna, "Aduh, cilaka teuing diri aing ieu, nya ayeuna paeh langlayeuseun teh".

Sanggeus ngomong kitu teh, tulcel, boga niat rek ngarorotek deui ka tegal, bari sugan manggih dangdaunan atawa bongborosan nu ngeunah dihakan, keur tamba ulah langlayeuseun teuing. Geus kitu bral leumpang ngajugjug ka tegal kaso urut nyundutan, anu deukeut kana talaga, sarta di sabeulahna deui nyandingkeun walungan gede. Barang datang ka dinya, eta nini-nini teh manggih lauk deleg pirang-pirang, rek pindah tina walungan kana talaga.

Sanggeus nepi kana tengah-tengah eta tegal, panon poe geus kacida teuing panasna, jadi deleg kabeh awakna taluhur kukumurna, ku tina seuseut datang ka henteu bisa maju leumpangna. Kusabab eta deleg kabeh pada nyandang susah tanwande manggih bilahi paeh kasaatan.

Di dinya eta nini-nini teh bungah kacida. Pikirna geus tangtu manggih untung meunang lauk pirang-pirang boga keur nukeuran sangu. Tapi manehna heran neuleu aya hiji deleg, anu panggedena ti sakabeh baturna, jeung deui leumpangna oge pangheulana, kawas-kawas nu jadi ratuna sarta bisaeun ngomong, pokna, "Samiun Alah kuring neda hujan! Samiun Alah kuring neda hujan!" Kitu bae omongna bari tatanggahan ka luhur. Ari ku nini-nini teh didengekeun bae saomong-omongna eta deleg teh, hayang nyaho kumaha kajadianana. Barang geus kira-kira satengah jam lilana datang hujan gede naker wani cileungcangan. Ti dinya eta deleg barisaeun deui leumpang tuluy kebat lumakuna, ari nini-nini teh datang ka ngadegdeg awakna tina bawaning tiris kahujanan sarta lengoh balikna teu barang bawa.

Kacaritakeun eta nini-nini teh sanggeus datang ka imahna tuluy mikir bari ngomong di jero hatena, "Ih boa lamun aing oge neda widi ka nu ngaran Allah teh, meureun dipaparin, ari piomongeunana mah nya cara deleg tea bae, ngan bedana aing mah rek neda uwang.

Ti dinya eta nini-nini seg bae tapakur di imahna, bari ngomong tatanggahan ka luhur nurutan sakumaha kalakuan deleg tea. "Samiun Allah kuring neda uwang! Samiun Allah kuring neda uwang!" Kitu bae omongna teu eureun jeung pikirna antek kacida panedana ka Gusti Allah, datang ka geus teu aya pikiran deui ka nu sejen.

Ari jalma anu imahna ditangkodan ku imah nini-nini teh, banget ngewaeunana kusabab gandeng jeung bosen, saunggal poe unggal peuting ngadengekeun omongna eta nini-nini, ngan kitu bae, taya pisan repehna. Tuluy bae nyentak ka nini-nini teh. Pokna, "Nini! Repeh aing gandeng, ngan kitu bae euweuh deui kasab, moal enya Allah teh sumping ka dieu, seba duit ka maneh. Jeung kitu bae mah anggur ngala suluh, ngala daun ka leuweung meureun aya hasilna. Jeung deui, lamun maneh henteu beunang dicarek, geura undur bae imah maneh ulah ditangkodkeun ka imah aing."

Panyentakna eta nu boga imah ku nini-nini henteu digugu, tonggoy bae ngomong nyuhunkeun duit ka Allah anggur beuki tambah maksudna. Bareng geus nepi ka lima poena, anu boga imah teh beuki kacida garetekeunana. Henteu beunang dicarek sarta dititah undur henteu los. Ti dinya eta jalma tuluy nyokot karung goni beunang ngeusian ku beling, datang ka pinuh sarta dipekprekan, supaya jejel ambih beurat. Niatna rek dipake ngabobodo ka nini-nini tea, sina di nyanaan duit paparin Allah ragrag ti luhur, jeung sugan nyeurieun ditinggang tonggongna ku eta karung ambih kapok moal ngomong kitu-kitu deui.

Kira-kira geus wanci sareupna, ku eta jalma karung teh dibawa naek ka para, tuluy diponcorkeun tina sipandak ditindihkeun ka handap, meneran kana tonggongna. Nini-nini teh kalengger tina bawaning nyeri. Ana geus inget, nenjo aya karung ngadungkuk kacida atoheunnana, panyanana nya eta karung duit, paparin ti Allah.

Anu boga imah teh suka seuri nenjo kalakuan nini dug-dug deg-deg, semu banget atohna. Geus kataksir piengkeeunana bakal meunang era kabobodo, karana nu dikarungan teh tetela pisan yen beling.

Geus kitu karung teh disembah ku nini-nini teh bari ngomong kieu, "Nuhun Allah! Nuhun! Naha loba-loba teuing maparin duit teh, mana ari keur ajengan, aya keneh, Nun?" Ti dinya tuluy geuwat dibuka. Geus kitu kersana nu agung, dumadakan eta beling kabeh jadi duit, aya uwang emas aya uwang perak, jeung deui kumaha gedena bae aya nu jadi ringgit, aya nu jadi ukon.

Ari isukna tatangga kabeh daratang ngadeugdeug, yen eta nini-nini meunang bagja boga duit pirang-pirang, asal tina dibobodo, malah kapala distrik sumping ka dinya ngalayad, sarta tuluy dilaporkeun ka nagara jeung ditetelakeun asal purwana. Ari timbalan ti nagara, eta nini-nini henteu kaidinan cicing di kampung, bisi aya nu nganiaya dipaling duitna, jeung diurus dipangmeulikeun lembur imah, katut eusina. Ti wates harita eta nini-nini teh jadi sugih teu kinten-kinten, kitu deui dipikanyaah ku menak-menak tina saregep kumawulana jeung tambah alus budina, kalulutan ku jalma rea sobatna, tina suka tulung ka jalma-jalma nu miskin, sumawonna ka nu keur kasusahan, margi ngaraskeun ka dirina basa keur malarat keneh.

Kacaritakeun eta jalma, anu mere karung beling tea, kabitaeun naker neuleu eta nini-nini tea jadi beunghar, lantaran dibobodo karung beling ku manehna. Geus kitu boga niat hayang nurutan. Ti dinya tuluy nganjang, sejana rek badami, supaya dibales ku eta nini-nini tea sina nindih ku karung beling ka manehna. Pokna, "Nini saterangna eta duit teh asalna beling beunang kula ngarungan, dipake ngabobodo ka sampean, kusabab satadina kaula giruk ngadengekeun ajengan ngomong bae nyuhunkeun duit ka Allah, tatapi ahir-ahir eta beling dumadakan wet jadi duit kabeh. Ku prakara eta ayeuna kaula rek neda dibales ku sampean, hayang ditinggang ku karung beling, karana tanwande jadi duit oge cara nu geus kalampahan, tatapi kaula mah hayang ditinggang ku dua karung, nu galede, ambeuh kaula leuwih beunghar manan nini. Wangsul nini teh, "Hade heug bae geura tapakur, cara kaula bareto". Ti dinya eta jalma teh tuluy balik.

Sadatang ka imahna heug bae tapakur nurutan sakumaha polahna nini-nini tea sarta ngomong, pokna, "Samiun Allah kuring neda uwang! Samiun Allah kuring neda uwang!" Kitu bae omongna jeung pikirna ujub kacida nangtukeun yen bakal meunang duit ti Allah dua karung goni parinuh. Bareng geus nepi ka lima poena, nini-nini teh tuluy ka imahna eta jalma nu keur tapakur tea, bari mawa dua karung beling beunang mekprekan, sarta tuluy dibawa naek ka para. Ti dinya heug eta dua karunganana ditindihkeun kana tonggongna.

Barang blug ninggang, sek bae kapaehan malah-malah tulang tonggongna datang kapotong. Arina inget ngageuwat menta parukuyan ka pamajikanana, heug karung teh dikukusan, ari mentas dikukusan tuluy disembah, bari ngomong nurutan cara omong nini-nini tea. Pokna, "Nuhun Allah! Nuhun! Naha maparin duit rea-rea teuing, mana ari keur ajengan? Aya deui?"

Barang geus tamat ngomong karungna dibuka, beh beling keneh bae henteu daekeun jadi duit. Ti dinya kacida hanjakaleunana datang ka ngalembah rek ceurik tina bawaning aral, seg bae bijil omongna suaban ngahina ka Gusti Allah. Pokna, "Ih naha Allah teh wet pilih kasih, dipangnyieunkeun duit sawareh? Ari kaula henteu? Jeung deui, kumaha naha atawa Allah teh geus diganti deui tayohna, da nu bareto mah bisa nyieun duit ku beling, ari Allah nu jeneng ayeuna tayoh-tayoh henteu bisaeun?"

Ti wates harita eta jalma gering heubeul pisan nyeri cangkeng. Tatamba kapirang-pirang dukun. Tina aya keneh berkah Allah bisa cageur oge, tatapi tanpa daksa, jadi bongkok tonggongna, datang ka henteu kuat nyiar kahirupan rosa-rosa. Lawas-lawas manehna jadi malarat cara nini-nini tea, kawas-kawas jadi tepa malaratna eta nini ka eta jalma tea. (*)

---

Nyutat ti Majalah Walanda, Tijdschrift voor Indische Taal, Land en Volkenkunde, wedalan taun 1872.
Dongeng Sunda Buhun ieu dikukumpul ku J.A Uilkens, mangrupa carita rahayat urang Ciamis.