Widadari

Dina hiji peuting Ujang ujug-ujug nanya, "Apa, di bulan teh aya Nini Anteh?" Kawasna bae Ujang teh inget kana bulan purnama nu harita keur ngaganteng di awang-awang.

"Aya", walon Apa. Piraku Apa kudu nyebut 'teu aya' mah, lantaran Apa kungsi ngadongengkeun lalakon Nini Anteh nu keur jongjon ninun di bulan dibarengan ku ucingna. Kana eta dongeng, Ujang jeung Nyai teuing ku percaya.

"Kumaha emamna?" Ujang nanya deui.

Rumasa, ngan teu kedal, Apa rada hese ngajawab eta pertanyaan teh, ari lantaranana dumeh sakeudeung mah Apa teh mikirna rasional teuing. Tapi sabada nyieuhkeun rasio mah, gancang pisan Apa bisa ngajawab.

"Apan dianteuran ku widadari."

"Ti sawarga, Apa?"

"Muhun," walon Apa ngahaminan kana jalan pikiran Ujang anu kapangaruhan ku dongeng Apa keneh yen widadari teh urang sawarga.

"Ari widadari ngagaleuhna ti mana?" Etah, Ujang geus pok deui bae nanya!

Apa ngarti naon sababna nu matak Ujang nanya kitu, lantaran tangtuna oge inget ka Emah nu sok balanja ka warung atawa ka pasar, balanja dahareun keur sapopoe. Upama widadari nganteuran dahareun ka Nini Anteh, tangtu dahareun teh aya asalna, ti mana? Nya tangtu ti warung atawa ti pasar. Kitu pastina oge pikiran Ujang harita teh.

Bener pisan analisa Apa teh, da basa Apa rada lila ngahuleng mikiran pijawabeun, geus pok deui Ujang nanya, "Di sawarga teh aya warung, Pa?"

Asa disedekkeun, harita Apa kudu ngajawab, "Aya. Aya warung di sawarga paranti widadari balanja keur nganteuran Nini Anteh."

Neruskeun jalan pikiran Ujang bieu, Ujang nanya deui bae. "Ku saha ditanggungna?" Eta pertanyaan teh jigana bae ku lantaran Ujang nyaho kana kabiasaan Mang Warung di hareupeun imah nu sok nanggung balanjaan ti pasar saban poe. Naha atuh inget ka Emah nu sok balanja ti warung? Apan ari Emah balanja ti warung mah, teu kudu aya nu mangnanggungkeun. Jadi meureun Ujang moal katutuluyan nanya kitu ka Apa.

"Saha Apa nu nanggungna?" Ujang pok deui nanya kawas nu teu sabar hayang meunang jawaban.

Ras inget, dina dongeng Apa teu kacatur aya lalaki pituin urang sawarga, ngan aya widadari wungkul, awewe, istri. Nini hidep baheula teu kungsi ngadongengkeun kitu deuih, diinget-inget teh. Tapi, da bisa bae Apa nambahan ku nu teu kacatur dina dongeng nini hidep baheula, lain? Bisa, da dongeng ieuh, jeung deui apan nu dipangdongengkeunana oge budak nu can nyaho di hitut bau.

"Sakti widadari mah, Ujang," cek Apa. "Teu kedah dipangnanggungkeun ku batur, da balanjaanana oge bisaeun hiber sorangan nuturkeun widadari saatosna ditiup ku widadari."

Ujang sugema ku eta jawaban teh, tapi Ujang mah teu perlu nyaho, yen dina nambahan dongeng widadari ti nini hidep teh, Apa teu wani ari kudu nyebutkeun yen aya tukang nanggung di sawarga mah. Lantaran nya kitu, di Apa aya keneh sieun doraka, ma’lum apan dongeng nini hidep teh dongeng ti pangaosan. (*)

---

Wahyu Wibisana