Si Rewok

Guyur salembur. Najan teu ilahar, tapi meh sakur urang lembur ngarasa kahibur. Rupaning pintonan ditanggap: bajidoran, dangdut, kosidahan, wayang golek, tug nepi ka tableg akbar. Olot Ukar, Ulis Kowi jeung Kulisi Ook, katara bangun sugema. Meunang hese cape tatahar teh, dina emprona mah geuning lungsur-langsar.

Peuting eta, malem Jumaah kaliwon, buruan bale desa teh ngadadak ngajanggelek jadi pasar malem.

"Para hadirin anu ku sim kuring dipihormat, teu karasa geuning, peuting ieu teh geus nincak peuting katilu hajat lembur. Enya, dina raraga ngareuah-reuah maotna Si Rewok," kitu cek Olot Ukar, basa keur biantara di luhur panggung. Nu surak mani saheng, matak eundeur salelembur. Malah awahing ku rame, nu keur biantara mah taya nu ngabandungan. Nyaho-nyaho Lurah Ukar geus mungkas biantarana. Tuluy disambung ku Kuwu Amas, minangka tamu istimewa.

"Kuring minangka kuwu, milu bungah nu taya papadana, dumeh Si Rewok geus nemahan pati. Sugan we ari Si Rewok maot mah, lembur urang teh jadi aman tur tingtrim." Teu kebat biantarana, da kasilep ku surak nu lalajo mani ayeuh-ayeuhan. Malah nepi ka rengsena biantara, biheung aya nu nyaho naon nu caritaan ku Kuwu Amas. Komo Hansip Baron mah, ti mimiti prung acara oge, ngan hayoh bae ngalindeukan Neng Lina. Mangpang-meungpeung, sabot Olot Ukar bongoh. Padahal sasarina mah Hansip Baron teh tara kumawani, da puguh ngaragangan Lurah Ukar. Tapi sanggeusna Hansip Baron dileler pangajen minangka pahlawan lembur, Olot Ukar siga nu mere lolongkrang hade. Hartina, tinggal Cep Erik nu kudu disanghareupan teh. Duka ku naon, da Cep Erik mah ti baheula oge memang teu panujueun upama adina kudu rerendengan jeung Hansip Baron.

Tatabeuhan dangdut mimiti ngagembrung. Nu lalajo mimiti motah. Aya awewe make baju merecet naek ka panggung. Nu lalajo beuki moyeg. Hansip Baron mah kalah ka anteng neuteup beungeut Neng Lina.

"Kang Erik nuju ka mana, Neng?" Hansip Baron nanya. Diukna rada ngised, semu nyedekkeun Neng Lina.

"Duka...!" Ukur kitu walon Neng Lina teh. Pangpangna mah geus bisa ngabade yen Hansip Baron teh ukur basa-basi. Da mun seug enya aya Cep Erik, tangtuna oge moal kumawani diuk di gigireunana.

"Si Erik mah keur nganjang ka imah calon pamajikanana di Rancakatel. Geus ampir saminggu, henteu balikna teh." Kalah Olot Ukar nu nembalan teh, bari panonna mah angger manco kana panggung, lir embung kaliwat nuturkeun nuturkeun nu keur ngageol luhur panggung.

-=oOo=-

Tilu poe katukang, Si Rewok geus jadi mayit. Puguh bae langsung ibur salembur, ear sadesa. Malah mimitina mah loba nu cangcaya. Pangna kitu teh, ngaran Si Rewok geus jadi kacapangan balarea, dipikasieun ti bareto. Estuning matak muringkak bulu punduk, mun ngaguar kaganggasan Si Rewok. Lain hiji dua nu nyebut leuwih ganggas alah batan sato teh. Kakara ngadenge ngaranna, nu soak mah tuluy ngoceak.

Sanggeus sumebar beja yen Si Rewok maot, rea nu tumanya, saha nu geus bisa maehanana? Da puguh salila ieu mah can aya nu metu nyangkalalak eta jalma. Dalah aparat kaamanan oge meh beak dengkak. Cek Bah Dinta tea mah, dukun sohor ti urang Ciparabun, majarkeun teh Si Rewok boga ajian meunang ngalap ti Siluman Belut. Leueur, matak hese ditewakna. Ngalawan Si Rewok mah, lain sanghareupaneun jalma bolostrong.

Olot Ukar terus ngayakeun saembara. Sing saha nu bisa nyerek Si Rewok, boh hirupna boh paehna, baris meunang hadiah, duit sapuluh juta. Kawasna mah Olot Ukur geus liwat ti jangar, dumeh kulawargana ge jadi korban kaganggasan Si Rewok.

Hansip Baron ngadadak jadi bahan catur balarea. Cenah manehna pisan nu nyangkalak Si Rewok teh. Samemehna tarung heula di Pasir Haur. Layon Si Rewok terus dibulen ku boeh, henteu kungsi dimandian heula. Satuluyna dipanggul ku ka buruan bale desa. Urang lembur tumplek ka bale desa, hayang ngayakinkeun eta beja.

"Cik singkabkeun boehna, hayang neuleu heula beungeutna! Rek diciduhan sakali mah!" Aya nu nyelengkeung semu nu ngenes.

"Meugeus, teu kudu ditenjo sagala rupa, beungeutna raca pisan!" cek Hansip Baron rada teugeug.

"Mending mandian bae heula. Terus urang kurebkeun sakumaha mistina," cek Mama Iking.

"Teu kedah, Mama. Jalma kieu patut mah, mending langsung dikurebkeun we, da tos puguh bakal direrab seuneu naraka!" tembal Kulisi Ook.

"His, ari taeun teh, sok nyanyahonan Nu Kagungan. Teu meunang, dosa eta teh!" saur Mama Iking.

"Lah, tong loba catur. Hayu urang rungkup bae! Iringkeun ku kuda renggong!" Hansip Baron bangun nu teu sabar. Rombongan kuda renggong geus anjog ka buruan bale desa.

"Nya ari geus kieu mah, sok we atuh kurebkeun di Cijengkol! Omat, ulah wani-wani dikubur di Makam Jambu, bisi ngotoran arwah-arwah jalma suci," kitu cek Olot Ukar.

"Ari Pa Olot, moal milu ngubur?" Ulis Kowi nanya.

"Apan kuring rek nyiapkeun raramean jeung barudak nonoman," tembalna.

Hansip Baron gugupay ka lebah rombongan kuda renggong, tuluy ngagorowok rada harus.

"Hayoh tabeuuh...!"

Der tatabeuhan kuda renggong teh dimimitian. Nu nyanyi, nu ngigel, nu sarurak, mutuh matak harengheng. Layon digotong ku Kulisi Ook, Hansip Baron, jeung Ulis Kowi. Ari Mama Iking mah tuluy bae ngaleos. Pasemonna bangun nu hanjelu.

"Mama, moal ngiring ngurebkeun?" cek Olot Ukar.

"Moal!" tembalna pondok, bari tonggoy ngalengkah ka kulonkeun.

"Atuda aya ku mararodel Pa Olot mah. Piraku rek ngurebkeun nu maot kalah ka diiringkeun ku kuda renggong." Aya nu nyarita tukangeun Olot Ukar. Barang dilieuk, mana horeng Ustad Otong.

"Lah, Mang Ustad mah da can kungsi ngalaman jadi korban Si Rewok. Jadi moal ngarasakeun kanyeri urang lembur."

"His, sanes kitu, Pa Lurah. Tapi kalah kumaha oge, ari nu maot dikitu-kitu mah, henteu sae. Komo deui ngadangu teh bade tatanggapan sagala."

"Enya, Mang Ustad. Kuring rek tatanggapan tujuh peuting noron. Bisi Mang Ustad rek lalajo, tangtu bakal disadiakeun korsi husus di jajaran hareup." Teu kebat nyaritana, da Ustad Otong kaburu ngaleos.

Beuki peuting, acara dangdutan mingkin rame bae. Aparat desa tingcakakak dina korsi jajaran hareup. Kituna teh bari tingserebung haseup udud, tinglaleguk inuman. Duka kumaha tetenjoanana, da nu ngigel teh siga nu pikalucueun. Hansip Baron beuki laluasa ngalindeukan Neng Lina.

Teu lila, Hansip Baron cengkat.

"Bade ka pengker heula sakedap," pokna ka Neng Lina.

"Mangga, masing lami oge," tembal Neng Lina. Rada nyentug kana angen Hansip Baron. Najan kitu, Hansip Baron kalah ka sarangah-serengeh, api-api teu ngadenge. Leos muru ka pipir bale desa, rada rurusuhan.

Kakara oge muka seleting, Hansip Baron ujug-ujug curinghak. Panonna melong ka lebah tangkal kihujan. Najan ukur sakolebat, katenjo aya nu sasalingkeran, make pakean sarwa hideung.

"Saha eta?" cek Hansip Baron teuneung. Hanjakalna ukur diwalon ku sora gaang jeung jangkrik. Eta jirim nguliwed ka kulonkeun. Hansip Baron beuki panasaran, lat poho kana sagala rupa. Harita keneh ngaberengbeng lumpat, ngudag jirim nu geus leungit dilegleg mongklengna peuting. Hanjakal, najan diberik bari lumpat satakerna, henteu kaudag. Diteangan ka ditu ka dieu, teu kapanggih. Antukna Hansip Baron ngalempreh bari renghap-ranjug, kesang ngoprot sakujur awak.

"Nuju naon, Mang Baron?"

Gebeg. Ustad Otong geus nangtung di hareupeunana.

"Bieu teh aya jalma nyurigakeun, lumpat ka lebah dieu. Tapi dasar keur apes, nepi ka henteu kaudag tah Si Ontohod teh. Padahal mun beunang mah, rek dipodaran sakalian, ngarah Si Rewok aya baturna di naraka!" tembalna.

"His, ari nyarita teh!"

"Ke, ke, ke, ari Mang Ustad rek ka mana?"

"Biasa we, rek menerkeun cai. Tuluy balikna rek nyimpang ka Mama Iking."

"Kade atuh, bisi eta mangkeluk ngarogahala."

"Kuring mah pasrah we ka Allah, Mang. Hayu ah, bisi peuting teuing, Assalammu’alaikum...!" Kituna teh bari ngalengkah rada rurusuhan. Hansip Baron sakedapan mah ngahuleng ngaragameneng. Siga nu keur mikir. Uleng naker. Teu lila, Hansip Baron cengkat. Tuluy leumpang rurusuhan.

Bras ka buruan imah Mama Iking, Hansip Baron ngarandeg. Kapireng di jero aya nu keur paguneman, semu gegerendengan. Manehna tuluy ngeteyep ka pipir imah Mama Iking. Satuluyna ngintip tina sela-sela bilik. Gebeg, Hansip Baron ngaranjug, bangun cangcaya kana tetenjoanana. Kesang badag kesang lembut mimiti rarenung maseuhan sakujur awakna. Angenna ratug tutunggulan, basa sora nu paguneman beuki atra kadenge.

"Allah mah lautan hampura, Jang. Dosa-dosa Jang Rewok anu bieu dicaritakeun teh, memang matak muringkak bulu punduk. Kilang kitu, rek sakumaha lobana dosa Jang Rewok, ari geus boga itikad rek tobat jeung rek babalik pikir mah, lawang pangampura masih keneh muka. Mama oge ngarasa bungah nu taya papadana," sora Mama Iking meupeuskeun simpena peuting. Ti kajauhan, sora tatabeuhan dangdut masih keneh ngagembrung.

"Nuhun, Mama. Abdi teh leres-leres hoyong ngubur tapak kapungkur, nanging nya kitu tea..." Rewok teu kebat nyaritana, sabab piceurikeun geus nyelek dina tikoro. Antukna kalah nginghak bangun nu nalangsa.

"Geus, teu kudu ceurik, Jang. Ayeuna mah hayu urang abdas. Wayahna sapeuting ieu mah ulah hayang sare. Mending solat tobat, solat hajat, solat istikharoh, masrahkeun awak sakujur kalayan neda pangampura ti Nu Maha Kawasa. Isukan, bada solat subuh, pek masrahkeun diri ka nu berwajib, ngarah urang lembur areling, saha sabenerna anu geus dikurebkeun teh. Bisi sieun mah, keun ku mama dianteur. Deudeuh teuing ana kitu mah Lurah Ukar teh...," kitu pokna Mama Iking.

Hansip Baron kekerot. Cacak mun di nu caang mah, tangtu bakal katenjo geuneukna beungeut Hansip Baron. Gap kana gagang bedog; Si Waja Karang, nu tara lesot disosoren saban mangsa.

"Dasar sia mah bangkawarah, Rewok! Cidra kana jangji sia sorangan." Hansip Baron ngagerentes, bari ngojengkang rek muru ka lebah tampian. Teu kahaja, sukuna nincak ucing kukutan Mama Iking, nu keur depa di tukangeun Hansip Baron.

Meooong...! Sora sakadang ucing bangun nu kanyenyerian.

"Saha di luar?!" cek Mama Iking, rada harus. Puguh bae angen Hansip Baron beuki ratug tutunggulan. Komo barang mireng sora panto ngulutrak mah. Rasa bingbang jeung tagiwur minuhan satungkebing hatena.

"Aeh, geuning Mang Ustad. Sok ka jero! Naha teu uluk salam heula atuh?"

"Punten, Mama, tadi teh nembe oge bade engab, tapi reuwas ngadangu sora ucing."

"Ucing?" Mama Iking naros. Hanjakal pisan Hansip Baron mah teu bisa nyaksian paroman Mama Iking. (*)

Dhipa Galuh Purba