Kurupuk Udang
Ti saprak katarajang kasakit jajantung. Loba pisan pantanganana. Duren teu meunang. Sate embe kudu dijauhan. Beuleum entog ulah pisan. Kolesterol cenah. Koresterol naek. Tekanan jajantung milu naek. Kadituna bakal riweuh deui urusanna.
"Daging sapi meunang. Ngan tong loba teuing. Eta ge tong aya gajihna!" ceuk Dokter waktu mariksa bulanan. Kitu deui sea food ge dipahing pisan. Komo udang mah, kana awak jadi arateul. Alergi. Tong boroning kulub udang. Kurupuk udang kadahar saeutik, langsung we arateul saawak-awak.
Harita ge, alergi teh kumat deui. Gara-gara keur istirahat dina pelatihan, ngadahar kurupuk udang saeutik. Panasaran we, ari dahar teu make kurupuk teh, teu apdol.
Dina poe kadua pelatihan. Menuna rada mending. Aya gepuk jeung lalawuh lainna. Kaasup kurupuk udang.
"Saha nu hayang kurupuk?" cekeng nawarkeun
"Sok kadieukeun!" jawab Pa Maman giak naker, narima tawaran kuring.
"Yeuh...!" kuring mikeun kurupuk udang. "Tukeuran jeung gepuk, nya?"
"Euweuh we!" ceuk Pa Maman, neruskeun hanca. (*)
Djamhur Ahmad
Reviewed by Rupa Sundapura
on
23.19
Rating:
