Sasakala Arca Domas

Di Gunung Cibodas, Kabupaten Bogor, aya arca batu pirang-pirang lobana. Disebutna Arca Domas. Baheula mah cenah lobana teh dalapan ratus. Hartina domas nyaeta dalapan ratus. Jeung ceuk beja deui, nu jadi eta arca teh kabeh oge urang Pajajaran, anu henteu daek nganut agama Islam. Cenah mah sasakalana teh kieu:

Jaman baheula, aya karajaan gede, katelahna Karajaan Pajajaran. Dayeuhna aya di wewengkon Bogor ayeuna. Sakurilingna dipager kuta kacida tohagana. Kaca-kacana aya di unggal madhab, sarta unggal kaca-kaca dijaga ku perjurit anu tohaga jeung samakta pakarangna. Saha bae anu rek asup ka jero dayeuh, kudu ngaliwatan heula eta kaca-kaca.

Ari anu jadi raja di Pajajaran harita, kaceluk jujulukna, Sang Prabu Siliwangi. Sang Prabu sarahayatna ngaragem agama Hindu. Agama anu diagem ku bangsa urang harita. Lain bae di sakuliah Pulo Jawa, tapi oge meh di sakuliah Nusantara deuih. Eta agama teh asalna mah ti India. Asupna ka urang geus ti beh ditu mula. Dibawa ku bangsa India anu daratang ka urang.

Tapi di sawatara tempat mah, geus aya anu ngagem agama Islam. Harita geus dug-deg karajaan-karajaan Islam. Upamana bae Demak, Cirebon, jeung Banten. Kitu deui jeung Palabuan Sunda Kalapa, anu geus kaereh ku Banten. Di dinya mah geus loba anu ngagem Islam. Ari agama Islam sumebarna di urang, utamana mah lantaran yasana Wali Sanga.

Karajaan Islam anu natangga jeung Pajajaran, nyaeta Karajaan Banten, nu dirajaan ku Sultan Hasanudin. Ari puseur dayeuhna di Surosowan, anu pernahna deukeut ka basisir Banten. Dina tempo anu singget Karajaan Banten geus ngajanggelek jadi karajaan anu gede. Agama Islam dijadikeun agama resmi karajaan.

Sultan Banten kagungan niat, palay ngislamkeun Karajaan Pajajaran. Nya anu pangheulana kudu diajak asup Islam teh, tangtu bae rajana, nyaeta Prabu Siliwangi. Da lamun rajana geus ngagem agama Islam mah, tangtu rahayatna bakal naluturkeun. Tuluy bae atuh Sultan Banten teh ngirim utusan. Eta utusan mawa surat keur ka Prabu Siliwangi.

Kacarita utusan teh geus nepi we ka Pajajaran. Suratna tos katampi ku Sang Prabu Siliwangi. Teras suratna diaos kalawan antare. Ari unggelna eta surat, nganasehatan supados Sang Prabu sareng rahayatna enggal-enggal nganut agama Islam. Lamun henteu kitu, tangtu bakal dirurug ti Banten.

Sang Prabu henteu mindel sedakapan. Anjeunna maphum yen balad Banten tohaga tur samakta pakarangna. Cindekna mah lain lawan-lawaneun. Tapi tawis raja anu henteu dijajah, tur maksadna ngabela kayakinan, yen agama Hindu taya dosana, eta nasehat ku anjeunna ditolak sapadamayan.

Ari anu mawa surat ti Banten tea saenyana urang Pajajaran keneh, ngan geus lila ngumbara di Banten. Malah geus ka Mekah sagala, ngajeroan ngulikna agama Islam teh. Geus kaasup alim gede, nelah jenenganana Kean Santang. Kaasup salah saurang kepetengan Sultan Banten.

Samulangna Kean Santang, Prabu Siliwangi ngempelkeun para ponggawa, mantri, senapati, katut kapetengan lianna. Ngabadantenkeun saniskara pasualan nagara, patali jeung ditolakna nasehat Sultan Banten. Moal henteu, saurna, Banten tangtu ngarurug. Najan waktuna tacan pasti, tapi sawadina kudu iatna ti ayeuna.

Sang Prabu nimbalan senapati pangluhurna, anu jenenganana Norogol, supaya nohagaan benteng pertahanan. Sawatara kapala perang geus diparentah, kudu ngajaga liliwatan di pagunungan, supaya musuh ulah bisa nobros ka Dayeuh Pajajaran. Harita keneh parentah Sang Prabu dilaksanakeun. Pajajaran sayaga nadah panarajang musuh.

Kacaritakeun Wirakarta, nyaeta hiji kapala perang nonoman, ngaraos hemeng lantaran ku nu jadi senapati henteu diparentah nanaon. Anjeunna aya sangkaan yen anu matak kitu teh, lantaran anjeunna saderek Kean Santang, anu geus meunang jujuluk "Macan Nusa Jawa", tina gede wawanenna kasartaan ku gagah perkosana.

Wirakarta banget panasaran, tur ngaraos kawajiban ngabela lemah cai. Anjeunna enggal mendakan Sang Prabu, nyuhunkeun dipaparin damel kaperjuritan. Dihenteu-henteu oge, anjeunna rahayat Pajajaran. Sanajan jeung Kean Santang katalian babarayaan, hate leutikna mah manteng ka leman caina.

Sang Prabu badanten jeung Senapati Norogol, sarta enggal Wirakarta kenging parentah, kedah ngajaga kaca-kaca beulah kulon. Tapi waktuna ngamimitian ngajaga, saur Norogol, kudu nunggu parentah deui. Wirakarta mungkur ti payuneun Sang Prabu. Paromanna alum ngemu kabingung.

Sumping ka bumina, Wirakarta teu senang manah, nepi ka teu barang tuang barang leueut. Hatena marudah gulinggasahan. Dipaksakeun kulem teu tiasa peureum. Tengah peuting anjeunna tapakur, neneda agungna ka para dewa, sangkan Sang Prabu ulah cangcaya.

Sanggeus meunang tujuh peuting, parentah nu dianti-anti henteu ngabukti, Wirakarta leungit kasabaranana. Tuluy nulis surat dina daun lontar, ditulis ku peso pangot. Geus rengse, diasupkeun kana ruas, sarta ditutup ku malam rapet pisan. Terus dibungkus deui dibuni-buni.

Wirakarta marentah gandeka, gandek anu jadi kapercayaanana, pikeun nganteurkeun eta surat. Anu ditujul Kean Santang di Banten. Sanggeus nampa surat, si gandek indit gagancangan. Kaluar ti Dayeuh Pajajaran rerencepan. Eta gandek geus nyahoeun, yen di mana-mana geus dijaga ku perjurit. Perjurit Pajajaran anu samakta pakarangna. Lamun seug suratna tea katangkep, tangtu manehna bakal ditangkep, dununganana oge geus pasti bakal kabaud. Dianggap geus hianat ka nagara, hukumanana anu pasti, nyaeta hukum pati.

Tapi tina percekana eta gandek, manehna bisa salamet nepi ka Banten, sarta gancangna carita, geus diaos suratna ku Kean Santang. Kean Santang kacida bungahna, barang uninga eta surat ti Wirakarta. Komo saparantos uninga unggelna mah. Mutuh matak pikabingaheun manahna. Ari unggel eta surat nyarioskeun, yen pangagung di Pajajaran, kalebet Sang Prabu Siliwangi, ngandung curiga ka Wirakarta, nepi ka matak salempang pibalukareunana.

"Ku margi eta," cek Wirakarta nutup suratna, "Mugi-mugi Kang Raka kersa maparin bongbolongan." Dicaritakeun deuih yen ayeuna Wirakarta, kapapancenan ngajaga kaca-kaca beulah kulon.

Kean Santang nyaur sajeroning manah, "Alamat hade, yeuh. Aing datang ka Pajajaran kudu nyorang kaca-kaca beulah kulon. Ayeuna eta kaca-kaca dijaga ku adi aing, atuh sasat ngan kari asup." Harita keneh anjeunna ngawalonan serat. Wirakarta diwujuk biluk ka balad Banten, sarta baris meunang ganjaran ti Sultan.

Dina malem Ahad legi tanggal lilikuran, Kean Santang katut lima ratus perjurit, kira wanci kongkorongok hayam sakali, tangtu geus aya di Pajajaran, deukeut kaca-kaca kulon. Lamun aya anu ngetrok kana panto kaca-kaca, kudu gancang-gancang dibuka, sangkan balad Banten bisa asup ka jero karaton. Kitu unggelna surat walonan ti Kean Santang teh.

Teu kacatur di jalanna, nu mawa surat geus datang deui ka Pajajaran, jeung suratna geus dibuka ku Wirakarta. Anjeunna bingung, manahna marojengja. Ras ka raja anu jadi pupundenna, ras deui ka lemah cai anu kudu dibelaan, tapi ras ka diri pribadi anu teu aman, jeung ras inget ka Kean Santang, saderekna. Wirakarta henteu gancang nyieun putusan.

Kacarita tengah peuting nu kaunggel dina surat, Wirakarta aya di tukangeun panto kaca-kaca. Wanci kongkorongok hayam sakali, aya nu ngetrokan panto kaca-kaca. Bray pantona dibuka lalaunan, sup Kean Santang asup rerencepan, dituturkeun ku balad-baladna. Harita teh keur meujeuhna tiris. Lolobana perjurit sarare tibra, ngan saeutik anu kagiliran nyaring, ngajaga mundar-mandir. Anu matak balad Banten bisa laluasa, arasup ka jero Dayeuh Pajajaran. Teu hese ngala bongohna anu keur jaga.

Barang musuh geus arasup, nu sarare buru-buru digeuingkeun, tapi lapur, memeh nyarekel pakarang, balad Banten geus nyarampak di dinya, terus bae disabetan ku balad Banten. Loba anu maot sapisan sapada harita. Anu salamet buru-buru lumpat, laporan ka Senapati Norogol.

Norogol enggal-enggal angkat ka karaton. Sang Prabu Siliwangi digugahkeun, diunjukanan langkung sae lolos ka palih wetan, margi nuju perang campuh palih kulon. Balad Pajajaran keur perang adu hareupan, ngalawan balad Banten anu bisa norobos kuta. Najan geus biasa tandang di medan perang, harita mah Sang Prabu sejen wirasat, ngaraos perlu ngadangu kana piunjuk Norogol.

Enggal bae Sang Prabu lolos sagarwa-putra, medal ti Dayeuh Pakuan lebet ka leuweung. Abdi-abdi anu seja belapati pada ngiring. Sapangeusi karaton teu sirikna dikerid peuti. Angkat rurusuhan ka palih wetan. Sababaraha perjurit pinilih nyarengan, ngaping ngajaring Sang Prabu sagarwa putra. Teras mapay-mapay leuweung geledegan, anu engke brasna ka Gunung Cibodas.

Bray beurang, burudul balad Banten daratang, jumlahna loba jeung pakarangna samakta. Der merangan jelema nu di luareun karaton. Saha-saha anu teu daek nganut Islam, geus ulah ngarepkeun hirup, jadi parab pakarang harita keneh. Antukna teu saeutik rahayat Pajajaran anu nganut Islam sapada harita. Tapi henteu saeutik deuih rahayat anu lolos. Pirang-pirang reana marubus ka leuweung. Aya anu milu jeung Sang Prabu Siliwangi, aya oge anu leumpang sakaparan-paran. Atuh Dayeuh Pajajaran teh ngadadak sepi. Di karaton geus parongpong. Ngan Senapati Norogol anu tanggoh, kawas nu hoyong uninga jajaten musuh.

Barang nepi Kean Santang ka karaton, rek mintonkeun kagagahan, jadi lempes, sabab ningali Norogol teu gedag bulu salambar, teu mundur satunjang beas, tanda perjurit lineuwih pilih tanding. Lain lawan-lawaneun perjurit atah-atah, lain sanghareupaneun memeh sasarap. Lain unghakeun.

Sanggeusna papayun-payun, Kean Santang uluk salam, pok Kean Santang nyaur kieu, "Ieu kaula gaduh iteuk bantun ti Mekah, bade ditancebkeun kana taneuh. Mangga ku sampean cabut. Upami kenging dicabut, tawis sampean ngagem agama suci, nanging upami teu kenging, sampean kedah nganut agama Islam."

Sanggeus iteuk ditancebkeun, Norogol ujub bakal kacabut, sabab kabedasanana pilih tanding. Tapi barang dicoba-coba, bet iteuk teh teu ongget-ongget acan. Sababaraha kali ditarik, eta iteuk kalah beuki jero nancebna. Tungtungna anjeunna waleh, rumaos kadeseh ku Kean Santang. Enggal amit ka Kean Santang, rek ngabujeng Sang Prabu Siliwangi, malah mandar kersaeun nganut Islam. Leumpang ngagedig gagancangan. Nyorang leuweung geledegan, mipir pasir ngeumbing jangkar. Jungkrang-jungkrang geus kasorang. Anu disungsi can kapanggih bae. Heuleut sawatara poe, Sang Prabu teh kasondong ku Norogol, nuju ngarereb di Gunung Cibodas. Sanggeus kitu, Norogol unjukan, nguningakeun peperangan, ti wiwitan nepi ka wekasanana, kitu deui hal jajaten Kean Santang. Norogol umajak ka Sang Prabu, supados kersa bganut Islam. Sang Prabu mindel sakedap, nembe sasauran ka garwa-putra katut pangiringna.

"Kami nyaho, yen di dunya taya nu langgeng. Marga kersa Nu Murba Wisesa, ayeuna agama Islam kudu nanjung. Lamun terus perang sadulur, matak ancur tutumpuran, matak ruksak matak rugi ka sarerea."

"Maraneh kabeh kumaha raga katineung, meunang milih agama nu mana bae. Ari kami neneda ka Mahadewa, nyuhunkeun asup ka Suralaya." Harita keneh Sang Prabu Siliwangi teh, les leungit tanpa lebih ilang tanpa karana. Leungit jirimna, anu sok disebut ngahiang tea.

Nu kantun bati melengek, nalangsa taya hinggana, prihatin taya tandingna. Sawareh indit ti dinya, laleumpang saparan-paran, nuturkeun indung suku. Sawareh cicing di dinya, ngarep-ngarep sugan panutan sumping deui. Tapi kawas geus kersa Maha Kawasa, anu ninggalkeun maneh di Gunung Cibodas, salin jinis kabeh jadi arca batu, sarta nepi ka ayeuna disarebut Arca Domas. Anu matak disebut Arca Domas, tiheula oge geus disebutkeun, lantaran reana eta arca, dalapan ratus.

Ari nu neruskeun mubus, lila-lila narepi ka Cibeo, ngahiji jeung urang Kanekes, nu asal ti Banten Kaler, waktu rajana nu katelah Pucuk Umun, kadeseh ku urang Islam. Urang Kanekes teh sok disebut urang Baduy. Padahal maranehna mah leuwih resepeun lamun disarebut urang Kanekes bae.

Sanggeus urang Pajajaran nganut Islam, Kean Santang terus ngislamkeun jelema-jelema, leumpang mapay-mapay pagunungan, terus nepi ka basisir kidul. Ngajarkeun Islam di sawatara tempat, lamun geus dianggap rengse, eta tempat ditinggalkeun, neangan deui tempat anyar, anu jelema-jelema anu can ngagem Islam.

Deukeut Teluk Cilauteureun, di basisir kidul Pameungpeuk, aya batu urut calik Kean Santang, waktu anjeunna jumeneng raja di Sancang, jujuluk Sang Prabu Gagak Lumayung. Ari pasareanana ayana di Kampung Godog, teu pati jauh ti Kota Garut. Sok loba anu jarah, utamana bulan Mulud. (*)

---

Budi Rahayu Tamsyah