Imah Panggung

Baheula mah saacanna mahabu imah gedong, rata-rata imah anu dijieun teh imah panggung. Imah anu di handapeunana aya kolongan. Salah sahiji pangbebeda antara imah gedong reujeung imah panggung nyaeta imah panggung mah miboga kolong, sedengkeun ari imah gedong mah henteu aya kolongan. Di handapeun palupuh atawa titincakan di jero imah, imah panggung mah aya lolongkrang anu kosong, kira-kira satuur nepikeun ka sacangkeng jangkungna. Sedengkeun imah gedong mah langsung wae titincakan di imahna teh make tehel anu diteundeun di luhureun taneuh.

Pikeun nahan imah supaya jangkung tina taneuh tempat nyieun imah, make batu anu disebut tatapakan. Di luhureun tatapan ditumbu ku tihang pikeun ngadegkeun imah. Salian ti aya kolong di handapeunana, imah panggung mah biasana sok dikidingan ku bilik tina anyaman awi atawa tina papan kai. Ari dadampar atawa titincakan di jero imah, anu dipake teh teu leupas tina papan kai atawa palupuh (leunjeuran awi anu dicacag supaya bisa diratakeun).

Di hareupeun imah atawa di hareupeun lawang panto osok aya tempat pikeun unggah jero imah anu disebut golodog. Samemeh asup ka jero imah, di rohangan hareup kadang osok aya rohangan tepas. (*)

---

Diropea ti https://ciburuan.wordpress.com/2013/02/03/imah-panggung/