Kagembang Ku Tahu Sumedang

Nyaritakeun dunya pariwisata, moal leupas tina urusan nu patula-patali jeung beuteung (baca: kadaharan). Meh saban wewengkon, pasti boga ciri has kadaharan istimewa sewang-sewangan. Contona mah upama nyabit-nyabit ngaran kadaharan dodol, tangtu bakal inget ka Garut. Puguh bae lain hartina euweuh dodol jieunan wewengkon sejen di luareun Garut. Loba pisan dodol-dodol nu sumebar di pasar, kalawan dijieunna lain di Garut. Tapi angger bae, anu kakoncara mah dodol Garut. Teu beda jeung tahu sumedang, pempek Palembang, Markisa Medan, galendo Ciamis, hui Cilembu, taleus Bogor, tauco Cianjur, jeung sajabana.

Rupaning kadaharan nu kakoncara teh, tetela bisa jadi sabangsaning iklan haratis pikeun ngawanohkeun hiji wewengkon. Malah teu saeutik, pangjurung laku para wisatawan mancanagara atawa wisatawan nusantara teh, awahing ku panasaran hayang ngasaan kadaharan-kadaharan nu kakoncara tea. Ku ayana kitu, puguh bae kadaharan teh minangka bagean tina potensi wisata anu kudu dipiara kalawan daria.

Sangkan henteu barieukeun teuing nataanana, kuring rek milih salah sahiji kadaharan anu kacida raketna jeung kuring. Sabada diteuleuman, diimeutan, tug nepi ka nyawang ka mangsa tukang, moal salah deui anu pangraketna teh: tahu. Aya hadena nulis dina basa Sunda, da moal kudu riweuh upama sakali mangsa rek nulis kecap: nyaho. Contona, kuring nyaho yen tahu teh kacida nikmatna. Upama ditulis ku basa Indonesia mah, tangtu bakal kieu: saya tahu bahwa tahu itu sangat nikmat.

Tahu. Ti mimiti inget kumelendang di alam dunya, kuring leuwih tiheula wawanohan jeung tahu, batan dodol, pempek, donat, coklat, jeung sajabana. Najan lembur teh di wewengkon Ciamis, tapi asa mindeng pisan indung kuring milih tahu keur deungeun sangu. Malah satungtung diurus keneh ku indung, alhamdulillah tacan kungsi sakali-kali acan ngalaman dibere galendo pikeun deungeun sangu.

Geus puguh deungeun sangu teh tahu, ana jig ka sakola, sup ka warung, kop deui kana gehu (toge jeung tahu, dibulen tarigu). Ti mimiti nyorang SD, SMP, SMA, nepi ka kuliah, ngalanggan jajanan teh pasti gehu. Iwal ti regana kahontal ku pesak, katambah deui letah kuring memang geus kacanduan ku gehu. Kajeun hot dog regana leuwih mahal, da kuring mah bakal kumetap keneh kana gehu. Sakalieun rada incah tina gehu teh, paling oge kana baso tahu, kupat tahu, atawa tahu gejrot. Angger-angger keneh tahu.

Ka dieunakeun sok kerung jeung rada hemeng, upama jajan gehu di kantin kampus. Ongkoh gehu, tapi kabuktianna mah euweuh togean. Aya kalana diganti ku bihun, wortel, emih, atawa ukur tahu dibulen ku tarigu. Padahal ari ngaranna mah angger we gehu. Untung pisan, kuring tara hayang protes. Babaturan kuring oge, jempling we dibobodo ku nu dagang teh. Rek naon bae baturna, satungtung aya tahuan mah, tetep bae gehu. Tapi duka teuing, upama sakali mangsa tahuna anu diganti atawa dieuweuhkeun mah. Bisa jadi, kuring moal daek nyebut gehu, lamun anu dibulen ku tarigu teh ukur toge, wortel, bihun, emih, jeung sajabana. Lebah dieu, kabuktian yen tahu leuwih nangtukeun kalumangsungan gehu, dibandingkeun jeung toge - najan toge disebut pangheulana: toge-tahu.

-=oOo=-

Malem Kemis, kuring ngahajakeun nganjang ka kampus Universitas Padjadjaran (Unpad), di Jatinangor, Sumedang. Saliwatan mah tangtu bakal loba nu cangcaya, da tujuan kuring henteu kurang henteu leuwih, iwal ti perkara tahu Sumedang.

Ecesna, kuring milu ngabandungan talk show, anu digelar rampak gawe antara Komunitas Gerbang Unpad, Huria Mahasiswa Antropologi, jeung Jaringan Kekerabatan Indonesia. Demi jejer anu dipadungdengkeun teh taya lian perkara tahu Sumedang, kalayan dijudulan "Andai dia Tahu". Anu kapeto jadi panyaturna aya tilu urang, nyaeta Hawe Setiawan, Setiaji, jeung Zarkasih, kalawan panumbu caturna Berby (mahasisiwi geulis, urang Bangka asana mah).

Dina eta riuangan, Hawe ngasongkeun panyawang ngeunaan tahu anu geus jadi identitas kasundaan, hususna Sumedang. Ceuk Hawe, di Sumedang perelu dipikiran sangkan diwangun arca tahu. Tahu Sumedang leuwih sukses ngawanohkeun Sumedang, sanajan dibandingkeun jeung Seksi Humas Pemkab Sumedang.

Kaitung panjang rupaning dadaran Hawe ngeunaan tahu teh. Tapi kuring ngajenghok, basa Zarkasih netelakeun yen kacang kadele anu dijieun tahu Sumedang teh mana horeng meunang ngimpor ti Jepang. Daek teu daek, kuring kudu percaya, da puguh Zarkasih mah sapopoena oge memang icikibung di dunya tahu. Sebut bae, Zarkasih teh salah sahiji pangusaha tahu Sumedang nu kaitung sukses.

Sajeroning ngasaan tahu Sumedang jieunan Zarkasih, pikiran jadi mancawura ka mana karep. Kaya kieu mah, palangsiang isuk jaganing geto, teu pamohalan lamun tahu Sumedang bakal kasilep ku tahu Jepang. Apan kiwari oge, bahan dasarna geus ti Jepang. Naha di lemah cai Pasundan nu kakoncara subur makmur, kalah meuli kacang kadele ti Jepang? Lebah dieu, urang perelu maluruh kalawan daria, naha lahan tatanen di Sumedang anu legana 1.521,95 km teh, geus beak kaleled ku jalan tol jeung real estate? Atawa memang di antara 997.000 urang Sumedang, geus mumul melak kacang kadele? Saliwatan, kuring sok rajeun nengetan para nonoman di pilemburan, anu leuwih reueus ngojeg batan bobolokot di kebon atawa di sawah.

-=oOo=-

Upama cek Hawe Setiawan tahu teh minangka salah sahiji identitas kasundaan, kuring oge memang boga pikiran ka dinya. Tapi aya deui tambahna. Kuring boga pamadegan, yen tahu Sumedang teh minangka hiji tanda raketna duduluran antara urang Sunda jeung Tionghoa. Pangna kitu, apan nu mimiti boga ideu nyieun tahu teh taya lian Ong Kino, urang Tionghoa nu ngumbara di Sumedang. Satuluyna disambung ku budakna, Ong Bung Keng, kira taun 1901 nepi ka 1993. Sajabana ti Ong Bung Keng, aya deui sawatara ngaran nu sarua ngamekarkeun usaha tahu, nyaeta Ong You Kim (Ukim), Ko Aniw, Ko Lento, Ko Jung Gong, jeung Babah Hek. Kilang kitu, ari anu populer mah tetep bae tahu Ong Bung Keng. Upama sakali mangsa ngaliwat ka Kota Sumedang, aya hadena nganjang ka Jalan 11 April Nomor 53 (baheula mah Jl. Tegal Kalong, Kelurahan Kota Kaler). Pasti manggihan hiji plang ngajeblag, anu unina "Tahu Bungkeng, Perintis Tahu Sumedang Sejak 1917".

Dumasar kana sababaraha sumber anu bisa dipercaya, kaasup ngayakeun wawancara langsung ka praktisi tahu, mimitina mah ngaran tahu teh nyaeta tou fu. Pangna jadi tahu, lantaran diluyukeun jeung letah urang Sunda. Tapi aya deui carita nu sumebar, yen gumelarna ngaran tahu teh raket patalina jeung Pangeran Soeria Atmadja, Bupati Sumedang taun 1928. Harita, Pangeran Soeria Atmadja kataji ku tou fu buatan Ong Bung Keng. "Ngeunah tahu teh," kitu saur Pangeran Soeria Atmadja. Anu antukna ti harita pisan, tou fu robah ngaran, jadi tahu.

Ku populerna tahu Sumedang, tangtu mawa berekah ka masarakat Sumedang. Kiwari, sanggeus umur Sumedang nincak 427 taun, loba home industry anu ngokolakeun tahu, boh warga Sumedang atawa Tionghoa. Kapasitas produksina nepi ka 8,2 ton saban taun, kalayan ngahasilkeun duit Rp. 11,5 miliar. Perkara tahu mah, memang tacan aya nu bisa ngungkulan Sumedang.

Sawatara waktu kaliwat, tahu Sumedang dicatet ku Musieum Rekor Indonesia (MURI), minangka tahu panjangna. Tahu Sumedang dicatet dina nomer rekor 1.506, sanggeus nyieun tahu anu panjangna 81 Meter, lebar 34 cm, jangkungna 5 cm, kalayan meakkeun 7,5 kintal kadele. Eta tahu nu ngageunjleungkeun teh dijieun ku 150 urang praktisi tahu ti 20 pausahaan tahu di Sumedang. Tahu Sumedang ngungkulan rekor samemehna dicangking ku Kabupaten Tegal (10/04/05), kalayan panjangna 43,5 Meter. Hartina, Sumedang geus sukses nyepeng rekor tahu pangpanjangna jeung rekor tahu pangbadagna, anu dicatet leuwih tiheula, taun 2004.

-=oOo=-

Nilik kasuksesan tahu Sumedang, tangtu bae aya sawatara catetan anu perelu dipikiran ku lembaga atawa instansi nu patali jeung widang pariwisata. Pangpangna mah kuring manghariwangkeun Hak Kekayaan Intelektual (HKI) direbut ku urang deungeun. Komo deui sanggeus kacang kadelena ngimpor ti Jepang.

Nyarita perkara pariwisata, tangtu nyarita kemasan. Pihak pamarentah kudu nyiar tarekah sangkan henteu kapiheulaan ku kaum kapitalis, dina raraga ngundakkeun harga jual tahu. Kamajuan jaman, teu bisa disingkahan deui, geus bisa ngarobah cara nyawang rupaning perkara, utamana anu nerekab ka para nonoman. Upama para nonoman ngarasa era atawa gengsi meuli tahu di warung leutik—komo ti tukang dagang asongan, tangtu bakal beda lamun sakali mangsa tahu teh disalin jinis siga kadaharan nu nyampak di McDonald.

Kareueus para nonoman kana tahu, perelu diundakkeun deui. Kawasna kagiatan sobat-sobat di Unpad bisa dijieun conto pikeun para nonoman sejen, sangkan bisa ngajenan kana kadaharan lemah cai sorangan. Sabisa-bisa mah, para nonoman teh sing bisa identik jeung tahu Sumedang, lain jeung dunkin donuts.

Lebah dieu, merelukeun rampak gawe ti rupaning unsur pamarentah jeung masarakat. Patani mah tos dieceskeun tugasna, mikiran pepelakan kadele, sangkan henteu kudu ngimpor ti Jepang. Lembaga kapariwisataan oge, atos eces. Atuh komo deui direktorat jendral HKI. Tug nepi ka lembaga kasehatan, teu meunang cicingeun. Lembaga kasehatan ulah bosen ngadadarkeun pentingna nuang tahu. Apan tahu teh mibanda protein nu kacida gedena, malah satata jeung kualitas protein hewani. Sakumaha anu bisa ditengetan dina NPU (net protein utility), yen sabagean loba protein tahu bisa mangpaat pikeun kabutuhan awak, kurang-leuwih 65 persen.

-=oOo=-

Kuring moal ngarasa era, upama aya nu nyebut "generasi tahu". Memang bener, kuring mah loba ngadahar tahu, sajabana ti sangu. Kacida ngahaturkeun nuhun ka para praktisi tahu, anu teu weleh satia nyadiakeun kadaharan murah tur ngandung gizi. Tukang nyieun tahu, salah sahiji nu milu ngarealisasikeun Undang-Undang Nomor 7 Tahun 1996, anu di antarana netelakeun yen kualitas pangan anu dikonsumsi teh kudu nyumponan sababaraha kriteria. Di antarana aman, ngandung gizi, jeung bisa kahontal regana ku masarakat. (*)

---

Dhipa Galuh Purba