Si Kabayan Ngimpi

Si Kabayan tara biasana datang ka imah mitohana.

"Kabayan aya naon maneh sisinarieun datang ka dieu?" Si Abah nanya bari semu heran.

"Ah ameng bae atuh Abah. Naha ulah kitu?"

"His, maenya minantu datang make teu meunang. Lain biasana maneh mah datang teh lamun aya kahayang jeung aya kabutuh, lin?"

"Nya saleresna mah Abah abdi kadieu teh bade tumaros, eh naroskeun. Kieu Bah, abdi teh kamari ngimpi ngapung. Naha bakal aya naoh nya?"

"Ke...ke...ke...! Ngapungna tarik atawa lalaunan?" Si Abah nanya bari kerung.

"Nya lalaunan asana mah, Bah."

"Sakumaha tah ngapungna?"

"Aya meuren sasuhunan imah."

"Wah...wah...sukur Kabayan, jigana mah maneh teh bakal kapilih jadi erte deuleu."

"Ah maenya, Bah?" Si Kabayan surungah-serengeh.

"Bener deuleu! Biasana lamun arek naek pangkat teh pan ka luhur."

"Tapi Bah, ti sasuhunan teh terus naek deui, kira-kira satangkal kalapa."

"Wah...wah..., bakal jadi lurah euy."

"Naek deui Bah, asana teh saluhureun pasir," Si Kabayan bari ngacungkeun ramona ka luhur.

"Beu...beu..., bakal jadi wadana, Kabayan," Si Abah bari asa teu percaya.

"Leuwih luhur deui, Bah."

"Bakal jadi gubernur."

"Luhur deui, Bah."

Si Abah akhirna mah ngageroan Si Embi jeung Si Iteung, budakna nu jadi pamajikan Si Kabayan. "Embi, Iteung, geuning geus tereh euy waktuna urang di tinggalkeun ku Si Kabayan."

"Naha aya naon kitu, Bah?" Si Iteung mani ngarenjag

"Kabayan, maneh bener eta teh ngimpi ngapung nu luhur kitu?"

"Enya bener Bah, mani luhuuur teh," Si Kabayan bari nyipta-nyipta bakal jadi pejabat nu beunghar.

"Emh...Iteung, geura usaha deui neangan salaki, nya!"

"Kela...kela, Bah!" Si Kabayan reuwas bari morongos ka Si Abah. "Kuring masih keneh aya di dieu bari jeung teu aya masalah jeung Si Iteung. Naha Abah nitah Si Iteung neangan salaki deui? Teu narima abdi mah, Bah!"

"Har..., apan maneh ngimpi ngapung nu luhur. Ieuh Kabayan, lamun ngimpi ngapungna luhur teh pasti bakal tereh maot deuleu."

"Ah da teu luhur-luhur teuing atuh, Bah."

"Apan tadi saluhureun pasir."

"Heunteu, Bah. Rada handap saeutik!" (*)