Tutug Oncom jeung Pencok Hiris
Bubuhan kuring mah urang lembur, jadi sasarap ge teu jiga barudak di kota ayeuna. Atuh sakola oge sakitu ngangkleung jauh bari jeung badarat, taya tutumpakan, kajaba balikna sakapeung sok kaparengkeun tarumpak roda sapi.
Tutug Oncom
Rebun-rebun keneh Ema geus namplokkeun sangu kana dulang, diakeul. Tah, mangsana sangu diakeul, tangtu nya panas nya ngebul. Katitenan sok dicampuran oncom beuleum beunang ngarendos. Sambarana oge teu bangga, ukur uyah, cikur, bawang beureum, jeung cengek sababaraha guluntung. Direndos dina coet batu rada gede disakaliguskeun jeung beuleum oncom tea. Saterusna mah nya digalokeun kana sangu dina dulang atawa dina boboko. Tah, kaolahan jiga kitu teh disebutna tutug oncom.
Mun kira aya keneh waktu, nya sasarap heula di imah. Tapi, mun rada elat sarta bakal kabeurangan, tutug oncom teh sok dibungkus we ku daun cau, didahar bari leumpang di jalan. Diambeng tea ngaranna teh. Ngan rokaya ninggang leumpang lebah galengan, tampolana sok tigedebut labuh bubuhan tara pati nenjo tincakeun.
Pencok Hiris
Aya deui kaolahan anu ngeunah didahar tengah poe teh. Atuh direndonkeun jeung sangu poe oge teu masalah deuih, nyaeta pencok hiris.
Nyieunna teu hese deuih. Hiris ge di lembur mah teu saeutik anu ngahaja melak, kaasup di pipir imah kuring. Bubuhan kasebut budak lembur, tara ieuh suda kana barang dahar, sakur nu dijagragkeun ku Ema sok dideluk we da puguh ngeunah.
Cara nyieunna, teu hese, hiris direndos jeung sambara kayaning uyah, tasasi, asem, cengek, cikur, jeung gula. Meh sarua jeung pencok kacang panjang, jadi sing karasa haneut cikurna.
Ari ngadaharna, tangtu bae dicocol atawa langsung digalokeun jeung sangu. Puguh we ngeunah jeung seger. (*)
Asep Ruhimat
Reviewed by Rupa Sundapura
on
21.57
Rating:
