Si Kabayan Ngalamun

Mitoha Si Kabayan keuheuleun pisan sabab Si Kabayan sok ngalamun wae. Digawe bari ngalamun, dahar bari ngalamun, mandi bari ngalamun. Komo deui di pacilingan mah mani beuki anteng ngalamunna teh.

Sakali mangsa Si Kabayan manggih endog meri, ngagoler dina jarami di sawah mitohana. Si Kabayan atoheun pisan. Gancang endog meri teh dibawa ka imah deuk ditembongkeun ka pamajikanana.

"Sukur atuh, ka dieu urang kulub, keur Si Encid," ceuk pamajikan Si Kabayan.

"Montong!" tembal Si Kabayan. "Anggur mah rek dipegarkeun, dipilukeun kana hayam bapa nu ayeuna keur nyileungleum," tembal Si Kabayan. Ti dinya endog teh diteundeun hareupeunana bari ditaksir.

"Kumaha Akang wae atuh, ngan ayeuna mihape budak, uing rek ngisikan heula," ceuk pamajikan Si Kabayan bari ngajingjing boboko rek ngisikan di pancuran.

Si Kabayan cingogo diharudum sarung bari nyanghareupan endog. Budak mah diantep we sina kokorondangan dina palupuh, sedeng manehna anteng ngalamun deui. Kieu ngalamunna teh.

"Endog teh pasti megar, heug bikang, engke pasti ngendog deui. Upamana wae ngendogna sapuluh terus dipegarkeun deui, megar deui jadi boga sabelas meri tah, pek kabeh ngendog deui. Mun endogna sapuluh, jadi boga 110 endog, beuki lila meri teh beuki loba. Endogna oge pasti beuki loba. Aing rek jadi bandar endog. Endog dijualan, aing jadi loba duit. Duitna di beulikeun kana domba bikang. Dombaa baranahan nepi ka aing loba domba. Dombana dijual ka pasar, terus dibeulikeun munding sarakit, munding oge baranahan, aing bakal loba munding. Adeuh...huhuy...munding aing mani rendang di sawah."

Keur anteng kitu, geprak wae endog Si Kabayan teh dibaledog ku pamajikanana tepi ka peupeus. Sihoreng endog teh kacingcalang.

"Kabayan, cing atuh kana ngalamun teh mani kamalinaan. Tuh tenjo Si Encid mani buncunur sirahna tidagor kana tihang, da diantep wae."

Si Kabayan kalahka molotot ka pamajikannana. "Kunaon munding aing diruksak ku maneh? Rasakeun ieu paneunggeul!" ceuk Si Kabayan bari ngamang-ngamang sapu.

Pamajikan Si Kabayan sieuneun, tuluy lumpat ka imah kolotna bari ngais budak. Si Kabayan ngudag bari angger ngamang-ngmang sapu.

Mitohana norojol ti imah, tuluy nanya ka Si Kabayan, "Kunaon maneh teh Kabayan kawas nu teu eling?"

"Bongan munding uing diruksak ku Si Iteung."

"Na timana maneh boga munding?"

"Pan tina ngajual ladang endog asal na mah," tembal Si Kabayan.

"Bohong ketang, ngalamun wungkul, barina ge endogna kacingcalang," Si Iteung nambalang.

"Euh kitu...," ceuk mitoha Si Kabayan. "Paingan atuh kebon aing mani ledug diranjah munding, ari maneh boga munding mah. Hayoh gantian! Mun teu di gantian dilaporkeun ka pulisi!"

"Ampun, Pa...!" ceuk Si Kabayan. "Abdi mah teu gaduh bulu-buluna acan munding teh, eta mah lalamunan. Hayu Iteung urang balik!" Si Kabayan ngajak balik ka pamajikanana.

Mitohana gogodeg.

Isukna Si Kabayan dititah ngala kalapa ku mitohana. Tina sapuluh kalapa, Si Kabayan bakal diburuhan kalapa sahulu. Si Kabayan atoheun pisan, terekel wae naek kana tangkal kalapa rek ngala kalapa nu kolot.

Barang nepi ka luhur tuluy diuk sidengdang dina sela-sela dahan kalapa. teng wae ngalamun.

"Buruh ngala kalapa rek dijual, ladangna dibeulikeun kana endog hayam, tuluy di pegarkeun, pek di ingu. Hayamna beuki loba, endogna ge rea deuih. Endog dijual ka pasar, aing jadi bandar endog. Tina ladang endog aing rek meuli domba, domba oge ngareaan, aing jadi bandar domba. Tina bati domba aing rek meuli munding, eh ketang moal, moal meuli munding bisi ngaruksak sawah mitoha. Ah rek meuli kuda wae, kudana kuda balap...kuda Ustrali nu jangkung tea, aing jokina. Plok...plok..., kudana dilumpatkeun." Bari ngalamun kitu teh Si Kabayan reurendeukan dina palupuh kalapa.

"Kuda teh beuki tarik lumpatna. Horseeehhh...kotoplak...kotoplak..." Si Kabayan beuki motah wae diukna dina palapah kalapa, nepi ka palapah teh pepelenoyan. Kulantaran motah teuing, palapah teh potong. Si Kabayan ngoleang kabawa ku palapah kalapa, gebrus wae ka balong. Untungna kalapa teh sisi balong. Si Kabayan pipina bared keuna ku regang awi. Sukuna tipalitek. Untung teu maot oge.

Ti harita Si Kabayan kapokkeun deui ngalamun dina tangkal kalapa. (*)