Entog Teu Mulang

Jam tilu sore...

"Si Ahmad geus ngaliwat, manehna?" cek Mang Oji ka pamajikanana.

"Bieu mah mawa carangka ka kidulkeun, tapi can katembong balik deui," walon Bi Rukim.

"Kumaha papakeanana?"

"Dicalana komprang, make dudukuy, ngajingjing arit."

"Henteu make kopeah?"

"Henteu. Ari kitu aya naon, teu karuh-karuh nanyakeun Si Ahmad?"

"Biasana wayah kieu teh geus indit ka masigit. Pohoeun kitu?"

"Atuda kakara oge jam tilu."

"Baruk? Kakara jam tilu?" Mang Oji ngorejat. "Ari sugan teh geus satengah genep. Naha waktu teh, mani asa leuir-leuir teuing?"

"Da Akang mah, puasa teh ngan ngareretan bae jam. Bangbrangkeun ka dituh, ngarah henteu ngabarungsinang!"

"Lain ngabarungsinang. Eta, nanyakeun Si Ahmad soteh, hayang geura-geura ngadenge manehna adan. Mani asa ngeunah kana ceulina teh."

"Puguh bae, da wedalan pasantren Bojong. Ngajina oge alus, kungsi jadi juara kacamatan apan."

Mang Oji ngahuleng, bari ngadayagdag kana korsi. Sukuna nyampay dina meja. Ragamang kana saku, ngusiwel ngaluarkeun bungkusan.

"Siga rek udud, manehna?"

"Gagabah teuing! Rek dipindahkeun kana meja ieu mah, titatadi disakuan bae!"

"Bako timana kitu?"

"Pamere Si Darmita, tadi isuk-isuk. Bako kawak bejana mah, da diasaan teh mani seungit melenghir."

"Baruk diasaan ongkoh?"

"Enya, tadi ti peuting, balik tarawehan!"

"Lain isuk-isuk diberena oge?"

"Na talete teuing atuh!"

Ngahuleng deui. Panonna neuteup ka buruan, ngaliwatan panto nu ngageblang. Katempo budak leutik keur ngadahar cau. Mang Oji neureuy ciduh.

"Gogoda..." gerendengna. Ret deui kana jam. Kakara satengah opat. Dayagdag deui. Huleng deui. Naha atuh, ari korejat teh siga manggih kareuwas. Berengbeng ka dapur, leumpangna mani blag-blig-blug.

"Aya naon?" cek pamajikanana nu keur campego hareupeun hawu bari ngasur-ngasur suluh.

"Ari daging entog geus dijait?"

"Enggeus. Tuh, dina pago, diwadahan ayakan."

"Geus diasakan?"

"Acan, da beurang keneh."

"Kade bisi kapopohokeun."

"Moal, apan kami ge hayang ngasaan."

"Heueuh, sakali-kalieun mah buka puasa teh ku nu ngarareunah, bangsaning dadagingan, ulah asin deui-asin deui. Kumaha ari keur tajil, aya keneh candil, lin?"

"Apan ku Akang dibeakkeun basa balik tarawehan."

"Ku naon atuh?"

"Apan boga keneh cau raja cere."

"Aeh, heueuh. Har..., geuning daging entog teh kari sapuluh keureut, naha ka mana sawareh deui?"

"Taktage, keur keuheul kami teh. Ku Akang dipoe di luhur kandang domba, lin?"

"Enya, ari kitu?"

"Si Rengge, hayam Si Kosim, gagarapakan di luhur kenteng. Teuing dikumaha da poe daging teh ujug-ujug murag. Jol Si Bopih, anjing Si Kosim keneh. Puguh bae asa dibere hancengan."

"Jadi ieu teh sesa Si Bopih?" Mang Oji mani molotot.

"Lain eta mah, anu nyesa keneh di luhur kandang. Ari anu murag mah lapur we, geuleuh rek dicokot deui oge."

"Na ari Si Kosim, gableg ingon-ingon diabur wae. Diontrog siah ku aing!" Mang Oji mani kekerot.

"Ulah, Kang. Ayeuna teh bulan puasa, naon kasebutna mun parea-rea omong teh."

"Keuheul atuda."

"Keun we atuh, da henteu peren kabeh. Lain, ari eta teh daging entog ti mana?"

"Nya entog urang atuh!" Mang Oji muncereng.

"Ke, ari urang boga sabaraha hiji entog teh?"

"Na mani teu apal kana ingon-ingon. Ti baheula oge urang mah teu kungsi riab ku entog. Si Geyot apan anu dipeuncit teh, bonganna nguyung bae. Tumpur we meureun entog teh Si Geyot geus euweuh mah."

"Ke, ke, lain Si Geyot mah keur dikurungan di pipir?"

"Geus dipeuncit cek kami oge."

"Aya keneh. Jung ilikan di pipir!"

Mang Oji turun ka buruan. Enya bae entog teh keur dikurungan ku carangka. Gidig deui ka dapur bari kerang-kerung.

"Enya geuning..."

"Heueuh, puguh kaget kami oge."

"Ari nu dipeuncit entog saha atuh, nya. Ah, barina oge make jeung geruh atuh."

"Jadi kumaha atuh, Kang?"

"Asakan we. Rejeki urang eta mah!"

-=oOo=-

Bada magrib...

Mang Oji geus ngampar samak di dapur. Sangu haneut diwadahan ku boboko, geus ngawagir hareupeunana. Kitu deui deungeunna mani ngabarak, kaasup daging entog tea.

"Manehna!" pokna, ngageroan pamajikanana. "Ngen atuh urang dahar!"

"Moal solat heula?"

"Engke deui, geus dahar. Cek ajengan oge tara husu ari solat memeh dahar teh. Komo apan ayeuna mah aya daging entog."

Kakara oge rek ngarongkong piring, kaburu aya nu pupuntenan. Cukil ditunda deui. Kojengkang mukakeun panto.

"Mang Oji aya?" cek nu di luar.

"Geuning ilaing, Kosim. Yap atuh ka jero!"

Kosim unggah, bus ka dapur, diuk hareupeun dahareun nu ngabarak.

"Euleuh, geuning bade taruang. Ngaganggu meureun?"

"Ah, henteu. Sakalian we atuh, geus buka acan?"

"Enggeus ari buka mah, ngan kakara ngadahar candil."

"Enya, sakalian we di dieu."

"Asa ararisin ieu teh."

"Naha make jeung era, kawas di imah saha bae!"

"Ditampi atuh."

"Enya, sok!"

Kalahka kapiheulaan ku Si Kosim dahar teh. Mang Oji bati medenghelna, da puguh satadina mah ukur ajak jawa. Tapi teu bisa kumaha, moal enya ari dicarek deui mah. Buru-buru manehna oge nyokot piring, rek maturan semah. Na atuh, teu ku hanteuna teh, Si Udin, budakna, nyampeurkeun ka dapur. Leuheung lamun saukur nyampeurkeun, da ieu mah bari barangtitah ongkoh.

"Pa, pangnyieunkeun kolecer!" pokna.

"Ke deui, Bapa rek dahar heula!"

"Ulah ngaganggu Sujang, Bapa maneh rek buka!" cek Bi Rukim.

"Hayang ayeuna!"

"Piraku wayah kieu hayang kolecer, rek di mana nanggerkeunana. Batur mah geus indit tarawehan!"

"Hayang ayeuna!" Si Udin kalahka lewa-lewe.

"Isuk deui!"

Abong budak, dihulag teh kalahka ceurik gogoleran dina palupuh.

"Jung atuh nyokot awi jeung peso rautna!" sora Mang Oji mani teugeug. Ari Si Kosim, henteu ngareret ka sisi ka gigir, jongjon bae dahar mani bangun ponyo naker, disaksian ku Mang Oji bari ngarautan awi. Bi Rukim tibang ngegel curuk di lawang ka imah.

"Puguh kieu, Mang!" cek Si Kosim bari ngosom. "Kuring teh rek nginjeum carangka, keur mawa jagong ti palawija!"

"Pira carangka atuh, cokot bae di pipir!"

"Enya. Bisi Emang hayang ngasaan jagong, isukan dikirim."

"Nyimpangkeun we tilu siki mah. Heg nu ngora keneh, hayang ngasaan beuleumna!"

"Naha atuh abong teuing, mani ngan menta tilu. Lain Mang, ari ieu daging naon, asa ngeunah-ngeunah teuing?"

"Daging en..."

"Hayam!" kaburu ditempas ku Bi Rukim.

"Paingan atuh, mani pedo. Cakial, Mang."

"Enya sugan."

"Sok atuh, asa teu puguh dahar sorangan mah!"

"Ke ieu kagok, keur nyieun kolecer."

"Hayam nu mana ieu teh, Mang?"

"Euh... nu mana, manehna?" bari ngareret ka Bi Rukim.

"Si Tigug!"

"Paingan atuh, dagingna mani pungkil. Nyaritakeun ingon-ingon, asa kaingetan, kuring teh keur leungit entog!"

"Baruk?"

"Isuk-isuk mah aya, malah kaburu keneh diparaban. Terus bae ngider teuing ka mana, nepi ka bieu can mulang keneh!"

"Lain Jang Kosim mah teu boga entog!"

"Puguh kieu lalakonna mah. Mangkukna, kuring teh tatamba ka Ciseureuh, nepungan Bah Wirya, dukun wacis tea. Apal meureun Emang oge, kuring boga kasakit eungap. Cek Bah Wirya, piubaranana ku daging entog. Tapi, kudu meunang ngajampean heula, ngarah kaala barokahna. Kabeneran Bah Dukun teh ngingu entog. Nya ngaririhan hiji."

"Kutan kitu?"

"Enya. Cek Bah Wirya, eta entog dipeuncitna kudu poe Jumaah, jam opat burit. Didaharna dina waktu buka puasa. Nya ayeuna meureun waktu nu mustari teh. Tapi entogna bet leungit."

"Karunya teuing."

"Kapaksa we meureun isuk mah, sakalian ngala jagong, rek nepungan deui Bah Wirya. Bisi matak kumaha onam, entog meunang ngajampean kalahka leungit. Aeh, kamalinaan geuning dahar teh, mani areungap kieu. Nuhun, Mang!"

"Ulah asa-asa Jang, sok we hayang keneh mah!"

"Wareg, ah. Bade permios bae. Di mana carangka teh?"

"Cokot bae di pipir!"

Si Kosim ngaleos. Mang Oji ukur bati hanjeluna, basa ngareret kana piring, daging entog geus beresih. Nu nyesa teh ukur sambarana.

"Na aya semah kasebelan teuing, mani teu ngagehan nu boga imah!" Mang Oji kutuk-gendeng.

"Beak kitu? Euleuh, enya geuning..."

"Teu boga kaera jelema kitu teh!"

"Teu nyaho kasopanan nya, Kang!"

"Puguh bae. Abong teu apal tatakrama Si Eta mah!"

"Ke, boa nu dipeuncit ku Akang teh entog Si Kosim. Da di lembur urang mah euweuh nu bogaeun deui entog. Mun enya teh, keun bae da didahar ku nu bogana. Atuh basa murag tina kenteng, apan dihakanna teh ku anjing Si Kosim keneh!"

"Kateuing atuh!"

-=oOo=-

Isukna, pabuburit...

"Ari entog geus diampihkeun?" cek Mang Oji.

"Eta sugan, apan Akang anu ngencarkeunana oge."

"Hih, boro-boro nguruskeun entog kami mah. Sakieu keur rariweuh teh."

"Teuing atuh, da acan katembong."

"Kamana ulinna, nya, wayah kieu tacan mulang."

"Boa diampihkeun ku Si Sujang?"

"Iraha teuing budak aya kahideng. Sakitu pagawean ukur ngablu teh. Ari engke dahar jeung naon?"

"Aya pais burayak jeung angeun waluh."

"Asa bosen ngadengena oge. Iraha beakna pais burayak teh?"

"Teuing atuh, bet nanyakeun ka kami."

Keur guntreng kitu kurunyung Si Omod, budak Kosim.

"Bade nyanggakeun jagong!" pokna, bari neundeun karung hareupeun Mang Oji.

"Nuhun, Jang. Wayah kumaha bapa maneh balik ti kebon?"

"Tadi, tengah dinten. Saur pun Bapa, engke cenah bada magrib kedah ka ditu, urang tuang sasarengan."

"Dahar babarengan?" Mang Oji kerung.

"Muhun!"

"Ke, asa teu gugur teu angin ieu teh, diondang dahar ku Si Kosim!" Mang Oji ngareret ka pamajikanana. "Aya acara naon, Jang?"

"Duka atuh, ngan pun biang nuju masak kanggo tuang sasarengan tea."

"Masak naon?"

"Saur pun bapa mah..., daging entog!" (*)

---

Dadan Sutisna