Sasakala Lalay
Jaman baheula di tutugan Gunung Galunggung aya padepokan katelah padepokan Wastukancana. Anu ngaheuyeuk eta padepokan jujulukna Resi Anggana Manik. Anjeunna hiji resi anu kakoncara luhung elmu jembar panalar. Kalangenan Eyang Resi ti waktos anom keneh resep ngempelkeun batu ali.
Rupi-rupi batu permata parantos kagungan, kayaning jamrut, angkik, merah delima sareng sajabina parantos sarajut ageung seueurna. Tapi aya keneh anu jadi kapansaran Eyang Resi, aya keneh nu dipikapalayna nyaeta batu wulung. Para catrik diutus ka tiap madhab, nguriling ka tepis wiring, ngambah ka pilemburan sugan aya sumebar beja di mana batu wulung.
Kocap aya selenting bawaning angin, beja nu pabeja-beja, cenah dina gawir cadas nu gurawes tonggoheun lengkob Kupuk Cangehgar, mun isuk-isuk atawa sore sok katembong aya cahaya koneng semu beureum nyengcelak.
Catrik Ki Tirtaguna gancang piunjuk wawartos ka Eyang Resi ngeunaan eta beja. Atuh Eyang Resi kacida ngaraos bingahna. Saterusna Eyang Resi kalayan diiring ku paracatrik, jengkar ngajugjug tempat anu ceuk beja tea. Anjog ka tempat anu dijugjug teh wanci pasosore. Enya bae sakumaha anu ceuk beja tea teh nyata.
Tapi rek kumaha bisana nyandak barang anu dimaksud, pisakumahaeun bakal bisa disorang, lantaran pernahna dina sela-sela batu gawir cadas anu nangtawing, pamohalan bisa ditaekan. Eyang Resi lajeng calik sidakep, meleng neneda kenging ilapat. Saterusna Eyang Resi lajeng gugupay, telenden aya beurit nyampeurkeun. Ku Eyang Resi eta beurit teh dicaritaan sangkan mangnyokotkeun itu barang nu cahayaan koneng semu beureum di jero sela-sela batu dina gawir cadas. Pikeun beurit teu heseeun, babarieun pisan nerekel naekan gawir teh. Atuh sadepan oge geus turun deui bari ngegel batu wulung anu herang ngempur koneng sari beureum. Eyang Resi tumanya ka beurit, sabada ngalaksanakeun piwarangna hayang naon engke beurit baris dilaksanakeun. Sakadang beurit nyarita yen manehna hayang bisa hiber. Mungguhing Eyang Resi anu linuhung elmu, harita keneh anjeunna ngaluarkeun sulampe tina saku jubahna, teras dirungkupkeun kana awak sakadang beurit. Dihin pinasti dadak sakala, sulampe jadi sakulit sadaging kana awak sakadang beurit ngajadi jangjang sarta terus bisa hiber.
Sakadang beurit laksana sakahayang bisa hiber, kitu deui pamaksudan Eyang Resi tinekanan. Ti harita eta sato jajadian teh katelahna lalay. (*)
Kumpulan Dongeng Sasatoan
Reviewed by Rupa Sundapura
on
21.35
Rating:
