Lauk Cucuk

Aya hiji lalaki, menak pilemburan keur niis di hiji sasaungan anu aya di sawahna. Kebeneran kawenehan mireungeuh widadari keur marandi di walungan anu teu jauh ti paniisan menak tea. Eta menak teh ngeteyep mapay nu bala, intip-intipan rek pangangguran ngiwat pakean salah saurang widadari anu keur jarongjon mandi. Gunyunyut pakean nu numpuk di sisi walungan teh dicokot sapangadeg, dikelek disumputkeun buni pisan. Atuh dina waktuna arenggeus mandi, salah saurang widadari teu bisa make baju, kapoosan bajuna euweuh. Lagu baturna baralik ka tempat asalna deui di kahiangan, manehna mah ngan bati ngaheruk mikiran kumaha nya pilampaheun moal enya rek bubulucunan. Hing...hing ceurik lantaran ditaringgalkeun ku babaturanana.

Keteyep disampeurkeun deui ku menak. Bari aluman-alimen era anu taya papadana, Neng Putri disampeurkeun ku nu lain muhrimna teh, kapaksa kakayidan pasini jangji pasang subaya nyumponan kahayang menak, daek dipirabi bari dumuk di pilemburan, sawios digentos anggoan oge cenah. Sareng deui, mangga akang mirabi abdi asal kedah tiasa ngestokeun kahoyong abdi deuih. Akang ulah rek gana-gana pipilueun kana urusan sareng padamelan istri.

Geus kakayidan ti dua pihakanana kitu mah, eta menak jeung nyi putri teh bumen-bumen di pilemburan, lembur menak tea.

Dina hiji mangsa menak teh teu nohonan jangjina. Nyi Putri bendu. Bus ka jero leuit, tadina mah pundung bari rek nyumput, ngan sabot ngaguar-guar tumpukan pare di hiji juru leuit panyumputanana, tamba kesel ngadon nyirekem, ari gorehel teh papakean aslina anu bareto disumputkeun ku nu cunihin teh kapanggih ti dinya, henteu kahaja. Teu talangke rap disalin, biur ngapung ka kahiangan.

Atuh menak teh saban wanci gawena ngahurungbalung. Wuyung liwung migandrung nu pundung, sedih kingkin mikiran anu ngaleungit ngahiang teu terang raratanana.

Pikeun ubar kakeueung, tamba ngalangeu ngadaweung ngabangbrang tineung, menak seja niiskeun pikir, ngababakan nyieun eempangan leutik di tengah sawah deukeut tempat bareto putri marandi. Susuganan nya bisa kaeupanan kabita ku empang anyar anu caina canembrang herang pikeun siram di dinya. Tapi lawas, didagoan, dipapantes bakal jol atawa ngurunyung ngadon siram teh saukur bati dina lamunan ukur dina gambar ciciptan wungkul, nu puguh mah ngan bati cau ambon dikorangan, cau lampe mah ka pipir-pipir. Lalaki ambon sorangan, awewe mah teu mikir-mikir.

Unggal waktu sok ngahaja urang lembur loba nu disauran pikeun ngabaturan ruang-riung di saung babakan anyar. Ngahaja curak-curak barangtuang balakecrakan malar nu sok malaweung ngadaweung ngalangeu jarauh panineungan tiasa kabangbrangkeun sakeudeung-keudeungeun. Rengse barangdahar, menak teh kageterkeun angen kaoyagkeun pikiran make hayang ngalungkeun cucuk lauk anu nyesa ngajepat dina piring urut alasna. Lung dialungkeun ka tengah empang anyar jieunanana tea. Dumadakan eta cucuk lauk anu limit teh bet jadi dagingan deui, aya sisitan, aya huluan aya buntutan sakumaha wajudna lauk cai. Ngan aya tambahna tina lauk anu sejenna, bet rimbil ku cucuk, sajaba sisit jeung cecepetna teh. Atuh rada aheng, barang katenjo mimiti ngadudibeg tuluy sosoloyongan dina balong. Kokocepatan dina empang antukna jadi tontonan balarea. Ibur salelembur, ear sapadesaan, aya lauk aheng. Rimbil ku cucuk dina awakna. Karuhan we jadi tontonan nu matak panasaran hayang nyaho di kieuna ulah ngan sakadar beja. Brul merul nu ngajugjug ti jarauhna, daratang nu ti anggangna, jadi ngabeungharkeun menak tea. Anu datang teh dikarcis. (*)

---

Akub Sumarna