Burjo

Mun pirajeunan mikiran pasualan ekonomi kiwari, baris kagambar potret pajurawet. Boro-boro mikiran ekonomi bangsa atawa dunya ketang, noong ekonomi kulawarga atawa sadirieun oge ayakalana poekeun. Ku kituna urang nyieun rupa-rupa tarekah pikeun neangan solusi.

Ngan masalah perekonomian sektor formal mah angger bae ngagejret. Balukarna, loba warga nu boga inisiatif mekarkeun sektor informal. Rereana tukang dagang dadakan (komo mun rek Agustusan, mieling milangkalana kabupaten/kota, atawa mun nyanghareupan Lebaran), mahabuna kaki lima, atawa dongdangan asup ka pilemburan.

Eta teh, cenah, balukar tina krisis ekonomi di sektor formal. Nurutkeun sosiolog Dr. Tadjudin Noor Effendi, tumuwuhna sektor informal teh lantaran loba karyawan di sektor formal nu di-PHK. Ku kituna, pasar tanaga kerja di Indonesia jadi keuna panyakit "informalisasi". Ku kituna sektor informal, nu dijadikeun seler pangupa jiwa, geus boga brand husus.

Apan urang kacida wanohna kana sate Madura, pecel lele ti Lamongan, roti bakar Bandung (karesep barudak nu mangkal hareupeun rumah sakit), sega/sangu jamblang (murah mareh), warung angkringan ti Klaten.

"Muncunghulna sektor informal," ceuk Dr. Irwan Abdullah, staf peneliti Pusat Studi Kependudukan UGM, "ngait pisan jeung lunturna kakawasaan agraris nu aya di padesaan." Nu disebut kakawasaan agraris mangrupa hiji wangun tata-aturan nu kudu "diagem" ku sakumna warga masarakat, saupama manehna merenahkeun sektor pertanian jadi sumber pangupa jiwa nu utama. Masih inget waktu taun 2004, kuring kungsi kadatangan lima mahasiswa Universitas Gajah Mada (UGM), Yogyakarta. Maksudna, maranehna rek maluruh beja ka Kuningan, sabab di Kota Gudeg euyeub pisan ku tukang bubur kacang hejo (burjo). Maranehna rek ngayakeun panalungtikan ngeunaan sektor informal, sabab dumasar kana hasil survey, ieu widang garapan teh mangrupa sektor alternatif pikeun pangupa jiwa.

Nurutkeun data awal, di Kuningan aya sababaraha desa di Kacamatan Garawangi (ayeuna geus dimekarkeun jadi Kacamatan Sindangagung), loba warga nu usaha kana bubur kacang. Sanajan, dina emprona mah, dipasieup oge ku rupa-rupa kadaharan jeung inuman sejen kayaning mie instan, kopisachet, susu sachet, inuman berkarbonasi, inuman berserat, sari buah, inuman suplemen, inuman penyegar, susu, jeung roko. Neng Anna Mariana, minangka pupuhu tim investigasi, netelakeun yen ampir di unggal jurukota, jlug-jleg - najan henteu permanen oge - ku warung burjo.

Barang ditalek, kabeh oge nyebutkeun yen maranehna teh pituin ti Kuningan. Memang bener, dina hiji lomba desa - kuring kaasup anggota tim paniten - kungsi nyodorkeun patanyaan ka Mang Ero, "Naon wangun usaha nu jadi andelan warga?" Jawabna teh, simpel pisan, "Seuseurna didamel di BRI".

Wah, wah, hebat pisan, pikir teh. Sanajan urang desa, geuning, loba nu digawe di bank nu geus teu diragukeun deui kredibilitasna. Hartina, kualitas SDM warga desa teh geus mapakan. Hate rada ciut, sabab urang kota oge henteu kitu. Komo deui kiwari, rek gawe teh hese kacida. Nya ari sakadar gawe mah, loba, di rorompok oge masih numpuk nu kudu dibebenah, tapi sual upah, jadi sual sejen.

"Teu kedah bingung, Pa," tembalna deui, surti. "Abdi sakaluwarga oge, pedah bade lomba, wangsul heula. Seuseueurna mah ngumbara. Arusaha, aya nu di Jakarta, Bandung, atanapi Yogya, nya, di BRI tea alias icalan Bubur (kacang hejo), Roko, jeung Indomie, hehehe."

Di Kuningan, aya hiji desa, ngaranna Desa Kertayasa, Kacamatan Sindangagung. Lambang desana, mun teu salah, mangkok bubur. Eta mangrupa ciri, yen usaha warga, lolobana tina bubur. Sanajan mangrupa sektor informal, mirip tukang jamu ti Wonogiri, tapi geus jadi sektor andelan. Nurutkeun data, di Yogya upamana, aya 400-an pangkalan burjo kalayan miboga pagawe antara 1500 tepi ka 2000. Tim survey ti UGM kungsi nyodorkeun conto, memeh kajadian lini di Kacamatan Depok, Sleman, aya kurang-leuwih 75 warung. Nu bogana 134 urang, sedengkeun nu milu gawe aya 160 urangna. Ti 134 pemilik pangkalan, maranehna boga 111 rubiah (pamajikan), 162 anak. Sedengkeun ti 160 pagawe, bisa nanggung 39 jiwa. Jadi mun dijumlah-jamleh mah, lumayan, tina eta 75 warung teh bisa "ngahirupan" 700-an jiwa.

Ditilik tina elmu ekonomi, pola bisnis burjo condong nepotisme. Networking-na kuat. Aki, bapa, atawa paman. Dipimilik jeung dikokolakeun, nya, ku kulawarga. Mun teu kitu, rekruitmen pagawe masih deukeut-deukeut kana baraya atawa tatangga. Rundayanna jelas. Sabab, pagawe nyekel kadali. Meuli bahan olahan, mayar retribusi, terus alokasi pengeluaran oge dicekel ku inyana. Nu boga modal atawa nu boga warung henteu salilana nungkulan. Apan pangkalanana ge lain ukur hiji. Pagawe boga hak prerogatif pikeun ngokolakeun usaha tur anggaran. Malah, sistem bagi hasil oge apan lolobana dumasar kana jumlahna jaga. Arus muterna duit lain saeutik.

Mun tempatna strategis, unggal poe bisa ngahasilkeun leuwih ti satengah juta. Malah, paling saeutik, rata-rata 200 tepi ka 300 rebuan. Bisa disawang, pihak pemodal, mun boga warung misalna sapuluh, sabulanna bisa meunang "gaji" sabaraha? Mun geus kapanggih koncina, naon bae oge matak pikabitaeun.

Tinimbang mikir nu teu puguh, atawa ngumbar lamunan ka alakpaul, komo dina sinetron loba nu hayang beunghar kalawan instan, nya mending usaha di sektor informal pan? Mun rek balaka, dunya "burjo" teh prospektif, Coy! (*)

---

Asep Budi Setiawan