Sasemplek Lalakon Pecinta Alam

"Tong poho jarum coklat sabos, nya!" cek Dasun, si pencinta alam tea, ka babaturanana. Roko teh keur bekel engke sore Dasun sabatur naek ka punclut Gunung Kembar. Heded cenah, di punclut nu tiis sabari ngaroko si coklat mah.

Isukna, rebun-rebun, Dasun sabatur-batur geus anjog ka punclut. Sanggeus ngareureuhkeun palay sabari nenjo ngangsrodna panonpoe mancat bumi jeung nyaksian saeutik-saeutik halimun nyinglar, kasedek cangra jeung heab si raja poe, Dasun sabatur-batur ngajajar, ngabaredega, ngawawaas ka handap, ka lemah nu upluk-aplak, satungtung deuleu.

"Tuh geuning beh ditu komplek pabrik teh, katembong keneh ngelun pulek haseup hideung tina carobongna. Pageto urang jadikeun rarancang nu eta teh. Pabrik urang jorag! Urang demo! Tuman. Keur mah nyieun haseup sakitu mulekna, pan papanggihan urang salila ieu, maranehna ge miceun limbah teu diolah heula, langsung dikocorkeun ka wahangan!" cek Dasun panjang lebar. Sumangetna ngagedur. Ari leungeun kedena mah terus teu cicing. Antara curuk jeung jariji tengah nyelap satengah batang jarum coklat nu terus dihakan seuneu. Tina bahamna, haseup seserebungan. Di tungtung mancung sapatu gunungna, katingali dua kuntung siga nu neuteup Dasun. Bingung. (*)

---

Diropea tina Grup Fikmin Basa Sunda di Facebook